Urdu writer - Abdul Basit

[Shokh]

~**... Qeemat ...**~

Ik Khawb Ko Sajaanay Mein.. Qeemat Jitnee Lagti Hai.. Uss Ko Chukanay Mein.. Poonji Saari Lagti Hai .. !!!


Khawb Kanch Say Nazuk Hain... Zara See Bay'Ehtiyaati Say...Kirchi Kirchi Hoo Jatay Hain.. Kirchi Kirchi Hoona Hee... Khawboon Ka Muqadar Hai..!!!


Maira Dil Bhi Ziddi Tha.. Iss Nay Thaan Rakhi Thee.. Laho Bahay Ya Jaye Jaan.. Ik Khawb Ko Sajana Hai.. Payaar Ko Nibhaana Hai.. Sab Rishtoon Ko Apnana Hai.. Par Iss Nay Kab Yeah Jana Tha... Ik Rishtay Ko Apnanay Mein... Kitnay Rishtay Martay Hein.. Sab Sangee Hee Bichartay Hein... Phir Us Rishtay Ko Nibhanay Mein... Khoof Seenay Mein Paltay Hein..!!!


Rishtoon Ke Kahaani Bhee.. Sadiyoon Hee Puraani Hai.. Khoon Ka Ho Ya Lafzoon Ka.. Zehar Tu Sab Ka Ik Sa Hai.. Wafa Ke Jo Kahani Hai.. Rishtoon Nay Kab Nibhaani Hai.. Dhoop Chaoon Kay Khail Mein.. Sab Ko Chaoon Hee Payaari Hai..!!


Rishtoon Ke Kahaani mein.. Saath Ko Nibhaanay Kay.. Jitnay Waaday Hootay Hain.... Qoos e Qazah Kay Rung Jaisay.. Dil Ko Yeah Lubhaatay Hain.. Apnee Aur Bulaatay Hain.. Par Un Kay Sahaaray Jab... Hum Door Safar Nikaltay Hain.. Tab Khabar Yeah Hooti Hai.. Wadoon Kay Iss A'asa Ko... Mas'Layhat Ke Deemak Nay.. Kab Ka Chat Khaya Hai.. Khook'la Kar Rakha Hai.. In Kay Sahaary Hum.. Kab Safar Kar Patay Hain.. Manziloon Ke Khawahish Mein.. Rahoon Mein Mar Jatay Hain...!!!


Khawb Magar Kab Martay Hain.. Uss Ghar Ko Bananay Kay.. Jiss Ghar Ko Bananay Mein.. Tamaam Umar Lug'tee Hai.. Jiss Ghar Ko Giranay Ko.. Aik Jhoonka Kaafi Hai..!!


Hum Nay Bhi Banaya Tha.. Sapnoon Say Sajaya Tha.. Kaya Kahain Aab Kaisa Tha.. Mohabbat Ka Gehwara Tha.. Khushiyoon Ka Ista'ra Tha.. Woh Ghar Jo Tumhara Tha.. Woh Ghar Jo Humara Tha.. Uss Ghar Ko Lagayee Aag.. Ghar Kay Charaghoon Nay..!!!


Raakh Pay Uss Ke Baitha Aaj.. Soochta Hoon Kiyon Banaya.. Iss Qadar Mohabbat Say.. Kaya Ik Khawb Ko Sajanay Ko ? Ya Ik Rishtay Ko Nibhaanay Ko ?

Iss Ghar Ke Baqa Ke Kaya ?
Ik Chingaari Qeemat Thee ?

@};- @};- @};- @};- @};- @};- @};- @};- @};- @};-

[Shokh]

~**... Kasak ...**~

Aaj aik siskee... sunee... tu likhay bina raha na gaya....



