It seems that you are unregistered. Please register with us by clicking Here, or if you are already registered login here
It seems that you are unregistered. Please register with us by clicking Here, or if you are already registered login here
Welcome to Urdu Community & Poetry/Shayari Forum
This is a discussion on Raaye Shumari Baraye Tehreeri Muqabila *Eid Special 07* within the Urdu Writer's Club forums, part of the Urdu Adab category; Asalam O Alekum Iss bar Moqey k munasbat sey tehreeri muqabiley ka mozo EID muntakhib kia gaya tha. hum un ...
| |||||||
| Poetry | Video | Photo | Books | Games | Sites | Register | Groups | FAQ | Calendar | Mark Forums Read | Chat |
| Notices | |||||||||||
|
 |
| | LinkBack | Thread Tools |
|
#1
10-25-2007, 12:48 PM
| |||||
| |||||
Asalam O Alekum Iss bar Moqey k munasbat sey tehreeri muqabiley ka mozo EID muntakhib kia gaya tha. hum un HG writers k bohat mashkoor hain jinhon ney apni masroofiyat main sey waqt nikal kar hamarey sath yeh khoobsurat tehreerain share keen. winner ka faisla Hg judges k commenst ki bunyad par kia jaye ga. judges sey guzarish hey k wo apney comments 31st october tak issi thread main submit karwa dain . khush rahyie . Aur sakoon aisa hey k ...mar janey ko ji chahta hey.By Kanwal Hussain    .................... .................... .................... .................... .................... . Aik Khat.... :By Haya n Aik Khat ................. Pyari Rabi, Eid Ki Meethi Meethi Mubarakbaad Qubool Karo.. Mujhay Yaqeen Hay Kay Hamaisha Ki Tarha Is Eid Par Bhi Maira Eid Card Owr Pyar Bhara Khat Pa Kar Tum Mazeed Phulay Nahi Samao Gi... Pichli Eido'n Ki Tarha Is Martaba Bhi Eid Ki Rudaad Tum Ko Likh Rahi Hoo'n... Amma'n Owr Bari Aapa Ki Samajhdari Ki Badowlat Yeh Eid Bhi Qehqahay Lagatay Guzri... Tum To Jaanti Hi Ho Kay Hamaray Baray Bhayya Jab Say Bhabhi Ki Lagaai Bujhaai Mai'n Aa Kar Alag Huway Hai'n Ham Sab Say Sharminda Sharminda Phirtay Hai'n...Unka Bas Nahi Chalta Kay Apni Chamri Kay Jootay Bana Kay Ham Ko Pehna Dai'n... Chaand Raat Ko Jaisay Hi Gaari Ruknay Ki Makhsoos Aawaz Aai Mai'n Nay Fowran Khirki Say Bahar Jhanka To Baray Bhayya, Bhabhi Kay Saath Gari Say Bahar Utartay Nazar Aaey... Mai'n Nay American Mezile Say Bhi Taiz Dowr Lagatay Huway Amma'n Owr Bari Aapa Kay Kano'n Mai'n Yeh Khabar Fowran Daagi... Amma'n Harbara Kar Uthee'n Owr Sekindo'n (Seconds) Mai'n Dopatta Mathay Par Lapait Kar Dhar Say Bister Pay Gir Gaee'n... Bari