Urdu Poetry Forum

-------------------------------------
Sandra se meri pehli mulaqaat association me hui thi.wo khud meri taraf barhi thi.
,,Hello, me Sandra hun or tum?,,
,,Hello,,mera naam Zara he or me Pakistani hun.me spanish seekh rahi hun.,,
,,tum to achchi khasi spanish bol leti ho.kiya aaj bhi tumhari class thi?,,Sandra ne muskura k mujh se poocha.
,,han,me weekly 3 days classes leney aati hun,, me ne bhi muskura k jawab diya.
Sandra mujh se bohat garam joshi se mili hatta k us ki aankhein pur namm hogaein.phir ham ne phone numbers or adress aik doosrey ko diya or Domingo(sunday) ko 1 bajey dopeher Sandra ne merey ghar aaney ka wada kiya.
Sandra har mulaqaat me mujhey bohat uljhi uljhi or bechein si nazar aai.me ne kai martaba us se poocha bhi lekin wo hans k taal gai.
mujhey us k barey me itna hi pata tha k wo spanish thi or Jitano qoum se talluq rakhti thi.us ki 2 behnein or 3 bhai mukhtalif markets me kapra farokht kartey thay or sab shadi shuda thay.us k khandaan me taleem hasil karna fuzool samjha jata tha sirf Sandra hi lar jhagar kar taleem hasil karney me kamiyaab ho pai thi.
khilti hui gandumi rangatt,brown bari bari aankhein(jo mujhey hamesha bheegi bheegi si lagti thein) khoobsurat dark brown lambey baal or intehai mutanasib jisim.Sandra behadd atractive thi.
me ne us ko hamesha black libaas me malboos dekha tha.
wo aksar kuread kuread k Pakistan k mutaliq sawal karti or Pakistan k mutaliq batatey huey me kho jati.me be takaan boley chali jati k Pakistan k chappey chappey se mujh ko ishq tha.wahan k kharaab halaat ka batatey huey meri awaaz rundh jati.
,,Sandra mujhey koi jadoo ki chari la do k me Pakistan k halaat theek kar sakun kiyun k ab to wahan jadoo ki chari ya koi Khudai mojiza hi halaat theek kar sakta he.,, me bohat afsurda hojati.
waqt guzarney k sath ham dono ki dosti pakki hoti chali gai or me us ka eatimaad jeetney me kamiyaab hogai.
,,Sandra ne aik din bataya k is se pehley us ki dosti aik Indian larki Paaja se hui thi lekin us ne merey zariye sirf apney kaam nikalwaey or aaj mujh ko poochti bhi nahi he.,,cigirette ka aik gehra kashh le kar Sandra ne cigirette masal di or phir ham dono aik park me beth gaey.
,,hay Sandra sardi lag rahi he,,me ne topi se kano ko achchi tarha dhanpa.
,,aik to yahan ka mosam mujhey bohat na pasand he.sardi parney pe aati he to parti hi chali jati he.naak,kaan sab sunn ho k reh jatey hein.apney se ziyada to kapron or juton ka wazan hojata he phir ye barish ki museebat bhi sath hoti he.,,me ne chatri ko zameen pe zor se mara.
,,ab batao me is heavy coat or juton ko heater k agey kab tak sukhati rahun?or garmi parney pe aati he to itni garmi parti he k bandey ki zabaan bahar nikal aaey. raat 10 bajey suraj ghuroob hotey me ne to kabhi nahi suna tha,,me mosam ko bura bhala kehney lagi.
Sandra hans pari,,tum ko to sirf mosam na pasand he jab k mujhey is mulk,is k loge,is ki zabaan,is ka rehen sehen,khana,libaas,r asumaat gharaz k har cheez se nafrat he.,,

