Doston aap sab kii khidmat meN aik paaband nazam paiSh kernay kii jurrat ker raha hooN ... Bazaahir to yeh aapkii ghazal lagegii, magar mujhper yaqeen rakhiay, yeh nazam hai
Yeh merii aik puraanii nazam thii jissay maiN ne revise kiya hai, aur isay na'ii shakl day dii hai!
Abhii mere paas Urdu meN likhne ka waqt naheiN thaa iss liay sirf Roman meN post ker raha hooN, inSha'Allah kal Urdu image post kerdooNga
Sadaa e Dil
jab diya dil ka mere bujhne laga
kee taRapker dard se aah-o bukaa
kya bhalaa kerta kisii se maiN gilaa
woh huvaa qismat meN tha jo bhii likhaa
kya huvaa gar paas tum mere naheiN
faaSloN se dil naheiN hote judaa!
haaN! magar furQat ne terii naazneeN
karb ka toofaaN hai barpaa kerdia
roz iss toofaaN meN jeetaa merta hooN
ban gayaa hai ab yeh meraa maShGhalaa
baawajood iss kay bhii maiN chup hee rahaa
uff! talak lab per naheiN aane diya
poochhio na zabt ka maiN ne safar
saa'ay meN Ghurbat kay kaise tay kiya
jaam-e raahat k liay terii qasam
ban k majnuu dar ba dar phirtaa raha
aagayaa honToN pe dam hooN jaaN balub
baar furQat ka naheiN mujhse uThaa
ab dam-e ruKhsat meraa nazdeek hai
aaKhrii hujjat merii sunlo zaraa
marg se pehlay ho maatam hai zabooN
haaN! magar tum se merii hai iltejaa
faatiHaa paRhker merii tum qabr per
rooh k riShte ko youN daynaa jilaa
QASSIM MIRZA ALI :QASSIM: