Adam ki koi bhi le ker khabar nahi.N aaya
Gaya he jo bhi udhar , phir idhar nahi.N aaya

Hazar saal mai.N ik baar bhi ye dar na khula
Hazaar saal se koi idhar nahi.N aaya

Koi nahi.N he yahaa.N tar-e-ankaboot bata
Gaya he koon yahaa.N se jo phir nahi.N aaya

Yahi.N pe aa ke kiya jo bhi kuch kiya peda
Mai.N aasmaa.N se liye bal-o-per nahi.N aaya

Mai.N mehvi ishq tha aisa diyar-e-hasti mai.N
Ke mujh ko fitna-e-mehsher nazar nahi.N aaya

The teergi he mere dil ke saamne aise
Ke waahame ke siwa kuch nazar nahi.N aaya

Malal tujh ko rahe ga safar pe jane ka
Ager tu ker ke ise mukhtasar nahi.N aaya