Jigar Muraad Aabadi aor Urdu Ghazal!

**TariqRaheel** · #1 06-30-2007, 07:41 AM

Jigar Muraad Aabadi aor Urdu Ghazal!

kaha jata hai keh she'ir kee zindagee meN zamanah us kee qadr naheeN karta aor us ke pewand-e-khaak ho jane par use kheeraaj-e-teHseen pesh kiya jata hai. lekin Raee'is-ul-muttaGhazzaleen HaZ^rat Jigar Muraad Aabadi kee qadr-o-manzilat un kee zindagee meN hee kee jane lagee th~ee.

beesweeN Sadee ee'swee meN sab se zeyadah Qubool-e-a'aam Jigar saHib ke HiSSah meN aaya. aap ka Halqah-e-shuhrat GaonDe ya Muraad Aabaad ke gird-o-nawaaH tak hee meHdood nah th~a. balkeh Dh~akah se le kar Lahor aor Lakh~naw se Madraas aor Mumbaee tak aap ko yaksaaN maqbuliyat HaSil th~ee.

dekh~a jae to aap ne Ghazal ke sewa kisee aor Sinf meN koee khaaS t^aba' naheeN aazmaee. nah hee adab bara-e-adab ke maasa'il se uljh~e aor nah hee adab bara-e-zindagee kee uljh~anooN se do chaar huwe. aor nah hee apnee sukhun gaoee ko kisee teHreek ya naz^ariyah se ham Aahang karne kee koshish kee. baa eeN hamah! Hind-o-paak meN kiya khaaS aor kiyaa a'aam sab meN aap ka charchah aor shuhra th~a.

zamanah ne qubuliyat ka taaj Jigar SaHib ke sar peh rakh~a aor Jigar SaHib se be panah muHabbat kee. Jigar SaHib kee is maqbuliyat ke kaee asbaab haiN. jis kee badaolat Urdu Ghazal ko shaan bh~ee buland huee. jin meN se chand zael meN darj kiye jaa rahe haiN.

Jigar SaHib aek milanlsaar, be takalluf, aor t^aba'a" insaan daost insaan th~e. apne milne walooN kee dil juee aor imdaad se kabh~ee haath~ nah kh~enchte. nit naeY daost banate aor purane daostooN ko hameshah yaad rakh~te. in wajuhaat kee badaolat khaaS-o-a'aam donooN hee aap se mil kar dil khush kar lete. aor yeh bh~ee Haqeeqat Dh~akee ch~upee naheeN keh woh aap kee shae'iree se zeyadah aap kee insaan daostee par jaan ch~iRakte. khud kehte haiN.

"Jigar kee hai zindagee muHabbat naheeN hai us ko kisee se nafrat
Jigar ke dil meN hai sab kee i'zzat Jigar hai yaroN ka yaar ab bh~ee"

Aap apne ma'aaSir Ghazal gao shu'raa' meN zeyadah a'aam fehem, hejaan parwar, zood acar, rangeen aor dilkash asha'aar kehte. aor us par aap ke she'er paRh~ne ka andaaz bh~ee saaHiranah th~aa. saamae'een par gaoya aek jadu saa t^aree ho jata th~aa. asha'aar kee sadagee ke baae'ic aap kee GhazalooN se lut^f andooz hona deegar shua'raa' ke muqabilah meN aasaan th~aa. aap kee meHfil se jo ek baar uTh~taa woh barsooN Jigar SaHib kee shakhSiyat aor aap kee shae'iree ko yaad rakh~taa.

aap ne maoseeqee kee leHnooN, alfaaz^ ke zer-o-bam radeef aor Qawafee ke Aahang ka eHsaas ko nah Sirf baRh~a diya th~aa balkeh us meN shiddat paedah kar dee th~ee. maoseeqee ko rooH kee GHiza kaha jata hai. is Hawalah se Jigar SaHib ko maoseeqee se azlee muHabbat th~ee. yahee wajah th~ee keh aap sharaab tark kar sakte th~e jaesaa keh aap ne apnee aakhree u'mr meN kar dee th~ee. lekin gungunaae baGhaer aap nah reh sakte th~e. aap bazm-e-she'er-o-adab meN gungunate huwe dakhil hote th~e aor jh~oomte huwe nikalte th~e. aap ke nazdeek she'er khuwaane aor she'er gaoee do mukhtalif cheezeeN nah th~eeN.

Aap jitne zaoq aor shaoq se she'er kehte itne hee shaoq se mushae'irooN meN aakar paRh~te. yahee wajah th~ee keh Jigar SaHib aor mushae'ire ham ma'anee hee kheyaal kiye jate th~e. aap ke barah meN mashhoor hai keh jahaaN Jigar SaHib wahaaN mushae'irah aor jahaaN mushae'irah wahaaN Jigar SaHib.