me ne herat se us k face ko dekha,,,kiya kaha tum ne? kiya.....?
,,han me theek keh rahi hun,,wo sanjeeda thior us ki aankhein mazeed bheeg gai thein.
,,me Pakistani hun.me wahin peda hui thi or wahein meri deth hui thi.isi liye to mujh ko Pakistani loge,un ki zabaan,un ka rehen sehen,khana,libaas gharaz k har cheez pasand he.,,wo laal angara si aankhein liye bolti chali gai.
me ne ghabra k usey jhinjhora.,,,Sandra, Sandra....tum pagal to nahi hogai ho?kiya bakk rahi ho?kiya tum Pakistan ja chuki ho?me ne herat se poocha.
wo sanbhal gai thi,hatheliyon se us ne apni aankhon ko bedardi se ragarr dala.
,,bataun gi dear,sab bataun gi lekin phir kabhi.,,wo achanak merey gaal choom k aik texi me beth k chal di.
or me hakka bakka akeli khari reh gai.
raat ko us ne phone kar k mujh se apney rawayye per sorry kiya.
aik din ham bahar coffee pi rahey thay k me ne us se kaha.,,Sandra kabhi apney ghar mujh ko bulao or apni family se bhi milao.,,
us ne udaas nazron semujhey dekhaor ahista se boli.,,aaenda aesy baat kabhi na kehna.meri family Pakistaniyon se bohat nafrat karti he.,,
merey dil ko sakht dhachka laga or me ne shadeed nagwari se poocha,,kiyun?,,
,,bataun gi yaar, bataun gi,,abhi to tum aik good news suno.mujhey Barcelona me job mil gai he.next week me join kar rahi hun.,,wo apney glass me wine undeltey huey boli.
,,kiya?,,or tum mujh ko ab bata rahi ho?,,me ghussey se boli.
,,kesey batati?mujhey to khud kuch ghanto pehley pata chala he,,us ne wine ka ghoont bhara.
,,me ne to aik add.me dekh k apply kiya tha or interview bhi de aai thi lekin mujhey umeed nahi thi k mujhey call kar liya jaey ga.aaj letter mila he to pata chala he.,,us ne bataya.phir meri taraf ghor se dekhney lagi.,,kiya tum khush nahi huein?,,us ne muskura k meri aankhon me jhanka.
,,nahi ye baat nahi he.me bohat khush hun.lekin pardes me itni achchi dost ki judai se dil ko dhachka lagna aik fitri baat to he na?,,me buri tarha ro pari.
,,arey meri jaan,tu mujhey itna chahney lagi he.ye tum Pakistaniaesey hi hotey ho.yaar ,me har month weekend pe aaya karun gi or phone waghera se bhi raabta rakhun gi na.,,wo khud bohat udaas thi lekin mujh ko tasalli de rahi thi.
,,Sandra,me tum se bohat kuch poochna chahti hun.,,me ne apni aankhon ko saaf kiya.
,,han dear,mujhey pata he.me bhi tum se bohat kuch kehna chahti hun.achchey dost baar baar nahi mila kartey or me tumhein khona nahi chahti.tum esa karo k apni family se ijazat le kar Sabado(saturday)or Domingo(sunday)merey pashi guzaro.bal k me hi tum ko pick karbig gi.tumhein mera thikana pata hi kahan he?darr asal me apni family se alag aik kiraey k room me rehti hun. or ab chahti hun k tum merey room ko dekho,,
me ghar walon se ijazat le kar 2 din k liye Sandra k ghar aai hui thi.us ka room ziyada bara nahi tha lekin me us ki sajawat dekh k heraan.o.pareshan thi.aesa lag raha tha k me Pakistan me khari hun.

