It seems that you are unregistered. Please register with us by clicking Here, or if you are already registered login here
It seems that you are unregistered. Please register with us by clicking Here, or if you are already registered login here 
Welcome to Urdu Community & Poetry/Shayari Forum
This is a discussion on Saaqii_Naama...by Ali Z Usmani [mere vaalid marHoom] within the Nazam forums, part of the Urdu Poetry - Shairi category; salaam dosto, maiN abhii Haal meN hii apne daura-e-Hindustan se vaapis aayaa huuN. shadeed garmii kaa saath rahaa magar aam ...
| |||||||
| Poetry | Video | Photo | Books | Games | Register | Groups | FAQ | Calendar | Mark Forums Read | Chat |
|
#1
03-05-2007, 07:04 AM
| |||||
| |||||
salaam dosto, maiN abhii Haal meN hii apne daura-e-Hindustan se vaapis aayaa huuN. shadeed garmii kaa saath rahaa magar aam kii lazzat ne dil Khush kar diyaa...aam kii Khusoosiyat yehi hai k meeThe hoN aur bahot se hoN...meeThe to the magar bahot hote huye bhii kam the kiuNki maiN sugar kaa mareez huuN liHaaza taskeen-e-lazzat na ho sakii.  Khair...maiN apne vaalid marHoom kaa majmoo'a-e-kalaam hamraah laayaa huuN is ummeed par k maiN ise jald hii bar manzar-e-aam par laa sakuuNgaa. tabaa'at kaa kaam insha Allah jald hii shur'uu hone waalaa hai mere vaalid marHoom kaa muKhtasir ta'arruf yeh hai k vo ek aise shaa'ir guzre haiN jinhoN ne shaa'irii apne taskeen-e-nafs ke liye kii thii aur unhoN ne dunyaavii namood o numaaish se parhez kiyaa aur unhoN ne gosha-e-'aafiiyat ko naam-varii o shohrat-yaaftagii par moqaddam jaanaa. mausoof AsGhar Husain "AsGhar GonDvii" ke shaagird aur dost the jiskii vajah se unkaa saath Jigar Muradabadii ke saath rahaa. marHoom AligaRh Muslim University kii Field Hockey ke captain bhii rahe aur unhoN ne Olympic Trials meN bhii shirkat kii. unke saathii janaab-e-Firoz saaHib select huye aur vo India kii team meN shaamil huye. Khair. 'allaamah Iqbaal ke Saaqii_naame se mutaassir ho kar marHoom ne Khud bhii tab'a aazmaaii kii hai. maiN use aaj aapkii KHidmat meN pesh kar rahaa huN. is saaqi_naame meN kuchh kamiiyaaN aur KhaamiyaaN yaqeenan hoNgii kiuNki vaalid saaHib kii shikast rasm-ul-Khat meN qalam_band taHreer ko paRhne meN qadre mushkil kaa saamnaa rahaa mere liye. ustaad sho'ara~ se darKhowaast hai k vo un KhaamiyoN aur kamiyoN kii nishaan-dehii farmaa deN. ai'n navaazish hogii. shukria. _______Hashmat Saaqi Naama pilaa, Saaqiyaa! jaam-e-mai jaaN_navaaz...zaraa, Saaqiyaa! jaam ik jaaN_navaaz [???] KhizaaN is gulistaaN kii bunyaad meN...yahaaN aashiyaaN reh-e-saiyaad meN yeh dunyaa-e-murdaar naa_paak hai...sag o zaaGh o kargas kii Khoraak hai pyaala nahiiN balki ik laala_zaad...k yak_baargii raaz hii raaz baad Khirad hai giraftaar-e-farda_o_dosh...paris haaN_nigar saKht be_hooda_kosh nazar door door aur dil sard hai...yeh gard auj-e-gardooN pe bhii gard hai k iskii nazar meN charKh-e-kabood...kabhii saqaf neelii, kabhii bai'Hr dood fazaa meN sho'aaoN kaa manzar kabhii...Hudood-e-nigaahii kaa manzar kabhii alag sab se taHqeeq-e-rind-e-Kharaab...falak chashma-e-mai, sitaare Hobaab na Khursheed-e-gardaaN, na maah-e-ravaaN...yeh sab sheesha o jaam-e-daryaa kashaaN uThaa, Saaqiyaa! jaam-e-Hairat_fazaa Khirad_soz, tan_soz, daanish_rubaa k dekhaa hai arbaab-e-daanish kaa Haal...gireh meN nahiiN hai ba_juz qeel o qaal kahiiN juz kaa jhagRaa, kahiiN kul kii bai'Hs...taKhaiyul kii