Kasak kissi tashna khawahish ke loo us uthtay dhowan ko kehtay hain.. jo ankhoon mein chubhta hai tu sab manzar dhundla say jaatay hain... humain koi takta hai tu mein cheekh uthtay hain.. mein rooya tu nahi hoon.. yeah tu younhee kuch aankh mein par gaya tha.. mujhay kuch howa tu nahi hai.. yeah lahoo jo ris raha hai.. yeah kissi nasoor ka tu nahi.. yeah tu younhi chaltay chaltay gir para tha.. ik thookar hee tu lagi thi.. mein chal raha hoon.. mujhay kuch howa tu nahi hai.. maira daman jo taar taar hai tu kaya howa... mairay daman mein pichlay mousmoon mein khillay gulaboon ke mehak aab bhi baaki hai.. woh gulaab jo mein joray mein sajanay ke khawb daikhtay daikhtay janay kab khud khawb hoo gaya.. nahi mujhay khwab tu na kahoo.. mein jee raha hoon.. mein daikhta hoon yeah manzar badal rahay hain.. mein in mein khoo raha hoon... kayah howa mein gum tu nahi hoon.. mujhay daikh loo tum.. saraab tu nahi hoon mein.. haan yeah jo shanay jhukay jhukay say hain.. yeah jo khusk hontoon ke kapkapahat hai.. yeah laraztay saayoon ka khoof jo ankhoon mein ruka howa hai.. yeah bus ik pal ka mehmaan hai.. guzar jaye ga.. mein samabhal jaoon ga.. fikar na karoo tum.. kaya howa ik khawahish tashna hee rahi hai.. woh nahi milla hai tu kaya howa ... woh kuch aisa haseen bhi tu na tha.. woh koi khuda bhi tu na tha.. haan kaya howa .. jo mein nay khuda bana rakha tha.. aab magar woh mairee nazroon ke bohat nichlee manziloon pay hai.. mein uss ko haqarat say daikhtee hoon.. magar yeah maira sir kiyon jhuka jaata hai.. nahi nahi mujhay kuch kalmaat kehnay hain.. kuch lafzoon kay nashtar chalanay hain.. kuch aur hee aaj taivaar dikhanay hain.. mujhay roona tu nahi hai.. mujhay uss pay hansna hai.. woh jo khuda tha maira.. jo khuda bana baitha hai.. woh khawb jo maira na hoo saka .. kissi ka hoo bhala kiyon kar.. mein nooch daloon kaya.. mairay haath mein do tiasha mein toor daloon kaya.. sahaara doo mujhay... maira haal tu daikhoo.. rukoo mein uss aur kuch likh daitee hoon.. mein likhtee hoon.. tum iss shehar kay sab say boonay shakhas hoo.. tum say haqeer mein nay pehlay nahi daikha.. tum ik haaray howay khilaari hoo.. tum kissi bachay ke tarhaan anaari hoo.. tum kaisay madaari hoo.. tamasha dikhaatay thai tum khud kaisay ban baithay hoo.. bohat jawab likhtay thai.. aaj kaisay sawaali hoo.. mein uss ko likhti hoon... yeah bay'rabat see battain.. yeah kissay kahaniyaan sab hee.. yeah jo likhtay rehtay hoo.. kiss kay liyeah hain yeah sab.. woh hans rahay hain tum pay.. nahi mujh pay tu nahi.. haaan tum pay hans rahay hain woh.. khamoosh hoon mein daikhoo tu.. mairee khamooshi badla lay gi tum sab ab... mein chup rahoon gi ... haan ch'up kay waar karoon gi.. yeah jo aag seenay mein lagi hai.. iss kay sard hoonay tuk.. mein har shab naya ik waar seekhoon gi.. jaab tuk sard nahi hooti yeah.. tab tuk yeahi ik khail khailoon gi... !!


Kasak ke aag aisee hee hooti hai.. jalati hai kabhi tu kabhi raakh kar daiti hai.. kasak.. yeah jeet say pehlay maat ka dukh hai.. kasam ke zad pay aye loug baray mazloom hotay hain... woh apnay dukh ke taskeen ke khatir soo heelay talaash kartay hain.. khud kay hotay nahi auroon kay bujhaatay hain chiraagh jee hum nay daikha hai kasak ke aag wohi aag hai jo hasad ke chingaari say janam laytee hai.. jalnay walla samajhta hai uss nay sab jalla diya hai.. khabar par tab hooti hai jab khud api raakh kuraidnay say bhi nahi milti.. !!!

Kasak say jaltay badan pay lafzoon kay marham rakhnay say.... zakham khatam tu nahi hootay.. haan magar sulagtay seenoon say uthta dhuwaaan kuch dair ko tham zaroor jaata hai.. par agar ehtiyaat na kee jaye tu kissi bhanbar ke tarhaan yeah dhara dhar aisa jalta hai pal mein khatam kar dainay ke khawahish mein pal mein raakh hoo jata hai.. ehtiyaat bohat zaroori hai.. !!

Kasak.....

[Shokh]

~**... Koun Hai Yeah ...**~


Akhir e Kaar Aaj Woh Bhee Tugh'yaani Pay Aye Pach'tawoon Kay Darya Mein Bin Patwaar Kam'maigee Ke Nao Liyeah Cheekh Pari Hai..

-|...Koyee Hai... Sunooo Koyee Hai...|-

Woh Uss Ko Chaand Kehti Thi.. Woh Chaand Kay Junoon Mein Bohat Door Nikal Ayee Hai.. Koyee Nahi... Yahaan Koyee Nahi Hai.. Koyee Bhi Tu Nahee Hai.. Koun Sunay Ga Uss Ke Pukaar Ko... !!