deewaron pe Pakistan k qabil-e-tazkira maqamaat ki fotos framing ki hui lagi thein.carpet k ooper khoobsurat chataiyan bichchi hui thein.jin per ajrakk k sheeshey lagey cushans rakhey huey thay.koney me lakri ka munaqqash huqqa bhi rakha hua tha.showcase me marble or brass se bani hui mukhtalif cheezein saji hui thein.showcase k ooper ilaqai libaas me malboos guriyan or guddey bhi sajey huey thay.bed pe rilly bichi hui thi.motey dabeez pardon k kinaron pe ajrakk ka border bohat khoobsurat andaaz se lagaya gaya tha.samney deewar pe koi tasweer thi shayed kiyun k us par is tarha se haar daley gaey thay k jhalak bhi nazar nahi aarahi thi.
me ne khoey khoey andaaz me gher yaqeeni nazron se Sandra ki taraf dekha.
wo hanse parior boli,,dekha,me ne ghalat to nahi kaha tha k me Pakistani hun.,,
phir boli,,aao me tumhein apni almari dikhaun,,wo mujheyshano se pakar k apni almari k qareeb le gai or almari ko poori tarha khol diya.
hangers khoobsurat Pakistani malbusaat se bharey parey thay.rewaeti ilaqai libaas or jadeed andaaz me siley huey libaas bhi mojood thay.sarhiyan bhi thein to shalwar qameez bhi barey barey dopatton k sath tangi huein thein.mukhtalif saleem shahi or chappalein bhi thein.gharaz k almari Pakistani ashiya se bhari pari thi.
Sandra aik aik cheez mujhey itni ehtiyaat se dikha rahi thi k jesey tabarruk ho.kahin be adabi na hojaey.us ne ahista se almari band kardi or mujhey liye huey bed pe gir si gai.
,,heraan horahi hona?,,wo dheerey se merey balon me ungliyan phertey huey boli.
,,mujhey batao na Sandra,ye sab kiya he?mujh se mazeed bardasht nahi horaha,plz.mujhey apney barey me sab kuch sach sachbatao.,,me bohat bechein thi.
,,me bhi tum ko sab kuch bata dena chahti hun isi liye tum ko yahan bulaya he warna merey siwa is room me kisi ko aney ki ijazat nahi he.lekin pehley ham khana khalein us k baad batein karein ge.,,
aaj shayed Sandra ne mujhey heraan karney ka tahayya kiya hua tha.
masaleh daar biryani,shami kabaab,raeta,salad,o r kheer se us ne meri tawazoh ki.
,,har cheez bohat lazeez he.Sandra tum itni achchi Pakistani cooking kis tarha kar leti ho?,,me ne phir herani se poocha.
,,jadoo se,,wo mazey se boli.
,,bohat se masaleh yahan Cordoba me nahi miltey wo me Madrid se ikhatta le aati hun.wahan kafi Pakistani or Indian shops hein.,,
khaney se farigh ho k Sandra ne khana sanbhala or me ne us k mana karney k bawajood barten dhoey or kitchen saaf kiya is doraan us ne qehwa bana liya or ham chataiyon pe aa k beth gaey.
,,Sandra ,plz.ab shuroo hojao me bohat bechein hun,, me ne pehlu badla.
wo gehri soch me doobi hui qehwa piti rahi or us k baad us ne dono ghutno me sir de liya.thori der baad sir uthaya to us ki ankhein surkh horahi thein.
,,dear.me kiya bataun?kahan se bataun?kiya kiya bataun?tum shayed sab kuch kuch ghanton me sun lo gi.sab kuch jaan jao gi lekin ye kuch ghanton ki to baat na thi,salon pe muheet he dastaan meri,kitni hi subhein,kitni hi dopehrein,kitni hi shamein or kitni hi ratein shamil hein is kahani me.me guzra hua lamha lamha tum se share karna chahti hun lekin esa hona mumkin to nahi.,,
,,tum darmiyaan me mujhey na tokna,shayed me kahin be rabt bhi hojaun lekin tum sunti jana.,,
me khamoshi se us ka face dekh rahi thi.
Sandra ne cigirette sulgaya or aik gehra kashh le kar dhuwan fiza me bikher diya.kuch der k liye us ka khubsoorat face dhuwein k margolon k peechey dhundla sa gaya.wo dheerey dheerey bol rahi thi

