Jab dil mein daag damaktay thay
jab palkein sheher k rasto'n per
ashqo'n ka noor lutaatii thii'n
jab saansein ujlay chehron kii
tan-mann mein phool sajatii thii'n
jab chaand kii rim-jhim kirno'n se
socho'n mein bhanwar par jate thay
jab ek talatam rehta tha
apne be-an't khayalon mein
har ehad nibhane ki qasmein
khatt khoon se likhne kii qasmein
jab aam thii'n hum dil walo'n mein
ab apne pheekay honto'n per
kuch jalte bujhte lafzo'n k
wajood pighalte rehte hain
ab apnii gumsum aankhon mein
kuch dhool hai bikhrii yaadon kii
kuch gard-aalood se mausam hain
ab dhoop ubalte koocho'n mein
pemaan dil k rehte hain
ab apne veraa'n aangan mein
kitnii sakoon kii chandnii hai
kitnii shaamo'n ka sona hai
iss ko khaaks'tar hona hai
kitnii roshan sii raatein hain
uss umr kii sab soghaatein hain
uss umr k khuwab khayal hue
woh pichlii umr thii beet gaii
woh umr bitaaye saal hue...
ab apnii deed k rastay mein
kuch rang hai guzre lamho'n ka
kuch ashqo'n kii baaraatein hain
kuch bhoole basre chehray hain
kuch yaadon kii barsaatein hain
yeh pichle ishq kii baatein hain
yeh pichle ishq kii baatein hain ....