Aapa '' Haey Amma'n '' Keh Kar Amma'n Say Lipat Kar Bai'n Kar Kar Kay Unhai'n Hosh Mai'n Lanay Lagee'n... Mai'n Itni Dair Mai'n Darwazay Ki Kundi Khol Kar Darwaza Bhair Kar Konay Mai'n Ghutno'n Mai'n Sir Day Kar Aansu Bahanay Ki Koshisho'n Mai'n Masroof Ho Gai.. Is Saari Kaarwai Mai'n Hamai'n Ba'Mushkil Aik Minute Laga... Baray Bhayya Ko Yaqeenan Bahar Hi Aawazai'n Pohanch Gai Thee'n Is Liye Woh Baghair Darwaza Khatkhataey Bowkhlaey Huway Ghar Mai'n Daakhil Huway... Andar Ka Manzar Daikh Kar Yaqeenan Unkay Haatho'n Kay Kabootar, Totay, Maina Sab Ur Gaey...'' Kiya Ho Gaya? Aray Kiya Ho Gaya? '' Woh Bowkhlaey Huway Kabhi Mujh Say Kabhi Bari Aapa Say Mukhatib Ho Rahay Thay...Bhabhi Pathar Kay Butt Ki Tarha Khamosh Khari Yeh Sari Kaarwai Daikh Rahi Thee'n... Bhayya Bilaktay Huway Amma'n Ko Hosh Mai'n Lanay Ki Tarkeebai'n Karnay Lagay... Aakhir Woh Bari Zor Say Bhabhi Par Dharay '' Tum Kiya Mujassima Bani Khari Ho, Thanda Pani Fridge Say Nikal Kar Laao, Daikh Nahi Rahi Ho Kay Amma'n Ki Kiya Halat Hay? '' Bhabhi Nay Tanziya Nazro'n Say Ham Sab Ka X.Ray Liya Owr Fridge Ki Taraf Barh Gaei'n... Kuch Dair Baad Woh Thanday Pani Ka Jug Liye Baramad Huee'n Jis Mai'n Pani Kam Owr Ice Cubes Ziyada Thee'n...Is Say Paihlay Kay Bari Aapa Bhabhi Say Jug Laitee'n Bhabhi Nay Yakh Basta Pani Amma'n Par Undail Diya Owr Bharraai Hui Aawaaz Mai'n Amma'n Ko Hosh Mai'n Lanay Kay Liye Bhayya Kay Saath Shareek Ho Gaee'n... Amma'n Kay To Maray Sardi Kay Daant Bajnay Lagay...Daant Kitkitati Amma'n Aakhir Kaar Hosh Mai'n Aa Hi Gaee'n...Bari Aapa Nay Zor Say Chutki Li To Amma'n Baray Bhayya Say Lipat Gaei'n...Baray Bhayya Rundhi Hui Aawaz Mai'n Amma'n Say Poochnay Lagay Kay '' Aakhir Huwa Kiya Tha? '' Bari Aapa Ki Doosri Chutki Par Amma'n Bilak Bilak Kar Ronay Lagee'n Kay '' Baita Raat Tumharay Abba Marhoom Khuaab Mai'n Aaey Thay...Tum Say To Thay Hi Naraaz Mujh Par Bhi Cheekhnay Lagay...Bouhat Gussay Mai'n Keh Rahay Thay Kay '' Jawaan Baitay Ko To Bewa Maa'n Owr Yateem Behno'n Say Alag Hotay Sharam Na Aai, Kam Az Kam Tum Hi Samajhdari Say Kaam Laytee'n...Baitay Kay Khuabo'n Say Bahoo Jaey To Uskay Khuaab Mai'n Bhi Jaoo'n...Mai'n Yaha'n Say Jo Kuch Kar Sakta Tha Woh Sab Kiya Hay Daikh Laina Chaand Raat Ko Baita Qadam Bosi Kay Liye Zaroor Haazir Ho Ga...Tum Zara Taakheer Na Karna Owr Chaand Raat Ko Baitay Kay Yaha'n Clifton Kay Wasee.o.Areez Ghar Mai'n Shift Ho Jana...Warna Baitay, Bahu, Us Ki Susral Owr Aanay Wali Naslo'n Mai'n Say