Ali or me aik sath parhtey thay.wo Pakistani larka tha.us k perents Pakistan me rehtey thay lekin un ka residence permit Spain ka tha or wo yahan bhi aatey jatey rehtey thay.ye room jis me aaj ham bethey hein Ali isi me rehta tha.
Ali behad haseen,zaheen,or khoobsurat sochon ka malik tha.larkey us se jelious rehtey thay kiyun k larkiyan Ali ko bohat pasand karti thein.larkey us ko tarha tarha se Ali ko teachers ki nazron me us ko neecha dikhaney ki try kiya kartey thay lekin Ali ka result,us ki shaksiyat,us ka seher or guftugu ka ba adab lehja un ki koshishein nakaam bana deta.
Ali ko football k game se junoon ki hadd tak lagao tha.wo Barcelona ki team ki taraf tha jab k mujh samet ziyada tar studant Real Madrid ki team ko pasand kartey thay.jab kabhi in dono teams ka match hota Ali ka face or josh.o.jazba qabil-e-deed hota.khoob naarey bazi hoti.larkey battamizi pe utar atey lekin Ali tehzeeb ka daman kabhi hath se nahi chorta tha.
in dino me swiming seekh rahi thi k me ziyada pani me chali gai.Ali ne hi meri jaan bachai or phir ham dono gher mehsoos tareeqey par aik doosrey k qareeb aatey chaley gaey.
hamari mohabbat ki ibtida bohat riwaeti si thi.phir aik waqt easa bhi aaya k ham aik doosrey k liye lazim.o.malzoom hogaey.
na Ali ne chaand tarey tor k laney k dawey kiye thay or na hi me ne us ki mohabbat me jaan de deney ki qasmein khai thein.han,ham ne bohat se easey khuaab zaroor dekhey thay jinhein ham sach karna chahtey thay.
hamarey sathi studants me sab ko hi ye baat pata chal gai thi k Ali or Sandra aik doosrey k deewaney hein.merey ghar walon ne eatraaz bhi kiya lekin me ne un ko qael kar liya k Ali sirf mera amigo(dost) he kiyun k wo study me meri help karta he is liye doosrey jaltey hein or easy batein kartey hein.
dar asal hamari Jitano family me ye riwaaj he k larka chahey 10 larkiyon se dosti kar le lekin shadi us ko Jitano larki se hi karna parti he.larki k liye mazeed sakhtiyan hein.us par zor diya jata he k wo sirf larkiyon se dosti rakhey.
me kiyun k taleem hasil kar rahi thi is liye merey ghar waley ziyada sakhti nahi kartey thay or wesey bhi kon sa me un ki sunti thi.Ali k perents baqaedgi se yahan atey thay.Ali ki dekha dekhi me bhi un ko Mammi or Papa kehti thi or wo bhi mujh ko betiyon ki tarha hi pyar kartey thay.jis saal Ali k perents nahi aatey thay wo 1 month k liye Pakistan chala jata tha or wapsi par merey liye tarha tarha ki Pakistani cheezein bhar k le ata tha.
Ali jata to 1 month taweel ho k sadiyon par cha jata.sooraj chamakna chor deta,sitaron ki jagmagahat madhamm par jati,phool murjha se jatey,har taraf sirf khizan ka mosam basera kar leta.Ali meri aankhon ki putli tha or us k bagher me nabeena(blind) ho kar reh jati thi.har cheez ko sirf Ali ka intizaar hota.
Ali wapas aata to apney sath suraj ki taabnaki,taron ki chamak,phoolon ki tar.o.tazgi or bahaar ka mosam bhi le aata.meri nabeena aankhein phir se roshan hojatein or suhaney sapney dekhney lagtein.
me bawajood koshish k Urdu na seekh saki.meri Urdu chand tootey phootey lafzon tak mehdood rahi.Ali merey liye khana pakaney ki bohat se books bhi lata tha jo k english me hoti thein or wesey bhi me Ali ki Mammi se bhi Ali ki pasandeeda dishes pakana seekh chuki thi.
me ne QURAN SHARIF sameat bohat si islami books k tarjumey parhey thay or me Deen-e-Ialam se bohat mutassir thi.mujhey apney mazhab me koi charm nazar nahi aata tha.apney mazhab ki kai baton ko mera mind qubool nahi kar pata tha jab k Deen -Islam har tarha se mujhey mukammal nazar aata.me aksar isi silsiley me Ali se baat cheet karti thi or wo mujhey mazeed Islami nazaryaat se muttila karta.ham ghanton behes kartey rehtey thay.
sach hi kehtey hein ishq or mushk chupaey nahi chuptey.merey ghar walon se bhi ye baat posheeda na reh saki k me Ali ki mohabbat me door nikal chuki hun.itni door k mar to sakti hun lekin wapsi na mumkin he.
