Urdu writer - Abdul Basit

[Shokh]

!!...Bundaan Miyaan...!!

Bundan miyaan humaray mazi kay sathee hoon na hoon.. magar bohat arsa saye ke tarhaan sath sath rehay.. Shairi kay dil dadaah hain.. aur Iqbal say khaas raghbaat rakhtay hai... IqBal say lagao ke wajaah un ke shairi qut'an nahi.. haan magar IqBal hai... IqBal in ke majbori howa karta tha magar ab wajaah e shohraat banta jaa raha hai... In kay IqBal say jitnee sinf e nazuk nalaan hain yeah uss pay utnay hee naazaan hain.. Sinf e Nazuk say utnay hee rujhaoo say baat kartay hain jitnay tanaoo say sinf e nazuk in say.. Hama waqat inkay asaab tanaoo ka shikaar rehtya hain..

Bachpan say hee do cheezain humaisha sath rakhtay thai...! aik machis aur dosri tail ke bottel.. Machis kissi bandar say cheeni hoi nahi hai.. Waisay yeah machis say jalanay kay bajaye sulganay ka kaam laitay hain.. aur aksar sulagtay howay paye jaatay hain.. In kay chahnay wallooon ke poori koshish yeahi hai kay machis say in ka peecha churaya jaa sakay.. magar umeed yeahi hai kay yeah chahnay walloon kay bass ke baat nahi haan magar chahnay wali hoo tu kuch kaha nahi jaa sakta..!!

Goo kay yeah kaheen say bhi taili nahi hain.. magar tail ke bottel in ke bachpan ke zarooriyaat mein say aik hai.. Yeah koi aisee achunbhay wali baat nahi hai.. Faqat itna hai kay in ke Maa jee ka khayaal hai kay sar mein jitna tail ziada hoo ga utnee dimaaghi machinery sahee challay gi.. goya in kay sar mein chooti chooti mooriyaan hain jo in kee dimaghee khadee ko tail fraham karti hain.. Pichlay dinoon UAE kay aik kafeel ke badoolat yeah tail mein khud kafeel hoo gaiye thai.. un dinoon tail ke bottel rakhna chooor diya tha, kiyon kay tail wallay sheikhoon nay in ko sath rakhna shuroo kar diya tha...!!

Pichlay donoon UAE say Lahore wapsi ka safar kiya, rastay mein kam hawa kay dabaoo ke wajaah say inkay dimaagh pay kaafi gehray asar paray.. shaid yadaasht bhi ussi wajaah say jaati rahi.. aab tu kaafi chahrooon ko bhee bhooltay jaa rahay hain.. jahaazoon say in dilchaspee bohat purani hai.. zamana e talib'ilmi mein imtahani parchon kay jahaaz bana kay uraya kartay thai.. phir thooray baray howay tu jo milta ussay kehtay mujhay jahaaz pay sair karwaoo.. aab khudh lahore kay gali kochoon mein jahaaz uratay nazar aatay hain.. Daikhnay wallay tu inko ab jahaaz hee kehtay hain.. !

Bundan Miyaan bachpan mein apni amma ke ankh ka tara howa kartay thai.. iss liyeah in ke Maa Jee nazar e bud say bachanay kay liyeah do kaam khaas ehtamaam say kiya karti theen.. aik tu in ke ankh ko surmay say iss kadar bhar diya karteen kay lagta jaisay chahray pay kanoon kay bajaye surmay ke kaan hoo.. jis mein say surma behta behta ankhoon tuk jaa pohancha hai. aur aisay mein agar kabhi Bundan Miyaan roo parain tu yeahi surma chahray pay aisay naqash o nigaar banata tha gumaan hoota tha.. jaisay koi Makhloot Brownish Black Zebra hoon Nazar e bud say bachanay kay wastay dosra kaam yeah kiya jaata kay Bundan Miyaan ko Aaina na daikhnay diya jaata.. !! (Aaina tu yeah ab bhi nahi daikhtay.. kehtay hain mujhay laaja aa jati hai.. yeah ab janay dijiyeah kay kahay pay aati hai) haan magar in ka surma itna nikal chuka hai kay ab surmay ke jagaah aik aynak nay lay lee hai..!! Aynak Ayanak walla JIN say inspired lagti hai.. Magar haal hee main Ayanak walla JIN nay bayaan diya hai kay agar woh in ko pehlay daikh laitay tu Aynak walla Bundan Miyaan bananay ko tarjeeh daitay..!!

Magar kuch kehnay wallay kehtay hain bundan miyaan baray hee shareef hain.. yahaan pay in ka Rishta Babra Shareef ya Nawaz Shareef ya aik aur Nasal e Iqtadaar say joorna maqsood nahi hai.. magar sawaal yeah hai kay kahaan say.. ? Iss sawal ka jawab phir kabhi kay liyeah utha rakhtay hain.. !!

