 jaane dil_vaaloN pe is daur meN kia guzregii!...merii ek Ghazal | |
salaam dosto, aaj aapkii Khidmat meN ek Ghazal le kar Haazir huaa huuN. ummeed hai k aapkii tab'a-e-naazuk par baar-e-garaaN na hogii. Hasb-e-ma'mool, aapkii aaraa kaa shiddat se intizaar rahegaa. peshgii shukria adaa kartaa huuN 1.gif ")1") faqat Khaak_saar, _______Hashmat Usmani 1. phir bahaar aayii hai, gulshan se sabaa guzregii jaane dil-vaaloN pe is daur meN kia guzregii! 2. le uRii hai yeh bahaaroN kaa junooN_Khez payaam unke kooche se bhii ho kar yeh sabaa guzregii 3. noor se hoNge dar_o_baam-e-tasavvur raushan jab mire zehn se yaadoN kii ziyaa guzregii 4. subHa_dam nik'hat-e-gul laayegii paiGhaam-e-visaal gul_'azaaroN kii nigaahoN se Hayaa guzregii 5. aatish-e-gul se lapakte haiN hawaaoN meN sharaar soorat-e-sho'la gulistaaN se hawaa guzregii 6. jhuk ke qadmoN meN gire jaate haiN gul-posh shajar sahn-e-gulshan se vo rangeen adaa guzregii! shukria bahot bahot 
__________________
Khayaal hogaa, junuun hogaa, bahot abhii dil kaa Khoon hogaa
bahaar hai door kii Haqeeqat, bahaar rang-e-chaman nahiiN hai
Ali Z. Usmani [mere vaalid marHoom] |