Bayain Hoo Raha hai.. Ya Hawaoon Ka Shoor Hai.. Kawaar Baaj Raha Hai.. Wahma Hai Shaid.. Divaroon Pay Ubhartay Aks Hain Kuch... Naqash Koi Nahi Hai.. Phir Bhi Lag Raha Hai.. Woh Chand Chehra Bulaata Hai Ussay.. Chiraagh Bujh Gaiye Hain.. Aks Saray Mit Gaiye Hain.. !!


Aisee Andhairee Raat Ke Ussay Adaat Nahi Hai.. Woh Chand Aab Nikalta Nahi Hai... Ussay Aab Payaar Say Koyee Takta Nahi Hai.. Woh Kaya Karay Kis Say Kahay.. Baat Koi Sunta Nahi Hai.. Sun Bhi Lay.. Samajhta Nahi Hai.. Woh Geet Likh Rahi Thi.. Woh Yeh Samajh Rahi Hai.. Woh Geet Likh Rahi Hai.. Woh Harf e Mohabbat Ke Shaidayee.. Laash e Mohabbat Pay Bayain Kar Rahi hai.. !!


Shaid Kay Daikh Lay Woh... Shaid Kay Lout Aye Phir Say... Aah Magar.. !!Woh Shakhas Jaa Chukka.. Woh Aab Likha Iss Ka Kuch Parhta Nahi Hai.. Woh Iss Kay Angan Say Uthta Dhuwaan Takta Nahi Hai.. Woh Skhash Jab Say Iss Ke Dastaras Say Nikal Gaya Hai.. Junoon Nay Iss Kay Ussay... Khuda Kar Diya Hai.. Haan Khud Tarsi Ke Adat Jo Ho Gai Hai.. Haan Jeenay Ko Yeahi Ik Rah Jo Bach Gaiee Hai.. Haan Woh Bhi Iss Rah Pay Chal Pari Hai.. !!


Kiyon Poochtay Hoo... ? Yeah Koun Bikhairay Baal.. Chehray Pay Mallay Khaak.. Ghar Say Nikal Para Hai.. Yeah Koun Hai.. Jo Gali Gali Bain Kar Raha Hai.. Yeah Koun Hai Jo Kahaniyaan Aisee Suna Raha Hai..

Sunoo... Mein Nay Mohabbat Ke Zameen Pay Kuch Khawboon kay Beej Boye Thai.. Fasal Paki Tu Fizain Khushiyoon Ke Mehak Say Behak Behak Jaati Theen.. Mein Shab o Roz Riyaazat Say Kuch Thak See Gaiee Thee.. Bus Ik Pal Ko Aankh Lag Gai.. Bus Ik Pal Ko.. Jo Daikha Tu Kuch Bhi Nahi Hai.. Jahaan Jaati Hoon Jahan Qadam Rakhti Hoon... Gham Kay Khaar Chubhtay Hain.. Jaanay Koun Mairee Mohabbat Ke Zameen Pay Ugee Fasal Chura Lay Gaya Hai.. Kissay Dosh Dharoon mein... Kiyon Na Bayain Karoon mein.. !!

Kiyon Poochtay Hoo.. Yeah Koun Hai... ? Yeah Kahaani Hai Kis Ke Kahaani.. Yeah Kirdaar Koun Hai.. Tum Jaantay Ho.. Tum Hee Tu Hoo.. Kaya Kaha.. Mein Hoon Yeah.. Nahi Nahi... Mein Tu Nahi.... !!!





.

[Shokh]

~**... Jawaari ...**~

Sahib khud ko bohat bara jawari aur uss say bhi barh kay haara howa jawari samajhtay hain.. in ka kehna hai zindagi aik juwa hai... har cheez hee juwa hai.. kaya paisa.. kaya zindagi.. kaya payar.. kaya dosti.. aur phir kissay baray jawari ke tarhaan seena taan kay kehtay hain hum woh hain jo sab haar chukkay.. !

Aik nazar say daikha jaye tu har woh shakhas jawaari hai jo khawboon ke duniya mein jee raha hai.. yeah khawboon ke duniya kaya hai.. pal ke khabar nahi samaan so baras ka.. aur yeah so baras ka samaan kuch aur nahi hein tawaqo'waat hain.. un say jin ko chaha.. kisi ko chaha tu tawaqoo ke aik ka das millay... kissi say rishta hai tu soch rakha hai yeah tu jaisa soch rakha hai waisa hee rahay ga.. par aisa kab howa hai.. ?

Insaan ke yeah bay baha tawaqoowat jo khawahishaat ka he badla howa aik roop hai.. yeah na tu kabhi khatam hooti hain aur na hee sab poori hoo sakti hain... aab faraq parta hai wahaan pay jahaan hum in kay poora honay pay ya poora na honay pay mukhtalif rud'e amal zahir kartay hain.. kuch woh hain jo sab paa laytay hain par kuch ik jab nahi milta tu sab bhool jatay hain... aur samajhtay hain sab haar baithay hain.. aur kuch woh bhi hain jo sab haartay challay jaatay hain par kabhi jo kuch mill jata hai tu samajhtay hain kull khudaie mill gaie hai.. ik woh jo sab paa kay bhi na'khush aur doja woh jo sab khoo chuka hai phir bhi shaad baitha hai.. !

