Kirchiyo'n Say Kasheed Kartay Hai'n Khushiya'n

Haya n · 06-06-2007, 07:13 PM

Page 1

Aakhir Mai'n Kiyu'n Nahi Sach Bol Sakti? Aakhir Mai'n Kiyu'n Nahi Sach Likh Sakti? Jab Yeh Sab Mujh Par Beeti Hay To Phir Mai'n Bayaan Kiyu'n Nahi Kar Sakti? Kiya Sach Bolna Itna Mushkil Hota Hay? Kiya Waqai Sach Likhna Itna Mushkil Hota Hay Ya Aesa Sirf Mairay Saath Hay? Jhoot Bolna Kitna Aasaan Hota Hay Laikin Mujhay To Na Sach Bolna Aaya Owr Na Hi Dhang Say Jhoot Bolna Seekh Saki..

Amma'n Tum Nay Mujh Say Kitnay Jhoot Bolay! Kabhi To Koi Sachi Baat Mairay Kano'n Mai'n Daal Daitee'n Kay Mai'n Bhi Zindagi Ko Khatta Meetha Ghoont Samajh Kar Halaq Say Utaar Laiti...Kabhi To Koi Mukhtalif Sabaq Mairay Zaihen Mai'n Undailtee'n... Hamaisha Aik Hi Sabaq Parhati Rahee'n...Mairi Ghutti Mai'n Hamaisha Aesi Batai'n Utarti Rahee'n Jo Mai'n Nay To Apni Zindagi Mai'n Kahee'n Nahi Daikhee'n.

Tum Kaha Karti Thee'n '' Rija Bitya! Sach Ka Alam Kabhi Sarnigoo'n Nahi Hota.Yeh Alam Sab Say Buland Hota Hay.. Hamaisha Is Ko Thamay Rakhna..Sab Say Bara Daman Sabr Ka Hota Hay Is Ka Pallu Hamaisha Thamay Rakhna..Izzat Ka Aik Niwala Bhi Bouhat Hay Laikin Bay'Izzati Ki Roti Say Kabhi Pait Na Bharna...
Bitya! Hamaisha Izzat Ko, Zaroorat Owr Maslaihat Par Fowqiyat Daina..Bitya! Jin Ka Koi Nahi Hota Un'Ka Allah To Hota Hi Hay Na? ...Sabr, Wafa, Eisaar Owr Khamoshi Hi Aurat Ka Zaiwar Hay Owr Jo Aurat In Zaiwraat Say Aarasta Hoti Hay Us'Kay Showhar Ko Dunya Mai'n Hi Jannat Mil Jati Hay''

15 Baras Tum Nay Apni Bato'n Ko Is Tarha Mairay Andar Utara Kay Yeh Tamaam Batai'n Lahoo Ban Kar Mairi Ragg Ragg Mai'n Baihnay Lagee'n...

Owr Jab Mai'n Apnay Showhar Firasat Kay Saath Maikay Ki Diurhee Chowr Kar Pakistan Ja Rahi Thi To Tum Nay Mujh Ko Owr Mai'n Nay Tum Ko Kis Tarha Bhenchnay Ki Koshish Ki Thi Kay Ya To Tum Mujh Mai'n Sama Jaao Ya Mai'n Tumharay Andar Hulool Kar Jau'n Owr Koi Mujhay Tumhari Aaghosh Say Juda Na Kar Sakay..

Abba Ka Thanda Larazta Huwa Haath Aaj Bhi Mairay Sir Par Dhara Hay ... Un'Ka Woh Dheema, Kaanpta, Toot'Ta Sa Laihja Mairi Sama'Ato'n Mai'n Hamaisha Kay Liye Mehfooz Ho Gaya Hay '' Bitya! Jis Ghar Baiti Ki Doli Jaati Hay Phir Janaza Hi Nikalta Hay! Mairay Sir Ko Jhukana Nahi!

Abba! Ab To Apna Haath Mairay Sir Say Hata Lijiye Kay Mai'n Faisla Kar Sakoo'n Kay Apnay Janazay Ko Dafan Kar Doo'n Ya Apni Chita Ko Apnay Hatho'n Aag Lagau'n?

Kaash Aey Kaash Mairay Ikhtiyar Mai'n Hota Kay Mai'n Apni Zindagi Kay 15 Saalo'n Ki Aik Mazboot Gathri Bana Kay Wahee'n Babul Ki Daihleez Par Chowr Aati Owr Mujhay Kuch Yaad Na Rehta, Mujhay Koi Yaad Na Aata...

Na Takiye Kay Neechay Rakhi Gurya Yaad Aati, Na Hatho'n Mai'n Lagi Mehndi Yaad Aati Jo Tum Chaand Raat Ko Mujhay Sotay Mai'n Hi Laga Kar Ooper Thaili Baandh Daiti Thee'n Owr Subha Mehndi Say Rangay Haath Daikh Kar Mai'n Pooray Ghar Mai'n Khushi Say Naachti Phirti Thi...Na Mujhay Eid Ka Woh Gharara Yaad Aata Jo Tum Nay Rato'n Ko Jaag Jaag Kar Mairay Liye Banaya Tha..Jitna Khoobsurat Maira Gharara Tha Utna Khoobsurat Kisi Ka Bhi Na Tha..Mai'n Pooray Mohallay Mai'n Ghararay Wala Jora Paihen Kar Dikhati Phir Rahi Thi... Hatho'n Mai'n '' Eid Mubarak '' Likha Huwa Surkh Purse Liye Eidi Jama Karti Sara Din Khushi Khushi Phirti Rahi Thi... Raat Ko Tum Nay Mairi Nazar Utari Thi..

Na Mujhay Aam Ka Woh Darakht Yaad Aata Jis Kay Neechay Jhilangay, Khurray Palang Par Lait Kar Mai'n Raisham Kay Rangeen Dhago'n Say Khuaab Buna Karti Thi..Yeh Maira Sab Say Pasand'Deeda Mashghala Hota Tha.. Bal'Kay Mai'n Nay To Khuaab Bunnay Kay Liye Aesay Raisham Kay Dhagay Istimaal Kiye Kay Woh Ab Bhi Mairay La'Shaoor Ki Atha Gaihraiyo'n Mai'n Usi Tarha, Usi Tarteeb Say Owr Saleeqay Say Teh Kiye Dharay Hai'n.. Na Un Raisham Kay Dhago'n Ka Rang Purana Ho Kar Madham Para, Na Khuabo'n Ki Mas'hoor Kun Maihek Kam Hui..Mai'n To Apni Saheliyo'n Ko Bhi Na Bhula Paai Owr Na Woh Handkuliya'n Bhooli Jo Mai'n Sakeena, Rimla, Nirmal, Kamla Kay Saath Mil Kar Pakati Thi...

Mujhay Abba Owr Tum Nay Itna Bharpoor Pyar Diya Kay Mujhay Kabhi Aehsaas Hi Na Huwa Kay Mairi Koi Baihen Nahi Hay Ya Bhaai Nahi Hay..Mujhay To Tashnagi Ka Aehsaas Hi Na Huwa...Tumhari Mohabbat Bhari Aagosh Hi To Mairi Kaenaat Thi Bhala Mai'n Nay Kab Socha Tha, Kab Chaha Tha Kay Mai'n Is Kaenaat Say Alehda Ho Jau'n...

Tum Kaihti Thee'n Kay '' Mairi Rija Jab Paida Hui To Allah Ki Rehmat Ki Soorat Mai'n Barish Baras Rahi Thi '' Jab Hi To Tum Say Juda Ho Kar Mairi Aankho'n Mai'n Mosam-e-Barsaat Nay Mustaqil Dairay Daal Liye..Dil Par Hamaisha Abr Chaya Raha..Kabhi Dil Par Tapa Tap Boondai'n Girti Rahee'n Owr Kabhi Aankho'n Say Khamoshi Say Aansuo'n Ki Barsaat Hoti Rahi Laikin Yeh Sotay Kabhi Khushk Na Huway...

Page 2...

Pata Nahi Kis Ki Nazar Is Pur'Sukoon Mahowle Ko Lag Gai Thi Kay Itnay Saihat Mand Owr Pyaray Say Abba Ko Diqq Jaisi Moozi Beemari Lag Gai Owr Woh Daikhtay Hi Daikhtay Charpaai Say Ja Lagay...Rimla Kay Pita Ji Nay Abba Ko Mashwara Diya Kay Jitni Jaldi Ho Sakay Rija Ko Biyah Do...Aesay Mai'n Firasat Jo Abba Kay Dost Kay Susrali Azeez Thay Owr Kuch Arsay Kay Liye Aaey Huway Thay...Abba Nay Un Say Hi Do Bol Parhwa Diye Owr Mai'n Handkuliya'n Pakanay Kay Dowr Say Itni Achanak Nikli Kay Jism To Maira Pakistan Chala Aaya Laikin Zehen In Hi Yado'n Mai'n Hunoot Ho Gaya...

Firasat Nay Amma'n Owr Abba Say Bhi Bouhat Israar Kiya Kay Woh Pakistan Chalai'n Laikin Unho'n Nay Inkaar Kar Diya Kay '' Miya'n! Tum Loge Sidharo Ab Ham Kaha'n Apni Boorhi Haddiya'n Ghaseet'Tay Phirai'n Gay.Yaha'n Hamaray Aaba.O.Ajdaad Ki Haddiya'n Dafan Hai'n Woh Bhi Mitti Mai'n Mil Gaey Ham Bhi Isi Tarha Mitti Mai'n Mil Jaei'n Gay..

Sanjeeda Sanjeeda Say, Chaihray Par Sharafat Ki Gaihri Chaap Liye Firasat Nay Mairay Dil Kay Taro'n Ko Choo Liya... Kaghzaat Mukammal Hotay Hi Mai'n Firasat Kay Ham'Rah Pakistan Kay Liye Rawana Ho Gai..

Firasat Nay Mujhay Dowran-e-Safar Bataya Kay '' Rija! Tum Mairi Zindagi Ki Awwaleen Khushi Ho.. Is Say Paihlay To Mai'n Is Lafz Say Hi Na'Aashna Tha..Maira Bachpan Bouhat Maihroomiyo'n Mai'n Guzra...Ammi Mujhay Bouhat Chahti Thee'n Laikin Baba Ki Adam Tawajoh Owr Ghair Aurto'n Mai'n Dil Chaspi Nay Ammi Ko Is Duniya Say Bouhat Jald Moo'n Mor Lainay Par Majboor Kar Diya...Baba Ki Zaat Par Un Ki Wafaat Say Koi Farq Na Para Un'Kay Mashaghil Wahi Thay...Albatta Mairi Owr Mairay Chotay Bhaai Nijabat Ki Tarbiyat Unho'n Nay Bouhat Sakhti Say Ki...Yaqeen Karo Rija! Ham Dono'n Bhaiyo'n Nay Kabhi Koi Khail Tak Apni Marzi Say Nahi Khaila...Bas Zindagi Yoo'n Guzri '' Chalo Firasat School Jaao, Hotel Say Khana Lay Kar Aao, Ab Khana Khaao, Chalo So Jaao, Utho Ab Ludo Khail Lo ''
Bahar Ka Mahowle Hamaisha Un Ko Bouhat Kharaab Nazar Aaya Is Liye Bahar Khailnay Na Daitay Thay Agar Ham Chori Chupay Aesi Harkat Kar Laitay To Woh Maar Parti Kay Hafto'n Bister Say Lagay Rehtay..Nijabat To Kai Martaba School Kay Bahanay Ghar Say Bhaga Jis Ki Saza Us Ko Yeh Mili Kay School Churwa Diya Gaya Owr Ghar Ka Choolha Us Kay Hawalay Kar Diya Gaya..Us Ka Hashar Daikh Kar Mai'n Aesi Koi Jurrat Na Kar Saka...In Hi Halaat Mai'n Jawaan Huwa..Waha'n Nokri Na Mili To Baba Nay Yaha'n Nokri Talaash Karnay Bhaij Diya.. Nokri To Na Mili Albatta Tum Zaroor Mil Gaei'n...Tumharay Abba Say Door Paray Ki Rishtay Daari Nikal Aai Owr Halaat Aesay Ho Gaey Kay Tum Mairi Dulhan Ban Gaei'n..Yeh Mairi Zindagi Ka Paihla Qadam Hay Jo Mai'n Nay Apni Marzi Say Uthaya Hay Owr Hadd To Yeh Hui Hay Kay Baba Ko Ittila Tak Na Day Saka..Ab Un Ka Kiya Radd-e-Amal Hota Hay Yeh Soch Soch Kar Maira To Dimagh Maauf Huwa Ja Raha Hay''

Page 3

Firasat Ka Dimaagh Maauf Honay Ka Sun Kar Paihli Martaba Mairay Nanhay Say Dil Par Dhairo'n Khowf Cha Gaya Owr Baba Ka Roab Owr Khowf Abhi Say Zaihen Par Taari Honay Laga..Maira Dil Owr Dimagh Un'Ki Mukhtalif Tasweerai'n Bananay Lagay Kay Baba Ki Laal Laal Khowf'Naak Aankhai'n Ho'n Gi Owr Haath Mai'n Danda Pakray Ghuma Rahay Ho'n Gay,Yeh Lambay Chowray Say Paihelwan Numa Ho'n Gay..Ho Sakta Hay Kay Koi Seeng Bhi Ho..Kabhi Naak Owr Moo'n Say Dhuwa'n Nikalta Nazar Aata...
Gharaz Yeh Kay Mai'n Bay'Had Khowf'Zada Ho Gai Thi..

Yahi Sab Sochti Mai'n Firasat Kay Chotay Say Flate Mai'n Chali Aai..Darwaza Aik Dublay Patlay Larkay Nay Khola Woh Nijabat Tha..Salaam Na Dua Us Nay Wahee'n Say Haank Laga Di '' Baba! Bhayya Ji Aaey Hai'n Saath Mai'n Aik Larki Bhi Hay. ''

Maira Dil Itni Zor Zor Say Dharak Raha Tha Kay Mujhay Lag Raha Tha Sab Ko Us'Kay Dharaknay Ki Awaaz Aa Rahi Ho Gi...Mai'n Nay Firasat Ka Haath Pakar Liya Tha Owr Itni Mazbooti Say Pakra Tha Kay Mairi Gulaabi Ungliya'n Safaid Par Gai Thee'n. Gulabi Honto'n Par Papriya'n Si Jamnay Lagi Thee'n..

Kamray Ka Darwaza Chirchiraya Owr Aik Aam Sa Adhair Umar Ka Aadmi Bahar Aaya..Shalwar Owr Banyan Mai'n Malboos, Mehndi Say Rangay Baghair Kanghi Kiye Huway Baal, Choti Choti Chamakdar Aankhai'n Mairay Jism Kay Aar Paar Hui Ja Rahi Thee'n..

''Yeh Lowndiya Kown Hay? Isay Kaha'n Say Utha Laya? '' Baba Ki Paat'Daar Awaaz Sun Kar Mai'n Bay'Hosh Honay Kay Qareeb Thi..

'' Woh Baba... Baba... Yeh... Yeh...Yeh Rija Hay...Yeh Mairi.....Woh Baba... Baba...'' Firasat Buri Tarha Haklanay Lagay...

'' Abay Kiya Baba Baba Ki Ratt Laga Rakhi Hay..Mai'n Pooch Raha Hoo'n Kay Yeh Lowndiya Ka Kiya Chakkar Hay? '' Baba Nay Firasat Ki Guddi Par Zor Daar Thappar Raseed Kiya Owr Mai'n Thar Thar Kanpnay Lagi..Aankho'n Kay Aagay Neelay Peelay Sitaray Chamaknay Lagay...

'' Woh Woh Baba Mai'n Nay Aap Ko Khat To Bhaija Tha Shayed... Shayed Aap Ko Mila Nahi'' Firasat Nay Jhoot Ka Sahara Liya Owr Mukhtasiran Bata Diya Kay Kin Halaat Mai'n Yeh Shaadi Hui..

Baba Ki Zabaan Say Galiya'n Goliyo'n Ki Tarha Nikal Rahi Thee'n Owr Haath Taizi Say Firasat Ki Durgat Bana Rahay Thay...

'' Abay Khali Lowndiya Ko Lay Aaya Jahaiz Kiya Taira Baap Day Ga? Khali Lowndiya Ka Kiya Mai'n Achaar Daloo'n Ga..Tu To Muft Ki Rotiya'n Tor Hi Raha Tha Ab Yeh Bhi Rotiya'n Tornay Aa Gai Hay...Yeh Ghar Hay Yateem Khana Nahi...Ja Lay Ja Is Ko Mairi Nazro'n Kay Samnay Say Owr Samjha Day Is Ko...Agar Yaha'n Rehna Hay To Haath Pair Hilana Ho'n Gay..Muft Mai'n Roti Nahi Milay Gi..Saali Nay Husn Kay Jaal Mai'n Phansa Liya Owr Tu Phans Bhi Gaya..Maira Baita Ho Kar Baray Nuqsaan Ka Sowda Kiya Hay Tu Nay Firasat...Ja Lay Ja Is Ko Andar...Is Say Paihlay Kay Mai'n Lowndiya Ki Gichi Daba Doo'n '' Baba Ghussay Say Dhaar Rahay Thay...

