As-salam-o-alaikum dosto,

muqabla-e-nazm goi Nov. 07 k liay nazmeN shamil krwany ka waqt khatm hua, hmeiN az-had khushi hy k is baar dostoN ne bherpur his'sa liya aur hmeiN bohat hi umda nazmeiN paRhny ko miliN...

mahana muqably ka asl maqsad na'ay likhny waloN meiN behter se behter likhny ka jazba baidar krna aur purany (senior) likhny waloN ki taraf se in na'ay likhny waloN k liay misaal pesh karna hota hy... hmeiN khushi hy k is baar seniors k sath sath na'ay likhny waloN ne bhi khoob participate kiya...

muqably ka faisla (jesa k aap sab ahbaab janty haiN) Judges k mushtarika faisly ki roshni meiN kiya jata h, so maiN sab judges se guzarish kruN ga k wo apni apni marking 30th Nov. 07 tak isi thread meiN post kr deN...

Judges k panel meiN shamil haiN: Sohail Malik, Sahir, Zain, Kanch ki Mehroo, Mehtab & WanderingThoughts

muqably meiN shamil nazmeiN derj zail haiN:

1-faridnawaz

akhri sawaaal

Bicharnee walee
meen kab tak yoonhi;oodass sa;besahara sa
sardiyoon ki yakh basta ratoon meen
zindagi ki tareek rahoo par
apnee mann meen tere milaan ki aass liyee
tere yadoon kee deep jalaoon
ore aab AKHRI bar TUM se SAWAL karta
hoon
iss see pehlee keh muntazir ankheen
tere dedar ki tamanna meen
kabhi na khulnee kooband hoo jaeen
ore mere rooh!!!!!
azab-e-faraq see ghabraa kar
chaand na mukamal si khuwahishoon koo
liyee
mujh see roth kar chali jaee
tumheen apni majboriyoon ki qasam
tum faqat aik baar aa jaoo
yee akhri sawal maan jaoo
--------------------------------------------------------------
2-denarouse

AKHRI SAWAL
----------------

TUM TAHI DAMAAN
SANG HATHOON MEN LIYEE
KHULTEE AABB KE CHENTTEE
MERE SAR GASHTA ROOH PAR DALTEE HOO
MERE GESOOO PAOON TALEE LEE KAR
MUJHEE KHUD SEE DOOR DHAKEELTEE HOO
MERE DIL KI UN CHUEEE BULANDIYOON PAR
GADRR KAR MUHABAT KEE JHANDEE
MUJHEE GEHRAIYOON MEEN PHEENKTEE HOO
HAR AIK SE MERA PATAA PUCH KAR
MUJHEE AJNABI BANA DETEE HOO
TU PHIR
AIK AKHRI SAWAL HEE TUM SEE
KIYA MEEN TERE SACHAIYOON KA BHARAM RAKHOON?
KIYA TERE BE TABIYOON KI DASTAAN KAHOON?
TERE BE QARARIYAAN KESEE BEYAAN KAROON?
TERE CHAHATT KOO KIYA HARF KE JAMEE PEHNAOON?
KEH MEEN NEE TU
TERE ANKHOON KI BANJAR ZAMEENEEN
APNEE NAAM SEE ABAD HUTEE DEKHI HEEN
TERE SUKHEE LABOON PAR
APNI MUSKURAHATT KI CHAMAK PARKHI HEE
TERE TALASH MEEN BHATAKTI BECHAIN NAZREEN
KHUD PAR QARAR PAYEE JATI HEEN
TERRE ANDER UTHTI KHUHAESHOON KI CHAAP
MERE MEHSOOSAAT MEEN SUNAI DETI HEE
TERE SOCHOON KI ZUBAAN
MERE ANDER GUNJTI HEEE
TERE JAWAR BHATOON KA SHOOR
MERE RAWANI MEEN TALATAM BARPA KARTA HEE
TU PHIR AEE JANAM
MAAN LEE YEE AKHRI SAWAL MERA
ORE KAR LEE IQRAR TU BHI
MERE TARHA
MERE KHATIR
TAHI DAMAAN HEE TU BHI
--------------------------------------------------------------
3-mujahid khan


