Urdu Poetry Forum

Aao hum bhi ijazat talb kar k uthain
ijazat lain dareena khwaboo.n k dar-o dewar sey
jin ki thandak sey muddat tak aankhain gulsitaa.n rahi hain
aaj in k khandar itney weeran hain
jin main ik dosrey ko pukaro tu aawaz tak bhi palat'ti nahi
ijazat lain
wadoo.n ki in konploo.n sey
jo ab tak rag-e jaa.n main pewast hain
jo jigar ki tarawash sey pholain barhain
aur darakhtoo.n ki sourat main saya kye apney hum-rah theen
aaj yoon kirm khurda hain
parindey bhi ghabra k ruktey nahi hain
ijazat lain
in rishtoo.n natoo.n ki zanjeer sey
jisey paoo.n main bandh kar, baazoo.n main somo kar
hamesha barey fakhar sey hum nay duniya ko dekha
ab ye hum sey guraizaa.n hai aur apney halqey
kisi aur ko sonpna chahti hain
aao hum bhi ijazat talb kar k uthain......
ijazat lain us sey
jisey hum nay chaha
aur itna k khud sey, khudaai sey, apney Khuda sey zayada
k ye rishta-e jaa.n zaman-o makaa.n k bhanwar main
apni zaat aur apni ana ko sanbhaley raha hai
magar ab ye thak sa gaya hai
ijazat lain us sey
jisey hum nay chaha..............