Kisi Ko Kabhi Eid Ki Khushiya'n Daikhna Naseeb Na Ho Gee'n...Mairi Yeh Baat Tumhai'n Her Soorat Maan'na Hay Warna Qabar Mai'n Bhi Mujhay Chain Naseeb Na Ho Ga '' ... Amma'n Phoot Phoot Kar Ro Rahee'n Thee'n Owr Baray Bhayya Rotay Huway Thar Thar Kaanp Rahay Thay... Bhabhi Ki Shakal Daikh Kar Mai'n Nay Bari Mushkil Say Hansi Roki... Amma'n Phir Goya Huee'n Kay '' Baita Raat Hi Mai'n Nay Tumhari Behno'n Ko Takeed Kar Di Thi Kay Tumhai'n Owr Dulhan Ko Zara Bhi Ittila Na Karai'n Warna Woh Pareshan Ho Jaei'n Gay Jab Kay Tumharay Abba Nay To Fowri Raabtay Ka Kaha Tha...Mai'n Apni Jaan Par Yeh Sab Sehti Hosh.o.Hawaas Say Baygana Ho Gai Kay Tum Aa Gaey Warna Mai'n Jeeti Ya Marti Kabhi Tum Say Kuch Na Kaihti ''... Bari Aapa Ki Siskiya'n Baray Bhayya Ki Hichkiyo'n Mai'n Madgham Honay Lagee'n... Is Say Paihlay Kay Bhabhi Koi Rakhna Daltee'n Mai'n Baray Bhayya Say Cheekh Maar Kay Lipat Gai Owr Ro Ro Kay Kehnay Lagi '' Haaey Baray Bhayya Aap Kay Baghair Aap Ki Nannhi Kaisay Kaisay Tarpi Mai'n Aap Ko Kaisay Bataoo'n? Amaa'n Owr Bhabhi Ki Ghalat Fehmiyo'n Ki Wajha Say Sab Say Ziyada Nuqsan To Aap Ki Nannhi Ka Hi Huwa Hay...Baray Bhayya Ki Qameez Say Musalsal Naak Pochtay Huway Mai'n Tarap Tarap Kay Ro Rahi Thi...'' Baray Bhayya Agar Aap Apni Nannhi Ko Ab Akela Chowr Kay Gaey To Aap Ki Nannhi Duniya Chowrnay Mai'n Dair Na Lagaey Gi '' Mai'n Nay Ro Ro Kay Kohraam Bapa Kar Diya... Baray Bhayya Nay Bhabhi Ko Wahi Hukm Diya Jo Ham Ji Jaan Say Chahtay Thay...Baray Bhayya Nay Khud Bhi Amma'n Kay Pair Pakar Kay Muafi Maangi Owr Bhabhi Ko Bhi Muafi Kay Liye Majboor Kartay Huway Wahi Dhamki Di Jo Abba, Amma'n Ko Diya Kartay Thay Kay '' Abhi Yeh Kaam Ho Jana Chahiye Warna Teen Harf Bol Kay Chutti Karnay Mai'n Dair Na Lagaoo'n Ga '' Abba Ka Kaha Wahi Jumla Is Waqt Baray Bhayya Kay Bouhat Kaam Aaya Jis Par Ham Sab Ash Ash Kar Uthay... Hamara Palra Bhari Daikh Kay Bhabhi Nay Waqti Towr Pay Hathiyar Daal Diye Owr Ham Mukhtasir Sa Samaan Liye Bhayya Kay Clifton Walay Laq.o.Daq Ghar Mai'n Shift Ho Gaey, Jo Hamari Bhabhi Ko Unkay Marhoom Walid Sahib Nay Jahaiz Mai'n Diya Tha...Bhayya Kay Haseen Jameel Honay Kay Ba Wajood Hamari Amma'n Isi Liye To Jaamni Owr Moti Si Bhabhi Biyah Lai Thee'n... Ghar Mai'n Qadam Rakhtay Hi Amma'n Nay Farman Jaari Kiya Kay '' Baita Mujhay Hawa Daar Owr Showr Sharabay Say Door Kamra Daina...Tum To Jantay Hi Ho Kay Tang Owr Baghair Hawa Wali Jagha Pay Mujhay Khafqan Uthta Hay...Showr Sharabay Say Mairi