04-10-2007, 12:23 AM
|
 | ~GONE with the wind~ | | | Join Date: Sep 2006 Location: ~Lost~
Posts: 11,010
Country:  Tutorials:
0 Thanks: 0
Thanked 10 Times in 10 Posts
Nominated 0 Times in 0 Posts TOTW/F/M Award(s): 0
Rep Power: 2673 | |
 Re: Pollinf For ~!~ HG Birthday SpeciaL- MuqabLa ~!~ | |
3. haya n (Page1) Bablu Owr Munni Kay Abba Owr Mairay Miya'n Jaani Apni Laado Rani Ka Salam-e-Mohabbat Qubool Kijiye Allah Aap Ko Aap Ki Amma'n Owr Baihno'n Ki Umar Bhi Laga Day Aameen ! Isi Haftay Aap Ko 3 Khat Likhay Hai'n, Koi Na Koi Khat To Zaroor Aap Ko Mil Jaey Ga..Is Martaba Saray Khat Mai'n Khud Post Kar Kay Aai Hoo'n Kay Kahee'n Ticket Kay Paisay Aap Ka Bhaai Guddu Patango'n Mai'n Na Ura Day... Miya'n Jaani Aap Amrika Kiya Sidharay Aap Kay Ghar Walo'n Nay Mujh Ko Akaila Samajh Kar Kainchli Hi Badal Li...Woh To Mairi Amma'n Ki Di Hui Training Kaam Aa Rahi Hay Kay Aeint Ka Jawaab Hamaisha Pathar Say Hi Daiti Hoo'n... Kuch Halaat To Paihlay Hi Aap Ko Likh Chuki Hoo'n Baqi Bhi Likh Daalu'n Kay Aap Ki Laado Rani Par Kiya Beet Rahi Hay? Aap To Jaantay Hi Hai'n Kay Is Maheenay Mairi Saalgirah Hay...Agar Mai'n Nay Dhoom Dhaam Say Saalgirah Na Manaai To Saaray Khandaan Owr Mohallay Mai'n Is Martaba Bhi Aap Ki Naak Kat Jaey Gi...Yahi Aap Kay Ghar Walay Kartay Chalay Aaey Hai'n Laikin Is Martaba Mai'n Aesa Hargiz Nahi Honay Doo'n Gi... Sab Dil Hi Dil Mai'n Yahi Kaihtay Ho'n Gay Kay Miya'n Amrika Mai'n Baitha Hay Tab Bhi Wahi 2 Takay Ki Saalgirah Manai Ja Rahi Hay... Haaey Allah Apni Pichli Saalgirah Yaad Kar Kay Mairi Aankho'n Say Tapa Tap Aansu Khat Par Girnay Lagay... Aap Ki Baihnai'n Pathar Sa, Baasi Chota Sa Cake Utha Laai Thee'n...Seelay Huway Chips Moo'n Mai'n Rakhtay Hi Aesa Laga Jaisay Chewing Gum Chaba Rahi Hoo'n...Aap Ki Bari Baihen Apnay Ghar Say Qowrma Shayed Nall Kay Neechay Paka Kar Laai Thee'n...Dubkiya'n Lagatay Shorbay Mai'n Say Sab Botiya'n Talaash Kartay Reh Gaey...Aray Boti Hoti To Milti Na?... Aap Ki Amma'n Nay Gaaey Kay Gosht Ka Aesa Pulao Pakaya Tha Kay Chawal Aapas Mai'n Guttham Guttha Thay...Chiknay Gilaso'n Mai'n Pheeka Sharbat Ghula Rakha Tha... Mairay Dil Ko Thori Dharas Thi Kay Chalo Koi Baat Nahi Tohfay Shayed Achay Mil Jaei'n...Laikin Jab Patang Kay Kaghaz Mai'n Liptay Packet Mai'n Nay Kholay To Maira Dil Dhak Say Reh Gaya... Aap Ki Bari