TANHAI
sakoot e shab hai
tanhai hai
lekin aisi tanhai
ke jis me goonjti rahti hain saari ankahi baaten
jo dil me shor to karti hain lekin
kah nahi paatay
kisi ke door jaatay paaon ki halki si woh aahat
kabhi patton ki khad khad mein
kisi ke lautnay ka shaq
kabhi beetay palon ki goonj
kabhi madham si sargoshi
kabhi apnay hi andar chal rahi aandhi ki aawaazain
sakoot e shab hai
tanhai hai
lekin aisi tanhai
ke jaisay door tak phaila ho
aawaazon ka ik jangal