--------------------------------------------------------------
4- readme


--------------------------------------------------------------
5- land of sorrow




--------------------------------------------------------------
6- faisal_Rwp


--------------------------------------------------------------
7- saraabs




Yaad aati hai aaj tak mujh ko
Us haseeN iztiraab ki lazzat
Pehle pehle sawaal ki wo rut
Uljhe uljhe jawaab ki lazzat
Aik badle hue ta'alluq ki
Aik baRhte hijaab ki lazzat
Dekhte hi nazar jhuka dena
Is qadar ijtinaab ki lazzat
Phir hamaiN bhi khabar ye hone lagi
Ham ko kitni shadeed thi chahat
Aur un ko bhi, jo gurezaN the
Is ta'alluq ki hogai adat
Rafta rafta badal gaye wo bhi
Apne saaNche main Dhal gaye wo bhi
Dil ki baateN samajh maiN aane lageeN
Chaand raateN samajh maiN aane lageeN
ANkh main sham'a wo jalane lage
Baat be baat muskurane lage
Dhyan ek simt jam na pata tha
Har har ahaT pe chouNk jaane lage
Go nazar is taraf na uThti thi
Phir bhi bewajah aane jaane lage
Aaeena jo na dekhte the kabhi
Kar ke kuch kuch singhaar aane lage
Zindagi Ko haseeN bana Dala
Ham ne mana, unheN zamane lage
Pehle pehle sawaal ka ham ne
Kaisa achcha jawaab paya tha
Go bohot der maiN wo aya tha
Per ghaTa ki tarah se chHaya tha
Zindagi ki dehekti dhoop maiN wo
Ek ghanera haseen saya tha
Jis qadar der se wo aya tha
Us qadar door tak wo chHaya tha
Phir sawaal-o-jawaab baRhte gaye
Apni aaNkhon ke khwaab baRhte gaye
Zindagi ki kitaab maiN har din
Us rifaqat ke baab baRhte gaye

Par khabar kia thi, is tarah hoga
Ham se dunya hi rooTh jayegi
Aisa halaat ka sitam hoga
ke tamanna hi rooTh jayegi
Ho ke majboor ham ko dunya se
Unka yuN haath chHoRna hoga
Wo ta'alluq jo jaaN se baRh kar tha
Us ta'alluq ko toRna hoga
Wo saraapa to kaaNch jaisa tha
Dil ke tukRe kahaN kahaN hoNge
Itna maloom hai magar ham ko
Rote hoNge jahaN jahaN hoNge
Un ko kis tarah ye batate ham
Dil to apna bhi TooT TooT gaya
Jab kabhi yaad agai un ki
Daman-e-sabr chHooT chHooT gaya
Itne majboor hogaye the magar
Un se ek lafz keh na sakte the
Aur ilzam Daalne waale
Log khamosh reh na sakte the
Khud pe ilzaam ka to gham bhi na tha
Unka dukh tha jo seh na sakte the
Band bhi TooT TooT jaate the
Aur darya bhi beh na sakte the
Aaj mil jayeN to kahuN un se
"Sun lo aai jaan-e-aarzoo meri
Aaj ke baad kuch na poochHooNga
Aakhri hai ye guftagoo meri
Ab to ham tum ke ajnabi Thehre
Aaj ek baat saaf kar do gi?
Aakhri ek sawaal hai dil maiN
Ye bata do ma'aaf kar do gi?"
--------------------------------------------------------------
8- zeename

Hum tumse ek baat poochte hain
beete lamho ki ek yaad poochte hain
kya tumhe yaad hai wo rangeen wadiyan
Mile the hum tum tumse wo mulakat poochte hain
kya tum bhulgaye ho wo sunehri raatein
saath jab bheege the hum tum un boondon mein
Tumse mohobbat ki wo barsaat poochte hain
kya kuch yaad nahi tumhe,sab kuch bhula diya
wo fiza,wo khaza wo tere armaan poochte hain
Yun ek pal mein hume kaise bhula diya tune
Jo legayi dur,jisne juda kiya wo halaat poochte hain
Humne to aaj tak intezaar k diye jalaye rakhe hain
Tumhare seene mein jalayi thi khabi humne jo
Us sulagti aag ka farmaan poochte hain
Hume chahe bhula do tum,Mita do in lamho ko
Akhri is sawal ka jawab dekar bhale chale jaao
tujhse apni is mohobbat ka anjaam poochte hain
--------------------------------------------------------------
9- autam