Firasat Jaldi Say Mujhay Lay Kar Aik Kamray Mai'n Ghuss Gaey Owr Mujh Ko Samjhanay Lagay Kay '' Bas Ab Sab Theek Ho Jaey Ga..Baba Nay Shukar Hay Tum Ko Qubool To Kar Liya ..Bas Rafta Rafta Halaat Theek Hotay Jaei'n Gay..Mai'n Jald Say Jald Nowkri Dhoondu'n Ga..Asal Mai'n To Baba Ko Ghussa Mairi Bay'Rozgaari Ka Hi Hay..Ab Tum Mairi Zindagi Mai'n Aai Ho To Insha Allah Mujhay Nowkri Bhi Mil Jaey Gi Owr Baba Ka Ghussa Bhi Khatam Ho Jaey Ga..Tum Har Tarha Itminaan Rakho..Bay'Fikar Ho Jao..Yeh Tumhara Bhi To Ghar Hay..Is Ghar Ko Apna Ghar Samajh Kar Bay'Fikri Say Raho..Sab Theek Ho Jaey Ga ''

Mairay Zimmay To Bas Aik Hi Kaam Tha Kay Tukar Tukar Daikhti Rahoo'n So Woh Hi Karti Rahi...

Thori Dair Mai'n Nijabat Muskurata Huwa Tray Utha Laya..Aik Plate Mai'n Qeema Owr Side Par Baghair Dastar Khuan Kay Rotiya'n Rakhi Thee'n...Woh Bhi Wahee'n Bister Par Baith Gaya...

Bhayya Ji! Mujh Ko To Tumhari Dulhan Bouhat Pasand Aai Bilkul Filmi Heroen Lag Rahi Hay...Kiya Katora Si Aankhai'n Hai'n Owr Chehra To Shayed Makkhan Say Dhoti Rahi Hay..Baal Bhi Kitnay Khoobsurat Hai'n..Kiya Is Ki Koi Baihen Bhi Hay? Agar Hay To Mairi Us Say Shaadi Kar'Wa Do...

Firasat Khush Ho Kar Bolay '' Shukar Hay Kay Tum Ko To Mairi Biwi Pasand Aa Gai..Ab Is Ka Khayaal Rakhna Owr Abba Say Bacha Kar Rakhna..Is Ki Koi Baihen Nahi Hay! Ab Yahi Tumhari Baihen Hay..''

'' Nahi Bhayya Ji Baihen To Nahi Hay Albatta Bhabhi Zaroor Hay..Kiya Yeh Goongi Hay? ''

Firasat Nay Mujh Ko Tahoka Diya Kay '' Yeh Tumhara Iklowta Daiwar Hay Aur Bhaai Bhi..Tumhara Har Tarha Khayaal Rakhay Ga..Abba Say Bachaey Ga..Dil Ka Bouhat Acha Hay Owr Khana Bhi Bouhat Acha Pakata Hay '' Mairay Moo'n Say Bouhat Mushkil Say '' Ji '' Nikla..

Phir Kab Raat Hui Owr Kab Subha, Mai'n To Aik Bouhat Hi Ajeeb Owr Drauna Khuaab Daikh Rahi Thi..Firasat So Rahay Thay Owr Subha Namudaar Ho Gai Thi Kay Baba Ki Awaaz Aai..

'' Abay Joru Kay Paihloo Say Niklay Ga Ya Wahee'n Para Aendta Rahay Ga? Firasat Harbara Kar Uth Baithay...'' Ji Aaya Baba ''

'' Joru Say Bhi Kaho Kay Takht-e-Shaahi Say Utray Owr Ghar Sanbhalay..Muft Mai'n Roti Nahi Milay Gi.''

Saari Raat Rotay Rotay Mairi Aankhai'n Mutawarram Ho Gai Thee'n Owr Bukhar Ho Gaya Tha..Firasat Nay Mairi Yeh Haalat Daikhi To Aahista Say Maira Sir Thap'Thapaya Owr Darwaza Khol Kar Bahar Niklay Mairay Kamray Ka Darwaza Bhair Diya...

Firasat Ki Minminati Hui Awaaz Sunai Di '' Baba Rija Ko Taiz Bukhaar Ho Gaya Hay''

'' Aray Kaha'n Say Utha Laya Hay Is Beemari Ki Pot Ko...Ab Dawa Daaru Bhi Mai'n Hi Karoo'n Owr To Aesh Karay..Kaan Khol Kar Sun Lo Yeh Drama Baazi Yaha'n Nahi Chalay Gi...Utha Us Nawab Zaadi Ko... Naashta Pakaey Sab Kay Liye.''

Nijabat Fowran Bola '' Baba Bawarchi Khana To Maira Hay, Waha'n Mai'n Kisi Ko Nahi Aanay Doo'n Ga ''

'' Haa'n Haa'n Charha Laina Sab Mil Kar Is Mah'Rani Ko Sir Par '' Woh Burburatay Huway Ghusul Khanay Ki Taraf Chalay Gaey..

Yeh Thi Mairi Firasat Kay Ghar Mai'n Aamad ...

Haya n · 06-06-2007, 07:18 PM

Page 4

Do Din Baad Chakratay Huway Sar Kay Saath Mai'n Kamray Say Bahar Aai..

'' Assalam.O.Alaikum Baba! '' Mairi Kaanpti Hui Awaaz Ba'Mushkil Nikli..

'' Walaikum ''! Kiya Baat Hay? Kiyu'n Bahar Aai Ho? Ho Gai Dramay Baazi Poori, Phaans Liya Mairay Bachay Ko, Adaei'n Dikha Kar Apna Ghulaam Bana Liya... Mai'n Tum Jaisi Lowndiyo'n Ko Achi Tarha Samajhta Hoo'n.. Mairay Saath Koi Drama Baazi Ki To Mai'n Hashar Bigaar Doo'n Ga.''

Firasat Nay Aa Kar Jaldi Jaldi Baba Say Daant Khaai Owr Mujh Ko Side Par Kar Diya...

Mai'n Khamoshi Say Bawarchi Khanay Ki Taraf Barhi Bal'Kay Aesa Lag Raha Tha Kay Mai'n Tairti Hui Ja Rahi Hoo'n...

'' Na Bhabhi Bawarchi Khana To Maira Hay Tum Doosray Kaam Kar Lo..''

Nijabat Ki Awaaz Say Mai'n Chownki Owr Ghar Ki Safaai Suthraai Mai'n Khamoshi Say Lag Gai...Safai Suthraai Karnay Say Ghar Ki Kuch Behter Shakal Nikal Aai ...Phir Mai'n Nay Mailay Kapray Jama Kiye Owr Un Ko Dhona Shuru Kiya...Firasat Mairay Aagay Peechay Phir Rahay Thay Jab Koi Kapra Dhoti Woh Fowran Mairay Haath Say Lay Kar Gallery Mai'n Algani Par Phaila Aatay...

'' O Joru Kay Ghulaam... Udher Hi Chipka Rahay Ga Ya Mairay Paas Bhi Aaey Ga. ''

Firasat Baba Ki Taraf Lapkay...

'' Haa'n Ab Batao... Is Tarha To Kaam Nahi Chalay Ga..Nowkri Kab Karay Ga? Kiya Mairay Marnay Ka Intizaar Kar Raha Hay? Mai'n Itni Aasaani Say Marnay Wala Nahi..Tum Sab Ko Maar Kar Hi Maroo'n Ga''

Owr Firasat Minminanay Lagay....

'' Tu Kuch Nahi Karay Ga Mujh Ko Hi Taira Band.O.Bast Karna Paray Ga...

Page 5

Yeh Thi Mairi Shaadi Shuda Zindagi Ki Shuruaat!

Baba Ghar Par Na Hotay To Firasat Owr Nijabat Maira Bouhat Khayal Rakhtay..Baba Kay Aatay Hi Sab Ko Saanp Soongh Jata...Kamray Mai'n Jatay Hi Firasat Mujh Par Sadqay Wari Honay Lagtay..Waqai Woh Mujh Ko Bouhat Chahtay Thay..Aksar Mairi Aankh Sotay Mai'n Khul Jati To Firasat Maira Hi Chehra Daikh Rahay Hotay Thay..Unho'n Nay Apni Tamaam Tar Chahtai'n Mairay Naam Kardi Thee'n..Phir Maira Yaha'n Owr Tha Hi Kown? Mai'n Bhi Firasat Ko Dil.o.Jaan Ki Tamaam Tar Gehraiyo'n Say Chahnay Lagi Thi...

Firasat Jab Nowkri Dhoondnay Bahar Nikaltay To Woh Chand Ghantay Mairay Liye Qayamat Say Kam Na Hotay Thay...Nijabat Kisi Hadd Tak Moo'n Phat Tha Kehta Kay '' Mai'n To Nowkri Nahi Karoo'n Ga Mai'n To Khana Hi Pakau'n Ga Mujhay Bawarchi Khana Hi Pasand Hay..Nowkri Karwana Hi Hay To Baba Mujh Ko Kisi Hotel Mai'n Bawarchi Ki Nowkri Dilwa Dijiye.''Owr Baba Ki Jawaban Jo Gaaliya'n Hotee'n Woh Showq Say Kha Laita..

Ground Floor Par Sajida Baji Rehti Thee'n Woh Lady Doctor Bhi Thee'n..Un'Ki 5 Baitiya'n Thee'n...Sajida Baji Kay Miya'n Jameel Bhai Bhi Nowkri Kartay Thay..Flate Kay Hi Aik Kamray Ko Unho'n Nay Clinic Banaya Huwa Tha..

Mai'n Jab Bhi Beemar Hoti To Baba Ki Hazaar Gaaliya'n Sunnay Kay Baad Nijabat Kay Saath Un'Kay Clinic Say Dawa Lay Aati..Woh Bouhat Meherban Owr Nafees Khatoon Thee'n Owr Mujh Say To Khaas Towr Par Bouhat Mohabbat Say Paish Aati Thee'n...Ajeeb Karb Sa Un'Ki Nazro'n Mai'n Aa Jata Tha Jab Woh Mujh Ko Daikhtee'n...

'' Kabhi Ghar Par Bhi Aa Jaya Karo Rija'' Woh Shafqat Say Kaihtee'n...

'' Ji Aau'n Gi'' Mai'n Dheeray Say Jawaab Daiti...

Woh Jaanti Thee'n Kay Baba Mujhay Aanay Dai'n Gay To Mai'n Aau'n Jau'n Gi...

Aik Din Baba Kisi Kaam Say Haider Abad Gaey...Woh Din Mairay Liye Eid Ka Din Sabit Huwa..Nijabat Nay Fata Fat Khana Pakaya Owr Firasat Apnay Kisi Dost Ki Khatara Si Gari Lay Aaey...

Mai'n Pehli Martaba Ghar Say Is Tarha Bahar Nikli Thi..Firasat Owr Nijabat Nay Mujh Ko Khoob Sair Karwai..Clifton Bhi Lay Gaey, Oont Par Bhi Bithaya Owr Khoob Qulfiya'n Bhi Khilaei'n..Muddato'n Baad Mai'n Nay Taza Hawa Mai'n Saans Li Thi...

Shaam Ko Duaei'n Maangtay Ham Ghar Aa Gaey...Shukar Hay Kay Baba Abhi Aaey Nahi Thay...Ham Nay Jaldi Jaldi Apnay Apnay Huliyo'n Ko Durust Kiya..Firasat Car Wapas Karnay Gaey Hi Thay Kay Baba Aa Gaey...

'' Kaha'n Gaya Hay Firasat? Maghrib Ki Azaan Kay Baad Ghar Say Kiyu'n Nikla? '' Woh Garjay...

Nijabat Fowran Bola '' Bhayya Ji Nowkri Dhoond'Nay Gaey Hai'n ''

''Haa'n Haa'n Mujhay Sab Pata Hay Kay Kitni Laaiq Owlaad Hay Mairi..Nowkri Kiya Dhoond Raha Ho Ga? Para Ho Ga Chokriyo'n Kay Chakkar Mai'n.''

Firasat Jald Hi Ghar Aa Gaey Owr Dant Sun Kar Mairay Paas Kamray Mai'n Aa Gaey...

Mai'n Nay Pakistan Say Amma'n Owr Abba Ko Bouhat Tasalli Kay Owr Achay Achay Khutoot Likhay Kay '' Mai'n Bilkul Theek Hoo'n..Firasat Kay Saath Bouhat Khush Hoo'n..Sab Loge Maira Bouhat Khayal Rakhtay Hai'n Owr Bouhat Achay Hai'n..''

Kiyu'n Kay Paihlay Baba Khat Parhtay Thay Phir Woh Khat Post Hota Tha..Owr Amma'n Abba Jo Duao'n Bhara Khat Bhaijtay Woh Paihlay Parha Jata Phir Mairay Hawalay Kiya Jata...Baba Na Bhi Khat Parhtay Tab Bhi Mai'n Amma'n Abba Ko Kuch Bhi Na Batati..

Ghar Mai'n Phone To Tha Nahi Amma'n Har Khat Mai'n Mujh Say Baat Kar'Nay Kay Liye Phone Number Poochtee'n..Mai'n Nay Aik Khat Mai'n Sajida Baji Ka Number Likh Diya To Baba Nay Maira Woh Khat Mairay Saamnay Hi Phaar Diya..Us Kay Baad Say Mai'n Amma'n Abba Say Koi Na Koi Bahana Bananay Lagi...

Baba Nay Firasat Ko Warning Day Di Thi Kay ''Jab Tak Nowkri Nahi Milti Khabar'Daar Jo Tu Nay Baap Bannay Ki Jurrat Ki''...Firasat Nay Sar Jhuka Diya Kay '' Baba Aesa Hi Ho Ga.''

Firasat Nay Bouhat Koshish Ki Kay Un'Ko Nowkri Mil Jaey Laikin Abhi Tak Nakaam Thay....

Baba Idhar Udher Jatay Rahay Owr Aakhir Kaar Unka Idher Udher Jana Kaam Aa Hi Gaya...Owr Unho'n Nay Firasat Kay Liye Dubai Mai'n Nowkri Dhoond Nikali..

Mujh Par To Saato'n Aasmaan Toot Paray..Firasat Ka Bhi Bura Haal Tha Laikin Baba Ki Baat Say Inkaar Ki Jurrat Un Mai'n Na Thi..Nowkri Bhi Itnay Arsay Baad Mili Thi Inkaar Ka Sawaal Hi Na Tha...

Page 6

Firasat Nay Rotay Dhotay Dubai Janay Ki Tayyari Shuru Kardi Owr Mai'n Un Say Lipat Lipat Kar Roti Rahi '' Agar Mujh Ko Yoo'n Chowr Kar Chalay Gaey To Aap Mujh Ko Dobara Zinda Na Paei'n Gay..Mujh Ko Bhi Saath Hi Lay Jaiye''

Woh Khud Phoot Phoot Kar Rotay Kay '' Nowkri Hi Aesi Hay Kay Biwi Sath Nahi Ja Sakti, Mai'n Bhi Kaha'n Tumharay Baghair Ji Sakta Hoo'n..Nijabat Tumhara Khayal Rakhay Ga.''
Firasat Owr Mai'n Dono'n Hi Phoot Phoot Kar Rotay Laikin Us Manhoos Ghari Ko Ham Na Roke Sakay Jab Firasat Mujhay Chowr Kar Dubai Chalay Gaey...

Mairi To Duniya Hi Andhair Ho Gai.Firasat Nay Dubai Pohanchtay Hi Kheriyat Ka Phone Sajida Baji Kay Yaha'n Kar Diya..Mai'n Nijabat Kay Saath Phone Sunnay Gai..Firasat Ki Awaaz Suntay Hi Ro Ro Kar Nidhaal Ho Gai, Udher Firasat Ka Bhi Aesa Hi Haal Tha..Phone Band Huwa To Mairi Sansai'n Bhi Band Honay Lagee'n..Sajida Baji Nay Bari Mushkil Say Mujh Ko Sanbhala Owr Mai'n Neem Murda Halat Mai'n Ghar Wapas Chali Aai..

Firasat Kay Baqaidgi Say Khat Bhi Aatay..Baba Paihlay Khud Parhtay Phir Mujh Ko Daitay..Un Khato'n Mai'n Bouhat Sada Owr Aam Si Tehreer Hoti..Mai'n Samajh Jati Kay Baba Kay Dar Say Aesa Likhtay Hai'n..

Us Din Ghar Mai'n Eid Ka Sama'n Tha Jab Firasat Nay Apni Tankhuah Ka Draft Bhaija..Mairi Badd'Naseebi Kay Usi Din Amma'n Ka Khat Aa'Gaya Kay Abba Is Duniya Say Rukhsat Ho Gaey...Mai'n Yeh Khabar Suntay Hi Kharay Qad Say Farash Par Gir Kar Bay'Hosh Ho Gai...Nijabat Mujhay Sajida Baji Kay Yaha'n Lay Gaya..Hosh Mai'n Atay Hi Maira Ro Ro Kar Bura Haal Ho Gaya...Sajida Baji Mujhay Sanbhalti Rahee'n...Nijabat Mujhay Wapas Ghar Lay Aaya...Mai'n Baba Kay Qadmo'n Mai'n Gir Pari Kay Mujhay Kuch Arsay Kay Liye Amma'n Kay Paas Bhijwa Dijiye''

Baba Nay Mujhay Thokar Maar Kar Alag Kiya'' Tairi Maa'n Paihlay Bhi Tairay Baap Ki Beemari Kay Jhootay Khat Likhti Rahi Hay Jo Mai'n Phaar Kar Phainkta Raha Hoo'n..Yeh Bhi Drama Tujh Ko Wapas Bulanay Kay Liye Kiya Gaya Hay...Wapas Jana Hay To Chali Ja Laikin Hamaisha Kay Liye..''

