Urdu Poetry Forum

**naz** · #1 03-19-2006, 07:25 PM

mujhe nahi pata ye kya likha hai main nay . k mujhe likhna nahi aata ...... per aise hi bethey bethey apney aap ko aj sey chund baras aagey kar k dekha hai..... us um'r ki kaiyat ko mehsoos karne ki koshish ki hai jab sab saath chor jatey hain... dost ... ehbaab........ aur wo olaad bhi jiss ki abyaari apney laho sey ki jati hai........ sab saath chor jatey hain .......hatta k apna wojood bhi.... kitna be-bas ho jata hai insaan ..... shiad is sey kaheen zayada jitna main nay mehsoos karne ki koshish ki.........

unwaan mujhe is ka kuch samajh nahi aaya ... k sochoo ko unwaan main muqayyad karna merey bas main nahi ... .. agar aap ko koi unwaan samajh aay tu zoror bateye ga

Ye zindagi ..... aati jati sansoo ka khiraaj mangti hai ....... ajab hai ye zindagi kabhi sat-rangi dhanak aanchal per utaar dheroo.n dher ghulaab bhar deti hai jholi main ... tu kabhi itney khaar nichawar karti hai k zindagi ki quba taar taar ho jati hai.....

ye lamha lamha guzarti zindagi chehrey per aarhi tirchi lakeerai.n khainchtey chali jaati hai.. ye arhi tirchi lakeerai.n jo humain be-mani nazar aati hain dar-haqeeqat ye zindagi ka wo rasmul-khat hai jisey parhney aur parh k samajhney sey hum qasir hain,.......

lamha lamha guzarti zindagi un sabz rutoo.n ko nazroo.n sey ojhal kar deti hai jo pehley pehel haathoo.n main haath daley humarey sang chalti hain........ guzarti um'r k saath ye zindagi khizaa.n k zard tama'chey aise munh pe raseed karti hai k wo aankhain jo khwaab buntey na thakti thee.n....... jin main un-ginat khwaab ban k jugnu chamaktey they........... aahista aahista unhi aankhoo.n k shabistaan khwaaboo.n k shamshaan ghaat ban jatey hain......... jahan roz aik khwaab ki chita jalti hai......... aur phir us ki raakh ko aansoo main baha diya jata hai ......

yehi haath jo chaand taroo.n ko muth'thi main bhar k mang bharney ko justt bhartey they ,...... ab thar'thar thar'thar kanptey rehtey hain ........... ye pair jin mian kharey hone ka bara ghumand howa karta tha.... ab in k taley zameen khisakti mehsoos hoti hai ...... aur ye zabaan....... zindagi k kitney hi asbaaq o tajarbaat sunaney ko betaab hai.. per kya kejeye k ab ye bhi saath chor chali hai....... baar baar lar'khara jati hai......... guzarti um'r k saath ye zabaan bhi kahan saath dey paati hai........ wo tamaam baatain jo dill sey laboo tak aaney ko machalti hain . lapakti hain ... per kaheen rastey main hi thak haar jati hain.... saans ukhar jati hai......... hulaq kantoo.n sey bhar jata hai ....... ab bhala kantoo ki baar ko ye chotey chotey lafz paar karain bhi tu kaise.......?????

**$@GH@R** · #2 03-27-2006, 07:06 PM

V.NICE WORK DEAR

Urdu Poetry Forum

.................... . .!!!!!

.................... . .!!!!!