merey ghar waley Ali k khoon k piyasey hogaey.mujhey merey bhaiyon ne rui ki tarha dhunak dala.me ne police me apni family k khilaaf report likhwa di or bayaan likh wadiya k mujhey or Aliko koi nuqsaan pohncha to us k zimmey daar meri family ho gi.
merey bhaiyon ne qasam khali k,, chahey hamein mout kisaza ho jaey,ham Ali ko jaan se maar ein ge.,,
mujhey pata tha k merey bhai easa kar guzrein ge kiyun k meri family ko bohat sharmindagi ka saamna tha or bohat zillat uthana par rahi thi.
baat itni aagey barh chuki thi k ham jo profesional life me qadam jamaney k baad shadi karna chahtey thay, ab hamein forann shadi karna thi.
Ali ne tamaam batein poori sachchai se apney parents ko likh di thein lekin phir bhi ye tamam batein clear nahi ho parahi thein.wo mujhey pasand to kartey thay lekin me un ko Bahu ki soorat qubool na thi.
itni sari batein itni door se clear nahi hoparahi thein or Ali mujh ko in halaat me tanha chor kar jana nahi chahta tha lekin phir merey samjhaney par wo majboor hogaya or apney parents or khandaan walo ko razi karney k liye khamoshi se Pakistan chala gaya.
me ne apni family ko ye hi bataya k Ali ko us k parents ne hamesha k liye Pakistan bula liya he kiyun k un ko yahan apney betey ki jaan ka tum logon se khatra tha.
me darasal un ko bhi thora thanda karna chah rahi thi or khud bhi thora sukoon se rehna chahti thi k jab tak Ali Pakistan me tamaam kaarwai mukammal nahi kar leta me wesey bhi tension ka shikaar thi.
Ali se meri sirf kuch minuts ka raabta hota tha is liye k merey bhai saey ki tarha mera taaqub kar rahey thay.
phir 1 maheena kheriyat se guzar gaya to meri family thora dheeli par gai k waqai Ali ka baab (chapter) khatam ho chuka he or ab un k khayaal me fikar mand honey ki koi zaroorat nahi thi.me ne( gracias A DIOS) thanks God ada kiya.
Ali ne mujhey aik din phone pe tamaam tar tafsilaat se aagah kiya k,, merey Mammy Papa razi ho chukey hein lekin tum ko hamesha k liye Pakistan aana parey ga or Islam qubool karna parey ga.us k baad yahan par hi hamein shadi k bandhan me bandhna hoga.hamein apna mustaqbil Pakistan me hi banana hoga ya phir naakami ki soorat me kisi easey country ka sochna hoga jo k Spain se door ho.tum 5th December ki apni seat swiss air se karwalo lekin bohat hi ehtiyaat se,kisi ko zara sa bhi shak na ho.me tumhari taraf se bohat fikar mand hun or han meri jaan, aik martaba phir thandey dil.o.dimagh se soch lo,jazbaat se hat k soch lo,,
mujhey bhala kiya sochna tha,mujhey to is poori kaenaat me Ali ksiwa koi doosra face nazar hi nahi aata tha.me to sir se paon tak us ki ho chuki thi.meander hi ander khushi se pagal horahi thi k me bhi ab daera-e-Islam me dakhil hojaun gi.me Ali ki dulhan banu gi,Pakistan me rahun gi or pata nahi me ne kiya kuch soch dala tha.
me ne apney rutine me kisi qisim ka farq nahi aaney diya tha.meri Mammi or Papa se bhi phone pe baat hoti thi.wo to abhi se mujh ko Fatima k naam se pukarney lagey thay.mujhey bhi apna Islami naam bohat pasand aaya tha.ham sab bohat khush thay.
4th December ko ali ne mujhey last call ki or mazeed hidayaat dein wo merey liye bohat fikarmand tha.me ne us ko har tarha itminaan dilaya.me ne sab k liye khamoshi se dheron gifts khareedey thay or meri family ye samajh rahi thi k me new year waghera k liye shoping kar rahi hun.
me ne or Ali ne jo khuab dekhey thay,un ki tabeer milney ko thi.me Sandra se Fatima Ali k khoobsurat wujood me dhalney ko thi.
5th December ko me ne khamoshi se soey huey ghar walon par alwidai nazar dali.meri aankhein aansuon se bhar gaein k me un sab ko bhi behad chahti thi.phir me ne un sab ko dil hi dil me bye kaha or hamesha k liye ghar ko chor diya.
me suhaney khuab aankhon me sajaey by bus Madrid jarahi thi.jahan se by air mujhey Pakistan fjy kar jana tha k achanak mera mobile bajj utha.me muskura pari k ye Ali hi hoga.