Zindagi humain ping pong kay khail ke tarhaan miltee hai.. hum kuch khoo daytay hain tu kuch paa bhi laytay hain.. aur jab jab kuch paa'tay hain kuch na kuch khoo bhi rahay hotay hain.. phir yeh sood o zayaan ka khayaal kaisa.. yeah runj o gham kay barhtay saaye kiyon kar.. kiyon hum sirf saab haar janay ke baat kartay hain aur jo jeet liya hai ussay faramoosh kar daitay hain.. yeah sab ravaiyeah kiyon kar janam laytay hain.. woh koun say awamil hain jo in kay asal moharikaat hootay hain... ?

Kuch lougon ko shoor machanay ka shouq hoota hai.. woh aisa iss liyeah kartay hain kay tawajoo hasil kar sakain.. matlab woh sab sirf aur sirf tawajoo kay hasool kay liyeah kartay hain.. yeah shaid woh loug hain jo bachpan kay door mein bay'tawajahee ka shikaar rahay.. aur phi iss kay hasool kay liyeah mukhtalif tareqay ikhtiyaar kartay chalay gai.. aur sab say asaaan aur azmooda shoor macha kay tawajoo ko apni taraf mabzol karwana hai..

baat mairay iss chotay say bhai ke hoo rahi thi.. jo jawari hai tu nahi.. par jissay khud ko jawari sabit karnay ka shouq hai.. aisay loug woh hotay hain.. jin ko kissi bohat hee payaaray nay.. kissi bohat hee chahnay wallay nay kabhi burra samajh liya ya keh diya hota hai.. aur phir yeah uss aik baat ke girah bandh kay baith jaatay hain.. na girah khulti hai na yeah agay barh saktay hain.. bus uss girah pay girahain bandhtay challay jatay hain.. woh bananay ke koshish mein lag jaatay hain jo hotay nahi.. aur anjaam kaar woh bhi nahi rehtay jo yeah asal mein hotay hain.. !!

jawari do rawaiyoon kay darmayaan rehta hai aik haar ka khoof aur dosri jeet ke khushi.. jawari jab bhi koi baazi lagata hai tu uss ko jeet ka poora yaqeen hota hai.. magar jaisay hee woh baazi jeet jaata hai.. woh uss ko jeet nahi samajhta.. aur agli baazi laganay baith jaata hai.. aur baree jeet kay liyeah.. aur youn woh saari zindagi jeet kay bhi nahi jeet sakta.. yeah hee jawari ke sab say bari bad'kismati hooti hai.. kay woh saari zindagi jeet kay bhi haarta hai.. kiyon kay sirf aik haar uss say uss ka sara kuch lay laytee hai.. aur woh aik haar uss ke tamaam jeetoon ko khatam kar daitee hai.. !!

hum sab hee jawari hain.. hum zindagi mein bohat hee khushiyaan paatay hain.. magar kaya kabhi bhi kissi bhi khushi ko hum nay hatmi khushi samjha.. hatmi sukh samjha.. nahi kabhi nahi.. aik sukh milta hai tu hum uss say aglay sukh ke aur chal partay hain.. ruktay nahi hain.. janay kiyon nahi ruktay.. kaash kay hum thehar jaana seekh sakaiin.. aik baar ruk kay daikh sakkain.. manzaroon ko lahoo mein utaar sakain.. un ko mehsoos kar sakkain.. magar hum ko agay barhna hoota hai... aur iss agay barhnay ke dhun mein hum jo jo khushiyaan jo jo jeetain hum ko miltee hain sab ko pamaal kartay agay barhtay challay jaatay hain.. aur jab iss agay barhnay ke dhun mein thookar lagti hai.. hum girtay hain.. tu hum tab samajhtay hain hum nay sab haar diya hai... hum sab hee jawari hain.. hum sab haar jeet ka khail khailtay hain.. haar ko seenay saja laytay hain.. aur jeet ko jeet nahi samajhtay.. gham ka matam kartay hain.. aur khushiyoon ko mazeed khushiyoon ke lalach mein kam kartay rehtay hain.. hum sab haray howay jawari hee hain.. !!!




.

