 Madad ho mere Ilaahi mujhe nahin milti | |
Madad ho mere Ilaahi mujhe nahin milti
Ye sach hai sach ki gawahi mujhe nahin milti
Bohot mila hai magar phir bhi aisa lagta hai
Wo cheez main ne jo chaahi mujhe nahin milti
Jo dil ke zakhm ko kaghaz pe phir hara kar de
ek aisi talkh siaahi mujhe nahin milti
Hamara shehr ye pasti se kaise nikle ga
Kaheen buland-nigaahi mujhe nahin milti
Main kis ke khwaab ko tabeer ki duaaen doon
Ke chashm-e-khwaab sara hi mujhe nahin milti
Main kis ko dekh ke is dil ko shaad kaam karoon
Kisi ke rukh pe zia hi mujhe nahin milti
Dawai le ke main sehra main sar patakta hoon
Jo dard dard karaahi mujhe nahin milti
Ye keh ke sach ne khumoshi se chor di basti
Kisi ki pusht panaahi mujhe nahin milti |