Sathiyo

Aek aur Kawish aap sab ki nazar. Ara'a ka intezar rahey ga



1. Ashk ruke tow sahra ho ga
beh nikle tow deryaa ho ga

2. Jab bhi chaand ko dekha ho ga
Us ney mujh ko socha ho ga

3. Raah badal li us ney apni
Raah mein mujh ko dekha ho ga

4. dekhna tujh ko, milna tera
Khawab kahan ye poora ho ga

5. Kon yahaN aata hey pagley
dekh le mur ke saaya ho ga

6. Laila baal bakherey nikli
MajnooN ban mein roya ho ga

7. Umr bita ke hijr ke ban meiN
Wasl ka bas ik lamha ho ga

8. Tujh sey bicher ker dil ka panchi
daali daali roya ho ga

9. Sham-e talab sey subh-e fana tak
Dil ka safar bas itna ho ga

10. Dushman jis ko maar na paaey
Us ko yar ney maara ho ga

11. Thora jhoot mila len is mein
sach tow bohat hi kerwa ho ga

12. La hasil hey shikwa phir bhi
Dil ka bojh tow halka ho ga

13. Tukrey dil ke chun lo khud hi
wo tow jag meiN uljha ho ga

14. kaisey kahun wo mera naheen hey
aur bhala wo kis ka ho ga


Qamar Zaman