Ibadat Owr Din Raat Kay Wazeefo'n Mai'n Khalal Parta Hay ''... Bari Aapa Bhi Laad Say Bolee'n Kay '' Baray Bhayya Mujhay Woh Wala Kamra Dijiye Ga Jaha'n Say Samandar Nazar Aata Hay ''... Mai'n Bhayya Kay Galay Mai'n Jhooltay Huway Laad Say Boli Kay '' Bhayya Aap Ka Jo Dil Chahay Mujhay Woh Hi Kamra Dijiye Ga Bas Usay Is Tarha Sajaiye Ga Kay Mairi Saheliya'n Daikhai'n To Aap Ki Owr Bhabhi Ki Wah Wah Karai'n ''...Mai'n Nay Chatt Say Bhabhi Kay Gaal Ko Kuch Is Tarha Chooma Kay Bhabhi Kay Maskaray Nay Palko'n Say Gaalo'n Tak Ka Safar Bouhat Khoobi Say Mukammal Kiya...Lipstick Bhi Hairan Hotay Huway Is Tarha Phaili Kay Bhabhi Ka Rangeen Sa Chehra Palak Jhapaktay Mai'n Intehai Sangeen Sa Ho Gaya... Amma'n Owr Bari Aapa Nay Bhabhi Ki Shaan Mai'n Aesay Qaseeday Parhay Kay Baray Bhayya Phool Kay Kuppa Say Ho Gaey... Bhabhi Nay Apna Moo'n Dhonay Ki Gharaz Say Wash Room Janay Kay Liye Jis Taizi Say Chalang Lagai Us Say Dugni Taizi Say Mai'n Baray Bhayya Say Khushi Say Lipat Kay Farmaaish Karnay Lagi Kay '' Baray Bhayya Aaj Chand Raat Hay, Jab Tak Amma'n Nowkro'n Say Samaan Set Karwaei'n Aap Mujhay Shopping Kay Liye Lay Kar Chaliye, Mai'n Apni Pyari Si Bhabhi Kay Liye Eid Ka Apni Pasand Ka Jora Owr Chooriya'n Loo'n Gi...Bhabhi Kay Hatho'n Par Apni Pasand Ka Design Banaoo'n Gi, Apni Bhabhi Ko Is Eid Par Dulhan Sa Tayyar Karoo'n Gi '' Bhayya Kay Chehray Par Fakhar Ka Aehsaas Jagmaganay Laga...Mai'n Bhabhi Bhabhi Ka Pahara Parhtay Gari Mai'n Baray Bhayya Kay Sath Baith Kar Humaknay Si Lagi... Waqaai Chand Raat Ko Mehngi Mehngi Shopping Ka Lutf Hi Kuch Owr Hota Hay... Bhabhi Ki Tareefai'n Kar Kar Kay Mai'n Nay 4 Suit Apnay, 3 Suit Bari Aapa Kay, 3 Suit Amma'n Kay Khareeday...Maching Jewellery Owr Deegar Lawazmaat Dil Bhar Kay Khareeday Owr Farakh Dili Ka Muzahira Kartay Huway Bhabhi Kay Liye Bhi Jaamni Rang Ka Suit Khareeda (Tum To Jaanti Hi Ho Kay Jamni Rang Mujhay Kitna Bura Lagta Hay...Bhabhi Ki Jamni Si Rangat Par Yeh Suit Sonay Par Sohaga Sabit Ho Kay Unhai'n Bengan Sa Bana Jaey Ga Yeh Soch Kar Hi Fart-e-Musarrat Say Hansi Mai'n Nay Kis Tarha Roki Yeh Maira Hi Kamaal Tha) Bhabhi Kay Liye Matching Chooriya'n Bhi Khareed Hi Dalee'n... Baray Bhayya Kay Na Na Karnay Kay Ba Wajood Mai'n Nay Baray Bhayya Ko Bhi Apni Pasand Ka Suit Dilwaya Kay '' Nahi Baray Bhayya Aap Ki Nannhi Kay Hotay Yeh Nahi Ho Sakta Kay Mai'n Eid Kay Din Apnay Baray Bhayya Owr Pyari Si Bhabhi Ko Apni Pasand Kay Joro'n Say Na Sajaoo'n ''... Baray Bhayya Nehaal Hoti Nazro'n Say Mujhay Daikh Daikh Kar Khush Ho Rahay Thay...Bhook Say Nidhaal Hotay Huway Mai'n Nay Pizza Hut Janay Ki Farmaish Daaghi...Apni Pasand Ka Pizza Halaq Tak Bhar Kay Wapsi Par Bari Aapa, Amma'n Owr Bhabhi Kay Liye Bhi Pizza Pack Karwaya...