ahhhhhhhhh,,wo phone tha ya qayaamat jo mujh par toot pari thi.wo Ali ki Mammi ka phone tha,wo ro rahi thein,cheekh rahi thein,chilla rahi thein.unhon ne aahon or siskiyon k darmiyaan bataya k Ali merey liye apni pasand ka shadi ka jora khareed k gari me beth hi raha tha k aik na maloom gari fireing karti hui guzri.Mammi to mehfooz rahein lekin Ali ne un ki gode me aanan faanan dam tor diya.
wo mujhey koss rahi thein k,,Sandra,tumharey manhoos wujood ki waja se Spain me bhi mout merey betey k taaqub me thi or yahan bhi tumhari nahuusat us ko ham se hamesha k liye cheen kar le gai.Allah karey tum bhi isi tarha apni maa ki aghosh me damm toro.me tumhein kabhi maaf nahi karun gi,,hay,ab me kis tarha ji sakun gi.,,
Mammi na janey kiya kiya kehti rahein lekin mujhey kuch hosh na raha,seeney me utney wali shadeed teeson se me behosh hogai thi.bus abhi Cordoba ki hudood me hi thi.mujhey hospital pohnchaya gaya or meri family ko ittila ki gai.
han,mujhey heart attack hua tha lekin meri badd naseebi k k me bach gai.doctors ne jab ijazat di to ghar waley mujhey ghar le aaey lekin kisi ne mujh se kuch bhi na poocha.
phir mujhey ehsaas hua k wo sab to mujhey bohat chahtey thay.lekin mujhey kisi ki chahat ka kiya karna tha? mujhey yaqeen nahi aata tha k mera Ali ab is duniya me nahi he.easa lagta tha k abhi wo kahin se aakar ,,how,,ki makhsoos awaaz nikaal kar mujhey dara de ga.mujhey yaqeen nahi aata tha k me or Ali hamesha hamesha k liye juda hochukey hein.
me ne khud ko sharaab me gharq kar liya.nasha karney lagi or phir ghar walon k hazaar mana karney or rokney k bawajood me yahan Ali k room me shift hogai.
sab kuch wesa hi he lekin mera Ali nahi he.me us k laey huey malbusaat kitney shoq se mehfilon me pehenti thi lekin wo sab me ne pehenna chor diye.ab me kis k liye sajun?kon mujhey pur shoq nazron se ghanton takey ga?kon bhala us ki tarha mujhey sarahey ga?
me Ali ki bewa hun.bana.o.singhaar me ne khud pe haraam kar liya he.me ne khud ko siyah libaas se dhaank liya he.me daera-e-Islam me sirf Ali ki waja se to dakhil nahi ho rahi thi lekin ab me khud ko is qabil nahi samajhti k Islam mujhey apni aaghosh me sametey.me sharaab piti hun lekin mujhey nasha nahi hota.be tahasha smoking karti hun.waqt guzari k liye juwa bhi khelti hun.har burai to ab me ne apna rakhi he.
mujhey to lagta he k mujhey Ali se sachi mohabbat na thi,agar sachi mohabbat hoti to me aaj zinda na hoti.mujhey to usi waqt mar jana chahiye tha jab Ali ne is fani duniya me akhri sanse li thi.
Mammi mujh se theek hi nafrat karti hein.na me ne kabhi un ko dobara phone kiya na kabhi raabta kiya.me khud ko is qabil nahi samajhti k apney us jurm ki u se maafi maang sakun jo k me ne nahi kiya.
