 Teri nigaah maiN faqat ilzaam reh gaye | |
Teri nigaah maiN faqat ilzaam reh gaye
Aur ham difa-e-jurm maiN nakaam reh gaye
Halaat ka sitam na bayaN ham se ho saka
DonoN jahaan paikar-e-dushnaam reh gaye
MajbooriaN ke arsh se le ayeeN farsh par
Sab khwaab asmaan pe benaam reh gaye
Mangi hai ab safai ke taab-e-sukhan nahiN
Ilzam jo dhare the, sar-e-aam reh gaye
Qisse kitab-e-dehr maiN aise bhi the kai
Aghaz likh diye gaye, anjaam reh gaye
Kaise kaheN ke rasta hi khatm hogaya
Manzil pe jab pohunchne maiN do gaam reh gaye
Hai qeemti wo jins jo bikne ki ehl ho
Ham bik na paye, dekh lo, bedaam reh gaye
Jis ke bhi aagay rotay, so deta yahi jawab
Teri shikayatoN maiN mere kaam reh gaye
Ab ham Saraab khud ko basaayeN ge dasht maiN
ShehroN maiN ab kahaN hamaiN araam reh gaye |