[Shokh]

~**... Pehchaan ...**~


Youn tu kayee loug zindagi mein aatay hain challay jaatay hain.. hum bhi kayee logoon ke zindagi mein aatay hain aur rung choor kay agay guzar jaatay hain.. kuch aisay hee andaikhay daikhay chehroon kay baray mein kuch likhna chahoon ga mein... pehlay bhi kaafi baar koshish kee.. kuch kay baray mein likha bhi.. magar baat adhoori rahi.. aksar tashnagi rahee.. kuch kami rahi.. koshish karoon ga iss baar woh tamaam jo seenay mein utaara jo saha par kuch na kaha.. woh jo kehna chaha par keh na saka.. woh sab likh sakoon.. mein shaid naam kissi ka bhi na likhoon.. ya shaid kuch ka likh bhi doon.. aik khawahish hai.. so ussi ke takmeel ke teraf janay ka socha hai.. daikhiyeah kahaan tuk qalam aur himaat saath daitay hain.. !!

Un sathiyoon say paishgee ma'zrat jin ko mairay likha acha na lagay ya maira kuch likha na'gawar guzray.. par yeah woh aks hain jo mein apnay jisam pay mehsoos karta hoon.. aur in ko mein harfoon mein dhalna chahta hoon.. mein janta hoon har koi apni hee nazar say duniya aur uss mein basnay waloon ko daikhta hai.. aur jis nazar say daikhta hai sirf wohi sach hoota hai .. baki sab jhoot aur sirf jhoot.. magar iss jhoot sach kay khail mein bohat kuch apas mein ghul mill jaata hai.. iss ke pehchaan ka dawa karna ghalat hai.. aur mein yeah dawa nahi kar sakta.. haan yeah zaroor keh sakta hoon.. iss say pehlay kay waqat kay dharay mein woh sab aks woh sab chehray dhundla jayain un ko mein raqam kar layna chahta hoon.. apnee yadoon ko rung dai daina chahta hoon.. yeah woh yaddain hain jo kabhi baad e saba see band khirkee ke kissi darz say kamray mein aa basti hai.. tu kabhi khullay asmaan tallay habas ka saman kar daitee hain.. !!

Iss umeed aur yaqeen kay saath (jo dainay wallay nay dai rakha hai) kay jald aap sab ko woh manzar dikha sakoon ga jin say mein guzar aya hoon.. haan magar un ke thakan say jisam abhi tuk dukh raha hai... youn lagta hai toot hee jaye ga.. magar abhi nahi.. abhi tu shaid aur bohat kuch hoona baki hai.. waisay bhi kuch hisaab barabar nahi howa kartay.. un kay liyeah aik lamba intazaar bhi karna parta hai..

Muntazir Rahiyeah Ga
Wa.Salam
Abdul Basit

[Shokh]

~**... Zindagi ...**~



Zindagi kay do rukh hain.. aik woh jis ka taluq aap ka aur aap kay RUB ka hai.. jis ke tableegh har koi karta hai.. kar sakta hai.. karna apna FARAZ e AWALEEN samajhta hai.. magar faraz wohi rahay uss ke adaigee kay tareeqay badal jaatay hain.. jaisay jaisay mahool badalta hai.. waqat guzarta hai aqdaar badaltay hain hum ko bhi badalna parta hai.. agar hum naye aqdaar kay saath kadam na barhayain tu bohat peechay reh jaatay hain.. aasaas ko choornay ke baat koi nahi karta.. magar naye door kay sath chalna aur Aa'lmi mo'ashray mein apna muqaam banana bhi bohat zaroori hai.. agar hum woh battain jo humaray abaoo ajdaad guzishata sadiyoon say kartay aye hain waisay k waisay hee kartay rahain gai tu kaya faraq paray ga ? aik say suni dusray say guzri.. kaya aap ko nahi lagta hum keh yeh zarori hai hum jis mahool mein jeetay hain uss ko apnayain aur uss ko mold karain.. na keh asaas ka us pay itlaaq karain uss ko asaas ke taraf layain.. aik jagah parha aaj ka door aik behta dhara hai iss ko bura bhala keh kay ya iss kay agay bandh baandh kay iss ko roka nahi jaa sakta.. HAAN iss dharay kay rukh ko moora jaa sakta hai.. zaroorat issi amar ke hai.. kay iss dharay ko badla jaye.. iss ko mora jaye aur iss ko naya rukh diya jaye.. aisay kay iss mein behnay waloon ka sans na rukay... woh issi dharay mein behtay howay iss taraf aa niklain.. la'shaoori toor pay.. aur yeah hum sani ul zikar batoon say shaid kabhi na kar sakkain..!