Baihen Nay Apna Istimaal Kiya Huwa Expired Makeup Ka Samaan Hi Pack Kar Kay Day Diya Tha Owr Baray Fakhar Say Mujhay Jata Rahi Thee'n Kay '' Razia Maira Daiwar Dubai Say Laya Hay '' Maira Dil Hi To Jal Gaya... Aap Kay Abba Nay Paihlay Apni Begam Say Ijazat Li Owr Phir Mujhay 100 Ka Mura Tura Sa Note Thama Kar Apnay Kamray Mai'n Ghus Gaey... Aap Ki Amma'n Nay Itni Hi Dair Kay Liye Kamray Say Nikalnay Ki Ijazat Di Thi... Manjhli Nay Mujhay Aesay Haar Owr Bunday Diye Jis Kay Kafi Nagg Niklay Huway Thay... Choti Nay Apni Tarha Choti Si Angoothi Mujhay Thama Di Jo Mairi Choti Ungli Mai'n Bhi Mushkil Say Hi Aai... Gift Khul Rahay Thay To Aap Kay Ghar Walay '' Waah Waah Shaandar '' Kay Naaray Laga Kar Taliya'n Baja Baja Kar Maira Dil Jala Rahay Thay... Aap To Jaantay Hi Hai'n Kay Mai'n Kitnay Achay Dil Ki Malik Hoo'n...Rotay Dil Say Hans Hans Kar Sab Ka Shukria Ada Karti Rahi... Saari Raat Ro Ro Kar Maira Bura Haal Ho Gaya...Babblu Owr Munni Hi Mujhay Tasalli Daitay Rahay...Haaey Mairay Bacho'n Say Apni Maa'n Ka Rona Daikha Na Ja Raha Tha...Yaqeenan Is Waqt Aap Ki Aankhai'n Bhi Bhar Aai Ho'n Gi... Miya'n Jaani Aap Nay Jo Check Bheja Tha Us Ki Bhanak Bhi Mai'n Nay Kisi Ko Nahi Lagnay Di...Aik Owr Check Ka Shiddat Say Intizaar Hay... Ab Aap Baychain Ho Rahay Ho'n Gay Kay Is Martaba Aap Ki Laado Rani Ki Saalgirah Kaisi Ho Gi? (page2) To Mai'n Tafseel Say Sab Likh Rahi Hoo'n...Saalgirah Ki Tasweerai'n Owr Video Bhi Jald Aap Ko Mil Jaey Gi...
3 Manzila Ghar To Aap Banwa Na Sakay Laikin Mai'n 3 Manzila Cake Zaroor Banwau'n Gi...Chicken Biryani, Chicken Qowrma, Gola Kabaab, Zarda, Owr Kheer Kay Ilawa Pepsi Bhi Rakhoo'n Gi....
Is Martaba Apnay Maikay Walo'n Ko Bhi Bulau'n Gi... Mairi Bhabhiya'n Jab Mujhay Is Tarha Saja Huwa Daikhai'n Gi To Jal Kar Kabaab Ho Jaei'n Gi...Aap Kay Ghar Walo'n Kay Seenay Par Saanp Lotai'n Gay Kay Razia Begam Nay Is Martaba Un Ki Chaal Kamiyaab Nahi Honay Di...
Aap Ki Taraf Say Mai'n Nay Sonay Ka Locket Set Abhi Say Khareed Liya Hay...Saalgirah Walay Din Hi Dhamaka Karoo'n Gi...Aap Khat Parhtay Huway Kitna Khush Ho Rahay Hai'n Na Kay Aap Ki Laado Raani Nay Hamaisha Aap Ka Shimla Ooncha Hi Rakha Hay...
Bablu Owr Munni Ki Taraf Say Mai'n Nay 2 Banarsi Suit Banwa Liye Hai'n... Maching Ki Chappalai'n Owr Chooriya'n Laina Bhooli Nahi Hoo'n...
