Urdu Poetry/Shayari Forum - View Single Post - Raay-Shumari Baraay Tarahi GHazal Sep,05

**Shagufta Basit** · #1 09-27-2005, 10:12 PM

As'salam O Alaikum,

MAh-e September ki tarahi ghazal k leye Mohterma Parveen Shakir ka darj-e zail misra diya gaya tha

Dukh Humarey They, Muqadder Ho Gai

is misrey pe jin jin shoa'ara nay apney kalaam muqabley k leye paish keye hum un k tah0e dill sey mamnoon hain

...

darj main muqabley main shamil shoa'ara k kalaam paish keye ja rahey hain .... aap ko jis shair ka kalaam uroos ki buniyaad pe mukammal lagey usey muntakhib kejeye koshish kejeye k zaati rawabit ko balaay taaq rakh k huqdar main huq main faisla keya jay

Tarahi ghazal no-1 (ZAIN)

jab se jaanam tum sitamgar ho gaye
ashk aankhon ke,samandar ho gaye

hon mubarak sukh tre tum ko sanam
"dukh hamaare the,muqadar ho gaye"

ki muhabbat to mila , ham ko sila
khuab jo bhi the wo pathhar ho gaye

ham ne socha to,magar samjhe na kuch
gham mree taqdeer kiyoonkar ho gaye

khaar to the khaar,ham ne NAZ gar
phool bhi chhooye to khanjar ho gaye

--------------------------------------------------------

tarahi ghazal no-2 (FARHAN USMANI)

Me Ne Dil Ki Baat Jab Tujh Se Kahi...
Chand Taaray Sab Munawwar Ho Gaye...

Har Khushi Tujh Ko Muyyasar Aa Gai...
Aur, Gham Meray Muqaddar Ho Gaye...

Tere Milnay Se Na Jane kiya Huwa...
Dost Jitnay Thay Sitamgar Ho gaye...

Tashnagi Teri Mitanay Ke Liye...
Aankh ke Aansoo Samandar Ho Gaye...

Ek Zara Sa Sach Hi To Me Ne Kaha...
Kiya Huwa? Khamosh Kiyunkar Ho Gaye

Logon Ki Baton Me Tum Bhi Aa Gaye...
Tum Bhi Yun Badzan Sarasar Ho Gaye...

Aaj Aisa Lag Raha Hai Janay Kiyun...?
Tum Mere Kad Ke Barabar Ho Gaye...

Teray Jaanay Se Faqat Itna Huwa...
Aaj Hum Khud Ko Muyassar Ho Gaye...

Kal Jo Mere Khoon Ki Taqseer Thay...
Aaj Wo Hi Phool, Khanjar Ho Gaye...

Aik Muddat Baad Jab Dekha Tumhein...
Aisa Lagta Tha Ke Pathar Ho Gaye

Teray Dil Ki Aabiyari Ke Liye..
Mere DiL Ke Khait Banjar Ho Gaye...

Kal Talak Pehchanta Koi Na Tha...
Aaj Se Hum Bhi Sukhanwar Ho Gaye...

Wo Mere Dushman Thay Dushman Hi Rahay

...

Tum Mere Apnay Thay, Kiyunkar Ho Gaye

-----------------------------------------

tarahi ghazal no-3 (QASIM MIRZA)

Phool KaaNTe, haath Khanjar ho ga’ay
Khair ho apne jafaagar ho ga’ay

Kya falak bersaa’ay hai taazii Sharaab?
Maikaday veeraan kyuNker ho ga’ay?

Kee tasavvur meN tirii tasveer jab
Raastay khud hii munawwar ho ga’ay

Iss se baRhker aur kuch kehnaa naheiN
“Dukh hamaare thay muqaddar ho ga’ay”

Matlabii dunya kii rangat dekh lo
Dost bhii duShman baraabar ho ga’ay

ChhoRker jab se gayaa hamko tabeeb
Naa.tawaaN, beemaar o laaGhar ho ga’ay

Ishq meN girtay rahay ubhray naheiN
Dard ka deevaan o daftar ho ga’ay

Hai karam Maalik ka :Qassim: be.panaah
MaShq se aSh’aar behter ho ga’ay

-------------------------------------

tarahi ghazal no-4 ( SHABNAM REHMAN)

Jaadui jaisay woh manzar ho gaye
murh ke dekha hum ne pather ho gaye

tum jo badlay tou na janay kis tarah
phool jitney the woh khanjar ho gaye

kaisi ye barish hui ab ke baras
khwaahishon ke khait banjar ho gaye

sukh tou jaisay qarz the us ke magar
dukh humaray the muqaddar ho gaye

shabnami lahja ye kis ka sun liya
jitney sehra the samunder ho gaye

tum se mil ke kitnay arsay baad phir
yun laga khud ko muyassar ho gaye

-----------------------------------------------

Raay shumaari 30 September tak jaari rahey gi ........ aur nataij ka ailaan yakum October ko kya jaay ga.

aap sey guzarish hai k zaati talouq daari sey bala tar ho kar faisla kejeye aur muntakib karda ghazal ki khobiyoo aur khamiyoo ka jaiza bhi paish kejeye

bohat shukriya

aap k tav'un ki mutamani
HallaGulla Intazamiya