Zindagi agar tunha insan aur uss kay RUB aur rasool ka mamla hota tu hum ko iss kura e arz pay bhaijnay ke chand'aan koi zaroorat nahi thi.. hum ko yahaan bhaija gaya aur hum ko nafas say nawaza gaya... hum ko samajh bojh di gai.. hum ko buray bhalay ke tameez di gai.. aur phir faisla bhi humray haath mein dai diya gaya.. woh faisla jo woh RUB khud karta hai uss nay hum ko apna naib banaya ... kam bari baat nahi hai.. USS RUB NAY HUM KO APNA NAIB bana kay bhaija.. iss duniya mein.. kiss liyeah uss ko apni ibadat karnay kay liyeah humari zarorat nahi hai.. uss ko humain daranay kay liyeah Kitaab utarnay ke bhi zaroorat nahi thi.. woh tu tamaam zaroortoon say mubara hai.. uss nay yeah Kitaab utari hum ko rah dikhanay kay liyeah.. uss nay hum ko deen diya ta kay hum cheezoon ko samajh sakkain uss kay wastay say.. uss nay hum ko isharay diyeah.. khud tuk anay kay liyeah.. magar hoota kaya hai.. hum apni man'pasand cheezain nikaal laytay hain.. aur un say apna mafhoom bana kay paish kartay hain.. sirf DARATAY hain.. baray afsoos ke baat hai.. woh jo hum say MOHABBAT karta hai mairay saathi aa kay mujh ko kehtay hain USS say DARO... aik taraf yeahi loug kehtay hain woh tum say tumhari MAA say ziada mohabbat karta hai.. phir yeahi saathi aa kay kehtay hain USS say daroo.. mujh ko tu samajh nahi aati koun see baat manoon.. koun see na manoon.. jis say mohabbat ke jaati hai uss say dara nahi jaa sakta.. chahat mein dar nahi hota...!!


Zindagi.. nay'mat hai.. sawal bhi hai.. tu jawab bhi hai.. ik sar'basta raaz bhi hai.. yeahi kuch bhi nahi hai.. yeah sab kuch hai.. kiyon keh yeahi woh mohlat hai jis mein annay walla kal hai.. agar iss mein kuch nahi hai tu anay wallay kal mein bhe kuch nahi hai.. yeah souraj ke pehli kiran bhi hai.. yeah amawas ke andhairi raat bhi hai.. yeah chamakta chaand bhi hai.. yeah taptay sehra pay girti barish ke boond bhi hai.. yeah talatum khaiz lehroon mein bin patwaar naoo bhi hai.. yeah bus ik lamha hai.. palak jhapki nahi ojhal howa nahi.. yeah tunha hai tu yeah mehfil bhi hai.. yeah tum ho agar tu yeah mein bhi hoon.. hum zindagi hain.. hum say zindagi hai..!


Zindagi khoobsourat hai.. keh iss mein tum ho.. keh iss mein mein hoon.. zindagi sehar kar dainay walla sur hai tu uss sur pay barhana nachti wehsha bhi hai.. yeah sarak kay uss par kachay ghar mein bhook say sisaktay bachay ke akhri hichki bhe hai.. yeah milan kay khawb ankhoon mein liyeah raat bhar jaagti sohagan ke ankh ka ansoo bhi hai.. tu yeah daghay say sab cheen laynay wala makaar lutaira bhi hai..!!


Zindagi tanha hai humaray andar.. aur dhoondti hai wajood ko apnay.. tum guzar rahay hoo jis rah say abhi.. yeah uss rah ke garad mein hai.. yeah sulag rahi hai.. yeah bujh rahi hai.. issay bujhnay na daina.. jalaye rakhna.. yeah zindagi hai.. jee loo issay.. guzarnay na daina.. !


Zindagi mazoor hai daikhoo woh gir para hai jo chal raha tha.. qadam barhaoo thaam loo na.. woh roo para hai.. jo hans raha tha.. ussay hansaoo.. koi khoo gaya hai.. ussay dhoond laoo .. yeah zindagi hai.. lamba safar hai.. tunha nahi hoo.. kaam oroon kay aoo... iss sung sab kay beetaoo ... !


Zindagi safar bhi hai.. rah'guzar bhi.. qayaam bhi hai.. manzil bhi hai.. yeah chal rahi hai tu thak rahi hai.. tum tunha nahi ho.. yeah qafla hai.. go ghar juda hain.. shehar tu ik hai.. rah'guzar tu ik hai.. tum pehlay pohancho ya baad pohnchoo.. pohanch tu jayain gai sab wahaan pay.. tu sath chalna bhi seekh lo tum..!


Maira dost keh raha hai zindagi kuch bhi nahi kitab e maazi kay siwa.. yeah maazi hai agar tu aatay paloon ka nisaab bhi hai.. doh'raoo na issay gun'gunaoo na.. iss kay sureelay geet sab ko sunaoo ..yeah khawb ke hai sourat... iss ko jagaoo .. khushi ke hai naveed... iss ko phaylaoo .. gham ke tasveer.. mill kay mitaoo .. zindagi guzar rahi hai.. tum tunha tu nahi hoo.. mill kay beetaoo .. na faslay barhaoo .. aoo paas aoo ..