Sab Kuch Pack Kar Kay Cake Kay Saath Hi Table Par Saja Doo'n Gi....
Fair & Lovely Kay Mustaqil Istimaal Say Maira Gehra Sanwla Sa Rang Gora Gora Lagnay Laga Hay Laikin Aap Kay Ghar Walo'n Ko Mai'n Ab Bhi Sanwli Hi Lagti Hoo'n...Sab Aap Ki Laado Raani Say Jaltay Hai'n...
Haa'n To Mai'n Aap Ko Apni Tayyari Ka Bata Rahi Thi...Mai'n Nay Saalgirah Kay Liye Laal Kaamdaar Saree Khareedi Hay Jis Ka Blouse Aishwariya Roy Jaisa Silwaya Hay....Kamar Par Khirki Sa Blouse Daikh Kar Aap Kay Hosh Ur Jaei'n Gay...
Mairi Saheli Chunni Nay Ghar Mai'n Beauty Parlour Khol Liya Hay... Mai'n Wahee'n Say Tayyar Ho'n Gi...Aap Ki Baihnai'n To Wahi Gola Ganda Sa Makeup Kar Kay Saalgirah Mai'n Shareek Ho'n Gi...
Mai'n Nay Abhi Say Chunni Say Kaih Diya Hay Kay Naqli Balo'n Ka 2 Manzila Joora Bana Kar Mairay Baloo'n Mai'n Fit Kar Day...3 Inch Ki Oonchi Aeri Ki Chappal Bhi Khareed Laai Hoo'n...2 Manzila Jooray Owr 3 Inch Ki Aeri Say Aap Ki Laado Raani Ka Chota Qadd Bhi Miss.World Ki Tarha Lamba Nazar Aaey Ga...Is Martaba To Mai'n Aeri Choti Ka Zor Laga Doo'n Gi...
Aaj Kal Mai'n Sirf 4 Waqt Khanay Lagi Hoo'n... Jis Say Maira Wazan Kafi Kam Ho Gaya Hay Owr Mai'n Bouhat Smart Lagnay Lagi Hoo'n...
Aap Jaldi Say Mujhay Aik Owr Check Bhaij Dijiye Ta Kay Mai'n Laal Saree Ki Maching Ki Jewllery Owr Apni Amaa'n Owr Apni Baihno'n Ki Taraf Say Bhi Achay Achay Gifts Khareed Laau'n...
Mairi Amma'n Nay Aap Ko Kabhi Damaad Nahi Samjha, Hamaisha Baita Hi Samjha Hay Jab Hi Itni Farmaishai'n Karti Hai'n...Mairi Baihnai'n Aap Par Jaan Daiti Hai'n Warna Itni Laad Bhari Farmaishai'n Aap Say Kabhi Na Kartee'n....Un Ki Farmaishai'n Poori Na Hueei'n To Un Ka Dil Afsurda Ho Jaey Ga Jo Aap Ko Kabhi Gawara Na Ho Ga...
Bablu Owr Munni Ki Saalgirah To Mai'n Amrika Aa Kar Hi Manau'n Gi...
Haaey Allah Jab Bablu Owr Munni Git Pit Git Pit Angrezi Mai'n Apnay Dadhiyaal Walo'n Ko Woh Sab Batai'n Sunaei'n Gay Jo Mai'n Un Ko Urdu Mai'n Sikhau'n Gi To Kis Qadar Maza Aaey Ga...Jo Kuch Mai'n Na Kaih Saki Woh Bacho'n Say Kaihelwau'n Gi... Bacho'n Ki Masoom Bato'n Ka Koi Bura Bhi Nahi Manay Ga...Aap Bhi Is Waqt Mairi Tarha Soch Soch Kar Hans Rahay Ho'n Gay... Hay Na?