Mai'n Roti Tarapti Rahi Laikin Mujhay Baba Nay Janay Na Diya..Khat Jab Bhi Likhti Phar Kar Phaink Daitay...

Mai'n Beemar Par Gai...Ro Ro Kar Neem Bay'Hoshi Si Taari Ho Jati...

Aik Din Mai'n Nay Amma'n Ko Khat Likha Owr Nijabat Ki Khushamad Ki Kay ''Tum Khat Post Kar Aao''...Mai'n Samajh Rahi Thi Baba Ghar Mai'n Nahi Hai'n...

Baba Aik Dam Apnay Kamray Say Nikal Aaey Paihlay To Khat Phara Us Kay Baad Mujhay Maarna Shuru Kar Diya '' Bata Kis Kis Ko Nijabat Say Khat Bhijwati Rahi Hay? Kiya Waha'n Apnay Yaar Chowr Aai Hay Jo Janay Kay Liye Itna Tarap Rahi Hay? '' Nijabat Mujhay Bachatay Huway Khud Bhi Pit'Ta Raha..Laikin Baba Kay Aagay Us Ki Aik Na Chali..Mai'n To Waisay Hi Dhaan Paan Si Thi Bhala Mai'n Nay Itna Sab Kuch Kaha'n Saha Tha Mai'n Gir Pari...

Nijabat Mujhay Kisi Na Kisi Tarha Sajida Baji Kay Paas Lay Janay Mai'n Kamiyab Ho Gaya..

Sajida Baji Mairi Halat Daikh Kar Dang Reh Gaei'n..Pehli Martaba Un Ko Itna Ghussa Aaya Kay Unho'n Nay Firasat Ko Dubai Phone Kar Kay Khoob Khoob Sunaei'n Owr Woh Sab Bhi Bata Diya Jo Firasat Ki Ghair Mowjoodgi Mai'n Hota Raha..Nijabat Nay Jo Kuch Sajida Baji Ko Bataya Tha Woh Sab Kuch Bhi Sajida Baji Nay Firasat Ko Bata Diya...

Haya n · 06-06-2007, 07:20 PM

Page 7

Firasat Sab Kuch Sun Kar Rotay Rahay Owr Baghair Kuch Kahay Phone Rakh Diya..

Mujhay Sajida Baji Nay Roke Liya Owr Nijabat Say Baba Ko Paigham Kehelwa Diya Kay '' Rija Ko Bouhat Chotai'n Aai Hai'n Mai'n Is Ko Apnay Paas Us Waqt Tak Rakhoo'n Gi Jab Tak Woh Theek Nahi Ho Jati Warna To Yeh Police Case Hay '' Nijabat Yeh Paigham Lay Kar Baba Kay Paas Chala Gaya...

Sajida Baji Mujhay Sanbhalnay Mai'n Lagi Rahee'n..

Firasat Ko Na Janay Kiya Huwa Kay Baghair Sochay Samjhay Nowkri Chowr Kar Wapas Pakistan Chalay Aaey..Mai'n Sajida Baji Kay Hi Paas Thi... Woh Airport Say Seedhay Sajida Baji Kay Ghar Hi Chalay Aaey Owr Kisi Ki Parwah Kiye Baghair Mujh Say Lipat Kar Ro Paray..Mairi To Cheekhai'n Hi Na Rukti Thee'n..Sajida Baji Nay Bari Mushkil Say Ham Dono'n Ko Sanbhala...

Firasat Bouhat Dublay Ho Gaey Thay Owr Rang Bhi Peela Par Gaya Tha..

Nowkri Chowr Dainay Ka Sun Kar Mairay Pairo'n Talay Say Zameen Nikal Gai...Baba Kay Khowf Say Mai'n Kaanp'Nay Lagi..

Firasat Nay Ghar Ja Kar Dartay Dartay Baba Ko Yeh Khabar Sunai To Un Par Aik Dowra Sa Par Gaya..Unho'n Nay Firasat Ko Maar Maar Kay Adh Muwa Kar Diya Kay '' Yeh Sab Is Manhoos Larki Ki Wajha Say Huwa Hay..Us Nay Mairay Draft Band Karwaey Hai'n Ab Woh Is Ghar Mai'n Dobara Qadam Nahi Rakh Sakti, Fowran Is Manhoos Ko Talaaq Do '' Baba Nay Firasat Ko Kamray Mai'n Band Kar Kay Bahar Say Tala Laga Diya Kay '' Jab Tak Talaaq Nahi Day Ga Darwaza Nahi Kholoo'n Ga ''

Nijabat Mujhay Aa Kar Ratti Ratti Report Daita Raha..

Mai'n To Jaisay Zinda Laash Ban Kar Reh Gai Thi..Zindagi Kay Koi Asaar Hi Mujh Mai'n Nazar Na Aatay Thay..Nijabat Pal Pal Ki Khabar Isi Tarha Daita Raha...

Sajida Baji Owr Jameel Bhaai Mairi Khatir Baba Kay Paas Gaey Ta'Kay Un Ko Samjhaei'n..

Baba Nay Un Ko Bhi Woh Woh Batai'n Sunaei'n Kay Khuda Ki Panah...

Nijabat Ka Naam Lay Kar Mujhay Badd Chalan, Aawara, Na'Farmaan Qaraar Day Diya Gaya... Kay Aesi Larki Mairay Baitay Ki Biwi Nahi Reh Sakti...

'' Agar Tum Logo'n Nay Is Larki Ki Side Li To Mai'n Tumhari Baitiyo'n Ko Aesa Badnaam Karoo'n Ga Kay Sari Zindagi Dehleez Par Baithay Baithay Boorhi Ho Jaei'n Gi.''

Sajida Baji Owr Jameel Bhaai Bouhat Shareef Family Say Taaluq Rakhtay Thay Woh To Aesi Batai'n Sun Kar Sharam Say Zameen Mai'n Hi Garr Gaey..Phir Bhi Unho'n Nay Baba Ko Khoob Khari Khari Sunaei'n..Court Kachehri Mai'n Ghaseetnay Ki Dhamkiya'n Day Kar Chalay Aaey...

Sajida Baji Nay To Mujhay Kuch Na Bataya Kay Mujhay Sadma Na Ho Laikin Nijabat Nay P.C.O Say Phone Kar Kay Mujhay Sab Kuch Bata Diya..

Mai'n Sajida Baji Owr Jameel Bhai Say Nazrai'n Milanay Kay Qabil Na Rahi..

Phir Kabhi Mai'n Nay Firasat Ki Jhalak Tak Na Daikhi...Baba Nay Gun Point Par Mujh Ko Talaaq Dilwai...Talaaq Ki Wajha Yahi Likhi Hui Thi Kay Mai'n Badd Chalan,Awaara Owr Na' Farma'n Bardaar Hoo'n...Neechay Firasat Kay Dastakhat Bhi Mowjood Thay...

Page 8

Mai'n Bin Paani Ki Machli Ki Tarha Tarapnay Lagi..Bay'Hosh Hoti Phir Hosh Mai'n Aati Owr Firasat Firasat Pukaar Kar Cheekhnay Lagti..Sajida Baji Mujhay Injuction Laga Kar Phir Duniya.O.Ma'Feeha Say Bay Khabar Kar Datee'n..Mai'n Firasat Say Milna Chahti Thi Laikin Sajida Baji Nay Mujh Ko Aesa Na Karnay Diya Kay '' Un Kam Zarf Owr Bay'Ghairat Logo'n Say Ab Tumhara Koi Waasta Nahi ''
Mai'n Nay Woh Tamaam Arsa Kaisay Guzara Yeh Mai'n Jaanti Hoo'n Ya Maira Allah...

Phir Suna Kay Baba Waghaira Ghar Hi Chowr Gaey Hai'n..

Sajida Baji Nay Bouhat Kaha Kay '' Wapas Amma'n Kay Paas Chali Jaao ''

Laikin Mai'n Bhala Kaisay Jaati Kay Mairay Sar Par To Abba Ka Thanda Larazta Huwa Haath Dhara Tha Owr Un Ka Woh Toot'ta Laihja Mairay Kano'n Mai'n Goonjta Rehta Tha '' Bitya! Maira Sar Na Jhukana ''

Mai'n Bhala Waha'n Ja Kar Apnay Bad'Naseeb Marhoom Baap Ko Yeh Taana Kis Tarha Dil'Wati Kay BaitiTalaaq Lay Kar Waapas Aa Gai Hay...Amma'n Ko Kaisay Batati Kay Un Ki Nazo'n Ki Pali Baiti Par Aik Aik Pal Kis Tarha Beeta..Mairi Baiwa Amma'n Aik Owr Sadma Kis Tarha Saihtee'n...

Mai'n Nay Sajida Baji Kay Pair Pakar Liye Kay '' Mujhay Khud Say Juda Na Kijiye ''... Owr Unho'n Nay Mujh Ko Utha Kar Galay Say Laga Liya Kay Aaj Say Mairi 6 Baitiya'n Hai'n...

Firasat Ki Achanak Judai Say Mai'n Neem Pagal Si Ho Gai..Ghanto'n Baithi Raihti, Mosamo'n Kay Sard.O.Garm Thapairo'n Say Bay Niyaz Ho Chuki Thi...

'' Rija Kab Tak Us Bay'Ghairat Owr Buzdil Insaan Ka Sog Manaao Gi? Woh Mar Chuka Hay...Bhool Jaao''

Mai'n Ghair Marai Nuqtay Ko Daikhti Rehti Owr Aansu Mairi Aankho'n Say Lariyo'n Ki Soorat Mai'n Baihtay Raihtay...

Page 9

Sajida Baji Nay Kisi Na Kisi Tarha Mujhay Thora Sa Zindagi Ki Taraf Ghaseeta...Mai'n Nay Zabar'Dasti Sajida Baji Kay Ghar Ki Kaam Karnay Waali Maasi Churwa Di Kay '' Baji Mai'n Ghar Ka Kaam Karoo'n Gi Warna Roti Mairay Halaq Say Nahi Utray Gi. ''

Sajida Baji Nay Bara Zor Diya Kay '' Tum Mairi Baiti Ho '' Laikin Mai'n Na Mani Owr Ghar Ka Tamam Kaam Kaaj Apnay Zimmay Lay Liya..Un'Kay Clinic Mai'n Bhi Haath Batanay Lagi...Silaai Bhi Shuru Kar Di...

Mujh Ko Is Tarha Masroof Daikh Kar Sajida Baji Nay Bhi Sukoon Ki Saans Li Kay Mairay Liye Aesi Hi Masroofiyat Zaroori Thi...

Woh Bay'Chaari Kaha'n Jaanti Thee'n Kay Mai'n Khud Ko Kitna Hi Masroof Kar'Loo'n Mairay Zaihen Ka Aik Gosha Sirf Firasat Kay Liye Sochta Raihta Hay, Mai'n Us'Ko Bhula Nahi Sakti...Mairay Zaihen Kay Parday Par Aik Film Si Chalti Raihti Hay Jis Kay Har Manzar Mai'n Kabhi Mai'n Ubharti Hoo'n Kabhi Doobti Hoo'n...Kabhi Amma'n Aa'Jaati Hai'n Owr Kabhi Abba Chalay Aatay Hai'n...

Bachpan Say Lay Kar Aaj Tak Ki Film Har Waqt Mairay Zaihen Mai'n Chalti Rehti Hay...

Din To Maira Paraya Hota Tha Laikin Raat To Mairi Apni Hoti Thi Owr Us Par Kisi Ka Bas Na Chalta Tha, Maira Apna Bhi Nahi...Aankho'n Say Jalta Huwa Paani Baihta Owr Jab Yeh Paani Khushk Hota To Aankho'n Mai'n Angaray Say Bhar Jaatay...In Bharaktay Angaro'n Mai'n Dhara Dhar Mairay Khuaab Jalnay Lagtay...

Mai'n Hairan Hoti Thi Kay Mai'n Firasat Ko Kiyu'n Yaad Karti Hoo'n? Us'Ki Kown'Si Batai'n Yaad Karti Hoo'n? Jab Kay Aaj Mai'n Jis Haal Mai'n Hoo'n Us Ka Wahi To Zimmay'Daar Hay..Laikin Woh Dil Hi Kiya Jis Par Maira Bas Chal Jata..

Kaha'n To Firasat Mairi Mohabbat Mai'n Mara Ja Raha Tha Owr Ab Yeh Hadd Kay Kabhi Mairi Khabar Bhi Na Li Kay Rija Tum Nay Yeh Sab Kaisay Bardasht Kiya? Zinda Ho Kay Mar Gaei'n? Khud Say Sawaal Jawaab Kartay Kartay Mai'n In Howl'Naak Rato'n Ki Subha Kar'Daiti...Dimaagh Phatnay Lagta To Dawaei'n Kha Kar So Jaati..

Mujhay Apna Hi Hosh Kaha'n Tha Jo Mai'n Amma'n Ki Khabar Rakhti..Itnay Arsay Mai'n Nay Amma'n Ki Khabar Na Li Laikin Amma'n Hi Apnay Achay Mamoo'n Ko Liye Sajida Baji Kay Ghar Pata Poochtay Poochtay Pohanch Gaei'n...

Mai'n Khari Ki Khari Reh Gai...Jo Khichri Baal Mai'n Chowr Kar Aai Thi Ab Woh Safaid Buraaq Ho Chukay Thay..Bouhat Kamzor Ho Gai Thee'n, Usi Tarha Kapray Ka Bana Batwa Galay Mai'n Latka Huwa Tha...

Mai'n Is Khuaab Ko Torna Nahi Chahti Thi Is Liye Khamosh Khari Baghair Palkai'n Jhapkaey Is Manzar Mai'n Khoi Rahi...

Jab Amma'n '' Haaey Mairi Bitya! '' Kaih Kar Mujh Say Deewana Waar Liptee'n To Mujh Ko Pata Chala Kay Yeh Khuaab Nahi Haqeeqat Thi...Mairi Cheekhai'n Buland Say Buland Tar Hoti Chali Gaei'n... Mai'n Aesa Roi Kay Sab Kay Kalaijay Phatnay Lagay..Aansuo'n Ka Tufaan Tha Kay Thamta Hi Na Tha...Mai'n Amma'n Ki Aagosh Mai'n Pari Mahi-e-Bay'Aab Ki Tarha Tarap Rahi Thi... Amma'n Kay Aansu Mairay Chaihray Par Baras Rahay Thay...

Sajida Baji Nay Qasmai'n Day Kar Alaihda Kiya... Un'Ki Baitiyo'n Ki Aankhai'n Bhi Ro Ro Kar Sooj Gai Thee'n..Mairi To Hichkiya'n Hi Na Rukti Thee'n...

Amma'n Nay Sajida Baji Ko Apnay Sar Ki Qasam Day Kar Poocha Kay '' Kuch To Bataao Mairi Is Phool Si Bachi Par Kiya Guzri? Mai'n To Khat Bhaij Bhaij Kar Thak Chuki Thi Har Tarha Raabtay Ki Koshish Ki Phir Khud Hi Rawana Ho Gai ''

Achay Mamoo'n Mujhay Kandhay Say Lagaey Aansu Baha Rahay Thay..

Sajida Baji Nay Bouhat Kaha Kay '' Paihlay Aap Aaraam Kar Lijiye, Kuch Kha Pi Lijiye, Itnay Lambay Safar Say Thaki Hui Aai Hai'n Phir Batai'n Bhi Ho Jaei'n Gi ''

Magar Amma'n Nay Ratt Laga Li Kay '' Aray Mairay Halaq Say To Paani Bhi Nahi Utray Ga.. Haey Maira Qalb Ulta Ja Raha Hay..Daikho Chupana Nahi Tum Ko Apni Bachiyo'n Ka Waasta Mujh Ko Tamaam Batai'n Sach Sach Bata Do Kay Kiya Guzri Mairi Chanda Par? Kiya Guzar Gai Mairi Rija Par?

Owr Sajida Baji Nay Mukhtasir Towr Par Tamaam Tar Sachaai Jo Batana Shuru Ki To Amma'n Ka Chaihra Paihlay To Ghussay Say Laal Bhabhooka Ho Gaya Owr Phir Dhulay Huway Latthay Ki Tarha Safhaid Par Gaya..Unho'n Nay Apnay Seenay Par Do'Hathar Mara Owr '' Haey Mairi Bitya! '' Kaih Kar Taiwra Kar Gir Paree'n...