~*~*~*~*~*~*~*~*~*~*~*~*~*~*~*~*~*~*~*~

[Shokh]

~**...Yon Tunha Nahee Kartay...**~

Mairay hissay mein aye tumharay dukh bhi ajeeb hain.. jo mein nay sambhaal rakhay hain.. sab gillay shikway jo tum say hain.. jo kabhi kiyeah nahi mein nay.. gar chahoon bhi tu kahaan kar paoon ga.. chaloo sab raqam karta hoon.. par bhala kab koun samajhta hai.. lafzoon ko parho gi tum.. lehja kab sun paoo gi.. tum ho haseen rungoon say bani titli.. aur mein tehra babool jaisa.. par yeah kaisi majboori... tumharay hissay aye hai.. yeah mana tumhain gul ke chahat hai.. gul bhi tumhain hee chahay hain.. magar yeah kanta babool jaisa.. jo har waqat saath rakhti hoo... kaya chutkara iss say nahi mumkin.. ya iss ke tum ko adat hai.. yeah adat kaisi adat hai.. tumhain mairi zaroorat hai.. aur uss pay uss say chahat hai.. kabhi socha hai tum nay yeah.. tumhain kis ki zaroorat hai.. tumhain jab gul ke chahat hai.. mujhay kiyon saath rakhti hoo.. kiyon barbaad karti hoo.. mairay jazboon mein shidat hai.. yeah shidat aisi shidat hai.. kissi din jo bharak uthay.. jala sab raakh kar dain gai.. yeah gulshan jahaan hoo tum.. isay barbaad kar dain gai.. mairay jazboon ke shidat ko kiyon awaz daiti hoo.. gur tum ko uss say mohabat hai.. uss kay sung ke chahat hai.. tumhain woh acha lagta hai.. mujhay is ke musrat hai.. magar itni guzrish hai.. gar tum ko us ka hona hai.. mukamal toor pay hoo jaoo.. yeah jo adhay man say har shab tum.. mairay pass aati hoo.. mujh say baat karti hoo.. uss adhay mein may kabhi bhi tum.. poori sama sakti nahi hoo tum.. mein kaisay tum ko bat'laoon... ajab adat hai mairi bhi.. badal is ko nahi sakta.. adhooray rishtoon kay sang mein.. kabhi bhi reh nahi sakta.. woh adha man tumhara jo.. khayaal uss kay mein rehta hai.. woh adha man mujhay la doo.. ya phir youn karoo ab kay tum.. raat dhlnay say pehlay tum.. jab mujh ko choor kay jaoo.. yeah adha man pay lay jana.. mein bin kay bhi jee loon ga.. mein tum bin mar na jaoon ga.. bas itni baat hai daikho.. gar mujh say milnay aoo tu.. ya kissi kay pass jaoo tu.. bas itna kaam hai karna.. jo rishta istawar hai karna.. uss mein khoot nahi rakhna.. rishtoon ke sadaqat ko kabhi pamaal nahi karna.. safar pay jab nikltay hain.. safar jab lamba hoota hai.. naoo badla nahi kartay... kabhi aisa nahi kartay.. souraj ke tamazat mein ... hum jis ke chaoon laytay hain.. raat kay andhairay mein.. ussay tanha nahi kartay.. gar karna par hee jaye tu.. Youn Tanha Nahi kartay......!!

[Shokh]

[Shokh]

~**... Kaka Qafiya ...**~

Lijiyeah Kaka Qafiya ka Qafiya hazir hai.. /wink4

[Shokh]