(Mujhay Pata Hay Kay Bhabhi Raat Ko Sirf Doodh Peeti Hai'n Un Kay Hissay Ka Pizza Raat Ko Kisi Waqt Bhi Mai'n Ura Kay Kisi Bhi Nowkar Pay Ilzam Laga Sakti Thi) Aray Haa'n Yeh To Batana Hi Bhool Gai Kay Mai'n Nay Khoob Bhar Bhar Kay Ice-Cream Bhi Khaai Thi Owr Wapsi Par Amma'n Kay Liye Saada Khushboo Ilaichi Kay Darjan Bhar Paan Laina Bhi Nahi Bhooli Thi... Bhabhi Kay Hatho'n Mai'n Mehndi Laganay Ki Batai'n Karti Mai'n Baray Bhayya Kay Saath Ghar Pohnchi To Bhabhi Lawn Mai'n Hi Tehelti Nazar Aaei'n...Hamaray Hatho'n Mai'n Itnay Saray Shopping Bags Daikh Kar Is Say Pehlay Kay Woh Behosh Ho Kay Girtee'n Mai'n Unkay Galay Lag Kar Chand Raat Ki Mubarakbaad Daiti Andar Aa Gai... Hamai'n Ander Aata Daikh Kar Amma'n Owr Bari Aapa Bhi TV Band Kar Kay Hamaray Paas Aa Kar Sadqay Qurbaan Honay Lagee'n....Amma'n Mairi Balaei'n Leti Hui Bolee'n Kay '' Mairi Nannhi Say To Is Bhaei'n Bhaei'n Kartay Ghar Mai'n Rownaq Ho Gai Hay, Aray Sotay Say Uth Jati Thi Kay Bhabhi Yaad Aa Rahi Hai'n '' ... Mai'n Baqi Thelo'n Ko Peechay Dhakeltay Huway Bhabhi Ko Unka Suit Owr Deegar Lawazmaat Dikhanay Lagi...Baray Bhayya Kay Saath Amma'n Owr Bari Aapa Nay Itni Wah Wah Ki Kay Bhabhi Ko Mairay Khuloos Owr Mohabbat Ka Aetraf Sab Kay Saamnay Karna Hi Para... Mairi Aankh Kay Isharay Par Bari Aapa Baqaya Thelay Bari Khoobsurti Say Lay Kay Rafu Chakkar Ho Gaei'n...Owr Mai'n Bhabhi Kay Mehndi Laganay Baith Gai... Baray Bhayya To Mujh Par Nisar Huway Ja Rahay Thay Unho'n Nay Aik Baar Phir Amma'n Kay Qadam Pakar Liye Kay '' Amma'n Hamai'n Muaf Kar Dijiye Jo Ham In Mohabbato'n Say Moo'n Morh Baithay Thay ''... Amma'n Nay Farakh Dili Say Muaf Kartay Huway Bhabhi Ki Chata Chat Balaei'n Lay Dalee'n Owr Shukranay Kay Nafal Ada Karnay Kamray Ka Rukh Kiya Jaha'n Bari Aapa Shopping Ka Dhero'n Samaan Liye Baytabi Say Unki Muntazir Thee'n... Chand Raat Ko To Mai'n Nay Chaar Chand Lagaey Hi Thay, Eid Kay Din Bhi Nik Suk Say Tayaar Ho Kar Mai'n Nay Bhayya Say To Dhairo'n Eidi Wusool Ki Hi Thi Laikin Dil Mai'n Thandak To Us Waqt Pari Jab Bhabhi Say Tagri Eidi Wusool Karnay Mai'n Kamiyaab Rahi... 3 Din Mai'n Bhabhi Ka Dum Challa Bani Ghoomti Rahi....Chowthay Din Jab Bhayya Office Janay Lagay To