dunyaa, taKhaiyul kii bai'Hs koii mai'Hv hai jama' o tafreeq meN...koii gum hai burhaan-e-tab'teeq meN khulii haiN taraqqii kii raaheN tamaam...chamaktii huii dars_gaaheN tamaam magar, yeh taraqqii ma'koos hai...kahaaN jaayegaa jo mai'Hboos hai use kia milegii jahaaN kii Khabar...jise nahiiN Khud apnii jaaN kii Khabar ise phai'Nk de le ke girdaab meN...k bai'h jaaye Hikmat yeh sailaab meN daraaz uske shoGhl aur madfan hai yeh yeh rah_bar nahiiN balki rah_zan hai yeh fasurda huuN maiN, saaGhar-e-mai pilaa!...pilaa aur Saaqii! pyaala-e-pai pilaa talaa'tum uThaa kar Duboo de mujhe...isii jaam o meena meN kho de mujhe k paanaa kahaaN hai jo khonaa na ho...yehii zindagii hai k honaa na ho mujhe ek jaam-e-baqaa chaahiye...Khudii kii jagah par Khudaa chaahiye jahaaN tak nazar jaa rahii hai mirii...tamaam ek tauheen, Saaqii! tirii Khudii kii numaaish, Khudii kaa zahoor...yeh sab zohd o taqwaa fisq o fujoor nahiiN dekhtaa apnaa mai'Hram ise...to, Hairat se taktaa hai 'aalam ise k is meer-e-mas'uud ko kia huaa...farishtoN ke masjood ko kia huaa k sajde meN bhi taab baaqii nahiiN...gohar hai magar aab baaqii nahiiN sanam_Khaane se baRh kar hai masjid kaa but...Brai'hman se moHkam hai zaahid kaa but but-e-Brai'hman gurz se choor choor...but-e-Shai'Kh dast-e-mujaahid se door uThaa, Saaqiyaa! jaam-e-mai jaaN_navaaz! k khul jaaye sab mujh pe hastii kaa raaz yeh merii nahiiN, Saaqiyaa! terii aaNkh hai...Khataa karne waalii nahiiN merii aaNkh yeh saalaar-e-Ghaznii, vo sailaab-e-fan...vo but_Khaana barham_zan o but_shikan yahaaN maa'il-e-harzah_kaarii hai vo...Khud is but_kade kaa pujaarii hai vo Khudii hai numaayaaN bhii, baareek bhii...Khudii hai munavvar bhii, taareek bhii yahiiN ek hai paak o dai'reena aur...magar us Khudii kaa hai aaiina aur vo us waqt thii jab yeh aadam na thaa...yeh aadam nahiiN balki 'aalam na thaa vo ab bhii hai lekin jahaaN tu nahiiN...yeh Saaqii se poochh ab kahaan tu nahiiN tavahhum meN ru hai, ta'aqqul meN tu...tasavvur meN tu hai, taKhaiyul meN tu tire saath hii but_parastii bhii hai...k ik but_kada terii hastii bhii hai Khirad ke pujaarii haiN hangaama_Khez! bas ab, Saaqiyaa! jaam-e-but_Khaana_rez! yeh iijaad o saamaan-e-Ghaarat_garii...yeh saudaa-e-KhooN_rezii o bartarii yeh sab hech, iskaa kuchh Haasil nahiiN!...agar tu zamaane se Ghaafil nahiiN! zamaana hai KhuuN_Khowaar, taaqat-shikan...khulii iskii fitrat, khulaa iskaa fan bahot is ne dekhe haiN kaafir_adaa...bahot sai'l_raftaar, mai'Hshar_adaa zaraa is shikaarii kaa fitraak dekh!...zaraa phaaR kar parda-e-Khaak dekh! kahiiN ustoKhowaan-e-tan-e-naazniiN...kahiiN Khaak hai aur kuchh bhii nahiiN kahaaN hai? zaraa dekh baa chashm-e-hosh...sar-e-be-kulah ho sar-e-taaj_posh yeh miTTi hai Ghaarat_gar-e-imtiyaaz...yahaaN ek hai rang-e-naaz o niyaaz zamiiN ko zaraa dekh chalte huye saraapaa-e-aadam nigalte huye shikam_sai'r hai is qadar, fitna_gar!...k Thokar se akSar ukhaRte haiN sar javaaN dekhtii hai yeh, zaalim! na peer...ise luqma-e-ustoKhowaaN shai'hd o sheer jise apnii chhaatii pe yeh paa gaii...use dekhte, dekhte khaa gaii shikam pur magar ishtihaa hai hanoz...balaa_nosh kaa muNh khulaa hai hanoz yahiiN haiN tayoor aashiyaane ke ba'd...yahiiN daam o dar ik zamaane ke ba'd isii meN haiN insaan waale sifaat...isii emN hai gum ashraf-e-kaai'naat vo barq-e-aatishiiN gurz e Khaara shikan...laraz jaate haiN jisse dasht o chaman zamiiN ke liye vo bhii