Mai'n Sab Bhool Bhaal Kar Amma'n Mai'n Lag Gai..Achay Mamoo'n Nay Ghabra Kar Bataya Kay '' Tumhari Judaai Owr Abba Kay Marnay Kay Baad Dil Ki Mareeza Ban Gai Hai'n Khuda Khair Hi Karay ''...
Mairay To Hawaas Saath Chor Gaey...Amaa'n Ko Fowran Hospital Lay Jaya Gaya....Laikin Woh Raastay Hi Mai'n Apnay Khaaliq-e-Haqeeqi Say Ja Milee'n...

Haya n · 06-06-2007, 07:23 PM

Page 10

Amma'n Ko Un'Ki Qaza Hi Yaha'n Khainch Laai Thi Ya Mai'n Manhoos Hi Apni Amma'n Ko Kha Gai Thi...

'' Haey Amma'n Tum Itnay Lambay Safar Say Aai Thee'n, Aik Saans Bhi To Sukoon Ki Na Li...Aik Luqma Bhi To Halaq Say Na Utara, Paani Ka Aik Ghoont Na Piya, Haaey Amma'n Tum Kiyu'n Aa Gai Thee'n? ''

Mai'n Tarap Tarap Kar Sab Kay Haatho'n Say Nikli Jaati Thi, Mairi Amma'n Khud Chal Kar Mairay Paas Aaei'n Owr Mowt Nay Un'Ko Chand Hi Lamho'n Mai'n Mujh Say Cheen Liya...Abhi To Mai'n Nay Dil Bhar Kay Tum Ko Daikha Bhi Na Tha, Abhi To Abba Ki Batai'n Bhi Na Ki Thee'n, Tum Say Kuch Poocha Bhi Na Tha Kay Mairay Aanay Kay Baad Tum Nay Kis Tarha Niwala Halaq Say Neechay Utara, Kitni Martaba Mairay Bister Ko Pyar Kiya, Mujh Ko Kis Kis Tarha Yaad Kiya, Haey Amma'n Yeh Kiya Ghazab Kar Diya Tum Nay? ''...Mai'n Tarapti Raihti, Takkarai'n Lagati Raihti...

Achay Mamoo'n Nay Mujhay Saath Lay Jana Chaha Laikin Mai'n Ab Kis Kay Pas Jati..Ab Waha'n Maira Kis Ko Intizar Tha?...Mai'n Nay Rotay Huway Inkaar Kar Diya...

'' Hamai'n Kiya Bura Tha Marna Agar Aik Baar Hota '' Shayed Shaair Nay Yeh Misra Mairay Liye Hi Qalam Band Kiya Tha...Mairi To Ab Yeh Samajh Mai'n Na Aata Tha Kay Mai'n Zinda Kiyu'n Hoo'n? Mairay Is Wujood Ka Ab Kiya Sabab Hay? Is Duniya Mai'n Reh Janay Ki Kiya Wajha Hay? Ab To Tamaam Qissay Hi Khatam Ho Gaey Thay..Kahani Shuru Bhi Hui Owr Khatam Bhi Ho Gai...Mai'n Ab Kis Aas Par Saans Lay Rahi Thi, Yeh Dor Toot Kiyu'n Na Rahi Thi?

Agar Is Duniya Mai'n Baba Jaisay Loge Mowjood Thay To Sajida Baaji Owr Jameel Bhaai Jaisay Loge Bhi Mowjood Thay Jinho'n Nay Qadam Qadam Par Apno'n Say Barh Kar Sahara Diya Shayed Isi Liye Is Duniya Ka Nizaam Chal Raha Tha Kay Buray Logo'n Kay Ilawa Achay Logo'n Ka Wujood Bhi Qaaim Tha...

Sajida Baji Owr Jameel Bhaai Mujh Ko Zindagi Kay Nashaib.O.Faraz Samjhatay Raihtay...Owr Mai'n Roti Raihti...

Aik Si Udaas Subhai'n, Aik Si Udaas Do'Paihrai'n Owr Dhalti Shamai'n, Roti Ratai'n Maira Muqaddar Ban Chuki Thee'n...

Yeh Woh Zindagi To Na Thi Jo Kahaniyo'n Owr Filmo'n Mai'n Nazar Aati Thi...Teen Ghanto'n Mai'n Sab Kuch Ho Gaya..Bachay Baray Ho Gaey, Jawani Aa Gai, Mohabatai'n Parwaan Charhee'n, Zaalim Samaaj Raah Mai'n Haail Huwa Owr Khatam Bhi Ho Gaya...Pyar Bharay Geet Gaey Gaey Owr Film Kay Aakhir Mai'n Group Photo Khinch Gaya Jis Mai'n Har Shakhs Hansta Muskurata Nazar Aata...Yeh Mairi Kaisi Kahani Thi Kay Na Is Ka Koi Aaghaaz Nazar Aaya Na Anjaam...Mai'n Kitni Dheet Thi Kay Ba'Zahir To Kaanch Say Bhi Naazuk Nazar Aati Owr Itna Kuch Saih Kar Bhi Zinda Thi...

Waqt Ka Kaam Hi Guzarna Hay Chahay Woh Hans Kar Guzray Chahay Ro Kar Guzray Albatta Guzar Zaroor Jata Hay...So Mai'n Bhi Waqt Ko Aagay Dhakailti Rahi...

Page 11

Sajida Baji Owr Jameel Bhaai Mujh Ko Samjhatay Kay '' Daikho Rija! Tumharay Aagay Tumhari Poori Umar Pari Hay Kab Tak Is Ko Ro Kar Guzarti Raho Gi? Kab Tak Firasat Ka Matam Karti Raho Gi Woh Tumharay Liye Mar Chuka Hay ''...

'' Sajida Baji Qasam Say Mai'n Firasat Kay Liye To Aesa Nahi Kar Rahi.. Us Say To Mujhay Nafrat Ho Chuki Hay.. Bas Mai'n Aap Logo'n Kay Saath Hi Raihna Chahti Hoo'n Mujhay Ab Zindagi Say Kiya Laina Daina ''

'' Nahi Rija! Tum Nahi'n Samajhtee'n, Abhi Tumhari Umar Hi Kiya Hay..Mai'n Khud Baitiyo'n Wali Hoo'n Mai'n Bhala Jaantay Boojhtay Kis Tarha Tum Ko Aesa Kar'Nay Doo'n? Tum Apnay Sath Insaaf To Nahi Kar Rahee'n? Mai'n Kis Tarha Apni Aankhai'n Band Kar Loo'n? Duniya Mai'n Buray Loge Hai'n To Achay Loge Bhi Isi Duniya Mai'n Mowjood Hai'n, Har Buraai Kay Peechay Achaai Chupi Baithi Hay, Har Andhairay Kay Peechay Sawaira Chupa Baitha Hay, Har Gham Kay Peechay Khushi Chupi Baithi Hay...Tum Himmat To Karo, Aetbaar To Karo ''...

Mai'n Un Ki Batai'n Sun Kar Ro Daiti Owr Bay'Basi Say Kaihti '' Sajida Baji! Yeh Sab Kitabo'n Mai'n Likhi Batai'n Hai'n Jin Ka Mairi Zindagi Mai'n To Koi Amal Dakhal Nahi...Mai'n Nay Sachaai Ko Buraai Kay Hatho'n Khatam Hotay Daikha Hay, Mai'n Nay Sawairay Ko Andhairay Say Shikast Khatay Daikha Hay, Mai'n Nay Khushiyo'n Ko Gham Kay Hatho'n Qatl Hotay Daikha Hay...Mujhay To Ab Kisi Par Aetbaar Nahi...Maira Aetbaar Mar Chuka Hay...Mai'n Aap Say Juda Hui To Mowt Hi Maira Muqaddar Banay Gi ''

Mai'n Sajida Baji Kay Hatho'n Mai'n Chaihra Chupa Kar Bay'Basi Say Ro Parti...

Waqt Nay Kuch Karwatai'n Owr Badlee'n Owr Mai'n Thori Bouhat Baihli Thi Kay Aesay Mai'n Jameel Bhai Mairay Liye Rishta Lay Kar Aa Gaey...
Dabeer Ka Maxico Mai'n Business Tha..Paihli Biwi Ko Zaihni Ham'Aaghangi Na Honay Kay Baa'Is Chowr Chukay Thay, Dabeer! Jameel Bhaai Kay Bouhat Achay Dosto'n Mai'n Say Thay.. Dono'n Saath College Mai'n Parhay Thay Is Liye Jameel Bhai Ka Israar Tha Kay '' Sirf Umar Ka Farq Hay Warna Dabeer Intehaai Shareef Owr Mehnti Insaan Hay ''

Jameel Bhai Nay Dabeer Ki Tareefo'n Kay Pul Baandh Diye... Dono'n Mujh Ko Samjhanay Lagay Kay '' Haqeeqat Phir Haqeeqat Hay.... Hamaray Moashray Mai'n Kanwariyo'n Ko Rishtay Mushkil Say Miltay Hai'n Tum Bay'Qusoor Sahi Laikin Ho To Talaaq Yaafta, Hamari Apni Paanch Baithiya'n Hai'n, Ham Khud Majboor Hai'n..Phir Abhi Tumhari Umar Hi Kiya Hay? Kis Aasray Par Jawani Guzaro Gi? Dabeer Mai'n Is Kay Siwa Koi Khaami Nahi Kay Un Ki Umar Chalees Baras Hay Owr Wo Aik Jawan Baitay Kay Baap Hai'n....Baqi Woh Achaiyo'n Ka Majmooa Hai'n ''

Woh Loge Mujhay Samjhatay Rahay..Mairay Dil Par Aaray Say Chal Rahay Thay Kay Itnay Hi Achay Hai'n Dabeer To Aap Apni Baiti Ka Rishta Kiyu'n Nahi Tay Kar Daitay? Laikin Mai'n Kuch Bol Na Saki.. Bhala Kiya Bolti? Mairi To Saans Saans Un Kay Aehsano'n Talay Dabi Hui Thi..

'' Jaisay Aap Logo'n Ki Marzi '' Itna Kaih Kar Mai'n Roti Hui Kamray Mai'n Bhaag Gai..

Maira Nikaah Intehaai Saadgi Say Dabeer Say Parha Diya Gaya Owr Mairi Rukhsati Amal Mai'n Aai...

Mairay Pairo'n Mai'n Bandhay Bhanwar Mujh Ko India Say Pakistan Owr Pakistan Say Maxico Lay Aaey...

Page 12

Ajnabi Dais, Ajnabi Cheihray, Ajnabi Zuban, Gharaz Kay Chand Hi Ghanto'n Mai'n Mairi Duniya Hi Badal Gai..Her Her Cheez Say Ajnabiyat Tapak Rahi Thi..

'' Parwar'Digar Mujhay Himmat Day, Howsla Day Kay Mai'n Is Zindagi Ko Nibha Sakoo'n '' Maira Dil Bay'Qaraari Say Ro Para...

Dabeer Waqai Bouhat Shareef Insan Saabit Huway...Mujhay Tasalli Tashaffi Dainay Mai'n Unho'n Nay Koi Kasar Na Utha Rakhi...Khanay Peenay, Paihannay Orhnay Ki Her Cheez Baghair Kahay La Daitay...

Un Ka Baita Raghib Jo Ab Maira Bhi Baita Hi Tha Woh Kisi Kaam Say Mulk Say Bahar Gaya Huwa Tha..

Dabeer Mujh Say Bouhat Batai'n Kartay, Mujhay Samjhatay Owr Un Ki Tamaam Bato'n Kay Jawaab Mai'n Mairay Paas Sirf Aik Lafz Hota '' Ji ''

Mairay Mutaliq Un'Ko Sab Kuch Pata Tha Isi Liye Mujh Ko Samjhatay Rehtay Kay Mai'n Khush Rahoo'n...Dabeer Mujh Ko Bouhat Khush Daikhna Chahtay Thay...

Mai'n Nay Bhi Poori Koshish Shuru Kar Di Kay Mai'n Dabeer Ki Tawaqoat Owr Khuahishat Par Poori Utroo'n..

Ghar Ka Tamaam Kaam Mai'n Dabeer Kay Aanay Say Paihlay Hi Khatam Kar Laiti..Ham Loge Ghoomnay Nikal Jatay..Kitni Ajeeb Duniya Thi Yeh..Kisi Ko Kisi Say Koi Sar.O.Kaar Na Tha.. Her Shakhs Apni Hi Dhun Mai'n Magan Nazar Aata...Koi Bay Tarteebi Mehsoos Na Hoti...Koora Tak Apnay Time Par Phainka Jaata...

Isi Dowran Raghib Bhi Aa Gaya...Woh Mujh Say Bouhat Garam Joshi Say Mila..Umar To Us Ki Mairay Hi Barabar Thi Laikin Qadd Kaath Mai'n Khoob Lamba Chowra Tha..Bouhat Hans Mukh Sa Larka Tha..

Mujh Ko Raghib Nay Ammi To Na Kaha Albatta Baji Kehna Shuru Kar Diya...Dabeer Nay Bhi Is Baat Par Koi Zor Na Diya..

Mairay Aa Janay Say Ghar Ka Aik Mahowle Ban Gaya Tha..Raghib College Say Aanay Kay Baad Mairay Mana Karnay Kay Ba'Wajood Maira Haath Bhi Batata.. Owr Ziyada Tar Ghar Par Hi Waqt Guzaarta...Us Ka Baihter Sulook Daikh Kar Dabeer Ko Bhi Mairi Taraf Say Kuch Sukoon Naseeb Huwa...

Waqt Kuch Acha Guzar'Nay Laga..Raghib Mujhay Yaha'n Ki Zubaan Sikhanay Laga ..Mai'n Thora Bouhat Seekh Gai Laikin Jab Bolnay Ka Time Aata To Mai'n Nervious Ho Jati Owr Mujh Say Aik Lafz Na Bola Jata...

Baad Mai'n Raghib Khoob Naraaz Hota Owr Mai'n Her Martaba Waada Kar Laiti Kay '' Acha Ab Zaroor Bolu'n Gi ''

Aik Din Raghib Ghar Par Hi Tha Kay Mairi Parosan Julia Aa Gai...Mai'n Paihlay To Khoob Nervious Hui Laikin Raghib Ki Aankho'n Mai'n Narazgi Daikh Kar Julia Say Baat Cheet Shuru Kar Di...

Julia Bhi Bouhat Khush Hui Us Nay Mairi Bouhat Howsla Afzaai Ki Owr Kaha Kay '' Tum Mairay Paas Aa Jaya Karo Is Tarha Zubaan Bhi Jald Seekh Lo Gi Owr Waqt Bhi Acha Guzray Ga '' Thori Dair Baith Kar Julia Apnay Ghar Chali Gai..

Raghib Bouhat Khush Tha..Khoob Tareef Owr Howsla Afzaai Ki..Woh Bilkul Ustado'n Ki Tarha Khush Ho Raha Tha...Dabeer Ko Pata Chala To Woh Bhi Bouhat Khush Huway...

Jaha'n Rehna Tha Waha'n Ki Zubaan Seekhay Baghair Chara Kaha'n Tha? Hala'n Kay Mujhay Koi Dil'Chaspi Na Thi Kay Yeh Sab Seekhti Laikin Dabeer Owr Raghib Say Ab Mairi Zindagi Wabasta Ho Chuki Thi Owr Un Ki Khushi Mujhay Sab Say Muqaddam Thi...

Haya n · 06-06-2007, 07:26 PM

Page 12

Ajnabi Dais, Ajnabi Cheihray, Ajnabi Zuban, Gharaz Kay Chand Hi Ghanto'n Mai'n Mairi Duniya Hi Badal Gai..Her Her Cheez Say Ajnabiyat Tapak Rahi Thi..

'' Parwar'Digar Mujhay Himmat Day, Howsla Day Kay Mai'n Is Zindagi Ko Nibha Sakoo'n '' Maira Dil Bay'Qaraari Say Ro Para...

Dabeer Waqai Bouhat Shareef Insan Saabit Huway...Mujhay Tasalli Tashaffi Dainay Mai'n Unho'n Nay Koi Kasar Na Utha Rakhi...Khanay Peenay, Paihannay Orhnay Ki Her Cheez Baghair Kahay La Daitay...

Un Ka Baita Raghib Jo Ab Maira Bhi Baita Hi Tha Woh Kisi Kaam Say Mulk Say Bahar Gaya Huwa Tha..

Dabeer Mujh Say Bouhat Batai'n Kartay, Mujhay Samjhatay Owr Un Ki Tamaam Bato'n Kay Jawaab Mai'n Mairay Paas Sirf Aik Lafz Hota '' Ji ''

Mairay Mutaliq Un'Ko Sab Kuch Pata Tha Isi Liye Mujh Ko Samjhatay Rehtay Kay Mai'n Khush Rahoo'n...Dabeer Mujh Ko Bouhat Khush Daikhna Chahtay Thay...

Mai'n Nay Bhi Poori Koshish Shuru Kar Di Kay Mai'n Dabeer Ki Tawaqoat Owr Khuahishat Par Poori Utroo'n..

Ghar Ka Tamaam Kaam Mai'n Dabeer Kay Aanay Say Paihlay Hi Khatam Kar Laiti..Ham Loge Ghoomnay Nikal Jatay..Kitni Ajeeb Duniya Thi Yeh..Kisi Ko Kisi Say Koi Sar.O.Kaar Na Tha.. Her Shakhs Apni Hi Dhun Mai'n Magan Nazar Aata...Koi Bay Tarteebi Mehsoos Na Hoti...Koora Tak Apnay Time Par Phainka Jaata...