Mai'n Nay Bhayya Say Apni Saheliyo'n Ki ''Eid Milan Party'' Ki Laad Bhari Farmaish Kar Di Kay '' Bhayya Mai'n Apni Saheliyo'n Ko Dikhana Chahti Hoo'n Kay Hamari Bhabhi Kitni Achi Hai'n ''...Bhayya Nay Jhat Say Ijazat Day Di Owr Yoo'n Aik Yaadgar '' Eid Milan Party '' Munaqid Hui... Bhabhi Nay Hamari Kisi Bhi Kaarwaai Mai'n Koi Rakhna Andazi Nahi Ki Jis Par Ham Peeth Peechay Dil Bhar Kay Hairan Bhi Ho Rahay Hai'n Owr Sach Poocho To Dar Bhi Rahay Hai'n... Amma'n Kay Dil Mai'n Her Waqt Pankhay Say Lagay Rehtay Hai'n, Bari Aapa Ko Alag Howl Say Uthtay Rehtay Hai'n, Mai'n Alag Her Waqt Andaisho'n Mai'n Ghiri Rehti Hoo'n Kay Pata Nahi Kis Waqt, Kis Ghari Bhabhi Ham Pay Sacha Ilzaam Sabit Kar Kay Hamla Aawar Ho Jaei'n... Ham Bhabhi Ko Achi Tarha Jantay Hai'n...Suraj Maghrib Say Nikal Kay Mashriq Mai'n Ghuroob Ho Sakta Hay Laikin Bhabhi Khamosh Owr Kamiyaab Hamla Karnay Say Hergiz Nahi Chook Saktee'n... Apni Isi Hikmat-e-Amli Ki Wajha Say Woh Din Dhiyaray Bhayya Ko Laloo Khait Say Clifton Lay Uri Thee'n Owr Ham Haath Maltay Reh Gaey Thay... Is Martaba Bhabhi Kis Rukh Say Ham Par Mezile Daghai'n Gi Ham Ko Kuch Ilm Nahi, Unki Musalsal Khamoshi Tufaan Ka Paish Khema Lag Rahi Hay...Lagta Hay Is Martaba Pakka Kaam Karai'n Gi... Amma'n Is Waqt Bhi Chilla Kaat Rahi Hai'n, Bari Aapa Bhabhi Ki Jasoosi Mai'n Halkaan Hui Ja Rahi Hai'n Laikin Majal Hay Jo Koi Sira Hamaray Haath Lag Jaey...Jaisay Hi Koi Sira Haath Laga Mai'n Tum Ko Doosra Khat Likh Doo'n Gi.... Ab To Tum Bhi Computer Lay Hi Lo, Tumharay Paas Computer Hota To Mai'n Itna Taweel Khat Likhnay Say Bach Jati Owr Tumhai'n 123 Greetings Ka Card Bhi Baghair Ticket Lagaey Bhej Daiti... Is Khat Kay Miltay Hi Jawabi Khat Rawana Kar Daina...Mujhay Yaqeen Hay Kay Tum Apnay Owr Apni Bhabhi Kay Maarkay Likhna Hergiz Nahi Bhulo Gi... Mairi Janib Say Dobara Eid Ki Mubarakbaad Wusool Karo... Mairay Liye Khususi Dua Karna Kay Mai'n Bhabhi Ka Hamla Paspa Kar Sakoo'n... Allah Hi Hafiz... Faqat Tumhari Iklowti Saheli '' Nannhi ''
__________________ Kuch Aansoo Kuch KhushiyaaN Dey Kar Taal Gaya Jeevan Ka Ik Aur Sunehra Saal Gaya ...!! Meri Zaat Zarra E Bey NishaaN Mera Ishq Naghma E Bey Nawa         |
|
#2
10-31-2007, 03:38 PM
| |||||
| |||||