~**...Youn Tunha Nahi Kartay...**~

Mairay hissay mein aye tumharay dukh bhi ajeeb hain.. jo mein nay sambhaal rakhay hain.. sab gillay shikway jo tum say hain.. jo kabhi kiyeah nahi mein nay.. gar chahoon bhi tu kahaan kar paoon ga.. chaloo sab raqam karta hoon.. par bhala kab koun samajhta hai.. lafzoon ko parho gi tum.. lehja kab sun paoo gi.. tum ho haseen rungoon say bani titli.. aur mein tehra babool jaisa.. par yeah kaisi majboori... tumharay hissay aye hai.. yeah mana tumhain gul ke chahat hai.. gul bhi tumhain hee chahay hain.. magar yeah kanta babool jaisa.. jo har waqat saath rakhti hoo... kaya chutkara iss say nahi mumkin.. ya iss ke tum ko adat hai.. yeah adat kaisi adat hai.. tumhain mairi zaroorat hai.. aur uss pay uss say chahat hai.. kabhi socha hai tum nay yeah.. tumhain kis ki zaroorat hai.. tumhain jab gul ke chahat hai.. mujhay kiyon saath rakhti hoo.. kiyon barbaad karti hoo.. mairay jazboon mein shidat hai.. yeah shidat aisi shidat hai.. kissi din jo bharak uthay.. jala sab raakh kar dain gai.. yeah gulshan jahaan hoo tum.. isay barbaad kar dain gai.. mairay jazboon ke shidat ko kiyon awaz daiti hoo.. gur tum ko uss say mohabat hai.. uss kay sung ke chahat hai.. tumhain woh acha lagta hai.. mujhay is ke musrat hai.. magar itni guzrish hai.. gar tum ko us ka hona hai.. mukamal toor pay hoo jaoo.. yeah jo adhay man say har shab tum.. mairay pass aati hoo.. mujh say baat karti hoo.. uss adhay mein may kabhi bhi tum.. poori sama sakti nahi hoo tum.. mein kaisay tum ko bat'laoon... ajab adat hai mairi bhi.. badal is ko nahi sakta.. adhooray rishtoon kay sang mein.. kabhi bhi reh nahi sakta.. woh adha man tumhara jo.. khayaal uss kay mein rehta hai.. woh adha man mujhay la doo.. ya phir youn karoo ab kay tum.. raat dhlnay say pehlay tum.. jab mujh ko choor kay jaoo.. yeah adha man pay lay jana.. mein bin kay bhi jee loon ga.. mein tum bin mar na jaoon ga.. bas itni baat hai daikho.. gar mujh say milnay aoo tu.. ya kissi kay pass jaoo tu.. bas itna kaam hai karna.. jo rishta istawar hai karna.. uss mein khoot nahi rakhna.. rishtoon ke sadaqat ko kabhi pamaal nahi karna.. safar pay jab nikltay hain.. safar jab lamba hoota hai.. naoo badla nahi kartay... kabhi aisa nahi kartay.. souraj ke tamazat mein ... hum jis ke chaoon laytay hain.. raat kay andhairay mein.. ussay tanha nahi kartay.. gar karna par hee jaye tu.. Youn Tanha Nahi kartay..!!

..

@};- Ik dost say maz'rat kay saath @};-

[Shokh]

~** ...Kasaak... **~

Kiyon samandar kay paniyoon mein tum nay zehar hai ghoola ? Mairi subh ko kiyon mukhatasar hai rakha.. yeah shab kiyon tum nay taveel hai kar di ? Samar yeah kis amal ka daitay hoo mujhay tum ? pehloo mein dil hai jo rakha .. ussay kis say ho dratay ? yeah sab jo hoo kartay... tu kiyon ankhoon ko mairi khawb ho daitay ? mein mayoosiyoon kay ghar mein hoon rehta ... mujhay hasratoon ke bhawar mein chooroo.. saraboon ke rah pay rakhoo.. mairay jisam ko azaab hee bakhshoo.. keh in khawboon ka khumaar tu utray.. !!

Mujhay zindagi say barh kay khawahish e mout nay hai ghaira .. mairi kam'maigi mairay hee badan ko nooch rahi hai.. mein thak gaya hoon... aab gir'nay laga hoon... thamay kashkool umeed ka apni.. tairi bay'rukhi kay raylay mein.. mein behnay hoon.. kiyon jeenay nahi daitay.. kiyon qatal nahi kartay.. kiyon daman mein mairay paro'aye hain sholay.. kyon mairay diyeah ke loo bujh kay nahi daitee.. yeah jaltee bhi tu nahi hai.. bujha kiyon nahi daitay... !!

Baychainiyaan hain kaisi.. yeah sakoot kaisa hai.. koi boolta nahi hai.. yeah shoor kaisa hai.. woh chaand ko daikhoo.. badliyoon mein khonay laga hai.. par aftaab yeah kis baat pay roonay laga hai.. yeah rooh ko mairi koun kat'ta hai daikhoo.. neendoon ko mairi kisnay.. deemak hai lagaya.. samandar kiyon aaj sab ko.. sehra say lagay hai.. !!

kiyon zindagi ko mairi neend nahi aati.. Iss raat kay safar mein.. kahaan pay hai sawaira.. khawahish e mout nay mujay phir say hai ghaira.. jeenay nahi daitay.. tu qatal kiyon nahi kartay... !!

