Read this beautiful piece by Saifuddin Saif:
-----------------------------------------

jab tere shahar se guzarta huun
******************** ****

dil bhi karta hai yaad chhup ke tujhe
naam leti nahin zubaan tera

ye bhi nahin mujhe maaluum
kis mohalle mein hai makaan tera
kaun si shaaKh-e-gul pe raqsaan hai
rashk-e-firdaus aashiyaan tera
jaane kin vaadiyon mein theharaa hai
Girat-e-husn kaaravaan tera
kis se puuchhunga main khabar teri
kaun batalaayega nishaan tera

teri rusvaaiiyon se darta huun
jab tere shahar se guzarta huun

haal-e-dil bhi na kah saka gar che
tuu rahi muddaton qariib mere
kuchh teri azmaton ka dar bhi tha
kuchh khayaalaat the ajiib mere
aaKhir kaar vo ghadi aai
baar-e-dar ho gaye raqiib mere
tuu mujhe chhod ke chali bhi gai
Khair qismat meri naseeb mere

ab main kyon tujh se pyaar karta huun
jab tere shahar se guzarataa huun

vo zamaanaa teri muhabbat kaa
ek bhuli hui kahani hai
tere kooche mein umar bhar na gaye
sari duniya ki Khaak chhaani hai
lazzat-e-qarb ho ke zakhm-e-firaaq
jo bhi hai teri meharbaani hai
kis tamanna se tujh ko chaahaa tha
kis muhabbat se haar maani hai

apani kismat pe naaz karata huun
jab tere shahar se guzarta huun