 Meri jaaN ye mera kamaal tha | |
Tujhe aik bhi na safayee di, meri jaaN ye mera kamaal tha
Tujhe dostoN pe yaqeen tha, mujhe dushmanoN ka khayal tha
BaNTeeN shehr maiN, jo ra'ayateN, to panaah DhoonD li dasht maiN
Wo kisi ka rehm-o-karam sahi, ye meri anaa ka sawaal tha
Wo jo lamha bhar ki bahaar thi, meri umr bhar ka hisaar thi
Na naye guloN ki talab koi, na khizaaN ka koi malaal tha
Tere mausamoN ka har aik pal, meri yaad maiN tha saja hua
Mujhe is se koi gharaz na thi, wo firaaq tha ke wisaal tha
Bhala waqt se maiN DarooNga kia, kabhi khauf iska karooNga kia
Jise haNs ke maiN ne chuna tha khud, wahi iska ghaiz-o-jalaal tha
Kisi aur ka bhi ye haal ho, to ye dil na itna niDhaal ho
Meri bad naseebi to ye hui, maiN khud aap apni misaal tha
Mujhe ilm tha, maiN Saraab tha, so naseeb mera kharaab tha
Wo jo raiza raiza hawa maiN tha, wahi mera khwab-o-khayal tha
__________________
******************** ******************** ****
Adaab teri bazm ke jeenay nahiN daitay
DeewanoN ko jeenay ki tamanna to baRi hay
(Qabil Ajmeri)
Last edited by Saraabs; 11-21-2007 at 05:44 PM.
|