[Shokh]

~**... Dukh ...**~

Dukh...!! na hoon tu khushi apni kadar o keemat khoo daiti hai.. har cheez ko apni pehchaan kay wastay kissi aas'ray ke kissi saharay kee.. kissi dosray wastay kee zaroorat hooti hai.. khushi ke, taskeen ke.. rahat ke manziloon ko jatay rastoon pay kam hee makhmal ka bichoona milta hai.. khall'yaan bahaar dainay say pehlay banjar zameen hoota hai.. jab tuk uss mein hull na chalaoo.. beej na beejoo.. faslain nahi ugteen.. phal nahi paktay.. magar jo faqat man salwa ke talash mein hoon.. nashukri ka mur'takab hotay hain.. jab tuk jisam kay lahoo ko paseena na kiya.. jab tuk uss banjar zameen ko naram na kiya jaye.. uss ke abyaari na kee jaye.. uss mein beej na booya jaye.. fasal ke umeed kaisi rakhni.. aur kahay koo.. aur agar yeah sab bhi kiya aur kabhi barishain na hoeen.. kabhi hoeen tu had say guzar gaieen.. kabhi hawain moon zoor hoo gain.. paki faslain matee mein matee hoo ga'een tu bhi nashukri kaisi.. Yeah tu rehmat hai uss RUB ke jo iss 4 din ke hayaati mein dard (jisay hum dard kehtay hain) dai kay uss humaisha ke hayaati ko sahal kar raha hai.. !!

Bani adam kay ikhtiyaar mein kab kuch hai.. woh tu upar walla hai jo chahay karay... azmata hai.. kabhi bin mangay dai kay.. aur kabhi payaas barha kay.. aur kabhi sab diya wapis lay kay.. aur yeah sab woh apnay bandoon kay sath apnay bandoon kay zariyeah hee karwata hai.. kabhi kissi ko kissi ka waseela bana daita hai tu kabhi kissi ko kissi ka.. kabhi dianay wallay haath ko lainay wallay mein badal daita hai... tu kabhi hathoon ko mati sona karnay ke taseer ata karta hai.. aisay mein kiss baat ka ghumand karain.. kiss baat ka shikwa karain.. guzar rahi hai guzar jani hai.. do nuqtoon kay darmayaan kay safar mein hain.. palak jhapkain gai tu uss paar hoon gai.. kis moun say jain gai.. uss kay darbaar mein kaya in dukhoon ke dastaan sunain gai.. yeah tu kuch bhi nahi hai.. kuch bhi tu nahi hai.. tavaqoo karni hai tu uss say karoo.. mangna hai tu uss say mangoo.. yeah banday.. mairay.. tumharay jaisay.. yeah tu khud mohtaaj hain mairee tarhaan tumharee tarhaan.. hum dono ke tarhaan.. yeah kab kissi ko kuch dai saktay hain.. yeah kab kissi say kuch lay saktay hain.. kiyon in say koi gilla rakhain... phir kis liyeah uss bat ka dukh karna jo mein nay sochi kay hoo aisay magar naa hoi..

Humdam humdard, dost uar sathi hain behlaway saray..
Koi kissi ka gham kaya bantay sab ko apnay payaaray..

Sab ko apnay payaray.. haan sab ko apnay payaaray.. sach hai.. karwa hai.. halaq say nahi utarta.. aisay mein hum kashkool uthay.. mulama charhi mohabatoon ke.. bay'naam chahatoon ke bheek mangnay nikal partay hain.. na murad hootay hain tu roonay lagtay hain.. ilzaam dharnay lagtay hain.. kabhi divaaroon say sar phortay hain tu kabhi dast o garibaan hotay hain.. sahi kartay hain kaya.. ?

Humari auqaat he kaya hai.. kis cheez ke akar mein hain hum.. kaya kar lain gai hum.. kuch bhi tu nahi.. phir yeah sab kahay ko.. yeah dukh dukh nahi hain.. yeah khushiyaan khushiyaan nahi hain.. sab tamasha hai chand ghari ka abhi howa khatam kay tabhi.. woh hai jis nay dooriyaan thaam rakhi hain humari.... sacha dukh uss ke yaad mein apnay gunahoon kay pachtaway ka hai.. sacha zakham.. uss ke mohabaat mein bahay lahoo ka hai.. tu phir yeah kiyoon hum apnay badan ke kharashoon ko lay kay bazaar mein daam lagatay phirtay hain... kaya paa lain gai hum.. kaya mill jai ga.. kuch bhi tu nahi.. ik saraab mein hai hum...!! saraboon mein khoonay wallay kabhi kab ghar ko louta kartay hain.. kab manziloon ko paya kartay hain.. !! Sachi khushi ke bat karoo.. jo noor ban kay chahroon ko apnay ghairay mein lay laitee hain.. uss khushi ke baat karoo jo uss RAB kay hijar ka hai.. jo humaray andar hai.. jis say juda howay tu humarya andar yeah khalla aan basa hai.. jissay bharnay ko hum kabhi ik ka sochtay hain tu kabhi doojay ka.. Uss Rab say.. haan uss jis say milain gai tu mukamal hoon gai.. !!