--------AKHRI SAAWAAL...!------

ager muhabat nahi kisee see

tu phir sar par guzarnee wali
qiyamatoon see piyar kiyoon?
hameen yee kesee na yad aayee?
gayee dinoo ki rafaqatoon meen bhi
tum ye keh kar bichar gayee thee "hameen muhabat nahi tum see""'
sooo aik mudat guzar kar bhi
milee hooo hum see tu aaj bhi tum
aesee sukhan meen udree huwee hoo
HAMEEN MUHABAT NAHI TUM SEE
tumheen muhabat nahi hum see
tumhara kehna baja hee lakin
tumhara chehra tumhari batoon ka sath denee see dar raha hee!
tumhari ankheen keh rahi heen
keh tum hijar,wasal,hijraan
sabhi azaboon koo chakh chukee hoo
chaloo yoonh kashakash meen akhir
ye maslehat hum nee maan li hee
tumheen muhabat nahi hum see
mager aee zood 0 ashnayee gheraan
aik AKHRI SAWAL HEE TUM SEE
yee mashwara maanloo tum
chaloo kisee see piyar kar loo
kiyoon kee
tumheen zarurat hee dosti ki
tumhari matti hee piyar wali
tumhara pekar hee ishq parwar
tumharee hontoon meen raas buhoot hee(keh jis ka qatra bhi baas buhoot hee)
tumharee pekar ki saltanat meen
gharoor bhi hee supurdagi bhi
tumhari ankhoon meen sagroon sa
sakoot bhi hee rawaniyaan bhi
woo meen nahi, na , sahi-mere jaan!
kisee kee shanee tu tumbhi thamooo
kisee kee dil par tu hath rakhoo
kiyoon apnee pekar meen aap gum hoo
kash maan jaoo mera ye AKHRI SAWAL
ore khud parasti ka yee
behunar aainaa badal doo
kisee kooa pnee siwa bhi chahoo
kisee koo dhundoo kuch iss talab see
keh ablee ju qadam meen aaeen
tu un ki talkhi bhi har tapak par
musaftoon koo nishat bakhshee
rafaqtoonkoo hayat bakhshee
yee akhri sawaal hee tum koo akhir
keh tum yonnhi raigaan na jaoo
tum yee tarmeen-e-zaat kar loo
maan jaoo yee sawaal meraa
gumaan ke asmaan see utroo
-------------------------------------------------------------
10- Ik PaGla
.................... ....
Sahil Ke Rate Par
Sang Tanhai Kay Beth Kar
Ungliyon Say Rate Par
Naam Tera Likh Raha Thah
Aur Yadoon Kay Darpan Say
Teri Sorat Mujhay Jhank Rahe Theh
Teri Ankhon Ki Khamoshi Mujh Say Poch Rahe Theh
Kiya Tum Ko Yaad Hae ?
Kiya Tum Ko Yaad Hae ?
Woh Lamha Akhri Woh Sans Akhri
Wo Zindagi Ka Maeri Sawal Akhri
Tumheen Mujh Say Mohab'bat Hae ?
Kiya Mujh Say Mohab"bat Hae ?
Haan Mujh Ko Yaad Hae
Akhri Sawal ! Jo Kiya Mujh Say Thah
Sans Tham Rahe Theh Lamha Akhri Thah
Tumhen Mujh Say Mohab"bat Hae
Kiya Mujh Say Mohab'bat Hae!
Keasay Batlaon Jana!
Us Aek Lamhay Main
Main Ruk Sa Giya Thah
Waqat Tham Sa Giya Thah
Her Soch Her Yaad Say
Her Sans Her Khiyal Say
Zindagi Kay Guzray Howey Her Ik Saal Say
Main Nay Pocha Hae?
Kiya Mujh Ko Mohab'bat Hae ?
Kiya Tum Say Mohab'bat Hae ?
Her Ristay Her Mor Say
Apnay Us Ghar Say
Jis Main Sang Bitaey Thay
Zindagi Kay Tamam Pal
Un Chahtoon Kay Her Daor Say
Main Nay Pocha Hae ?
Kiya Mujh Ko Mohab'bat Hae ?
Kiya Tum Say Mohab'bat Hae ?
Chand Ke Chandni Say
Jhil Mil Sitaroon Say
Pholoon Ki Khushbo Say
Dilkash Nazaroon Say
Main Nay Pocha Hae ?
Kiya Mujh Ko Mohab'bat Hae ?
Kiya Tum Say Mohab'bat Hae ?
Her Pal Mujhay Jana !
Yeh Jawab Milla Un Say !
Woh Chaht Tumhari Hae
Tumhain Us Say Mohab'bat Hae
Ab Tum He Kaho Jana !
Yeh Baat Haqeqat Hae Ya Hae Ik Afsana
Maeri Chaht Tumhari Hae ?
Mujhay Tum Say Mohab'bat Hae ?
--------------------------------------------------------------
11- Stubborn Lioness