 ~kanwal hussain~ Afsana likhna aik bohat mushkil kaam hai. kanwal is afsanay k likhnay main ye mushkil marhala boht aasani say tay krti nazar aae hain, baaz jaga jumly boht hi khobsorat our mukhtalif likhnay ki koshsish bhi krti nazar aae hain. bahat khub  marks khiyal ki infaradiyat =4\3 kahani\mazmon\mozo say insaaf =3\3 nasar or bayaniya =3\3 Total =10\9 ~haya ji~ aik khobsorat afsanwi khat, is khat main haya ji apnay makhsoos andaz main nazar aaee hain, ibtada main to ye khat lagta hai laikin darmiyan main ye ahsaas kaheen gum hojata hai k ham khat parh rahay hain, anjaam per phir achanak pata chalta hai k ye khat hai. main samjhti hon k ye is tahreer ka kamzor pahlo hai. tahreer mukammal toar per khat k pairaaiy main nahi hai, albaatta eid k mozo say acha insaaf kiya hai, nasar bhi achi hai marks khiyal ki infaradiyat =4\2 kahani\mazmon\mozo say insaaf =3\2.5 nasar or bayaniya =3\2.5 Total =10\7
__________________   |
|
#3
10-31-2007, 04:48 PM
| |||||
| |||||
Salam... Hum nay donoN tehreereiN baghour parhi heiN... ... donoN likhariyoN ko buhat buhat mubarakbaad k jin k qalam nay hamesha ki tarhaaN iss muqablay meiN bhi apnay joher dikhaye... ab marking 1. Kanwal Hussein Buhat achi tehreer hay.. alfaz ka ista'mal buhat acha hay... laikin kahin kahin ghair zuroori tafseel ya tawalat mehsoos hoti hay... ba haisiyat-i-majmoyee aik buhat achi tehreer hay.. aap k marks hein khayaal ki infiradiyat: 2.5 mazmoon se insaf: 3 Nasr aur bayan: 3 Total: 8.5 2. Haya n buhat mazaydaar khat hay... .. parh ker buhat maza aya... halka phulka mazah liye huway ye khat waqai aik buhat achi kawish hay... mubarakbaad qabool kijiye... meiN pehli barish wali hi baat karooNga kay darmiyan mein andaz-i-bayaaN kuch aisa ho jata hay k lagta nahin k khat parha ja raha hay.... marks khayaal ki infiradiyat: 2 mazmoon se insaf: 2.5 Nasr aur bayan: 3 total: 7.5 Best of luck janab..
__________________ |
|
| Bookmarks |
| Tags |
| raaye, shumari, baraye, tehreeri, muqabila, eid, special |
| Thread Tools | |
| |
Similar Threads | ||||
| Thread | Thread Starter | Forum | Replies | Last Post |
| Raye shumari baraye muqabla-e-ghazal goi *Mazahiya*.. (Oct.07) | kanch ki mehroo | Urdu Poet Club | 5 | 11-02-2007 03:46 PM |
| Tehreeri Muqabila *Eid Special* (oct 07) | Kanwal | Urdu Writer's Club | 6 | 10-23-2007 12:44 PM |
| Nateeja Baraye Tehreeri Muqabila | Kanwal | Urdu Writer's Club | 5 | 10-10-2007 01:40 AM |
| Raaye Shumari Baraye Muqabila E Tehreer | Kanwal | Urdu Writer's Club | 2 | 09-27-2007 09:39 PM |
| Raye Shumari Baraye MuqabiLa Maah-e-JuLy 2007 | naz | Urdu Writer's Club | 12 | 07-30-2007 12:25 PM |
Raaye Shumari Baraye Tehreeri Muqabila *Eid Special 07* 
