Khudaa ka shukr hai maiN iShq meN hooN mubtilaa naheiN
yeh marZ aisaa hai k jiss kii koi bhii davaa naheiN

Khayaal k ufak ka aaftaab Doobtaa naheiN
mujhay woh hans k dekhnaa teraa jo bhooltaa naheiN

haiN manzilaiN alag alag haiN raaste alag alag
safar meN zindagii k yuN milaap ho sakaa naheiN

sahaara jiss ne muShkiloN meN tujhko apna hai diya
tujhay Qasam hai uss Ghareeb ko tu bhoolnaa naheiN

najaane kaunsii Sharaab uss k maikade meN hai
jo aik baar waaN gaya to phir woh lauTtaa naheiN

nigaah kii zabaan se yahaaN peh boltay haiN sab
to kya huvaa kisii ne muNh se kuch agar kahaa naheiN

daleel yeh a'mal hai ussko ab bhi mujhse pyaar hai
gunaahgaar tha magar woh day sakaa sazaa naheiN

chalo yeh maan bhii liyaa k dil meraa hai sang dil
magar yeh sach bhi jaanlo k dil ka maiN buraa naheiN

har aik saans boltii hai teri :Qassim: e hazeeN
meraa Hussain k sivaa hai koi aasraa naheiN

__________________