AAKHRI SAWAL k unwan sey humney aik nazam Contest mein share kerney k liyey likhi thi...phir socha k aik try zara doosri qisam ki kee jaey,pata nahin wo kisi ko pasand aaey bhi k nahiN...phir jo bhi zehn mein ata gaya wo kuch yun bana tha...(Humara nahiN khayal k is meiN hum sahi sey alfaz ka chunaO ya khayal pesh ker paey hain)bus jo ungliyaaN likhti gaeeN wo likh daala...aur kuch lines to abhi abhi nazil hoeeN...

ab aap loge isey bardasht kijyey aur agar hosakey to apni raey sey zaroor nawaziyey

Mila tha aik ajnabi...
YaheeN kaheeN'yaheeN kaheeN
Naee naee theeN manzilein
Naey naey they raastey
DiloN k sooney deyar meiN
Naey naey kanwal khiley
Jo zindagi ki dourr meiN
Tanha they'hum qadam chaley
Humari chahtoN k kuch
Naey fasaney bun gaey
jo din paharr they kabhi
Wo din paloN mein cutt gaey
Phir aik din wo keh uttha
Suno Aey humsafar meri...!
Sawal tujhsey hai mera
MuhabbatoN ki raah meiN
Jo chal parrey haiN hum yunhi
Ye ajnabi sa raasta
Sada yuN taey karogi kya?
Chalo k aaj haath mein
Hum haath apney daal leiN
Hum is adhoorey saath ko
RafaqatoN meiN dhaal leiN
To us k yuN sawal per
NigaheN meri jhuk gaeeN
Meri ana k haath meiN
LagameiN meri kas gaeeN
Na kuch jawab bun parra
Us aakhri sawal ka
Merey na pas tha jawab
Sarapa wo sawal tha
Phir usko janey kya hoa
Wo raasta badal gaya
Meri sada ki pohnch sey
Wo aik dam nikal gaya
Merey qadam bhi utth parrey
WaheeN sey maiN palatt parri
Meri ana bhi us lamhey
Mujhey hara k hans parri
Magar jo wo chala gaya
To ab mujhey pata chala
Us aakhri sawal ka
Ye aakhri jawab tha
Mujhey bhi us sey pyar hai
Mujhey bhi intizar tha
Magar mila bhi ab to kya
Na wo raha'na hum rahey
Humarey saamney haiN ab
Judaii k sutooN kharrey