 Raat ki chandni hai tere shehr main | |
Raat ki chandni hai tere shehr main
Dard ki roshni hai tere shehr main
Dhoondte hain tujhe sab yahan se wahan
Sab ko teri pari hai tere shehr main
Saari dunya se ab apna kia waasta
Dil ki dunya basi hai tere shehr main
Zindagi apne kooche main chor aye ham
Bandagi zindagi hai tere shehr main
Apni zaat apna chehra dikhai na de
Kaisi waraftagi hai tere shehr main
Saare gul sara sabza ujar kion gaya
Kaisi andhi chali hai tere shehr main
Tujh ko hai kuch khabar aai sarapa ghazal
koi kab se dukhi hai tere shehr main
Is main rehna mahaal, is se jana kuja
kis qadar bebasi hai tere shehr main |