[Shokh]

~**... Muntazir ... **~

[Shokh]

~**...Saaya...**~

Mein nay kabhi khud ko nahi daikha..!!

Magar jaisay jaisay khud say door hoota jaa raha hoon khud ko pannay ke khawahish zoor pakartee jaa rahi hai..!!

Mein woh nahi hoon jo mein barsoon khud ko samajhta raha.. !!

Mein woh bhi nahi hoon jo tum mujh ko aaj samajhtay hoo.. !!

Mein ik aisi duniya ka bashinda hoon jo asmanoon kay uss paar kaheen gum hai..!!

Mein nay kaal apnay qud jitna ik aaina khareeda.. !!

Mein nay uss mein ik ajnabi ko apnay samnay kharay daikha..!!

Kkhud o khaal ho bahoo mairay thai magar woh kaheen say bhi mein na tha..!!




Mein nay poocha: koun hai tu..
Woh bola: Tu..

Mein nay poocha: koun hoon mein..
Woh bola: maira wajood..

Mein nay kaha: Juda hai kiyoon..
Woh bola: Majboor hoon mein....

Mein nay kaha: Aan milo mujh say..
Woh bola: kuch waqat lagay ga..

Mein nay poocha: manzil hai kahaan..
Woh bola: Tu peechay choor aya..

Mein nay poocha: Aanjaaam hai kaya..
Woh bola: Jo chahoo gai tum...

Mein nay kaha: Soona chahta hoon...
Woh bola: Aan miloo mujh say...

[Shokh]

~**... Khawb Safar ...**~

Safar karnay ka shouq tu shaid nahi keh sakta haan adat mujh ko bachpan say pari.. choota sa tha tu mairay walid nookri kay sialsay mein lahore aa gai... hum apnay daada daadi kay saath rahay Nowshehra mein.. phir jab un kay roozgar ka kuch bando'bast howa tu hum bhi lahore aaa gai.. magar kuch arsay kay baad un ko karachi jaana par gaya tu hum dobara apnay daada daadi kay paas rehnay chalay gai.. kuch saal aisay hee guzray.. phir hum aik baar phir say apnay waldain kay saath rehnay karachi chalai gai.. wahaan hum nay apni zindagi kay sunehray din guzaray.. har saal garmiyoon ke chutiyoon mein Karachi say Nowshehra tuk ka safar jo lag bhag do din pay moheet howa karta tha woh kartay chutiyaan guzarnay apnay daada daadi kay paas aa jatay.. 2 maah rehtay saray rishtay daar apnay baal bachoon kay sath waheen pay aa jaya kartay thai.. aur uss ghar mein mailay ka sa samaan hoota tha.. daadi rooz humaray liyeah achay achay khanay banaya karti theen aur phir hum sab bachoon ko dopahar mein apnay kamray mein bitha kar kahaniyaan sunateen.. phal khilaateen.. aur phir khud hee khaani sunatay sunatay soo jaya karten.. aur sab bachay chupkay say aik aik kar kay ghar kay dalaan mein aa jatay aur khoob udham machatay kabhi bagheechay mein jaa kay us ka bura haal kar daitay.. aur jab daada ko pata chalta tu phir hajamaat ho khoob howa karti thee.. khair woh din bhi guzar gai aur 1987 mein jab humaray walid ka intaqaal howa tu hum sab ghar wallay lahore mein aa gai.. aik saal pehlay hee daada daadi bhi sab baich kay lahore aa gai thai keh un kay baaki sab bachay bhi lahore mein thai.. lahore mukhtalif shahar tha karachi say.. karachi mein kabhi bhi karachi waloon nay hum ko karachi walla na samjha.. aur jab lahore aye tu lahore waloon nay bhi apna na samjha.. safar ka silsala suffer kay saath saath chalta raha.. iss door dhoop mein koi khaas dost na ban saka mas'awaye khud kay.. haan kuch saathi zaroor millay... 1989 mein computer college mein dakhla liya kay kuch acha rozgar hoo sakay.. waheen pay kuch dostoon nay program banaya kay muree jaatay hain.. rehaash ka bandoobast upper topa kay army mess mein howa.. tu woh mairi zindagi ka pehla safar tha.. jis mein mein nay chehroon say hat kay hussan ko daikha.. aur ussay apnay andar utarta howa mehsoos kiya.. !!

