Mein yaadon ke mizaar per

ik jalte bujhte deep ki manand

timtima rah hoon

yeh jante hoe bhi

keh

hawa ka ik tez jhonka

mujhay bhi ik yaad bana kar

gujar jay ga

phir bhi mein

jale ja rah hoon.


Aati jati sanson ki

jaise chah nah ho

saans aay nah aay

uss ki parwah nah ho

aisa

saans laine ka

gunnah

kiye jaa rah hoon.

Jaise gamzan ho

ajnabi raston

ka rahi azal se

naa ashnaa

apni manzil se

Aise hi andekhi

musafton per

mein akela

chale ja rah hoon.