Zindagi Ke Maile...!

[imported_naz]

[FONT="Comic Sans MS"][size=3][color=DarkRed]


Zindagi ke maile



Kiya samaan hai. Dhulti huwi shaam aur surej ki mudhum kirnain. December ka thunda thunda sa mausum. Her teref, aik shor, hunsta huwa shor, muchulta huwa shor, bachon ka shor, hunste muskurate huwe, daurte huwe bachon ka shor. Yehi to hai, saal ka aakhri maila!

Kami phir, ussi manoos kushish ki teref khincha chula aya, is maile ki janib.

In bachon ko dekho to aisa mehsoos hota hai ke, jaise duniya main ghum naam ka koi uncle sire se hai hi nahin. koi apni ammi ka haath pekre kissi jhoole ki teref ishaara ker reha hai to koi apni aapi se zid ker reha hai. koi ice cream khane main mushghool hai, to koi apne hum umer bachon ke saath jhoola jhoolne ke liye line main be sebra huw ja reha hai. kitne payare hain yeh saare bache, maile ki chum chumati ronqain!

Buchpan se le ker, aaj tek, yeh maila joon ka toon. Saal ke issi muheene abaad hota hai, issi school main. kami ke school main. Poore aik hufte ke liye, aur Kami to thehra hi maile ka shidaai, bhula woh kahan is se door reh sekta tha. Ab to yeh haal hai ke, maile ka her ferd use jaanta hai. Aik unsiyyet si ho gayi hai un ke saath. Itne saal beet gaye magar, is ki ronaq kabhi maand nahin peri, bulke pehle se bhi zayadah chumukne lugi hai.

Kami, unheen mutalashi nuzron se, maile ki gehma gehmi main gum tha. Aik bhunware ki terha kabhi yahan to kabhi wahan, aur phir, uchanuk, woh ruk gaya.

Chulte chulte, us ke qadem phir waheen a ker jum gaye the. Waheen.

Aur phir, maazi jaise us ki aanhon main simet aaya tha. Ghur main dil nahin lugta tha us ka, aur ghur to khair us ka kabhi tha hi nahin. Who to us ke Mama Papa ke jane ke ba

[imported_naz]

Waqt aik merhum hai, laiken waqt zalim bhi hai. Ussi ki zulmut hai jo hum burdasht nahin ker sekte, aur phir, ussi ki aas hai ke jo humare dilon ko tuskeen deti hai. Yeh maile bhi Kami ke liye aik duniya the, kabhi khushi ka pegham, to kabhi, dukh ka samaan.

Kami bhi soch reha tha ke zindagi nain use, zindagi ke hi kitne ajeeb pehloo dikhain hain. Kaheen to khushi di, to itni ke kel aane ka intizaar hi na reha, aur ghum diye, to who bhi aise ke sunbhale na sunbhle. Leiken shayed, waqt: Yeh waqt hi hai, werna to, us ke bus se bahir tha, zindagi ke saath samjhota kerna.

Use bache aur phool bohot passand the. Haal ye tha ke jahan chote bache dekh liye, to saare kaam kaaj chor chaar ker, un ki duniya main mukhul ho jaati, aur kami ser khujata reh jata. Use hairet us ki hurketon per nahin thi, magar us ke is la ubali pun per thi, kitni besaakhtgi thi us ki aankhon main, kitna payar, jugmug jugmug, timtimati aankhain. Kahan se who itna payar bator laayi thi apne under, who sochta aur hairaan hota rehta.

Phir jub England jaane se pehle us ki aakhri mulaqaat huwi, yaheen, issi Jhoole ke paas, who bhi kiya waqt tha, who bhi kiya lumha tha. Kami to aise mehsoos ker reha tha ke jaise, who kissi aur mulk nahin, bulke kissi aur hi duniya main ja reha hai, who bhi, apna sub se qeemti samaan chor ker, apna buchpun, apni yaadain, aur Sanea.