Woh safar kam tha nasha ziada.. aur phir tu youn howa kay har saal hee garmiyaan aati tu jisam pay chiyoontiyaan see reengnay lag jaateen.. dil chata buss kuch hoo aur paharoon ke bulaniyoon mein.. daryaoon kay kinray door tuk phaili wadiyoon mein.. jharnoon kay shoor mein.. baraf say dhakay darkhatoo ke jhuki shakhon mein panaah mill jaye.. saara saal june july kay maheenay ka intazaar hoota aur paisay ikathay kiya karta kay kab yeah din ayain aur paharoon ke aur safar kiya jaye.. aisay hee 10 saal ka arsa guzar gaya.. har saal khita e pak kay seenay pay garay parbatoon ke chootiyoon kay saayoon ko chootay.. mein jab bhi iss safar pay nikalata har baar hee kuch manchalay motorcyle pay in parhoon mein ghoomtay nazar aatay.. aur mein un ko tab tuk daikhta rehta jab tuk woh nazar mein rehtay.. !! aur phir shaam dhaltay he un sawaroon kay chehray badal jaatay aur maira chehra un ke jagaah lay layta.. yeah khawhish thi ya khawb tha.. kuch keh nahi sakta.. haan magar guzartay waqat kay saath saath junoon banta chala gaya.. aur iss khawahish nay zoor pakar liya kay zindagi mein aik baar zaroor inhee wadiyoon mein younheen azaadiyoon kay saath phirna hai.. !!

Phir youn howa 2000 ka saal aya aur hum nay aik motorcycle lay lee number us ka tha LXM3855 Honda CG125. humari tu lottry nikal aye.. uss khawb ke tabeer mill gai humain.. mein roz office say nikalta aur kabhi rai wend road pay aur kabhi multan road pay motorcyle doraata phirta... yeah khwab say tabeer ka safar tha.. mein roz jab motorcyle pay baith kay office jaata tu zahan mein yeahi hoota kay jaisay kohsaroon kay darmayaan say kaheen guzar raha hoon.. rooz ka hee mamool ban un tamaam saathiyoo ko jo mairay saath har saal parbatoon kay safar pay mairay humrah hootay un ko office say ghantoon lambi calls karta aur un ko iss safar pay jo mein motorcyle pay karna chahta tha iss baras uss kay liyeah ammada karta.. kuch sathiyoon nay tu jab yeah suna tu hathay say hee ukhar gai aur khoob salawaatain sunayain.. keh miyaan damaagh kharab hoo gaya hai... kaya zindagi payaari nahi.. magar jab akhoon mein khawboon ke tabeer utri hoo tu kahaan kuch sunayee daita hai..

Phir youn howa kay jo kuch saathi manay thai saaal kay shuroo mein jaisay jaisay garmiyoon kay din kareeb aye kuch kay ghar mein kuch kaam nikal aye.. aur kuch ke tabiyaat kharab hoo gaye.. faqat ik mein bacha aur aik maira cousin.. jis ko mein nay zor zabardasti say razi kiya tha kay woh mujh say umar mein kuch choota hai.. aur pichlay baras uss ko mein apnay saath nashay kay iss samandar ke ataah gehraiyoon mein Huza aur Qaylaash jaisi vadiyoon mein liyeah ghooma tha.. woh din bohat lambay thai.. September ke 19 tarkheer tay hoi thi iss safar kay liyeah.. aur September aa kay nahi dai raha tha.. khuda khuda kar kay Aya aur hir woh raat bhi aye jis kay souraj taloo hotay hee hum nay iss safar pay nikalna tha.. mein bohat khush uss din.. dafatar say aatay hee sab samaan aik bag mein band kay bag aisay tayaar kar liya jaisay abhi safar pay nikal parna hai.. Lahore mein mairi adat thi mein ghar ke chat pay sooya karta tha.. jaldi soonay kay subah souraj nikalnay say pehlay hee safar ka iraada tha.. raat kay koi aik bajay ka waqat hoo ga kay Bakar (maira cousin) aya aur kaha kay uss kay walid nay janay ke ijaazat nahi di.. aisay laga jaisay chun say sab toot gaya hoo.. uss kay saaharay hee tu jaa raha tha mein.. kay akaylay woh bhi motorcycle pay paharoon ka safar karna.. sara sar pagal pun tha.. woh tu yeah keh kay chala gaya.. aur mein dair tuk jaagta raha.. ajeeb kashmakash mein tha.. sab ko keh chuka tha iss saal mein motorcycle pay paharoon pay jaoon ga.. yeah safar maiiri pehchaan ka hissa thai.. aur na bhi hoon.. yeah woh safar thai jo mairay tamaam saal ke thakan utaar diya kartay thai.. bohat thakawat hoo gai.. janay kab aankh lag gai.. !!