''AAKHRI SAWAL''

KHUDA-e-Bartar karam hai tera
Khalifa apna bana k Tu ney
ZameeN per insaan ko utara
Aqil'zahanat'fehm'im amat
Dee saari makhlooq per fazilat
Ye Tera insaaN barrha phir aagey
Barrhey phir arman-o-khuahishen bhi
Zarooraten bhi'
Karamaten bhi
Terey mazahir ko is ney socha
K maiN bhi aesa hi ker dikhaooN
Bananey phir ye chala ajoobey
Naee naee ronaqen banaeeN
ZameeN sey ho ker falak pey pohncha
Ye jaa pohncha hai chaand per bhi
Ye Tera insaaN...
Tha is pey lazim
Teri sannaee ki humd karta
To teri nemat ka shukr hota
Magar ye insaaN...
Fatah k aesey nashey mein dooba
Khudi mein apni 'Tujhey bhi bhoola
Tabahi apni hi phir bana li
K jis din Atom-Bum banaya
Wo aik zarra
Zara sa reza
Magar jo toota'tabahi laaya
Ejad is ney kiya boht kuch
Phir aik din ek masheeN(computer) banai
Ajab ajooba hai ye bhi is ka
Khazana-e-maloomat jis meiN
Jo us sey poocho'jawab aaey
Magar ye dar hai...
K aik din wo na aesa aaey
Ye Tera insaaN
Barra hi nadaN
Jo us sey poochey...
Mujhey bata tu
K kya ''KHUDA hai?''
Ho Akhri wo sawal is ka
Khalifa jis ko bana k bheja
Bus aik dam ho qehr sa nazil
Bikher parrey kaiinat sari
Aur Akhri us sawal ka ye
jawab aaey
K ''Han KHUDA hai!''
Barra KHUDA hai
Wo WAHDAHU LASHAREEK jis ney
Tujhey banaya
Qaraz tha tujh per terey Khuda ka
Tu shukr karta'tu humd karta
Tu Us k aagey sujood karta
Magar Aey Badbakht...!
Ye kya kiya hai?
Barri himaqat kari hai tu ney
Azeem Rub ney jo nemateN deeN
Tu un k zaryey azaab laaya
Tabahi paee
Khasara paya!
...................! !!
To sun ley ab Aey Khata k putley!
Hai waqt ab bhi'bus ab sudhar ja
Tu apney Rub ki taraf palatt ja
Ghafoor hai Wo
Raheem hai Wo
Wo bakhsh dega khataeN teri
Magar Aey insaaN...
Bus Akhri us sawal sey dar
Tu ab sudhar ja
Bus ab sudhar ja
K apney Rub ki mazeed kitni
InayatoN ko
Bhulaey ga tu...!!!
--------------------------------------------------------------
12- rubinbiswas