Isi Dowran Raghib Bhi Aa Gaya...Woh Mujh Say Bouhat Garam Joshi Say Mila..Umar To Us Ki Mairay Hi Barabar Thi Laikin Qadd Kaath Mai'n Khoob Lamba Chowra Tha..Bouhat Hans Mukh Sa Larka Tha..

Mujh Ko Raghib Nay Ammi To Na Kaha Albatta Baji Kehna Shuru Kar Diya...Dabeer Nay Bhi Is Baat Par Koi Zor Na Diya..

Mairay Aa Janay Say Ghar Ka Aik Mahowle Ban Gaya Tha..Raghib College Say Aanay Kay Baad Mairay Mana Karnay Kay Ba'Wajood Maira Haath Bhi Batata.. Owr Ziyada Tar Ghar Par Hi Waqt Guzaarta...Us Ka Baihter Sulook Daikh Kar Dabeer Ko Bhi Mairi Taraf Say Kuch Sukoon Naseeb Huwa...

Waqt Kuch Acha Guzar'Nay Laga..Raghib Mujhay Yaha'n Ki Zubaan Sikhanay Laga ..Mai'n Thora Bouhat Seekh Gai Laikin Jab Bolnay Ka Time Aata To Mai'n Nervious Ho Jati Owr Mujh Say Aik Lafz Na Bola Jata...

Baad Mai'n Raghib Khoob Naraaz Hota Owr Mai'n Her Martaba Waada Kar Laiti Kay '' Acha Ab Zaroor Bolu'n Gi ''

Aik Din Raghib Ghar Par Hi Tha Kay Mairi Parosan Julia Aa Gai...Mai'n Paihlay To Khoob Nervious Hui Laikin Raghib Ki Aankho'n Mai'n Narazgi Daikh Kar Julia Say Baat Cheet Shuru Kar Di...

Julia Bhi Bouhat Khush Hui Us Nay Mairi Bouhat Howsla Afzaai Ki Owr Kaha Kay '' Tum Mairay Paas Aa Jaya Karo Is Tarha Zubaan Bhi Jald Seekh Lo Gi Owr Waqt Bhi Acha Guzray Ga '' Thori Dair Baith Kar Julia Apnay Ghar Chali Gai..

Raghib Bouhat Khush Tha..Khoob Tareef Owr Howsla Afzaai Ki..Woh Bilkul Ustado'n Ki Tarha Khush Ho Raha Tha...Dabeer Ko Pata Chala To Woh Bhi Bouhat Khush Huway...

Jaha'n Rehna Tha Waha'n Ki Zubaan Seekhay Baghair Chara Kaha'n Tha? Hala'n Kay Mujhay Koi Dil'Chaspi Na Thi Kay Yeh Sab Seekhti Laikin Dabeer Owr Raghib Say Ab Mairi Zindagi Wabasta Ho Chuki Thi Owr Un Ki Khushi Mujhay Sab Say Muqaddam Thi...

Page 13...

Mairi Tabiyat Nidhal Si Rehnay Lagi Owr Ultiya'n Shuru Ho Gaei'n...Lady Doctor Nay Maa'n Bannay Ki Khush Khabri Sunai...Dabeer Nay Bouhat Khushi Ka Izhaar Kiya Jab Kay Raghib Ka Kuch Pata Nahi Chal Raha Tha Kay Woh Khush Hay Ya Na'Khush...

Na Janay Mai'n Kiyu'n Khowf Zada Si Rehnay Lagi Thi Jab Kay Yeh Mairay Liye Aik Bouhat Bari Khush Khabri Thi...

Dabeer Paihlay Say Barh Kar Maira Khayal Rakhnay Lagay...
Jaisay Jaisay Waqt Guzarta Gaya Mairi Ultiya'n To Band Ho Gaei'n Lakin Mai'n Sotay Say Dar Kay Uth Jaati...Aik Na Maloom Sa Khowf Maira Peecha Karta Raihta...Dil Ki Dharkan Itni Taiz Rehti Kay Lagta Dil Seenay Say Bahar Nikal Aaey Ga...

Mai'n Dabeer Ka Haath Pakray Raihti Kay Kaam Par Na Jaiye...Bhala Aesa Kitnay Din Mumkin Tha...Dr. Nay Mujhay Sukoon Ki Dawaei'n Dee'n... Mai'n Ziyada Tar Ghafil Pari Rehti...In Halaat Mai'n Raghib Nay Maira Bouhat Khayaal Rakha...Apnay Hath Say Juice Pilata, Zabardasti Kuch Na Kuch Khilata Pilata Raihta, Mairay Baihtay Aansu Saaf Kar Kay Mujhay Bahadur Bannay Ki Talqeen Karta...Laikin Maira Woh Na Maloo'n Sa Khowf Aakhri Lamhay Tak Maira Peecha Karta Raha...Is Na Maloo'n Khowf Mai'n Ghiri Mai'n Aik Khoobsurat Say Baitay Ki Maa'n Ban Gai...

Allah Nay Dayem Ki Soorat Mai'n Maira Daman Maamta Ki Anmol Dowlat Say Bhar Diya...

Hospital Say Ghar Aai To Dabeer Owr Raghib Bouhat Khush Huway...Raghib Nay Bhi Dayem Ko Bouhat Pyar Kiya...

Mairi Bhi Yahi Koshish Hoti Kay Mairi Zaat Say Kisi Ko Koi Takleef Na Pohnchay...Mujh Say Koi Kotahi Na Ho...Dabeer Mairi Taraf Say Mutmain Ho Kar Apnay Kaam Mai'n Dobara Masroof Ho Gaey... Raghib Ka Aik Achi University Mai'n Daakhla Ho Gaya Tha ...University Say Aa Kar Tamaam Waqt Ghar Par Mairay Saath Hi Guzarta...Tamaam Kaam Mai'n Owr Raghib Mil Kar Kartay...Waqt Bouhat Khush Gawaar Guzar Raha Tha...Dayem Masha Allah Bouhat Khoobsurat Owr Pyara Bacha Tha Bilkul Tang Na Karta...Mairi Saihat Par Bhi Khushgawar Asaraat Murattab Huway Owr Mai'n Khili Khili Rehnay Lagi Jis Say Dabeer Bouhat Khush Owr Mutmain Rehnay Lagay...

Aik Din Dopeher Ko Mai'n Hasb-e-Mamool Dayem Ko Sula Kar Us Ko Thapak Rahi Thi Kay Achanak Raghib Bhi Wahee'n Bister Par Kohni Kay Ball Lait Gaya Owr Ghowr Say Dayem Ko Daikhnay Laga ...Kafi Dair Baad Dheeray Say Bola...

'' Dayem Bilkul Aap Ki Copy Hay..Waisi Hi Hosh.O.Hawaas Cheen Lainay Wali Aankhai'n, Pyari Si Nanhi Munhi Si Naak Owr Khoobsurat Gulaabi Gulaabi Narm.O.Nazuk Labb, Jin Ko Bay Ikhtiyaar Pyar Karnay Ko Dil Chahay...''

Yeh Kaih Kar Us Nay Soey Huway Dayem Kay Labo'n Par Pyar Kiya Owr Kamray Say Bahar Nikal Gaya...

Maira Dil Dhak Say Reh Gaya Kay Yeh Kiya Keh Gaya Raghib? Mai'n Apnay Ko Laakh Bahanay Bana Bana Kar Samjhanay Lagi Kay Nahi Nahi Aesi Koi Baat Nahi Hay, Us Ki To Aadat Hi Aesi Hay, Woh To Apnay Bhaai Ki Tareef Kar Raha Tha, Yeh To Us Ka Bhaai Say Chahat Ka Aik Andaaz Tha, Laikin Kuch Aesa Tha Kay Maira Ander Mutmain Na Ho Pa Raha Tha...Mai'n La Shaoori Towr Par Mohtaat Ho Gai...Khud Ko Mazeed Masroof Kar Liya...Ander Hi Ander Her Waqt Dua Karti Rehti Kay Maira Wehem, Wehem Hi Rahay, Mairay Khadshaat Bay Bunyaad Hi Rahai'n...

Dabeer Owr Raghib Ka Ji Jaan Say Khayal Rakhti...Dabeer Mujh Ko Bouhat Chahtay Thay Woh Waqai Bouhat Mehnti Owr Shareef Insaan Sabit Huway Thay...Mai'n Bhi Rafta Rafta Un Ki Mohabbat Mai'n Doobti Chali Gai...Woh Thay Hi Is Qabil Kay Un Ko Toot Kar Chaha Jata Phir Mai'n Bhala Kaisay Na Chahti...

Page 14

Mai'n Fridge Ki Safai Kar Rahi Thi Kay Raghib Wahee'n Chala Aaya Owr Mujhay Khamoshi Say Kaam Kartay Daikhnay Laga...Mai'n Nay Us Ko Bilkul Nazar Andaaz Kar Diya...Woh Mairay Qareeb Chala Aaya...'' Kiya Kar Rahi Hai'n? ''

'' Tum Ko Kiya Nazar Aa Raha Hay? '' Mai'n Nay Kaam Jaari Rakhtay Huway Normal Andaz Mai'n Jawaab Diya...

'' Kuch Dair Mairay Paas Bhi Baithiye...'' Woh Apnay Makhsoos Lab.O.Laihjay Mai'n Bola...

'' Haa'n Haa'n Baithoo'n Gi Kaam To Khatam Kar Loo'n? ''

'' Nahi Paihlay Batai'n Phir Kaa'm...''

'' Fridge To Saaf Kar Loo'n Warna Khuah Makhah Museebat Khari Ho Jaey Gi...Aata Khameer Ho Jaey Ga Abhi Mujhay Salan Bhi Pakana Hay...Tum Jao Thori Dair Dayem Kay Saath So Jao...Mai'n Itni Dair Mai'n Kaam Khatam Kar Loo'n ''

Mai'n Nay Sahoolat Say Usay Samjhaya Laikin Us Nay Kandho'n Say Pakar Kar Maira Rukh Apni Taraf Kar Liya...

Maira Dil Dar Kay Maray Taizi Say Dhak Dhak Karnay Laga Laikin Mai'n Nay Sakhti Say Us Kay Haath Jhitak Diye...Yeh Kiya Battamizi Hay Raghib? Mujhay Kaam Karnay Do...

'' Please Mairi Baat Sun Lijiye Warna Maira Dimagh Phat Jaey Ga ''....

'' Aesi Kiya Baat Hay Jo Mujhay Is Tarha Mukhatib Kar Rahay Ho? '' Mai'n Nay Khurdaray Laihjay Mai'n Sakhti Say Poocha...

'' Mai'n Nay Hazaar Baar Khud Ko Roka Hay Kay Na Kahoo'n, Laikin Mai'n Bouhat Majboor Hoo'n... Kiya Kahoo'n Kiya Na Kahoo'n? Kuch Samajh Mai'n Nahi Aa Raha ''

Mairay Zehen Mai'n Khatray Ki Ghantiya'n Bajnay Lagee'n...

'' Nahee'n Samajh Mai'n Aa Raha To Na Kaho...Mujhay Kaam Karnay Do, Dabeer Aa Jaei'n Tab Araam Say Baat Kar Laina ''...

'' Uffoo Aap Samajhti Kiyu'n Nahi Hai'n? '' Woh Kuch Jhunjhla Sa Gaya...

'' Kiya Nahi Samajhti? '' Mai'n Nay Hairani Say Usay Daikha...

'' Jis Din Mai'n Nay Aap Ko Paihli Martaba Daikha Tha Usi Din Maira Ideal Mairi Aankho'n Kay Saamnay Jeeta Jaagta Namoodaar Ho Gaya Tha...Mai'n Abbu Say Bouhat Mohabbat Karta Hoo'n Laikin Tamam Tar Haqeeqat Jaanay Kay Ba Wajood Maira Dil Aap Ko Behen Ya Maa'n Ki Haisiyat Kabhi Nahi Day Sakta...Mai'n Aap Say Shadeed Mohabbat Karta Hoo'n...Is Ghar Ko Aik Aurat Ki Zaroorat Thi...Abbu Nay Khud Kiyu'n Shaadi Kar Li? Woh Bhi Aap Say Jo Khud Unki Owlaad Kay Barabar Hay...Mairi Shadi Aap Say Kar Daitay Tab Bhi To Aik Aurat Is Ghar Mai'n Aa Jati...Mai'n Aap Kay Baghair Nahi Reh Sakta ''...

'' Bas Karo Raghib, Khamosh Ho Jao Warna Aasmaan Phat Paray Ga ''... Mai'n Karb Say Cheekhi, '' Apni In Bayhooda Bato'n Samait Mairi Nazro'n Say Door Ho Jao Warna Mai'n Apni Jaan Day Doo'n Gi ''...

Mai'n Wahee'n Farash Par Baith Kar Phoot Phoot Kar Ronay Lagi...Raghib Taizi Say Ghar Say Bahar Chala Gaya...

Ro Ro Kar Mairi Halat Kharab Ho Gai, Yeh Kiya Ho Gaya Tha? Ab Kiya Ho Ga? Kiya Mai'n Dabeer Ko Bata Doo'n? Nahi Nahi...Woh Bhala Mairi Is Baat Ka Kab Yaqeen Karai'n Gay...Yaqeen Kar Liya To Kahee'n Mujhay Chor Na Dai'n? Mai'n Kaha'n Jau'n Gi? Dayem Ka Kiya Ho Ga? Dabeer Kahee'n Dayem Ko Mujh Say Cheen Na Lai'n...Mai'n Dabeer Kay Baghair Zinda Nahi Reh Sakti...

Mairay Dimaagh Par Hathowray Baras Rahay Thay... Khud Say Sawaal Jawaab Kartay Na Janay Kitna Waqt Guzar Gaya...

Dayem Kay Ronay Ki Awaaz Sun Kar Mai'n Kamray Mai'n Bhagi...

Haya n · 06-06-2007, 07:30 PM

Page 15

Raat Ko Dabeer Ghar Aaey To Mairi Weeran Shakal Owr Sooji Hui Aankhai'n Daikh Kar Pareshan Ho Gaey...

'' Yeh Kiya Halat Bana Rakhi Hay Rija? '' Dabeer Kay Laihjay Say Pareshani Ayaa'n Thi...

Mairi Aankhai'n Phir Say Aansuo'n Say Labraiz Ho Gaei'n Mai'n Nay Aansuo'n Say Bhari Aankho'n Say Dabeer Ko Daikha...Farishto'n Ki Masoomiyat Liye Chehra, Kannpatiyo'n Par Chamaktay Safaid Balo'n Mai'n Woh Kitnay Achay Owr Kitnay Apnay Apnay Say Lag Rahay Thay...Mujh Ko Achanak Un Par Toot Kar Pyar Aaya...Mai'n Un Say Lipat Gai...

'' Dabeer Dabeer... Mai'n Aap Kay Baghair Aik Pal Nahi Ji Sakti...Mujhay Kabhi Khud Say Juda Na Kijiye Ga...Mairay Aansu Dabeer Ki Qameez Bhigonay Lagay...

Unho'n Nay Mujhay Apni Aaghosh Mai'n Samait Liya...'' Mairi Jaan, Kaisi Batai'n Karti Ho? Mai'n Kiya Tum Say Aik Pall Bhi Juda Ho Kar Khush Reh Sakta Hoo'n? ''... Woh Achanak Chonk Gaey...'' Aray Tum Ko To Bouhat Taiz Bukhaar Hay ''...Mujhay Lita Kar Woh Mairay Liye Garam Doodh Owr Teblet Lainay Chalay Gaey...Mairi Himmat Na Pari Kay Mai'n Raghib Ki Batai'n Dabeer Ko Batati...Mujhay Dar Tha Kay Maira Ghar, Maira Dayem Owr Dabeer Mujh Say Chin Jaei'n Gay...

Dabeer Nay Mairi Halat Ko Mairi Beemari Ki Kaifiyat Samjha...

Raghib Apni Bato'n Par Qayem Tha Woh Israar Karta Kay Mai'n Bhi Us Ki Mohabbat Ka Iqraar Kar Loo'n...Mai'n Nay Us Ko Sakhti Say, Narmi Say Her Tarha Samjhaya Kay '' Mairi Zindagi Sirf Owr Sirf Dabeer Say Wabasta Hay...Zindagi Ki Aakhri Saans Tak Mai'n Rija Dabeer Kay Naam Say Wabasta Rahoo'n Gi, Isi Naam Par Mujh Ko Mowt Aaey Gi ''...

