10-07-2005, 11:15 AM
~**... Tal'aash ...**~
Insaan azaal say talash e shanaakhat mein bhatuk raha hai.. uljhee hoi door sirra jiska milta nahi hai.. suljhanay lago ulajhtee chali jaate hai.. hasool e ishq insaan kay mizaaj ka asaas hai.. far'aaq iss kay badan e lateef ko jasaad e kaseef say saf araa rakhta hai.. kamzoor aur qavee ke jung azlee hai.. iss jung mein kuch ba payada sehraoon ke khaak chantay hain tu kuch hisaar e zaat mein qilla bund hoo kay daray sehmay baithay rehtay hain... har koi apnay apnay hisaar ke qaid mein hai.. wajood magar kissi ka tanha kuch bhi nahi.. mein agar hoon tu tujh say.. tu agar hai tu mujh say.. tunha tu kuch nahi .. tunha mein kuch nahi..
Aandhaikhi kashish hai jis nay sab bandh rakha hai.. apnay dairay mein nach nach kay mein khud ko kabhi na paa saka.. khud ko pana hai tu mujh ko iss dairoon kay hisaar say nikalna hoo ga.. mein tujh ko dhoondta hoon.. yeah talaash kaisi hai.. jo kabhi shuroo nahi hooti.. kabhi khatam nahi hooti.. jo hijar mein shab e visal ka maza daiti hai.. jo rooh ke tashnagi ko sawa karti hai.. jo dil e heraan ko har aks mein taira chehra dikhati hai.. ik qatray ko jo guher karti hai.. mujhay guhar honay ke khawahish hai.. tujhay panay ke khawhaish hai.. !!
Tujhay mein nay haseen lab o rukhsaar mein dhoonda.. woh amada e zawaal thai.. woh nafas kay aseer niklay.. woh rung e shabaab jo un pay utara tha.. jisaay mein taira noor samajha tha.. chand rooz ka mehmaan nikla.. kachay rungoon say bani yeah sab haseen sourattain.. gham ke barishoon mein do pal ko bhi jee nahi paa'teen.. sab rung utar jatay hain.. wohi ik see koori sourat reh jaati hain.. Nahi millay tum kissi mein bhi.. Mairi talaash adhoori hai.. Yeah wehshattein tairi atta.. yeah tashnagi ka darya charha howa.. yeah mairay wajood ke bin patwaar naoo.. yeah bhanwar khayaloon kay.. sab tairi atta.. !
Mairi pehchaan tujh say hai.. tairay hisaar mein aoon tu khud ko paoon.. apnay hisaar say magar mein nikloon kaisay.. bhaij mujhay ik meethi neend key aan miloon tujh say...!! tairay wastay mein he baqa hai mairi.. tu hai tu mein hoon.. tu nahi tu mein kaya yeah jahaan bhi kuch nahi..!! tu magar hai kahaan.. ?