Akharee Saawaal

akharee saawal poochney
tum se aya hoon janey jana
suno faisala aub tum ko hi karna hai
meri ess chahat ka
itna kehna hai bus tum se
aub bhi tum meri zindagee ho
dili ehsaashat ko mery
ankhono main pharney waley
moh lya saadgee se merey dil ko
sub se aziz ho itni tum mughey
tumharey haatono main rakh di
mene apni ess jaan ko
dil mera muthee main band ker lo
ya phir phool samajh ke esey
jo guzrey nagawar tumhey
tor ke dil ki patayaina ura dena
kahin kisi weeraney main
shaid yunhi mujey sakoon ajaye
azm hai mera kar dee naam tumhrey
ye zindagee aub tu mayoos na krna
na rud karna mery jazbono ko
ya phir maan lo ess dil ka kaha
mumkin hai tumhrey es rawaye se
khain main tang ho kr mar hi na jaono
itney anjaan tu na bano
dil ki baat ankhono main pharney waley
kahbi khe na saaka ess dil ki tapkan ko
tum se main janey jana
koi kya janey meri ess maan ki laagan ko
dil ki lagee nahi hai ye
jub bhi tum se nigha milata hoon
sanbhaley nahi sanmbalta ye dil
girft inti mazboot hai ess ki
bina tumharey rehna aub mushkil hai
khud ko jala ke main apney aap ko
ye maashal e jisaam laya hoon
ye woh naghma hai jesy sun ke
chataney bhi samandar ban jayain
mubhaat ki shama haemsha apney
taaq e jaan main roshan rakhna
sawaal tum ko khoney ka nahi
sirf tum ko chahney sirf tum ko paaney ka hai
--------------------------------------------------------------
13- RUKHSAAR

AAKHRI SAWAAL

IsI rEhgUzAr pAY tUm nE mUjH sE
cHaHaTo'N kA aPnI
iQrAaR yUn kiA tHa
mUhAbBaT k sabHi rAaStO'n sE
mUjHe aAsHnA kiA tHa
tUm hE nE mUjH sE kAhA tHa
"mUhAbBaT diL kO cHhOtI aGaR
rOoH mAiN uTaR jAaYe
tAu hAmEsHa ZiNdA rEhTi hAi
iSi tArhA tUm bHi aB
mErI sAaNsO'N mAin bAsTi hO
mErI rOoH mAiN rEhtI hO"
aUr uS gHaRi tUmHaRi
mUhABbAt k LuMs nE
mErI bHi rOoH kO cHhO LiA tHa...
mAgAr tUmhArE sAfAr kI mAnZiL
kiSi aUR rAaH paY tHi
tUm Se pHiR wOh mEri
MuLaAqAaT aAkHrI tHi
uS rAaH sE aAgAy
kOi rAaSta nAhi tHa
pALaT jAatI bHi TaU kAiSe
kOi rAHnUmA nAhI tHa
ChAro'N OoR mErE
sHikAsTaGi kA jAaL tHa
bEhTaY hUwE aShQo'N kA
RuKnA mUhAaL tHa
"bInA rOoH k mAiN aB
kiS tArhA'N JiYoN geE..?"
uSi rEhgUzAr pAY tUmSe yE
mErA aAkHrI saWaAL tHa
--------------------------------------------------------------
14- ali4everfriend


--------------------------------------------------------------
15- sLeEpLeSs


--------------------------------------------------------------
16- Kanwal Hussain


--------------------------------------------------------------
17- silent_wishes

Aakhri Sawal

ay m'ray masoom dil !
thu kab thalak yuuN ishq maiN jalta rahay gaa
yaad usay kerta rahay gaa
raat din rotaa rahay gaa
raastay taktaa rahay gaa
ab sambhal bhee jaa !

z'ra socho !
tujay kuch aur bhi kerna hai jeevan maiN
bila maqsad yuuN ronay se tujay kuch bhi nahi milna
ye dunya hai barri zalim
tujay barbaad kerdegi
bhalaa chaaho z'ra apna !

z'ra socho !
jisay thu ne bohot chaha
bhala uss ne kabhi maana
ke tum uss keliay ye jaan bhi qurbaan kerdoge
ke har ek kaam ka maqsad usi ka naam kerdo ge
agar kehtay ho tum ke haaN
usay ehsaas hai tera
tho phir is jaan ki baazi laga dena
usay apna bananay ki
musalsal justjoo kerna
tujay mil jayegaa ek din
magar ye pooch lo khud se !!!!

ke waaq'i ye haqeeqat hai ????

--------------------------------------------------------------

Note: ye thread sirf judges k liay lagaei gai hy, so guzarish hy k Judges k elawa koi bhi member is thread meiN post na kary, ghair-mutaliqa post ko delete kr diya ja'ay ga...

__________________