Zindagi khoof ke sourat.. nahi nahi... mujh ko daraoo na.. mairi shaam dhal rahi hai.. tumhari subah aa gai hai.. mairay charagh bujh rahay hain.. in ko jalaoo na.. mujh ko daraoo na.. mairay pass aoo na... zindagi khoobsourat hai.. mill kay beetaoo na.. !


Zindagi khushi ka naam hai.. yeah ban kay dulhan hai saij pay baithi.. iss ka ghoongat uthaoo payar jataoo na.. naaz uthaoo.. iss ke raishmi zulfoon mein.. kuch pal tu beetaoo na.. saans kiyon hai sakin.. beeti baat bhool jaoo.. dulhan hai tumharee.. seenay say lagaoo na... zara muskuraoo na... !!


Zindagi hai dhoop mein pari.. baraf ke ik dali... kitni hawa hoi... kitni reh gai baki.. hisaab choor do yeah... aag jo lagi hai... badan jis mein jal raha hai... iss ko bujhaoo na.. yeah peepal ke chaoon hai... thoora sastaoo na.. kiyon bhaagtay hoo itna.. thehar bhi jaoo na.. !!


Zindagi sung'dil hai bari.. koi payar karnay walla.. bain kar raha hai... roo raha hai daikhoo... koi jaan say bhi payara.. jaan haar baitha.. .. usay chup karaoo na.... uss ko bataoo na.. yeah zindagi hai payaray.. yeah khail hai anookha.. daiti hai sab ko dhooka.. hum jeet jatay hain tu... yah harti hai hum ko.. yeah reet hai purani... par kaya karain hum is ka.. tanha guzar dain kaya.. jungle mein bhag jayain... garaybaan ko phaar layain kaya.. ayzaaz bhi tu hai yeah... seenay na kiyon sajayain... issay hans kay na kiyon beetayain... ??

Zindagi uss haraf e ghalat ke sourat... Jo sama'atoon mein na hoo tu kuch bhi sahi nahi lagta.. Zindagi paani ka bulabala hai ... yeah bulbula hee hai apna jahaan.. Zindagi saraab lag rahi hai... nazar ka yeah dhooka hai... yeah kuch bhi tu nahi magar sab kuch hee yeah tu hai.. maira jahaan hai yeah jaisa hai... jalla kay raakh kar doon ya... kehkashaan say sajaoon iss ko.. mujh pay munhasir hai aab yeah sab... par tunha kuch nahi hoon mein.. haan sab kay saath chaloon gar mein... in dairoon say gar nikloon ga... woh RUB maira bhi hoo ga khush.. aur yeah JUG taira rahay ga shad... par in dairoon say nikloon tu.... !!

[Shokh]

~**... Pagal ...**~

Galee mein bachay us kay peechay pagal pagal ke awazain lagaatay bhag rahay
thai.. uss nay pichlay kai maheenoon say kapray bhi nahi badlay thai...
kameez ka chaak udhartay udhartay garaibaan say jaa milla tha.. chahray ka
rung zard patay sa hota jaa raha tha... ankhoon mein jul bujhay khawboon ke
rakh phailee hoi thi.. baloon mein kissi chirya kay tootay ghoonslay kay
kuch tinkay abhi tuk atkay howay thai.. woh apna naam bhool chuka tha sab
uss ko pagal kehtay thai.. woh pichlay kai barsoon say rungoon kay iss
shahar ke galiyooon mein dasht kay safar pay hai..!!

Shahar ke har gali doje say milli hoi thi woh aik gali say nikalta tu aglee
gali mein khailtay bachay apnay puranay khilonay choor kay nai khiloonay say
khailna shuroo kar daitay... yeah khail un kay liyeah sirf jeet hee jeet tha
aur har koi jeetna chahta tha.. shaam phailtee jaa rahi thi aur uss ka badan
pay aur zakhmooon kay liyeah jagaah kam parti jaa rahi thi.. Issi phailtee
sayaahi mein hee kaheen say aik bara pathar aa us kay mathay laga tabhi raat
kay andhairoon us ko hath thaam kay roshniyoon kay jahaan ke taraf safar
shuroo kiya....!! Dard barhta jaa raha tha... !! hut'ta kay dard nay sab
apnay hisaar mein lay liya... ussi lamhay kaif o saroor ka janam howa..!!

