 Ye Ghar Mera Makaan Mera | |
Athens county mein Carriage Hill dhondna koe mushkil nahein. Town mein kissi se puch lejeye wo theek theek aap ko rasta samgha de ga...You go to the richland avenue....go straight...cross the Macdonnald....and take the little road on the right going up the hill...thats carriage hill. Aik choti si pahari pe chaar paanch baari imaarton pe mushtamil ye carriage hill apartments hein. Inhe apartments mein aik apartment hamara he.
Ghar ka derwaza aik chote se living room mein khulta he. Dahein taraf wali diwaar k saath aik bara sofa aor derwaze k saath aik chota couch. us k saath TV aor pir mera study table. Meyz kitabon paper folders aik computer aor bohat se berabt kaghazon se bhara para he. uper k shelf pe kuch kitabein aik study light aor baba ki kuch taswerein frame huwein hein. Ussi frame mein aik daricha ik aor aanghan mein khulta he. Ye charpaye pe us diwaar k saath jo chashma lagaye mohtabar si khatoon bheti hein ye meri Maan he, un k aathon mein khylta huwa ye nanna baseer mere bare bhaii ka chota beta. Bara beta sameer bhi yahein kahein cricket beyt utaye kissi ko cricket kheylne k leye keh raha hoga. Aabe do saal ka he leykin us k shoq hein cricket kheylna daadi ko tang kerna aor ghanti bajte he lamak ker phone utana. Bhabi shayad bawerchi khane mein hein. Bhaii Ayaz to apne school mein honge. Maamon k saath wahan perhate hein. ye jo lambe se qad ka lerka aabe aabe ghar mein dakhil huwa he ye chota bhaii usmaan he. Aor Umar shayad andar kamre mein bheta per raha hoga.
Kuch deyr wahein khare khare in ko dekhta hon pir aahisata se ye daricha band ker k jo murta hon to samne sofe pe tanhaaye meri muntazir hoti he. Usse khud pe hor k jab sofe pe leyt jata hon to kheyal ki khirki aik aor duneya mein khilti he. Ye meri aor Us ki duneya he. Ye jahan hamari tamannayon ka he. ye ghar hamari mohabbaton ka. Yahan umeed k phool khilte hein. Yahan peyaar ki berkha barasti he. Yahan dheyan ki taroon se ham apne armanon k Asmaan pe khusheyon k ranga rang taare sajate hein. Yahan raat ik dusare ko khojne mein guzarti he. Yahan din hamare baton k saye mein katta he.
Ye Ghar Mera Makaan Mera
Ye Meri Dunya Jahaan Mera
Is k Andar Asmaan Mera
Ya he Naam o Nishan Mera
__________________ Learner ................ 
Last edited by Inam; 05-16-2005 at 04:27 PM.
|