Mai'n Nay Us Kay Aagay Ro Ro Kar Haath Joray '' Raghib Mujh Badnaseeb Par Rehem Karo, Maira Is Duniya Mai'n Tum Logo'n Kay Siwa Koi Nahi...Mujh Say Mairi Yeh Jannat Na Cheeno...Mai'n Tumharay Baap Say Deewana War Mohabbat Karti Hoo'n Tumharay Baap Ki Izzat Hoo'n, Maira Owr Apna Rishta Paihchano...Is Rishtay Ka Taqaddus Pamaal Na Karo...Khuda Kay Qeher Ko Awaaz Na Do...Maira Qusoor To Bata Do Jis Ki Itni Kari Saza Tum Mujhay Day Rahay Ho ''

Mujhay Bilak Bilak Kar Rota Daikh Kar Woh Sharminda Ho Jata ...Khud Bhi Ro Parta '' Mai'n Kiya Karoo'n? Yaqeen Kijiye Din Raat Duaei'n Karta Hoo'n, Khud Say Wada Karta Hoo'n Kay Aap Ko Dukh Nahi Doo'n Ga...Mairi Hi Bato'n Say Aap Beemar Par Jati Hai'n Laikin Aap Ko Daikhtay Hi Khud Say Kiye Tamaam Waday Rait Ki Deewar Sabit Hotay Hai'n...Mairi Bhi Zindagi Mai'n Abbu Kay Siwa Koi Nahi Hay...Kisi Khooni Rishtay Ki Kabhi Shakal Bhi Nahi Daikhi...Aap Khud Sochiye Kay Mai'n Abbu Say Kitni Mohabbat Karta Hoo'n Ga? Mai'n Jald Kahee'n Chala Jaoo'n Ga...Kaash Abbu Aap Say Shadi Na Kartay Maira Kiyu'n Na Socha Abbu Nay? ''

Mai'n Aziyat Say Cheekh Uthti '' Mujhay Kuch Nahi Sunna Hay...Khuda Kay Liye Mairi Zindagi Say Chalay Jao...Tumhari Shakal Daikhtay Hi Mujhay Shadeed Tension Shuru Ho Jati Hay...Mairi Nazro'n Kay Samnay Mat Aaya Karo, Mai'n Tumhari Shakal Bhi Daikhna Nahi Chahti ''...

Mai'n Ro Ro Kar Halkaan Ho Jati...Sukoon Ki Dawao'n Kay Baghair Maira Ab Guzara Na Tha...Dabeer Ghar Par Hotay To Mujhay Sukoon Rehta Unkay Jatay Hi Mairay Aasaab Chitakhna Shuru Ho Jatay...

Julia Dayem Say Bouhat Mohabbat Karnay Lagi Thi Aksar Apnay Ghar Usay Lay Jati...Dayem Bhi Julia Say Manoos Ho Gaya Tha...

Mai'n Saari Raat Karwatai'n Badalti Rahi Thi...Dawaei'n Khanay Kay Ba Wajood Soi Na Thi Owr Ab Maira Sar Dard Say Phata Ja Raha Tha...Kaam Bhi Sara Para Huwa Tha...

Mai'n Nay Dayem Ko Julia Kay Hawalay Kiya Owr Khud Dawaei'n Kha Kar So Gai...

Na Janay Kitni Dair Tak Soi Thi Kay Kisi Aehsaas Say Mairi Aankhai'n Ba'Mushkil Khulee'n...Mujhay Apnay Chehray Par Kisi Ki Garam Saansai'n Mehsoos Huei'n...

Haa'n Woh Raghib Hi Tha...Neend To Mairi Uri Hi Thi Ab Hosh Bhi Ur Gaey...Mujhay Jaagta Daikh Kar Woh Taizi Say Kamray Say Nikal Gaya...

Mai'n Us Kay Peechay Bad Hawaas Si Bhaagi Owr Main Darwazay Par Us Ko Pakar Liya...Mai'n Roti Ja Rahi Thi Owr Us Kay Moo'n Par Tamanchay Maarti Chali Ja Rahi Thi... Us Ko Bura Bhala Kaihtay Huway Poochti Rahi Kay Mairay Kamray Ka Lock Kaisay Khola? Woh Mujh Say Maafi Maangta Raha, Buri Tarha Rota Raha...

'' Mujhay Maaf Kar Dijiye Mai'n Andha Ho Gaya Tha '' Mai'n Us Ko Kosti Rahi, Bura Bhala Kaihti Rahi '' Aaj Dabeer Say Zaroor Tumhari Shikayat Karoo'n Gi...Mai'n Tumharay Baap Ki Izzat Hoo'n Laikin Tum Par Mairi Kisi Baat Ka Koi Asar Hi Nahi Huwa Owr Aaj Nowbat Yaha'n Tak Aa Gai? '' Maira Ghussay Kay Saath Saath Sadmay Say Bhi Bura Haal Tha...

Woh Maafiya'n Mangta Raha Laikin Mai'n Nay Us Ki Aik Na Suni...

Dabeer Kay Aatay Hi Mai'n Nay Apnay Anjaam Ki Parwah Kiye Baghair Raghib Ki Shikayat Laga Di... Us Ki Tamaam Tar Batai'n Bata Dee'n...

Page 16

Dabeer Ko Jaisay Sakta Sa Ho Gaya Tha, Jaisay Jaisay Mai'n Bolti Gai Dabeer Ki Halat Mutaghayur Hoti Chali Gai...Lagta Tha Ghussay Owr Sadmay Say Un Ka Wujood Phatnay Ko Hay...Un Kay Chehray Say Saaf Zahir Ho Raha Tha Kay Un Kay Ander Dhamakay Say Ho Rahay Hai'n...Woh Deewana Waar Raghib Kay Kamray Ki Taraf Barhay...Raghib Na Janay Kis Waqt Ghar Wapas Aa Gaya Tha Owr Shayed Dabeer Ka Hi Muntazir Tha...

Raghib Ki Dabeer Nay Aesi Pitaai Ki Kay Maira Dil Bhi Dehel Gaya...Jawaan Owlaad Ko Martay Martay Dabeer Haanpnay Lagay...Mai'n Nay Dabeer Ko Paihli Martaba Itnay Ghussay Mai'n Daikha Tha...Mujhay Ab Dabeer Ki Fikar Honay Lagi Kay Ghussay Ki Ziyadti Say BP High Na Ho Jaey Jo Kay Un Ki Khandaani Beemari Thi...

Raghib Khamoshi Say Pit'ta Raha...Apnay Bachaao Kay Liye Us Nay Zara Bhi Mazahmat Na Ki...

Dabeer Wahee'n Kamray Mai'n Nidhaal Ho Kar Kursi Par Baith Gaey Owr Dono'n Hatho'n Say Apna Sar Thaam Liya...Is Say Paihlay Kay Woh Kuch Boltay Raghib Un Kay Qadmo'n Par Sar Rakh Kay Phoot Phoot Kar Ronay Laga...

Us Ki Aik Hi Takraar Thi Kay '' Abbu Mujhay Maaf Kar Dijiye ''

Dabeer Kay Aansu Owr Paseena Apas Mai'n Madgham Ho Rahay Thay...

Dabeer Khamoshi Say Uthay Owr Quran-e-Pak Lay Aaey Owr Sansanatay Laihjay Mai'n Bolay '' Is Par Haath Rakh Kar Qasam Khao Kay Ab Kisi Bhi Qisim Ki Shikayat Ka Mowqa Nahi Do Gay ...Yeh Tumhari Maa'n Hay ''...

Maa'n Par Zor Daitay Huway Un Ka Laihja Mazeed Taiz Ho Gaya...

'' Mai'n Janta Hoo'n Kay Quran-e-Pak Sachi Ya Jhooti Kisi Bhi Qasmo'n Kay Uthanay Kay Liye Nahi, Laikin Tum Nay To Mairay Paas Koi Raasta Hi Nahi Chowra...Is Waqt Kaha Gaya Tumhara Her Aik Laft Ka Ameen Mai'n Quran-e-Pak Ko Banata Hoo'n Jo Kehna Hay Is Par Haath Rakh Kar Kaho ''

Raghib Nay Laraztay Hatho'n Say Quran-e-Pak Par Haath Rakh Kar Aansuo'n Say Bojhal Laihjay Mai'n Qasam Khaai Owr Mujh Say Bhi Haath Jor Kar Maafi Maangi...

Mai'n Nay Us Ko Maaf Kar Diya...Maaf Na Bhi Karti To Mairay Ikhtiyaar Mai'n Tha Hi Kiya?

Lagta Tha Mairi Taqdeer Koelay Say Likhi Gai Hay...Mai'n Woh Siyah Bakht Thi Kay Taqdeer Ki Gardish Khatam Honay Ka Naam Hi Na Laiti Thi...

Kuch Arsa Hi Kheriyat Say Guzra Tha Kay Raghib Phir Apni Harkato'n Par Utar Aaya...Us Par Aik Junoon Sa Sawaar Hota Owr Woh Apni Unhi Bato'n Ko Dohranay Lagta...Us Kay Baad Wahi Maafi Talaafi Ka Silsila Shuru Ho Jata...

Mai'n Dabeer Say Shikayat Lagatay Lagatay Thak Gai Thi Owr Woh In Shikayto'n Ka Tadaruk Kartya Kartay Aajiz Aa Gaey Thay...

Raghib Ab Apni Her Baat Say Mukar Jata Kay '' Mai'n Nay To Quran-e-Pak Par Haath Rakh Kar Qasam Khai Hay Bhala Ab Mai'n Kis Tarha Koi Aesi Waisi Baat Kar Sakta Hoo'n? Yeh Mujh Ko Ghar Say Nikalwana Chahti Hai'n Is Liye Jhootay Ilzamaat Laga Rahi Hai'n ''...

Mai'n Depression Owr Tension Kay Saath Saath Shadeed Ghabrahat Ka Shikaar Ho Gai...Ba'Mushkil Ghar Ka Kaam Nimtati Warna Maira Dil Kisi Bhi Cheez Mai'n Na Lagta...Na Mai'n Dayem Ko Theek Say Sanbhaal Pati Thi, Na Apna Khayal Rakhti...Hafta Guzar Jata Kapray Na Badalti, Na Kanghi Karti, Kahee'n Aanay Janay Ka Dil Hi Na Karta, Bhook, Pyas Ka Aehsaas Bhi Rafta Rafta Khatam Hota Ja Raha Tha...Maira Dil Hi Mar Gaya Tha...

Sajida Baji Owr Jameel Bhaai Say Jab Bhi Raabta Hota Mai'n Un Ko Her Tarha Itminaan Dila Daiti Kay '' Mai'n Bouhat Khush Hoo'n ''...Woh Loge Bhi Mairi Taraf Say Mutmain Ho Gaey Thay...

Raghib Ki Harkatai'n Usi Tarha Jaari Thee'n...Ab Mai'n Us Ki Shikayat Lagati To Dabeer Mujhay Dant'tay Kay '' Tum Raghib Kay Moo'n Par Thappar Nahi Maar Sakti Thee'n? Tum Yeh Kar Laitee'n, Tum Woh Kar Laitee'n To Us Ki Aesi Jurrat Kis Tarha Hoti? ''

Woh Bhi Tang Aa Gaey Thay...Ghar Ka Mahowl Jehenum Ban Chuka Tha...Zehni Pareshaniyo'n Say Mai'n Mustaqil Beemar Rehnay Lagi Thi...

Ragib Ki Aik Hi Ratt Thi Kay '' Mai'n Nay Kuch Bhi Nahi Kaha, Na Hi Kuch Kiya Hay, Yeh Ab Mujh Par Jhootay Ilzaam Laga Kar Is Ghar Say Nikalwana Chahti Hai'n...Mujh Say Sowtelay Pan Ka Sulook Karti Hai'n...Jaisa Sulook Mairay Saath Hay Waisa Dayem Kay Saath To Nahi...Dayem Ki Her Baat Poori Ki Jati Hay Owr Mujh Say Sowtelay Pan Ka Sulook Kiya Jata Hay ''

Woh Dhitaai Say Jhoot Par Jhoot Bolay Chala Jata...Na Zameen Phat'ti Na Hi Aasmaan Toot'ta...

Is Tarha Khulam Khulla Jhoot Sun Kar Mai'n Bhi Cheekh Uthti...Ghar Mai'n Aik Hangama Sa Bapa Ho Jata...Dabeer Ka Haal Bhi Paglo'n Jaisa Hota Ja Raha Tha...

Gharaz Yeh Kay Aik Khuli Jang Shuru Ho Chuki Thi...Tanhaai Miltay Hi Raghib Mujh Say Maafiya'n Maangna Shuru Ho Jata Kay '' Mai'n Kiya Karoo'n? Agar Jhoot Na Boloo'n To Abbu Mujh Ko Ghar Say Nikaal Dai'n Gay, Apni Bato'n Say Mukroo'n Ga Nahi To Aap Say Door Kar Diya Jaau'n Ga...Mai'n Aap Kay Baghair Zinda Nahi Reh Sakta ''

Mai'n Us Ki Baat Kaat Kar Cheekhnay Lagti, Ronay Lagti... Mai'n Us Kay Aagay Haath Jor Daiti Kay '' Mujh Bad'Naseeb Par Taras Khaao, Mairay Masoom Dayem Par Rehem Karo, Mai'n Sakht Zehni Aziyat Owr Karb Ka Shikaar Hoo'n..Sab Kuch Tumharay Haath Mai'n Hay, Chaho To Bacha Lo, Chaho To Barbaad Kar Do ''...Mai'n Bilak Bilak Kar Us Kay Aagay Ronay Lagti, Tarapnay Lagti....

Page 17

Mujhay Tarapta Daikh Kar Raghib Phoot Phoot Kar Ronay Lagta

'' Khuda Ki Qasam Bouhat Koshish Karta Hoo'n Laikin Apnay Dil Par Maira Bas Nahi Chalta...Doosri Larkiyo'n Say Dil Laganay Ki Bouhat Koshish Ki, Sainkro'n Dostiya'n Kar Chuka Hoo'n Laikin Kiya Karoo'n Mujhay Koi Chehra Hi Acha Nahi Lagta, Mairay Zaihen Par Sirf Owr Sirf Aik Hi Chehray Ka Raaj Hay Owr Woh Aap Ka Hay ''

Maira Cheekhna Chillana, Bilakna Sab Raega'n Chala Jata...

Darya Mai'n Rehtay Huway Magarmach Say Bair Kis Tarha Rakha Ja Sakta Tha...Mai'n Nay Raghib Ki Koi Bhi Baat Kabhi Dabeer Say Chupai Na Thi Owr Na Hi Unho'n Nay Kabhi Mujhay Jhoota Tasleem Kiya Tha...Woh Khud Raghib Ki Taraf Say Mashkook Raihtay...Woh Her Baat Say Mukar Bhi Jata Tab Bhi Dabeer Samajh Jatay Kay Raghib Jhoot Bol Raha Hay...Laikin Ab Koi Suboot Bhi To Un Kay Haath Nahi Aa Raha Tha...

Dayem Her Baat Say Bay'khabar Parwarish Pata Raha...
Kai Martaba Halaat Aesay Huway Kay Maira Dil Chaha Kay Apni Jaan Day Doo'n Laikin Dayem Ka Masoom Chehra Owr Dabeer Ki Zaat Maira Rasta Rok Laiti...Amaa'n Owr Abba Ki Batai'n Gardaab Ki Tarha Mairay Zaihen Mai'n Chakkar Khanay Lagtee'n...Mairay Sar Par Rakha Abba Ka Larazta Kaanpta Haath Mujhay Haraam Mowt Marnay Say Rokay Rakhta...

Raghib Ab Dabeer Say Bhi Zabaan Daraazi Karnay Laga Tha...Jawaan Tha, Dabeer Bura Bhala Kaih Kar Khamosh Ho Raihtay...Raghib Ki Wahi Aik Ratt Rehti Kay '' Nahi Aesa To Kuch Bhi Nahi Huwa ''...

Mai'n To Bas Aik Chalti Phirti Laash Ban Gai Thi...Dabeer Ki Mohabbat Mairay Dil Mai'n Usi Tarha Thi Laikin Us Par Ab Mano'n Kay Hisaab Say Baraf Ki Teh Jam Gai Thi...

Hafto'n Mai'n Kisi Say Koi Baat Na Karti, Her Waqt Maira Dil Rota Rehta...Jism Mai'n Jaan Hi Na Rahi Thi...Bari Mushkil Say Khud Ko Bister Say Ghaseet Kay Utha Pati Thi...Kisi Na Kisi Tarha Khana Paka Kar Rakh Daiti...Ghar Ganda Para Rehta Laikin Mujh Say Safaai Na Hoti...Raghib Nay Bhi Ghar Kay Kamo'n Say Haath Khainch Liya Tha...Ghar Ko Daikh Kar Mujh Par Ronay Ka Dowra Sa Par Jata Kay ''Yeh To Maira Ghar Tha? Yeh Qabristaan Kaisay Ban Gaya?''

Dayem Ab Kinder Garden Janay Laga Tha Wapas Aa Kar Rota Kay '' Mujhay Bhook Lag Rahi Hay '' Bari Mushkil Say Uth Kar Mai'n Usay Kuch Na Kuch Khila Daiti Par Khud Bhooki Hi Pari Rehti...