sar_shaar-e-jaam...koii ho! ise peT bharne se kaam uThaa jaam-e-Saaqii, dil afsurda hai pilaa mai k dil zinda, tan murda hai dil-e-zinda kaa maut Haasil nahiiN...jo miT jaaye vo jism hai, dil nahiiN! tu ik jur'aa Tapkaa de jis Khaak par...pahoNch jaaye vo Khaak aflaak par farishtoN ke Hairat kaa saamaaN hai Khaak...namood-e-kamaalaat-e-yazdaaN hai Khaak isii se bulandii kaa baazaar sard...yeh Khaak hai chashm-e-shaitaaN meN gard mujhe kaam kia kufr o islaam se...giraa, Saaqiyaa! barq ik jaam se k ho jaaye afsoon o afsaana soKht...dil o jaaN hoN maanind-e-parvaana soKht vo mai bhar k saaGhar uchhalne lage...har ik mauj se noor ubalne lage fazaa yeh yahaaN tak pur_anvaar ho...k jo saaNs luuN, noor kii dhaar ho milaa Hauz-e-mai_Khaana Kausar ke saath...piyuuN aur le jaauuN bhar bhar ke saath k auroN ke bhii hosh uRaane laguuN...milaa duuN nazar to pilaane laguuN moHabbat se rangiiniyaaN dard-e-sar...moHabbat se gul_haa-e-zebaa-e-sharar yeh dunyaa to kia jo Thai'hr jaaye 'ishq...k firdaus se bhii guzar jaaye 'ishq kahuuN kia bahot 'ishq ke baab haiN...k dunyaa hai soyii huii Khowaab meN dar-e-mai_Kada band kar, Saaqiyaa! k hone ko hai ab saHar, Saaqiyaa!
__________________ Khayaal hogaa, junuun hogaa, bahot abhii dil kaa Khoon hogaa bahaar hai door kii Haqeeqat, bahaar rang-e-chaman nahiiN hai Ali Z. Usmani [mere vaalid marHoom] Last edited by Baaboo Babooshkaa; 03-05-2007 at 07:19 AM..                   |
|
#2
03-05-2007, 07:25 AM
| |||||
| |||||
bhat zabardast.. buhat hi khoobsoorat nazm hay..... Aap k walid sahab mashAllah buhat hi ba kamaal shayer thay....iss nazm meiN her qism ka rang jhalakta nazar araha hay .... buhat hi nadir khayalaat khoobsoorat alfaz aur rawani k saath paish kiye heiN.... Buhat khush rahiye... aur mazeed bhi share kijiye... aik mashwara hay k aap issko Inpage meiN likh ker share kiya karaiN..... hum design kerwa saktay heiN.... aur phir ye poetry hamaray doosray designs k saath millions of users ko mail huwa karay gi....
__________________ I am a hardworker, I hardly work  |
|
#3
03-06-2007, 03:16 AM
| |||||
| |||||
Quote:
aapkii taHreer paRh kar be-Had Khushii huii k kisii baa-zauq hastii ne apnii tavajjo dii. shukria. pasandeedgii ke liye bahot bahot shukria. janaab vo puraane log the jo gumnaamii kii zindagii guzaar gaye aur peechhe besh-bahaa Khazeena chhoR gaye taa k ham usse kuchh sabaq Haasil kar sakeN...isii niyat se maiN ne unkaa kalaam is taKhtii-e-paiGhaam par pesh karne kii jasaarat kii. aapkaa mashwarah sar aaNkhoN par...bas, ek mushkil yehii hai k mujhe inpage par na hii likhnaa aataa hai aur na hii mere paas inpage hai. aapkii offer yaqeenan qaabil-e-sataaish hai aur mujhe bahot Khushii hogii agar aap is silsele meN merii kuchh madad kar sakeN...maiN unkaa pooraa masavvada aapkii site par chaspaaN karne ke liye ba_Khushi raazii huuN agar aap marHoom kii shaa'iri ke liye koii mustqail jagah 'ataa farmaa deN...ai'n navaazish hogii aapkii. ji zaroor...maiN insha Allah waqtan fa waqtan unkaa kalaam yaahN chaspaan kartaa rahuuNgaa taa k baa-zauq aHbaab kii nazar se guzar sake. shukria ek baar phir aapkaa  faqat Khaadim-e-urdu, _______Hashmat |
|
#4
10-16-2007, 05:23 PM
| |||||
| |||||
nice sharing!!!!!!!!!
__________________  |
 |
| Tags |
| saaqii_naamaby, ali, usmani, vaalid, marhoom |
| Thread Tools | |
| |
Saaqii_Naama...by Ali Z Usmani [mere vaalid marHoom] 
TOTW/F/M Award(s): 1