mujhey batao,mujhey batao Zara, agar Ali is duniya me nahi he to is ko qaem rehney ka kiya haq he?kiya wo haseen,zaheen,azam.o .himmat se chamakney damakney wali aankhein jin me mustaqbil k kitney hi roshan khuab thay,hamesha k liye band hojaney k qabil thein?
kiya wo chaand se ziyada taabnaak chehra mitti me mil janey k qabil tha?
kiya wo dil jo sirf or sirf mohabbat se labrez tha,barood ki goliyon se chalni kar deney k qabil tha?
kiya wo mazboot.o.tawana jisim khaak.o.khoon me mil janey k qabil tha?
kisi ko kiya mil gaya?aakhir kiya mil gaya? merey Ali ko maar k----
jis insaan ne kabhi chiriya ka bachcha bhi nahi mara tha us ko aik doosrey insaan ne is bedardi se akhir kis jurm me maar diya?
me ne to apney Ali ko jeeta jaagta us ki watan bheja tha phir us k apney hi hamm watan ne us ko kiyun khoon me dubo diya?merey Ali ne kisi ka kiya bigara tha?
Mammi mujh se kiyun nafrat karti hein?un ki badd duaein aakhir mera peecha kiyun kar rahi hein? wo us badd bakht ko kiyun nahi kostein? jis ne un ki maamta ko ujara he or mujh se merey mehboob ko cheen liya he,,,,,,,Sandra mujhey buri tarha jhinjhor rahi thi.lekin merizabaan mera sath nahi de rahi thi.
ash tray cigirettes se bhar chuki thi.Sandra ka face or shirt aansuon se bheeg chukey thay.wo be tahasha ro rahi thi or meri bhi hichkiyan bandhi hui thein.me us ko galey se lagaey roti chali jarahi thi.na janey ham dono kitni der tak rotey rahey.
raat bheeg chali thi.me ne thanda yakh zumo de manzana(apple juice)bari mushkil se Sandra ko pilaya
us ne kanptey hathon se phir cigirette sulgaya or wine k 2 glass charha gai.
phir room me gehri khamoshi cha gai.wo musalsal cigirette pi rahi thi or wine k ghoont pe ghoont bhar rahi thi.
,,aao me tumhein apney Ali se milwaun,,kamrey me Sandra ki kanpti hui aawaaz ubhri.us ne apney yakh basta hathon se merey hathon ko pakra or khari hogai.
phir samney deewar par lagi bari si tasweer se us ne 6 phoolon k haar utar diye.
dekho cariño(dear) ye he mera Ali,,,me ne 6 salon se isey nahi dekha,me ne 6 salon se is ko nahi chuwa,me jo aik lamha bhi Ali k bagher na rehti thi,ab Ali k bagher hi jeena mera muqaddar he,,,,he na chahey janey k qabil?Sandra ki aankhein phir se baras uthein or hont kanpney lagey.
phir us ne dheron albums nikal k dikhaey jis me be shumaar fotos thein.kahin wo aik doosrey ko ice cream khila rahey thay to kahin baraf k goley aik doosrey par uchaal rahey thay.kahin Sandra Pakistani libaas me malboos Ali ki banhon me chamak rahi thi.gharaz k ab me Sandra or Ali ki kahaniko sun nahi rahi thi bal k dekh rahi thi.