Ghabrahat Say Lagta Kay Ab Dam Nikal Hi Jaey Ga...Aik Pal Chain Na Aata...Ab To Dawaei'n Bhi Bay Asar Ho Gai Thee'n...Bay'khuabi Ki Shikayat Itni Barh Gai Thi Kay Saari Saari Raat Tehelti Rehti, Kabhi Gallery Mai'n Baithi Door Khalao'n Mai'n Ghoorti Rehti...Apnay Aap Say Batai'n Kartay Kartay Na Janay Kitna Samay Beet Jata Mujhay Aehsaas Hi Na Hota...Sar Dard Say Phatnay Lagta To Paaglo'n Ki Tarha Neend Ki Goliya Halaq Say Utatri Kay Kisi Na Kisi Tarha Bas So Jau'n, Owr Phir Neend Aa Hi Jati...

Nend Aati To Amma'n Mujhay Apni Aghosh Mai'n Samait Laitee'n...Mai'n Un Say Lipat Lipat Jati, Ro Ro Kar Un Say Baytabi Say Kehti '' Amma'n Mujhay Hamaisha Kay Liye Apnay Paas Rakh Lijiye, Aap Say Juda Ho Kar Mai'n Bouhat Aziyat Mai'n Hoo'n ''

Woh Mujh Ko Tasalliya'n Dainay Lagtee'n, Apnay Haath Say Luqmay Bana Bana Kar Khilatee'n, Mairay Lambay Ghanay Balo'n Ko Sanwaar Kar Choti Goondhtay Huway Kehtee'n Kay '' Bitya Khud Ko Sanbhalo, Mairi Achi Rija Khuda Apnay Kuch Bando'n Ko Kam Owr Kuch Ko Ziyada Aazmata Hay...Mairi Rija Bhi Sur'khuroo Ho Gi, Kamiyaab Ho Gi,Is Aazmaish Mai'n Poori Utray Gi ''...

Abba Bhi Safaid Burraq Kapray Paihnay Chalay Aatay..Mairay Baalo'n Par Shafqat Say Haath Phairtay Huway Kehtay '' Rija Bitya ! Tum Nay Jis Tarha Maira Sar Buland Rakha Hay Us Par Mujh Ko Fakhr Hay ''...

Amaa'n Owr Abba Mujh Ko Itna Pyar Kartay, Mairi Itni Himmat Bandhatay Kay Mai'n Behel Jaati...Mujh Ko Muskurata Daikh Kar Woh Dono'n Bhi Shafqat Say Muskura Kar Maira Maatha Choom Choom Laitay Kay Mairi Aankh Khul Jaati Owr Mai'n Phir Say Is Taptay Saihra Mai'n Nangay Paao'n Chalnay Lagti...

Koshish Karti Kay Halaat Ka Himmat Say Muqabla Karoo'n Ta Kay Amma'n Owr Abba Ko Dukh Na Ho...

''Jaldi Jaldi Ghar Ka Kaam Khatam Kar Loo'n Ta Kay Ziyada Say Ziyada Dair Amma'n Owr Abba Kay Saath Guzaroo'n '' Mai'n Apnay Aap Say Batai'n Kartay Huway Bay Dili Say Kaam Nimtati Owr Dawaei'n Kha Kar Apni Usi Jannat Mai'n Kho Jati...

Haya n · 06-06-2007, 07:32 PM

Page 18

Ab To Mairi Is Khuabo'n Ki Jannat Mai'n Amma'n Owr Abba Kay Saath Saath Mairi Saheliya'n Bhi Chali Aatee'n...Mai'n Apna Dil Khol Kay Un Kay Saamnay Rakh Daiti...

Ham Sab Aapas Mai'n Khoob Batai'n Kartay, Hanstay, Chair Chaar Kartay...Mujh Ko Is Tarha Hansta Khilkhilata Daikh Kar Amma'n Owr Abba Bhi Bouhat Khush Hotay...

Mai'n Nay Dabeer Say To Raghib Ki Shikayat Hi Karna Chowr Di Thi Laikin Ab Mai'n Raghib Ki Aik Aik Shikayat Apni Saheliyo'n Say Lagati...

Mujhay Ab Duniya Kay Is Jehenum Say Koi Dilchaspi Na Rahi Thi...Ziyada Tar To Mai'n Dawaei'n Kha Kar Ghafil Hi Pari Rehti...Dabeer Hi Ab Dayem Kay Saath Saath Ghar Ko Bhi Ulta Seedha Sanbhaal Laitay...

Mai'n Nay Jis Mahole Mai'n, Jis Duniya Mai'n Aankh Kholi Thi Mai'n Apni Usi Duniya Mai'n Wapas Chali Gai Thi Owr Apni Is Duniya Mai'n Khoob Magan Thi, Khush Thi Laikin Yeh Lamhay Itnay Mukhtasir Hotay Kay Palak Jhapaktay Hi Nazro'n Say Ojhal Ho Jatatay...In Lamhaat Mai'n Ziyada Say Ziyada Raihnay Kay Liye Mai'n Dawao'n Ki Miqdaar Barhati Chali Ja Rahi Thi...

Jis Tarha Zindagi Guzarnay Kay Liye Saans Lainay Ki Zaroorat Hoti Hay Usi Tarha Mairi Saansai'n Bhi Yeh Dawaei'n Ban Chuki Thee'n... Mai'n In Kay Baghair Ab Ji Na Sakti Thi...

Ghareloo Zindagi Ki Talkhiya'n Dabeer Kay Kaam Par Bhi Asar Andaaz Ho Rahi Thee'n Owr Mijaaz Par Bhi...Unho'n Nay Bouhat Koshish Ki Kay Mai'n Wapas Zindagi Ki Taraf Lowt Aau'n Laikin Woh Kamiyaab Na Huway...

Mai'n Nay Dabeer Kay Saath Achay Din Bhi Guzaray Thay Laikin Woh Lamhaat Itnay Mukhtasir Sabit Huway Kay Palak Jhapaktay Hi Ojhal Ho Gaey...

Khushiyo'n Bharay Lamhaat, Khushiyo'n Bhara Waqt Chahay Kitna Hi Taweel Kiyu'n Na Ho Lamhay Bhar Ka Hi Lagta Hay, Gham Ka To Aik Pal Bhi Pahaar Ban Jaya Karta Hay...

Page 19

Ab To Mairay Khuabo'n Ki Duniya Bouhat Aabaad Ho Chuki Thi...Lazeez Pakkay Pakaey Khanay, Jagmag Karta Huwa Saaf Suthra Sa Ghar Maira Muntazir Hota...

Amma'n Abba Nay Mairi Zindagi Ko Mukammal Karnay Kay Liye Mairi Shaadi Bhi Kar Di Thi...Maira Jeewan Saathi Dabeer Ka Hi Ham Naam.O.Ham Shakal Honay Kay Saath Saath Kariyal Jawaan Bhi Tha...Us Ka Uthna Baithna, Chalna Phirna, Batai'n Karna, Gharaz Kay Tamaam Tar Harkaat.O.Saknaat Waisi Hi Thee'n Jaisa Kay Mai'n Chahti Thi...Mai'n Us Ki Qurbat Kay Lamhay Lamhay Say Khushiya'n Kasheed Kar Rahi Thi...Mujhay Ab Koi Tashnagi Na Rahi Thi...

In Khushiyo'n Bhari Zindagi Say Jab Mai'n Jaagti To Zindagi Ka Tapta Sehra Maira Muntazir Hota Jis Mai'n Kahee'n Mairay Liye Jaey Panah Na Hoti...

Raghib Ki Batai'n Mazeed Shiddat Ikhtiyaar Karti Ja Rahi Thee'n... Mai'n Nay Dabeer Say Kuch Kaihna Hi Chowr Diya Tha Jaanti Thi Kay Woh Yahi Kahai'n Gay Kay '' Kaisi Kamzor Aurat Ho Kay Apni Hifazat Nahi Kar Saktee'n? Aurat Ki Marzi Na Ho To Mard Ki Majaal Nahi Kay Nazar Bhar Kay Us Ki Taraf Daikhay''...

Mujhay Pata Tha Kay Woh Razia Sultana Say Lay Kar Phoolan Devi Tak Sab Ki Misalai'n Day Dalai'n Gay...Isi Liye Mai'n Apni Jannat Mai'n Lowt Jaati Owr Her Her Baat Apni Saheliyo'n Owr Dabeer Ko Batati...

Waha'n Mairay Haath Mai'n Aag Say Bana Hunter Hota Jis Say Mai'n Raghib Ki Khaal Udhair Kar Rakh Daiti...Us Ki Zabaan Par Jaltay Huway Angaray Rakh Daiti Jin Say Woh Aesi Batai'n Karta Tha Kay Mairi Rooh Tak Zakhmi Ho Kar Bain Karnay Lagti Thi...Un Hatho'n Ko Pathar Say Kuchal Diya Karti Thi, Un Aankho'n Mai'n Garam Garam Loha Ghusair Daiti Thi Jin Say Woh Mujhay Daikha Karta Tha...

Mai'n Nay Baba Owr Firasat Ko Bhi Janwaro'n Ki Tarha Baandh Kar Rakha Huwa Tha...Un Ko Bhi Usi Aag Say Banay Hunter Say Maarti Rehti, Woh Mairay Qadmo'n Mai'n Lot'tay, Mujh Say Maafiya'n Mangtay...Mai'n Un Ko Buri Tarha Thokrai'n Marti Kay '' Mairi Adalat Mai'n Tum Mai'n Say Kisi Kay Liye Maafi Ka Koi Aik Lafz Nahi...Jo Boya Hay Woh Kato '' Mai'n Un Ko Udhairti Raihti Owr Mairi Rooh Tak Pur'Sukoo'n Hoti Chali Jati...Un Sab Ki Cheekhai'n, Faryadai'n Mujhay Zehni Sukoon Bakhshtee'n...

Haqeeqat Ki Duniya Ka Doosra Naam Mairay Liye Jehenum Hi Ban Chuka Tha...

Dayem Aik Bouhat Ideal Owr Pur'Aetmaad Bacha Tha..Allah Nay Us Ko Kuch Ziyada Hi Nawaz Rakha Tha...Us Kay Pur' Aetmaad Qadam Taleemi Maidan Mai'n Kamiyabi Say Uth Rahay Thay Jin Ko Mai'n Nakami Ki Nazar Nahi Karna Chahti Thi...Dayem Mujhay In Halaat Mai'n Bouhat Ghair Mehfooz Sa Lagta...Dabeer Ki Barhti Umar Mujhay Dehlaey Rakhti Kay Un Ko Kuch Ho Gaya To Raghib To Mairi Botiya'n Cheel Kawwo'n Ki Tarha Noch Dalay Ga...Koi Aesa Sira Haath Na Lagta Kay Mai'n Is Gutthi Ko Suljha Sakti...

Page 20

Raghib Ki Bato'n Say Maira Dil To Kab Ka Chakna Choor Ho Hi Chuka Tha...Kabhi Mai'n Us Say Kaihti Kay '' Tum Daway To Mohabbat Kay Kartay Ho, Yeh Mohabbat Ki Kown Si Qism Hay? Mohabbat Mai'n To Insaan Apnay Mehboob Ko Phoolo'n Ki Chari Bhi Is Dar Say Nahi Chuwata Kay Kahee'n Us Ko Koi Chot Na Lag Jaey...Aik Tum Ho ...Tum Nay To Maira Wujood, Mairi Rooh Tak Lahu'lahaan Kar Dali Hay..Mujhay Bay Gor.O.Kafan Laash Bana Kar Rakh Diya Hay...Yeh Kaisi Mohabbat Hay Tumhari? Nahi Yeh Mohabbat Nahi, Yeh To Woh Nafrat Hay Jo Pehlay Din Say Tum Nay Mujh Say Ki Owr Jisay Tum Mohabbat Ka Naam Daitay Ho...Yaad Rakhna Raghib Mujhay Qayamat Kay Din Par Pakka Yaqeen Hay... Us Din Mai'n Tum Ko Owr Kisi Ko Bhi Maaf Nahi Karoo'n Gi Na Hi Maira Allah Maaf Karay Ga...Maira Yeh Haq Is Duniya Ka Koi Bhi Bashar Mujh Say Nahi Cheen Sakta...Jab Tak Mai'n Tum Ko Maaf Na Karoo'n Maira Allah Bhi Tumhai'n Maaf Nahi Karay Ga...Mai'n Tum Mai'n Say Kisi Ko Maaf Nahi Karoo'n Gi...Apna Yeh Haq Zaroor Istimaal Karoo'n Gi...

Mairi Bad'Dua Hay Kay Tum Sona Bhi Chuo To Woh Mitti Ban Jaey, Koi Kamiyabi Tumharay Qareeb Bhi Na Phatkay, Tum Sukoon Kay Aik Aik Lamhay Ko Tarso, Neend Tum Say Utni Hi Door Bhagay Jitni Door Khushiya'n Owr Kamraniya'n ...Tumhari Is Jawani Ko Ghun Lag Jaey...Mairi Bad'Duaei'n Hamaisha Tumhara Peecha Karai'n Gi...Mairi Khamoshi Ko Mairi Buzdli Na Samjhna Us Waqt Mairay Dil Say Tumharay Liye Bad'Duaei'n Nikal Rahi Hoti Hai'n...Mai'n Khamosh Nahi Hoo'n ''...

Haqeeqi Duniya Ki Talkhiya'n Mujhay Phir Khuabo'n Khayaalo'n Ki Duniya Mai'n Lay Jataee'n, Maira Zehen Khuabo'n Ki Wadiyo'n Mai'n Panah Talash Karta Rehta Jaha'n Hans Mukh Sa Dabeer Mairay Aagay Peechay Phirta...Kitna Khush Rehti Thi Mai'n Us Ki Qurbat Mai'n...Kuch Arsay Baad Hi Mairay Ghar Chaand Sa Baita Dayem Paida Huwa Jo Is Duniya Mai'n Bouhat Mehfooz Tha...Mairi Jannat Ab Mukammal Ho Gai Thi...

Khuabo'n Ki Jannat Say Haqeeqi Zindagi Ka Safar Mairay Liye Suhaan-e-Rooh Sabit Hota Tha...Mai'n Bayak Waqt Do Kishtiyo'n Ki Musafir Ban Kay Reh Gai Thi....

Dabeer Say Mai'n Shadeed Mohabbat Karti Thi Laikin Woh Mairi Us Zindagi Kay Saathi Thay Jo Mairay Liye Jehenum Say Bad'Tar Thi Isi Liye Mai'n Un Say Door Hoti Chali Gai Laikin Dili Towr Par Mai'n Un Say Door Na Thi...Halaat Nay Mujhay Khuabo'n Ki Duniya'n Mai'n Buri Tarha Dhakail Diya Tha Jis Say Mai'n Ab Chahti Bhi To Nikal Na Sakti Thi...

Dabeer Say Mai'n Kiya Kehti? Kiya Woh Jantay Na Thay Kay Agar Mai'n Apni Hifazat Khud Kar Sakti, Khud Ko Sanbhaal Sakti To Un Say Shaadi Hi Kiyu'n Karti? Larkiyo'n Ki Shaadi Ki Hi Kiyu'n Jati Hay? Un Ki Izzat Ki Hifazat Waldai'n Kay Boorhay Hath Nahi Kar Patay Isi Liye Un Ko Showhro'n Kay Ghar Haank Daitay Hai'n Ta Kay Woh Apnay Hamsafar Ki Panaah Mai'n Apni Duniya Khud Basaei'n...Laikin In Bato'n Ka Koi Faeda Hi Na Tha, Mai'n Yeh Batai'n Dabeer Say Kar Kay Kiya Karti?...

Mai'n To Us Duniya Mai'n Khush Thi Jaha'n Pyar Mohabbat Owr Izzat.O.Aehtraam Say Sab Loge Rehtay Thay...Phoolo'n Say Bana Ghar Maira Maskan Tha Jaha'n Dayem Kay Qehqahay Goonja Kartay...Amma'n Abba Ka Pur'Shafqat Saya Mairay Sar Par Hota...Maira Jeewan Saathi Dabeer Qadam Qadam Par Mairay Hamrah Hota...Sab Kuch Waisa Hi Hota Jaisa Kay Mai'n Chahti Thi...

Dabeer Nay Raghib Ki Shaadi Ki Koshshai'n Taiz Kar Di Thee'n Laikin Usay In Bato'n Say Koi Dilchaspi Hi Na Thi...Woh Maira Hi Dam Bharta Owr Mai'n Aahai'n Bharti, Aesi Aahai'n Jin Mai'n Mairay Armano'n Ki Jalti Hui Raakh Hoti, Mairi Umango'n Ka Khoon Owr Bay'Saebani Ka Jalta Huwa Aehsaas Shaamil Hota...

Haaey Kitna Rashk Aata Tha Mujhay Un Waqto'n Ka Soch Kar Jab Larkiyo'n Ko Paida Hotay Hi Zinda Dafan Kar Diya Jata Tha...Aey Kaash Kay Mai'n Bhi Usi Dowr Mai'n Paida Hui Hoti...

Na Mujh Say Abba Ka Jhuka Huwa Sar Daikha Jata Tha Na Hi Dabeer Kay Jhukay Huway Kaandhay Daikhna Mairay Bas Mai'n Tha...Ab To Mai'n Dabeer Say Apni Mohabbat Ka Izhaar Kartay Bhi Jhijhakti Thi Kay Jitna Bay'Aetbaar Hotay Mai'n Nay Is Lafz '' Mohabbat '' Ko Daikha Tha Us Ki Misaal Milna Mushkil Thi...Kitni Nafrat Ho Gai Thi Mujhay Is Lafz Mohabbat Say...Kaash Mai'n Is Lafz Ko Hi Duniya Say Mita Daiti...