Kami nain nuzrain utha ker dekheen, aur jhoole ko khali paa ker, itminaan se utha, aur us ki gaud main beth gaya. Ab maila apne urooj per tha, sooruj bhi dhul chukka tha, aur her teref log hi log the, magar woh, kissi aur hi duniya main khoya huwa tha. Who yahan, Sanea ko aakhri baar milne aa gaya tha, us ki yaad ke saath.

England jane ke ba’d, khut-o-kitabut ka silsila reha. Kami ko siref do cheezon ka intizaar rehta, aik apni taleem ke mukammal hone ka, aur aik, Sanea ke khut ka. Us ka khut ata to goya, England ke weeran aur ujre mausum main buharain cha jaaya kerteen. Us ke naye dost, us ke chehre ki roshni dekh ker jaan jaate ke, lo bhai, aaj phir telegram aa gaya.

Aur phir uchanuk, us ke khut aana bund ho gaye the. Who betaabi ke alam main ghote khata reha, magar koi jawaab na paa ker aik ajeeb kaifiyet main mubtala ho gaya tha, aik kurb ki kaifiyyet main.

Aaj subah hi who, Sanea ki qaber per ziyaret ker aaya tha. Aankhon se aansoo rukne ka naam hi nahin le rehe the. Teen saal: teen saal beet gaye is sanehe ko, magar, kami ke zukhum to taza hain, goya use guzre aik din hi beeta ho. Who ab bhi us ki awaaz sun reha tha, mehsoos ker reha tha, bus, nehin ker pata, to use chu ker yaqeen nahin ker pata tha. Aur yehi Sanea ke na hone ki nishani thi. Sub chor chuke they usey, sub.

Us ka khut us ke haathon main ab bhi luruz reha tha. Jub use chutiyaan huween to who daura daura aaya tha, magar jis ke liye aaya tha, who to ja chuki thi. Haan agar kuch tha, to who us ke khut jo who post na ker paayi thi. Cancer nain us ki saansin mudhum ker di theen, us ki aankhon ki roshni maand ker di thi. Aur bil aakhir, use is duniya se fana kur chuki thi.

Airport se ghur tuk ka sufer, Kami nain shayed komey ki haalut main guzara tha. Koi awaaz aa rehi thi, us ke under se koi cheekh reha tha, us ki suma’aton ki deevaron ko torta huwa us fuluq tuk pohonchna chahta tha, koi imarut thi us ke munn main, jis per zulzale ka qeher nazil huwa tha, koi toofaan tha jo use apni lapeit main liye ja reha tha, magar, us ke hoont, us ka saath chor chuke the. Us ki aankhain kissi bhi manoos chehre ko dekhteen to use hi dekhteen. Deewangi ki hudaain paar ker reha tha, jub use, Sanea ki qaber per is baat ka ehsaas huwa ke, ab who ja chuki hai. Us ke under ke shor ko goya zubaan mil chuki thi. Use apna aap sunbhaalna mushkil huwa ja reha tha. Bohot mushkil.

Sanea ki walida, wohi theen jis nain Kami ko pick kiya tha. Kitna hosla tha un main, kitni jurr’at thi, kami soch bhi nahin seka tha. Buchpun se kami ko who apna beta tesleem kerti aayeen theen magar, bawajood in sub ke, unhon nain kami per subha bhi na hone diya tha ke, Sanea kub hospital main admit rehi, kitne din tekleef berdaasht ki thi unhon nain. Kitne din. Aur wohi kami ko is mor per suhara bhi de rehi theen. Janti theen ke, Kami toot jaaye ga, bikher jaaye ga, raiza raiza ho jaaye ga.