Daikha maa uss kay liyeah daisi ghee kay parathay bana kay laye hai...
katoori mein paroos say mangwaya howa sarsoon ka saag apni mehak say uss ke
taloo say lagi zubaan ko tur kar raha tha... sarhaanay baithi behan mathay
pay lagay zakham ko dhoo rahi thi.. aur apnay nazuk hathoon kay sath baloon
mein uljhay jungloon mein ujray ghoonslay kay tinkoon ko nikaal rahi thi..
maan uss ko baita khana khaa loo keh rahi thi us ke ankhoon mein chupa pani
ka woh aik namkeen qatra gawahi dai raha tha kay woh pagal nahi hai.... woh
duniya ka sab say payara baita hai... Chooti behan kay nanhay munay hathoon
ke porain us kay kanoon mein sargooshi kar kay keh rahi theen... Bhaiyaa tum
say acha bhai poori duniya mein aur koi nahi hai... !! Tabhi souraj ke bay
reham kirnoon ke taab na latay howay kamray ke khirki kay sheesha toot gaya
aur aik kaghaz mein lipta pathar masayhree kay pass aa kay gira.. !! uss
kaghaz pay sirf aik lafaz likha tha..!!

!!...Pagal..!!

[Shokh]

~** ...Mujhay Tum Say Mohabbat Hai... **~

Suno... ik baat kehni hai.. mujhay ik baat sun'ni hai.. wohi ik baat keh jis ko.. sun'nay ko tarastee hain.. samatoon ke viraan raahain.. jo kehnay ko bay'chain kab say... bujhay lehjoon kay san'naatay.. wohi ik bat keh jis ko... humara har harf kehta hai... pinhaan hai jo lehjoon mein... magar uss baat ko kehtay... janay hum kis say hain dartay...

Mujhay woh baat sun'nee hai... kehnay ke jissay hum ko.. nahi koi zaroorat hai.. magar jis' ko suntay hee.. bahaar chupkay say aati hai... gul aisay khilaatay hain... dast e jaan ka har koona... khushboo say mehakta hai.. andhairi lambee ratoon mein.. jaisay diya sa koi jalta hai.. na'umeed lehroon ko.. jaisay kinara milta hai.. mujh'ay woh baat sun'nee hai.. kehnay ke jisay tum ko.. nahi koi zaroorat hai...!

Kehna jis ka mushkil hai.. bari hee aam hai laikin.. sehar uss mein yeah kaisa hai.. badan jiss ko sun'tay hee... hararat say tapnay lagtay hain... khawahisyoon k rubaab pay yeah kaisay.. naghmay bajnay lagtay hain.. soye sadiyoon kay sabhi jazbay.. khushi say naach uthtay hain...

Haan kehna jis ko mushkil hai.. magar ik bar kehnay say... yeah jo deep jaltay hain... kabhi daikha hai tum nay kaya... zamanay ke sabhi khushiyaan.. jahanoon kay sabhi khush'rung... inhee say janam laytay hain... mujh'ay bhi janam layna hai... sung tumharay jeena hai.. sung tumharay marna hai... magar tum say yeah sun'na hai... sirf ik baar nahi sun'na.. mujhay har baar sun'na hai... chaloo ik baar tu keh doo... !

Mujhay tum say mohabbat hai.. tumhain mujh say mohabbat hai.. humain yeah baat kehnay kee.. nahi koi zaroorat hai.. magar yeah baat kehtay hee.. magar yeah baat sun'tay hee... lehjoon
mein basay yeah haraf... mujh ko thaam laytay hain.. mujhay girnay nahi daitay... mein chalta hoon kissi bhi aur.. yeah jugnoo say chamaktay hain... yeah khushboo say mehaktay hain... phir koi dar nahi rehta.. na tum say door honay ka.. na tum ko kho hee dainay ka.. mujhay aisa phir lagta hai.. rakhay seenay pay mairay sar.. tum meethi neend sooti ho.. mujh say janam layti ho.. mujh ko janam daiti ho.. !

Mujhay yeah baat kehni thi.. Mujhay tum say mohabbat hai... sirf ik baar nahi laykin.. mujhay har baar kehni thi... tumhain mujh say mohababt hai.. tumhain yeah baat kehnay ke.. nahi koi zaroorat hai.. magar ik baar keh do tu.... sirf ik baar keh do tu... chaloo ab keh bhi do daikhoo... !!

[Shokh]

~**... Zard Ruttain ...**~

Ab kay bars ik bar phir say.. Jaraay ke udaas shammoon mein.. Haray bharay darakhtoon ko.. Zard rutoon nay aan ghaira hai.. Ho sakay tu bacha loo in ko..

Khamooshiyoon ke serhadoon kay iss taraf.. Barsoon say tunhaiyoon ke qaid mein.. Kissi hum'nafas ka muntazir.. Sard hootay mousmoon mein.. Jalaye aas kay deep ko.. Tund hawaoon say lar raha hai..

Ruka howa uss moor pay.. Tumhari janib woh tak raha hai.. Khawb hoo ya ho haqeeqat.. Woh kash'makash mein para howa hai.. Tum ho jahaan.. kaya waheen rahoo gi.. ? Ya barh kay uss ko thaam loo gi.. ?

[Shokh]

....................................................