Dabeer Bhi Thak Chukay Thay...Un Ki Umr Owr Saihet Araam Ki Mutalashi Thi...Woh Mujhay Toktay Kay '' Rija Tum Mujh Say Kitni Door Ho Gai Ho... Na Tum Ko Maira Khayaal Hay Na Hi Dayem Ka, Na Hi Ghar Ka Khayaal Rakhti Ho..Her Her Cheez Par Mitti Ki Teh Jami Rehti Hay...Jis Tarha Tumnay Ghar Ki Her Cheez Par Mitti Ki Teh Bicha Di Hay Usi Tarha Mairi Mohabbat Bhi Usi Mitti Mai'n Dafan Kar Di Hay...Mujhay To Tum Mai'n Pehlay Wali Rija Ki Jhalak Bhi Nazar Nahi Aati, Tum Nay To Mairi Tamaam Chahtai'n Hi Framosh Kar Dee'n...Is Umr Mai'n Mujhay Yeh Sab Bhi Jhelna Tha ''...
Woh Mayoosi Say Boltay Chalay Jatay...

Gharaz Kay Un Ko Bhi Mujh Say Shikaytai'n Paida Ho Gai Thee'n Kay Na Mai'n Achi Bivi Kay Faraaiz Ada Kar Pati Thi Na Hi Achi Maa'n Kay, Yeh Sach Bhi To Tha Phir Mai'n Bhala Kaisay Inkaar Kar Sakti Thi...Mai'n Un Ki Tawaqoaat Par Poori Na Utar Saki Thi To Yeh Maira Hi To Qusoor Tha...Dabeer Kay Paas To Das Hazaar Suboot Thay Kay Woh Mujh Say Kitni Mohabbat Kartay Hai'n... Unho'n Nay To Amal Bhi Kar Dikhaya Tha, Mairay Paas To Koi Suboot Hi Na Tha, Maira To Daman Hi Khaali Tha...To Bhala Kiya Suboot Paish Karti Kay Mujhay Un Say Kitni Mohabbat Hay?...

Na Mai'n Is Duniya Mai'n Apni Marzi Say Aai Thi Na Hi Apni Marzi Say Janay Ka Ikhtiyaar Mujhay Hasil Tha...Jin Halaat Mai'n Zindagi Guzarti Chali Aai Thi Us Mai'n Mairi Marzi Ka To Dakhal Na Tha...Jitni Mairay Allah Nay Mairi Saansai'n Likh Di Thee'n Woh To Mujhay Laina Hi Thee'n...Zindagi Basar Karnay Kay Liye Na Chahtay Huway Bhi Insaan Kisi Na Kisi Ka Sahara To Laita Hi Hay So Mairay Ander Ki Rija Nay Bhi La Shaoori Towr Par Khuabo'n Mai'n Panah Dhoond Li Thi, Takhayulati Sahara Lay Baithi Thi ...

Haya n · (This post was last modified: 08-16-2012, 04:25 PM by Haya n.)

[COLOR="#0000FF"]Page 21

Dabeer Ki Kisi Baat Say Mujhay Inkaar To Na Tha Yeh Sach Hi To Tha Kay Mai'n Haqeeqat Say Faraar Hasil Kar Kay Un Bato'n Mai'n Khoi Rehti Thi Jin Ka Amli Towr Par Tasawwur Bhi Na Mumkin Tha, Laikin Mai'n Bhi Kiya Karti Jo Kuch Mairay Daman Mai'n Tha Wahi To Un Kay Hawalay Kar Sakti Thi...Mairay Daman Mai'n To Mayoosiya'n Thee'n, Tashnagi Thi, Aansu Thay, Mehroomiya'n Thee'n Phir Mai'n Kis Tarha Un Kay Daman Ko Umeedo'n, Aasudgi Owr Khushiyo'n Say Bhar Daiti?...

Mai'n Chahay Laakh Dabeer Ki Taraf Na Daikhti, Chahay Un Say Baat Na Karti, Laikin Aesa Mai'n Dil Say To Na Chahti Thi...Mai'n To Bas Us Dabeer Say Door Hoti Chali Gai Thi Jo Mairi Us Zindagi Ka Saathi Tha Jaha'n Dukho'n Owr Aziyato'n Kay Siwa Kuch Na Tha...

Jo Dabeer Mairi Khuabo'n Ki Duniya Mai'n Maira Hamsafar Tha Us Ko Na To Duniya Ki Maslaihtai'n Nazar Aati Thee'n Na Hi Majbooriya'n Us Kay Qadam Rok Pati Thee'n...Us Ki To Sharartai' Owr Chohlai'n Hi Na Rukti Thee'n, Us Ki To Batai'n Hi Khatam Na Hoti Thee'n...Us Ki Baato'n Par Mai'n Hans Hans Kar Thak Jati, Laikin Majaal Hay Jo Woh Shararto'n Say Baaz Aa Jata...Amma'n Owr Abba Kitna Khush Hotay Thay Jab Un Ki Rija Owr Dabeer Khushiyo'n Kay Jhoolay Par Sawaar Pyar Ki Peengai'n Barhatay...

Mai'n Isi Tarha Khuabo'n Owr Haqeeqato'n Kay Darmiyan Safar Karti Waqt Ko Peechay Dhakailti Hui Aagay Barhti Rahi...

Dayem School Ki Taraf Say Apnay Teachers Owr Doosray Students Kay Saath Shaher Say Bahar Visit Kay Liye Gaya Huwa Tha...Dabeer Bhi Ghar Say Bahar Thay...Mai'n Gellary Mai'n Khari Oonchai Say Sarak Par Chalti Gariyo'n Ko Bay Dhiyani Say Daikh Rahi Thi...Itnay Mai'n Dabeer Ka Phone Aa Gaya Kay '' Gari Kharab Ho Gai Hay..Mai'n Shaher Say Abhi Faslay Par Hoo'n.. Mujhay Dair Ho Jaey Gi Tum Pareshan Na Hona ...Tum Aesa Karo Kay Julia Kay Ghar Chali Jao Mai'n Aa Kar Us Kay Ghar Ki Bell Baja Doo'n Ga...''

Maira Dil Dhak Say Reh Gaya, Mai'n Sehem Si Gai ...Is Waqt Julia Ka Baita Owr Showher Sab Ghar Aa Chukay Hotay Thay Owr Khanay Kay Baad Sonay Ki Tayyari Kar Rahay Hotay Thay...Mujhay Acha To Nahi Lag Raha Tha...Mai'n Nay Us Kay Ghar Janay Kay Liye Chabiya'n Uthaaei'n Hi Thee'n Kay Raghib Mai'n Door Khol Kar Ander Chala Aaya...Maira Dil Buri Tarha Kaanpnay Laga Laikin Mai'n Nay Us Par Zahir Na Honay Diya....

'' Tumharay Abbu Bas Aanay Hi Walay Hai'n Julia Nay Mujhay Bulaya Hay Mai'n Us Kay Ghar Ja Rahi Hoo'n ''...

'' Is Waqt Owr Julia Kay Ghar? '' Mujhay Mairay Dost Nay Bataya Hay Kay Abbu Ki Gari Kharab Ho Gai Hay...Woh Loge Abhi Sheher Say Bahar Hi Hai'n... Us Kay Uncle Bhi Abbu Kay Saath Hi Hai'n...Isi Liye Mai'n Ghar Chala Aaya Kay Dayem Bhi Ghar Par Nahi Hay Aap Akeli Pareshan Ho Rahi Ho'n Gi '' Woh Mujhay Ghowr Say Daikhtay Huway Itminaan Say Bola...

'' Mujhay Kuch Nahi Sunna.. Maira Waqt Na Barbaad Karo Julia Maira Intizaar Kar Rahi Ho Gi, Mujhay Dair Hui To Woh Khud Chali Aaey Gi ''... Maira Laihja Taiz Ho Gaya Jab Kay Maira Dil Pattay Ki Tarha Kaanp Raha Tha...

'' Acha Chali Jaiye Ga Paihlay Mairi Baat To Sun Lijiye '' Wo Gallery Walay Room Kay Darwazay Par Is Tarha Khara Ho Gaya Kay Usay Hataey Baghair Mai'n Guzar Na Sakti Thi...

'' Ragib Yeh Kiya Battamizi Hay? Hato Yaha'n Say Warna Mai'n Bouhat Buri Tarha Paish Aau'n Gi...Abhi Isi Waqt Ghar Say Chalay Jao, Jab Dabeer Aaei'n Tab Aana '' Mujhay Apnay Laihjay Ka Khokla Pan Khud Mehsoos Ho Raha Tha Laikin Mai'n Chilla Uthi...

Mairay Muqaddar Ki Tarha Raat Ki Siyahi Bhi Barhti Chali Ja Rahi Thi...Raghib Kay Qadam Na'Paak Irado'n Say Mairi Janib Barh Rahay Thay Owr Mai'n Ghair Mehsoos Tareeqay Say Gellary Ki Janib Sirak Rahi Thi...Us Pal Kitna Wehshi Owr Bay'Rehem Lag Raha Tha Raghib...Mai'n Hosh Mai'n Hi Kaha'n Thi...Charo'n Taraf Say Mujhay Aawazai'n Aati Mehsoos Ho Rahi Thee'n...Amma'n Ki Aawazai'n, Abba Ki Aawazai'n, Dabeer Ki Aawazai'n Owr Dayem Kay Ronay Ki Aawazai'n Mairay Kaan Kay Parday Pharay Day Rahi Thee'n Kay Jaisay Sab Mairi Laash Say Lipat Kar Bain Kar Rahay Ho'n...Apnay Sar Deewaro'n Say Takra Rahay Ho'n...

Page 22

Jo Sachai Ka Alam Amma'n Nay Mairay Hatho'n Mai'n Thamaya Tha Woh Sar'Nigoo'n Honay Ko Tha, Sabr Ka Daman Mairay Na'Tawa'n Hatho'n Mai'n Taar Taar Honay Ko Tha...Bay'Izzati Kay Kitnay Hi Niwalay Mairay Halaq Mai'n Phansay Huway Thay Jis Say Mairi Saans Ruki Ja Rahi Thi...Mairay Sabr, Mairi Wafa, Mairay Eisaar Owr Khamoshi Ka Zaiwar Dakoo Lootnay Ko Tha...Izzat Par Zaroorat Owr Maslaihat Hi Chadar Parti Kab Say Mai'n Daikh Rahi Thi...Abba Ka Sar Jhuknay Kay Qareeb Tha...

Mairi Bay'Noor Hoti Aankho'n Mai'n Dayem Owr Dabeer Ki Hansti Owr Roti Shaklai'n Gudmud Ho Rahi Thee'n...Mai'n Nay Tareek Aasman Ki Taraf Apni Bay'Noor Si Nazrai'n Uthaei'n To Amaa'n Owr Abba Ki Shaklai'n Nazar Aaei'n..Un Ki Aankho'n Say Aansu Beh Rahay Thay...Abba Nay Mairay Sar Par Say Apna Thanda, Larazta Huwa Haath Hata Liya Tha...Mairi Nazro'n Mai'n Abba Kay Liye Tashakkur Ubhar Aaya...

Abba Ka Haath Mairay Sar Say Hata To Mujh Ko Khud Mai'n Aik Anjaani Si Taqat Mehsoos Hui...Mai'n Jo Hamaisha Chirya Ki Tarha Sehmi Rehti Thi Mujhay Khud Mai'n Aik Sherni Si Jaagti Mehsoos Hui...

Mai'n Khisakti Hui Bilkul Railing Say Ja Lagi Thi...Gallery Mai'n Gamlo'n Kay Paas Hi Shakhai'n Chaantnay Wali Qainchi Rakhi Thi...Raghib Ko Mujh Say Aesi Koi Umeed Na Thi Owr Na Hi Mujhay Khud Say Aesi Tawaqoh Thi...Sab Kuch Aanan Faanan Huwa...Mai'n Nay Qainchi Poori Quwwat Say Raaghib Kay Dil Kay Muqaam Par Day Mari...Khoon Ka Fawwara Raghib Kay Saath Saath Mujhay Bhi Khoon Alood Kar Gaya...Woh Khoon Mai'n Lithra Huwa Railing Par Adha Latak Sa Gaya Tha...Mairay Ander To Shayed Koi Jin Hulool Kar Gaya Tha...Mujh Mai'n Bala Ki Taqat Aa Gai Thi...Mujhay Kuch Hosh Na Tha Kay Mai'n Kiya Kar Rahi Hoo'n...

Raghib Kay Lataktay Jism Ko Mai'n Nay Pakra Owr Poori Quwwat Say Gallery Say Neechay Uchaal Diya...Us Ka Jism Jaisay Urta Huwa Sarak Par Ja Gira Owr Taizi Say Khoon Nikal Kar Us Kay Ird Gird Ikhatta Honay Laga...Mai'n Nay Hiqarat Say Us Kay Bay Jaan Jism Ki Taraf Daikha... Aik Dam Hi Mai'n Bay'Jaan Si Ho Kar Haanpti Hui, Neem Bay'Hoshi Ki Halat Mai'n Wahee'n Gallery Mai'n Hi Gir Pari...

Logo'n Ka Shor Bhinbhinahat Ki Tarha Mairi Sama'At Say Takra Raha Tha Owr Ab Un Mai'n Sab Say Wazay Aawaaz Police Ki Gariyo'n Kay Syron Ki Thi...

**************************************************

Mujhay Is Jail Mai'n 2 Saal Honay Ko Aaey, Abhi Tak Yeh Case Chal Raha Hay...

Jawaan Baitay Ki Mowt Ka Gham Uthaey, Bouhat Say Sadmo'n Ko Galay Say Lagaey Dabeer Paihchanay Nahi Jatay, Mairay Masoom Dayem Ko Halaat Nay Waqt Say Paihlay Jawaan Owr Sanjeeda Kar Diya Hay...Mujhay Kuch Nahi Pata Kay Mairay Case Ka Kiya Banay Ga?...

Mairi Aabla Paai Ka Yeh Safar To Zindagi Ki Aakhri Saans Tak Jaari Rahay Ga, Raghib Kay Wujood Kay Saath Saath Mairay Khuabo'n Ki Duniya Bhi Maqtool Ho Chuki Hay...Mujhay Apnay Kiye Ka Ratti Bhar Koi Pachtawa Nahi...Sukoon Aawar Adwiyaat Aaj Bhi Mairi Jaey Panah Hai'n...Jin Ko Kha Kar Mai'n Ghaafil To Ho Jati Hoo'n Laikin Na Amma'n Mujhay Galay Laganay Aati Hai'n Na Hi Abba Ka Dast-e-Shafqat Mujhay Naseeb Hota Hay, Mairay Khuabo'n Ka Dabeer Maira Saath Chor Baitha Hay,Mairay Dayem Ki Qalqariya'n Dam Tor Chuki Hai'n, Mairay Khuabo'n Ki Jannat Mai'n Aag Lag Chuki Hay Jis Ki Jalti Raakh Tak Ab Ur Chuki Hay...Haa'n Aesay Holnaak Khuab Zaroor Nazar Aatay Hai'n Jin Say Dehel Kar Mai'n Uth Jaati Hoo'n....

Tanhaai Mujhay Maazi Ka Aaina Dikhati Rehti Hay... Koi Aik Yaad Maira Peecha Nahi Chorti...Kiya Mai'n Yeh Sab Bhula Sakti Hoo'n? Rehaai Ki Koi Aarzu Mairay Dil Mai'n Nahi Panapti, Kisi Shaakh-e-Umeed Par Koi Konpal Nahi Phoot'Ti, Mairi Aankhai'n Aansuo'n Say Khali Ho Chuki Hai'n Owr Dil To Kisi Qabristan Ka Pata Daita Hay...

Mairay Paas Koi Suboot Nahi Kay Raghib Nahi Bal'Kay Maqtool To Mai'n Hui Hoo'n...Dafn Raghib Ko Nahi Mujhay Kiya Jaey...Mairi Zakhmo'n Say Choor Bay'Jaan Rooh Kisi Ko Nazar Nahi Aati...Mai'n Apna Lahoo Kis Kay Hatho'n Par Talaash Karoo'n? Mairay Qatilo'n Ko Kab Saza Milay Gi?... Mujhay To Aseer Huway Sadiya'n Beet Gai Hai'n...Mairi To Rooh Tak Is Aseeri Ki Aadi Ho Chuki Hay...Jis Say Nijaat Ab Mumkin Hi Nahi Rahi...Koi Mujhay Kis Kis Baat Say Rehaai Dilaey Ga, Kisi Aik Yaad Say Bhi Rehaai Mumkin Nahi Rahi, Mairay Muqaddar Mai'n Na Koi Nijaat Dehenda Hay Owr Na Hi Mujhay Rehaai Ki Koi Talab Hay...Mai'n Is Misray Ki Chalti Phirti Tasweer Ban Chuki Hoo'n...

'' Itnay Manoos Sayaad Say Ho Gaey Ab Rehaai Milay Gi To Mar Jaei'n Gay ''

(Written By Haya)[/COLOR]