Aray Haa'n Mai'n Batana Hi Bhool Gai Kay Aap Kay Bhaai Guddu Ko Is Martaba Bhi Mohallay Mai'n Paihla Inaam Mila Hay... 23 March Kay Muqablay Kay Liye Mai'n Nay Hi Is Martaba Bhi Taqreer Likh Kar Di Thi...
Aap To Jaantay Hi Hai'n Kay Aap Ki Laado Raani Ko Pakistan Owr Pakistan Ki Tareekh Say Kitni Mohabbat Hay... Woh To Teachers Hi Mujh Say Jalti Thee'n Jab Hi Is Mazmoon Mai'n Mujh Ko Fail Kar Daiti Thee'n...
Mai'n To Aaj Bhi '' Razia Pakistani '' Kay Naam Say Akhbaro'n Owr Risalo'n Mai'n Nazmai'n Bhejti Hoo'n Jo Kabhi Bhi Shaya Nahi Hotee'n...Daak Kay Kharaab Nizaam Ki Wajha Say Aditor Ko Kabhi Mairi Nazmai'n Hi Nahi Miltee'n... Warna Aaj Parween Shaakir Say Ziyada Razia Pakistani Ka Naam Mashoor Hota...Pakistan Say Mujhay Itni Mohabbat Na Hoti To Mai'n Apna Takhallus '' Pákistani '' Kiyu'n Rakhti?
Pakistan Ki Mohabbat Say Sarshaar Ho Kar Mai'n Nay Aesi Taqreer Likhi Kay Guddu Ko Paihla Inaam Mila...Kitna Khush Qismat Hay Guddu Kay Usay Mujh Jaisi Laaiq Faaiq Owr Mohabbat Karnay Waali Bhabhi Mili Laikin Kisi Ko Mairi Qadar Hi Kaha'n Hay?
Miya'n Jaani Mujhay Jald Say Jald Amrika Bulwanay Ka Intizam Kijiye...Amrika Owr Aap Kay Baghair Mujhay Apna Aap Adhoora Sa Lagta Hay...
Sab Loge Jal Kar Raakh Ho Jaei'n Gay Jab Aap Ki Laado Raani Amrika Jaanay Kay Liye Baray Walay Jahaaz Mai'n Baithay Gi...Mairay Daei'n Baei'n Bablu Owr Munni Baith Kar Khushi Say Taliya'n Bajaei'n Gay...
Achay Say Miya'n Jaani Mujhay Jaldi Say Aik Owr Check Bhejiye Ta Kay Mai'n Khoob Dhoom Dhaam Say Apni Saalgirah Mana Kar Aap Ka Dil Khush Kar Sakoo'n...
Mujhay Fowran Ab Khat Likhna Band Karna Ho Ga...Is Liye Kay Aap Ki Amma'n Mujhay Masroof Samajh Kar Kisi Say Phone Par
Baat Kar Rahi Hai'n...Mai'n Zara Doosra Phone Utha Kar Sunoo'n Kay Kis Kis Say Mairi Buraiya'n Ki Ja Rahi Hai'n?
Mujhay Pata Hay Kay Aap Abhi Say Mairi Tasweero'n Owr Video Kay Liye Tarap Rahay Ho'n Gay...Aap Fikar Na Kijiye Ga Jald Mairi Saalgirah Ki Tasweerai'n Owr Video Daikh Kar Aap Khushi Say Nach Rahay Ho'n Gay...
Bablu Owr Munni Kay Saath Saath Mairi Amma'n Owr Apni Baihno'n Ki Pyar Bhari Farmaisho'n Ki List Alag Say Kaaghaz Par Likh Kar Isi Lifafay Mai'n Daal Rahi Hoo'n...
Apna Owr Maira Hamaisha Bouhat Khayaal Rakhiye...
Mairay Saath Hamaisha Khush Rahiye...Aameen
Faqat
Aap Ki Laado Raani
(Amrika Aanay Ki Muntazir Razia Pákistani)
(Háya)
Last edited by Pehli``Barish; 04-11-2007 at 04:08 PM.
|