Aap mushae'irooN meN khaaS andaaz se samaaN bandh~te keh sunne wale khud par qabu nah rakh~ pate aor bad mast hone lagte. aap naojawaan shua'araa ko sunte aor dil kh~ool kar daad dete gh~anTooN un ke kalaam par sar dh~unte kabh~ee kabh~ee to khush gulu naojawaan shae'irooN kee aek Toolee aap ke saath~ saath~ rehtee. pehle to aap un kee GhazleeN sunte aor raftah raftah khud bh~ee mooD meN aate. aor is kaefiyat meN jab she'er kehte to HaZ^areen-e-meHfil ke dil-o-dimaaGh par Sirf Jigar SaHib aor Jigar SaHib kee shae'iree ke siwaa kuch~ nah hotaa.

aek t^araf insaan daostee aor dusree t^araf sadah usloob-e-shae'iree kee badaolat raftah raftah aap a'wwaam ke dilooN meN gh~ar kar gae. logooN ko Jigar SaHib meN aek hamdard insaan aor shafeeq daost mil geyaa th~aa. in hee khubiyooN kee badalat Jigar SaHib logooN ke dilooN par raaj karne lage. aor aap ko aap ke chahane walooN ne seene se laga liya.

jin aoSaaf-e-Hameedah kee janib raqim-ul-sut^oor ne isharah kiya hai. nihayat aham kheyaal kiye jane ka laae'iq haiN. aap ne in aoSaaf kee madad se Urdu aor Urdu shae'iree kee baRee imdaad kee. aor yooN Urdu kee abru barqaraar rahee. warnah Maolana Hali ne Naasikh aor talaamzah-e-Naasikh ke rang-o-Aahang ko dekh~te huwe Ghazal ke khilaaf jo aawaaz buland kee th~ee woh aor jis se Ghazal ka wujood hee khat^rah meN paR geyaa th~aa. aor ba'ad meN A'zmat Ullah Khan aor Josh SaHib jo keh Ghazal kee gardan Zadanee ke liye maedaan meN nikal paRe th~e. agar us waqt Ghazal Jigar SaHib ke hath~ooN a'wwaam kee panah meN nah aatee to a'aen mumkin th~aa keh be gunaah hee maaree jatee. aor agar bach bh~ee rehtee to aaj jis shakl meN Ghazal apnee aabru bachaeY huwe hai. aesee Halat meN nah hotee.

1930 ke ba'd jadeed Ghazal kee shakl meN jo t^ufaan aaya. us kee tund hawa Ghazal ko khas-o-khaashaak kee t^arH uRaa le jana chahatee th~ee. lekin Jigar SaHib ne apnee sadah aor pur kaef Ghazal gao kee badaolat mazaaq-e-jamhoor ka samaan muhaiyaa kar ke baRaa eHsaan kiya. aap ne barwaqt Ghazal ko is sael-e-taGhaeyur se nijaat dilaa dee. agar aap barwaqt is ka ehtemaam nah karte to yeh baat baRe yaqeen se kahee ja saktee hai. keh us waqt ke naabGhah-e-ruzgaar ASGhar, Fani, Seemab, Hasrat, Yaganah, aor Raz waGhaerah kee khuwaaS pasand Ghazal bh~ee khat^re meN paR jaatee. in Haalaat meN jigar SaHib kee adabee kawishooN se inkaar naheeN kiya jaa saktaa.

Jigar SaHib ke kalaam meN maoZ^oo' kee fusurdagee-o-takraar aor kheyaalaat kee yaksaniyat ke hote huwe bh~ee lut^f aor acar barqaraar rehtaa hai. aap kee haaN bohot kam yeh eHsaas milta hai keh kisee khaaS jazbah yaa kaefiyat ko qalam band karne ke liye t^abiyat par zaor de kar qaafiyah pemaee kee gaee hai. yaa kisee khaaS kheyaal ko nazm karne ke liye alfaaz^-o-kheyaal ko kisee khaaS samt maoRaa jaa raha hai. har miSra' aor har she'er jazbah kee shiddat se be saakhtah aaya hai. aor dilpazeeree aor dilkashee se khalee naheeN aaya. Jigar SaHib ko qafiyah kee madad se she'er nikaalne ka fan kabh~ee nah aayaa th~aa. aap is qism ke :mutshaae'irooN: ko kaareegaraan-e-she'er kehte th~e. aap farmate haiN.

"kaareegaraan-e-she'er seY puch~e koee Jigar
sab kuch~ to hai magar yeh kamee kiyoN acar meN hai"

Aap ke kalaam meN agarcheh woh hamah geeree naheeN jo aap ke ma'aSir Ghazal gao shua'ara' ka t^urrah-e-imteyaaz raha. aap kee shae'iree ka meHwar aap ke ham zamanah shua'araa' se mukhtalif nah th~aa. andaaz aor acaraat ke leHaaz^ se aap kee raah ASGhar, Faani, aor Hasrat, se alag Z^aroor ho gaee hai.

