Aey waqt kuch der ko teher ja
Meray kuch udhooray kaam baqi hain..
Bistar ki shikan usi tarah pari hai,
durust kar luon...
Meri kitab khuli reh gai hai,
safha palat gaya hai,
shayad hava chali thi,
mein band kar luon...
Raat mitti ka it but banaya tha,
uss k lab abhi silay huay hain,
zara si lakeer dalnay ki der hai,
kuch der phir uss say baatain kar luon
Ye tasweer yahin pari hai,
main ne to phar di thi,
iss ka bhi bandobast kar luon...
Teher, sunn, koi bansuri bajata hai,
kisi k dil ko chot lagi hai,
main marham rakh duon...
Ab chal magar aey waqt zara sanmbhal kar,
meray haathon mein ab vo haath nahi,
jin k saharay mein nay chalna seekha tha,
abhi hi kahin mujh se bichray hain,
Ab chalti to hun magar dekh
mujhay girnay mat dena,
mujhay sahara de dena,
Haan ab chal...............