Subah kay koi 9 bajay ka waqat hoo ga jab maa jee nay aa kay utha aur jo pehli baat kee woh yeahi tum nay tu jana tha.. gai nahi.. woh janti theen.. un ka baitta kitna thaka howa hai.. woh safar pay na gaya tu uss ke thakawat nahi utray gi... woh pehla din tha jab safar kay naam pay dil mein khoof utar aya tha.. woh lambi musafattain jo har saal dostoon kay sung palak jhapaktay guzar jaya karti thi.. zindagi say lambi lagi.. magar ussi pal koi devana cheekh kay boola.. Maa jee aap bhi kamaal karti hain.. itni dair say uthaya.. kab nikloon ga kab pohanchoon ga.. Maa jee hairat say mujh ko tuknay lageen.. aur kaha mein tu tumharay dostoon ka intazaar kar rahi theen jin kay saath tum nay jana hai.. uss waqat tuk mairay andar ka musafir jaag chuka tha aur woh mujh pay poori tarhaan haavi hoo chuka tha.. jhat say bahana taraasha kay nahi hum sab nay Sheikhupura mein mil kay nashta karna hai.. aur phir baghair moun dhoye kapray badlay bag pakra maa jee ke dhairoon duwain leen.. ghar say bahir aya motorcyle start kee aur nikal para.. gali ke nukar pay jaa kay peechay mur daikha maa jee darwaazay pay khari mujh ko daikh rahee theen.. aur un mein yaqeen tha phir say daikhnay ka.. ! Maa ke woh nazar woh duayain mairay liyeah kaafi theen.. @};-

Ghar say nikla tu khud ko bara akayala mehsoos kiya.. ghussa bhi bohat aya un sab pay jinhoon nay pehlay kaha kay hum saath challain gai par ayain waqat pay dagha dai gai.. dagha khaanay ke adat see hoo gai hai... par iss ka faida yeah howa woh uss ziddi shakhas nay zid pakar lee keh aab tu jana hai.. chahay kuch hoo jaye.. aur kaisay naa jata ghar say tu nikal hee aya tha.. pehlay ilaqay ke main market gaya wahan pay aik shop hai jahaan mein roz mango milk shake piya karta tha.. wahaan jaa kay milk shake kay 2 glass banvaye aur ghata ghat pee gaya.. waheen pay baithay baithay plan banaya keh abhi nikloon ga tu 5 ghantay mein via GT Road RawalPindi aur lag bhag 4 ghantay mein Abottabad pohanch jaoon ga..

Rawalpindi mein mairi aik khala rehti hain socha dopahar ka khaana waheen jaa kay khaoon ga.. buss yeah socha aur bike pay baitha halmet pehna aur Band Road ke taraf hoo liya.. Band road pay un dinoon naye sarak ban rahi thi.. aur treffic ke halat burri thi.. magar hum tu motorcycle pay thai aur kaafi shookha andaaz paya hai mein nay motocycle chalanay ka.. dost tu kehtay hain basit tum motorcycle nahi chalatay mout kay kounain mein race lagatay hoo.. mujhay achi tarhaan yaad hai uss waqat ajeeb ajeeb sochain aa raheen theen.. youn motorcycle pay paharoon mein motorcycle pay janay ke khushi bhi thi aur ik lambay tanha safar ka khoof bhi..

Inhee sochoon mein gum GT road pay aan pohancha.. wahaan say left turn liya aur sochoon mein aisa magan tha kay GT road pay janay kay bajaye Faislabad road pay bike daal di.. par jab road pay har 10 mins kay baad Faisalabad itnay kilometer reh gaya tu thoori pareshani hoi keh yeah Faislabad kab say move hoo keh GT road pay aa gaya.. kuch dair tu khud ko hee samjhata raha keh nahi Faisalabad GT raod pay hee hai.. magar jab Faisalabad kuch hee kilometer reh gaya aur Gujranawla na aya tu road ke side pay truck driveroon kay liyeah banay howay aik qehwa khanay pay bike kharee kee aab yeah poochtay howay sharam bhi aa rahi thee keh itnay lambay safar pay nikla hoon aur pehla moor hee shaid ghalat lay liya.. issi sharam sharam mein aik karak chaye ka order diya aur nunge charpaye pay layte gaya thakawat see honay lagi thi..

Bay'shtar iss kay keh neend aaati aur mein waheen soo jata chaye aa gai.. chaye jo larka lay kay aya uss say baray raazdarana andaaz mein poocha Rawalpindi ko yeahi sarak jaati hai kaya.. uss nay kaha Haan.. tu dil ko tasaali hoi.. par sath hee jab uss nay haath say udhar ko ishara kiya jidhar say mein aa raha tha keh iss taraf jaa kay agay GT road aye gi udhar say seedhay haath hoo jaiyeah ga tu chaye aik dum pheeki see lagi.. bari mushkil say woh garam garam chaye khatam kee aur bike pay dobara himat kar kay baitha .. kamar tab tuk takhta hoo chuki thi.. woh jitni practice kee thi woh sab jawab dai chuki thi.. magar jo thaan baithay thai.. uss ka kaya kijiyeah..

