Urdu Poetry Forum

**WanderingThoughts** · #1 07-02-2008, 09:46 PM

As-salam-o-alaikum Dosto!

June 2008 k Muqabla-e-nazm goi k liay hmeiN kul 5 nazmen mosul huiN... tamaam nazmeN khoob haiN, ham aap sab sathioN ka shukriya ada krty haiN k ap ki nazmoN ki waja se is muqbly aur is mehfil ki ronaq meiN izafa hua...

aap janty haiN k tamaam judges ki marking ka average hi muqably meiN shamil enteries ka final score tasawur hota hy, so ap dostoN ki NazmoN ko derj'zail points milay:

1. Ridz = 2

2. Chaltamusafir = 3.5

3- autam = 2.5

4- faridnawaz = 4.5

5- danmurfi = 8.8

so judges ki marking k mutabiq is mah k Muqabla-e-nazm goi ki fateN qaraar pa'ay haiN:

danmurfi

------------------------------------

Nostalgia

wo ik khamosh si larki
wafa kay sahilon par
waqt ki nao mein bethi soch mein gum hai
kitab e zeest kay jo warq paltay hain
to mazi kay dhundhalkon sey kayi chehrey, kayi yadein
ubhar kar jagmagati hain

usey yeh ilm,
yadon kay saharey umr to guzra nahin karti
magar yeh khud faramoshi!
gham e dauran sey kuch pal jab churati hai
to janey kitney barson ki thakan aankhon mein aati hai

tabhi woh sabr, jo sail e rawan ko rok leta hai
Asasa hai...
kayi bay naam jazbon ka
kayi anjaan rishton ka
jo dil mein reh gayi us khush gumani ka
Kahani ka...
jo likhkhi thi wafa kay rahrawon ney
bey khabar anjam sey ho kar

Usey ik shajar e saya dar banna tha k jiski chhaon mein aakar
zamaney bhar ki sari shiddatein bhi maand par jateen
Ghata ban kar barasna tha jisey banjar zameenon par,
unhein zarkhaiz karna tha

woh gumgushta muhabbat
is jahan par raj karney keliye nikli to thi laikin
riwajon kay andheron mein najaney kis taraf bhatki
sabhi mausam bohat bay kaif kar daley
to in bay rang yadon ke saharey umr woh kesey guzarey gi
wo apni jaan sey haarey gi
------------------------------------

!!!apko bohat mubarik!!!

aakhir meiN aik bar phir ham un tamaam dostoN ka shukria ada karty haiN, jin ki kawishaat ne is muqablay ki ronaq baRhi...