me ne aansuon se bheegi aawaaz me kaha.,,han,Sandra, tumhara Ali behadd shaandaar he,behadd chahey janey k qabil,lekin us ne bhi tum se piyar kar k koi ghalti nahi ki.tum bhi parastish k qabil ho.tum bhi azmat k buland meenarey par khari ho.mohabbat karney me or mohabbat nibhaney me bohat farq hota he.tum ne mohabbat ki bhi or nibhai bhi,me tumhari mohabbat ko salaam karti hun.
,,tum ne ye kis tarha samajh liya k tum ko mazhab-e-Islam qubool nahi karey ga.arey nadaan,hamarey mazhab me to sirf or sirf mohabbat hi mohabbat he.har jagha mukhtalif peraey me mohabbat ka hi darss diya gaya he.jin ko insaniyat se mohabbat ho,insani rishton se mohabbat ho,imaan se mohabbat ho,apney deen or dunyawi faraiz se mohabbat ho,Allah or us k Rasool(P.B.U.H) ki batai hui har har baat se mohabbat ho,har zee rooh se mohabbat ho.wahi to musalman hotey hein----
,,Sandra,mujhey yaqeen he k tum sachey dil se Allah k huzoor girgirao gi,sajdey me ja k ro gi to Allah Tallah tum me aik easi ruhani taqat peda kar dein ge k sharaab or is jesey doosrey bekaar sakarey khud bakhud choot jaein ge.duaon me bohat ziyada taqat hoti he,,,
Sandra mujh se lipat k ro rahi thi or keh rahi thi.,,kiya me waqai musalman hosakti hun?Ali ki khuahishaat or khuab ab bhi purey kar sakti hun?kiya me Barcelona,Fatima Ali k name se ja sakun gi?,,
,,han Sandra,easa zaroor hoga.me maqami masjid k molwi sahib se baat karti hun.is neak kaam me ham sab hi tumharey sath hein.
,,Sandra jesa k tum janti hi ho k me kahaniyan likhti hun.agar tum ijazat do to me tumhari kahani bhi likhna chahti hunk Sandra kis tarha Fatima Ali k khoobsurat wujood me dhali?,,
,,Sandra ne thori der kuch socha phir dheerey se boli.,,Zara,meri kahani shohrat k liye nahi he or na hi me is ko aak karna chati hun lekin hosakta he k ye kahani Ali ki Mammi ki nazron se bhi guzrey or wo mujh ko maaf kardein---han,tum meri kahani zaroor likhna,,wo merey galey lag gai or merey gaal chumney lagi.
mujhey chumtey huey wo gelery me aagai or barasti aankhon se aasmaan ki taraf is tarha dekhney lagi jesey k us ka Ali aasmaan ki wusaton se jhaank kar apni khushi ka izhaar kar raha ho.
-----------------------
writen by Haya

Inne bareeeeeeeeeeeeee :-b

achi hey
bohat achi

reply baad mein karoon gi

soch key .blushy

Khush rahiye

wassalam @};-

__________________
@};- Please update your Signature : Administrator HallaGulla

Assalam.o.alekum,,,m oon ji thanks for ur nice reply.ji nahi ye real story nahi he.ye meri hi takhleeq he.pasand karney ka bohat shukriya.or meri hosla afzai bhi hui he aap k reply se.Allah hafiz,,,,,Haya

__________________

.
.
.
.
.

Click Here

achi haii