Wapis udhar ko bike moori jidhar say yahaan tuk pohanchay thai.. GT raod pay jaa kay dobara shak howa keh kaheen uss larkay nay jhoot tu nahi bool diya.. aik thailay wallay say doobara confirm kiya aur pata chala keh hum khair say dairh ghanta kissi aur hee dashat ke musafat kartay rahay hain.. khair jee bike ko GT road pay daal diya aur woh jis speed pay jaa sakti thi matlab koi 100+KM.. uss speed pay doorana shuroo kar diya.. aur baaz dafa tu speedo meter ke soee bhi mairi taraf bari iltajee nazroon say daikhti thi..

CD player sath lay kaya gaya howa tha.. kanoon mein headphones lagay howay thai aur CD pay Nusrat Fateh Ali ke Qawaliyaan chal raheen theen.. Tum Ik Goorakh Dhanda Hoo uss waqat lag bhi sab goorakh dhanda hee raha tha.. Qawali suntay suntay pata hee nahi chala Gujranawala aa gaya.. Jab Gujranwala aya tu aisay laga jaisay manzil bus younhee kuch lamhoon ke musafat pay reh gai hoo .. woh yaqeen jo uss waqat milla wohi tha jo phir saray rastay saath raha.. aur pata hee nahi chala kab Gojar Khaan aur phir Rawalpindi aa gaya..

Taqreeban 3 baj kay kuch mins pay mein Rawalpindi mein apni khala kay ghar tha aur uss waqat ehsaas howa keh jisam ka kaya haal howa hai.. jab bike say utra.. kuch lamhay tu laga hee nahi yeah maira apna badan hai.. tangain mein jaisay kissi nay ussi halat mein sariyaa daal diya tha jis halat mein mein bike pay baitha howa tha.. khair khala mujhay daikh daikh kay kam hairat zada hoieen aur mairi bike ko daikh kay ziada hoyeen.. un ko yaqeen hee nahi aa raha tha kay basit miyaa lahore say un keh ghar tuk younhi bike pay hee aya hai.. khair yaqeen dilana maqsood bhi nahi tha.. poocha kuch khanay mein hai.. bhindiyaan khanay ko mileen.. lady fingures.. apna he maza tha un ka.. saath mein unhon nay ussi waqat doodhi halwa bana liya mairay liyeah .. yahaan yeah batata chaloon kay jitna acha mairi khala doodhi halwa aur parathay banati hain mein nay aaj tuk apni zindagi mein kissi aur kay haath ka nahi khaya..

Khuda khuda kar kay khana aya tu khala mairay pass hee aa kay baith gaieen aur kehnay lageen kapray change kar loo aur aab araam karoo.. mein un ke baat sun kay hans para aur kaha nahi jee mein ab nikloon ga.. poocha keh kaha.. aur jab mein nay bataya keh ab abotabad jana hai aur aat udhar hee qayaam karoon ga.. tu yeah bari bari ankhain dikhain aur saath mein do aik shareefana kisam ke galiyaan deen aur kaha damaagh kharaab hai.. par uss waqat tu mujh ko sirf apna hee theek lag raha tha.. un ko samjhaya keh lahore say yahaan tuk pohanch gaya hoon agay bhi kuch nahi hoo ga.. aur jo agar kuch hoona hoota hai woh kaheen bhi hoo sakta hai ghar mei baithay baithay bhi.. baat un ke samajh mein aye ya nahi.. par yeah howa keh bike ghar say nikalnay aur agay kay safar pay janay ke ijazaat mill gai..

Waheen pay mairay aik cousin rehtay hain.. un say poocha keh bhai Abotabad janaay ka rasta tu bata do.. un keh liyeah shaid mairee yeah harkat koi ajeeba thee.. kehnay lagay mein sath chalta hoon abotabad mor tuk choor aata hoon tum ko.. mujhay aur kaya chahiyeah tha.. unhoon nay gaari nikaali aur mujh ko lead karnay lagay.. Peshawar road pay kuch ziada door nahi jana para aur adh aik ghantay mein abotabad more aa gaya.. waheen pay aik resturant hai naam bhala sa tha.. wahaan baith kay hum nay aik aik cup chaye ka piya aur phir hum nay un say ijazat chahee bike start kee aur abotabad ke taraf apna safar shuroo kiya..


Baki Aainda @};-