Aur ab, who yaheen betha huwa tha, issi jhoole per. Yadon main gum, sochon ki lehron main tairta huwa. Shayed yeh us ka aakhri sufur tha, Pakistan main. Shayed. Bohot koshish ke bawajood, who Sanea ke khut ko khud se juda na ker paya tha. Us ki aakhri baatain, us ke supne, who un se juda na ho paya tha. Who khut ab bhi us ke saath saath rawan duwaan tha. Aur use is baat per hairet hoti thi, ke khut ka khiyaal aate hi, us ke haath kissi unjaani taqet ke tehet, khud ba khud who khut us ki aankhon ke saamne khol dete, go ke use us khut ka aik aik lufz hifz ho chukka tha, magar use is taqet per koi qabu nahin tha. Aur who, humesha ki terha, aik baar phir is khut ko, aise perh reha tha ke jaise, who pehli baar perh reha ho. Pehli baar.


‘................................................. .
Kami, mujhe maloom hai ke tum mujhe is baat per kabhi muaf nahin kero ge magar main mujboor thi. Tumhari zindagi ka sawaal tha, aur aakhri dinon ke medical tests is baat ki gawahi de rehe the, ke humara saath, chund lumhon ka hai. Is liye mama nain tumhain England bhijwaya tha. Kiya kerteen, aik maan hain naan, is main un ka koi qasoor nahin tha, saara qasoor mera hai, Siref Mera. Ho seke to apni sanea ko muaaf ker dena. Main jahan kaheen bhi hongi, tumhare liye humesha dua go hoongi. Bus tum apne hosle, apne iraade muzboot rukhna. Meri khatir hi sehi.

Aur yeh kis nain kaha ke, main ja rehi hoon, tum se door, main to humesha tumhare saath hoon, humesha. Apne aap ko kabhi akela na samajhna. Main tumhare saath hoon, humesha
.......................................’

‘....................Ab InshaAllah, mulaqaat rehe gi, doosre jahan. Haan, is baar ke maile main, Qasim chacha ko mera salaam zaroor kehna, aur haan, tum aao ge to, mere garden ke phoolon ko mama ke saath mil ker school ke garden main le jana. Kami, main jahan bhi hoongi, khush hongi, tum meri perwah na kerna, khoob perhna aur apne muqsadon main kaamyaab hona. Apna bohot bohot khiyal rakhna, ussi terha, jis terha main rukhti thi tumhara. Meri baat mano ge naan.


Ab main chuli
Allah Nigehbaan
Tumhari
Sanea.’


US ke haath jhoole ki dor se jum chuke the. Aur use us waqt ehsaas huwa, jub kissi nain us ke haath per hulke se chuwa tha.

Who aik nunhi si guriya thi, us ke saamne khuri huwi. Kami nain jeldi se khut jaib main dala aur aankhain pohoch ker, bare lagao se us guriya se poocha:

‘Kiya ap jhoola jhoolna chahti hain’, Guriya nain ser ke ishare se haan kiya. Kami nain us ke liye jhoola khaali ker diya aur use jhoole per bitha ker aik hulke se jhoola diya. Abhi mura hi tha ke, kissi khiyal ke tehet ruk gaya, soch reha tha ke agar Sanea yahan hoti to, who yaqeenan is nunhi si guriya ke saath jhoola jhoolti, who thi hi aisi, bohot shurreer. Aur kami nain beikhtiyaar, jhuk ker guriya se poocha ke:

‘Beta, aap ka naam kiya hai’. Guriya nain apne chote chote motiyon jaise daant nikale, magar koi jawaab na diya. Kami nain jhooti mooti si naraazgi se aik baar phir poocha ke:

‘Yaar ab buta bhi do, uncle ki baat nahin taalte’

Is per guriya apni totli si awaaz main chehki,

‘mela naam, shaaaneeyaa haiii’

Aur kami ko jaise haireton ke jhutke luge. Who kuch dair ke liye but’t sa buna reha, aur guriya ko jhoolte huwe dekhta reha. Phir ahista ahista, us ke qadam, maile ke durwazon ki teref rawan ho gaye. Use ab koi gila nahin tha, zindagi se, is maile se.

[$@GH@R]

:rose V.NICE WORK DEAR :rose