Originally Posted by mr romeo

salam dosto, i 'm a new member here and this is my first contribution in this writer's club n how's it, only u ppl can tell me better...

MERI PYAARI!!!!

Aaj phir younhi chup baithe hoye achaanak tumhara khyaal zehan ke nihan khanon se nikal ker pori soch pe chaa gaya aur phir tumhari yaadon ka ik sailaab-e-rawaan mujhe apne saath baha le gaya.

Mujhe aaj bhi woh din yaad hai jab hamara pehli martaba aamna saamna hooa tha, tumhare husn ne pehli he nazar mein mere dil mein gharr ker liya tha aur tumhara shokh pairahan tumhare husn ko chaar chaand laga raha tha. iss pehli nazar ki mohabbat ne mujhe tumhaare hasool ki koshish per majboor ker diya tha aur shayed qismat ne bhi tumhain mere baseeb mein likh diya tha. youn tum meri zindagi mein aa gayee. tumhain paa ker meri khushi ki koi inteha na thi. ik ehsaas-e-tafakhurtha jo mujh mein mojazan tha. log hamain aik saath daikh ker rashk karte thay. jab kabhi takhliye mein main tumhare bazoo ko choota tha to tum laaj ke maare mere haathon mein jhool jaati thi. tumhari woh haseen aankhain mujhe sehar zada ker daiti theen. jab hawa chalti thi to tumhare lehraate hoye gaisoo dil ko moh laite thay aur jab kabhi baadal garajte thay to tum seham jaaya kerti thi aur main tumhain pass laa ker seene se laga ker kisi saaye main le jaata tha ke kahin barasne wali baarish ki boondain tumhaare nazuk badan ki hayyat he na badal daalain. mujhe woh din bhi yaad hai ke jis din tum apne shokh pun mein girr ker khud ko zakhmi ker baithi thi aur mujhe tum ko haathon pe utha ker bari ehtiyaat se lana para tha aur phir tumhari marham patti bhi kerna pari thi. hamare darmiyan hamaahangi bhi iss qadar thi ke tum mere haathon ki halki si junbish ko bhi jaati thi aur iss pe fori amal kerti thi. bohat se log hamari iss refaaqat ke raqeeb bhi thay aur tumhain mujh se juda karne ki koshish kerte rehte thay magar main her baar unn ki chaal ko nakaam ker daita tha.

Laikin ik din to aisa hona he tha aur woh toofani din mujhe aaj bhi acchi tarah yaad hai ke jis din waqt ki taiz hawa ne tumhari zindagi zindagi ki dor kaat di aur tum mere daikhte he daikhte ufaq ke paar ja utri. aaaaaahhhhh, main tumhain aaj bhi bohat yaad kerta hoon meri pyaari PATANG!!!!!! 0:-)