Jigar SaHib ASGhar GhaonDawi ke e'qeedat mandooN meN se th~eY. aap ne ASGhar kee ra'anaae'ee-e-kheyaal, aor nishaat^-e-rooH ka acar bh~ee liya. lekin yeh acar pukhtaa nah ho saka. aap ka meHboob ASGhar ke taSawwuraatee aor takhaiyyulaatee meHboob kee t^arH nah th~aa. balkeh aek seedh~aa sadh~aa isee dunya ka fard th~a. aor isee majaazee duniya se ta'luq rakh~taa th~aa. yoN kehaa jaa saktaa hai keh Jigar SaHib kaa meHboob DaaGh, Maomin, aor Hasrat ke meHboob jaesaa hai. DaaGh ka meHboob chunkeh baazaree meHboob hai is liye us meN balaa kee shukee aor shararat hai. Hasrat bh~ee koee kam shaokh naheeN. Haq beyaanee aor be baaqee Hasrat kee serat ke do aham pehlu haiN.

Jigar SaHib kaa mua'aamlah Hasrat aor DaaGh se mkhlalif hai. aap kee Ghaerat mandaraanah t^abiyat aor kisee qadar ruHaanee zindagee aap kee daastaan-e-Gham ko chaTkhare le kar beyaan karne kee ijazut nah de sakee. aap ke laa ubalee pan ke bawajood aap kee Ghazal meN woh rakh~ rakh~ao jo un kee roozmarrah zindagee meN th~aa usee kee jh~alak miltee hai.

dar junooN az khud nah raftan kaar har deewanah neest!

bayaan-e-Husn meN Husn-e-beyaan aor iz^haar-e-i'shq meN aadaab-e-i'shq aap ko har lamHah a'zeez th~aa. isee t^arH kaar-e-deewaangee meN aap ne paas-e-gareebaaN ko kabh~ee naz^ar andaaz nah kiyaa. yahee wajah hai keh aap kee shae'iree kee fiZ^aa Ghaer sangeedah nah hone paee.

aap kee zindagee masaae'il se do chaar rahee. lekin aap

aoz-e-pihaanee: ke baawajood hameshah muskuraate rahe. aor yeh muskurahaT raaz-e-nihaanee ko ch~upane ke siwa aor kuch~ nah th~ee. farmate haiN.

kisee Surat numood-e-saoz-e-pihanee naheeN jatee
bujh~aa jataa hai dil chehre kee tabanee naheeN jatee!

Sanjeedagee hazaar ho Gham se mufar naheeN
daryaa usee meN band hai jo aaNkh~ tar naheeN!

mua'aamlaat-e-i'shq-o-Husn ko yaa Hadicaat-e-Zindagee ko ch~upaa kar rakh~ne. aor khaarijiyat ko daakhliyat meN samo kar romaan banaa dene kee koshish aap ko ASGHar aor Hasrat ke andaaz-e-Ghazal se judaa kartee hai. Haqeeqat to yeh hai keh Jigar SaHib ne bh~ee Mir kee t^arH she'er ko sukhan kaa pardah banaya diyaa th~aa.
aor yahee un kaa fan qaraar payaa.

farq Sirf itnaa hai keh Mir ka kalam yaksar mayoosee aor naakamee kaa shadeed radd-e-a'amal hai. aor Jigar SaHib kee shae'iree kaamranee ummeed-e-fardaa aor takmeel-e-shaoq ke shadeed aHsaas ka maAaal aor HaSil hai. Mir khud apne deewaan ke barah meN kehte haiN. keh yeh hazaar GhamooN aor takaaleef ka majmua'ah hai. jabkeh Jigar SaHib ke haaN HaoSlah mandaanah raaz-o-neyaaz khush aae'eend aarzueeN aor ummeed-e-fardaa ka eHsaas apnee puree shiddat ke saath~ parwaan ch~aRh~aa huwaa hai. farmate haiN.

meraa kamaal-e-she'er bas itna hai aeY Jigar
Woh mujh~ peh ch~aa gaeY maiN zamane peh ch~aa geya!

Jigar SaHib ne kamaal-e-she'er ko yaheeN meHdood kar diya aor is kaa aek manfee acar yeh huwaa keh aap ka Halqah-e-acar Mir ke muqaablah meN meHdood ho geyaa.
Mir ne Gham-e-jaanaaN aor Gham-e-ruzgaar ko baham digar yooN marboot^ kar diya hai. keh ab unheeN judaa karnaa Ghaer mumkin hai. isee imtezaaj ne Mir kee shae'iree ka daae'irah bohot ph~elaa diyaa hai. aor itnaa keh Jigar SaHib us meN gum ho sakte haiN.

Jigar SaHib kee shae'ree Mir kee shae'iree kee t^arH fikr-o-jazbah kee khubSurat aamezish kee shae'iree naheeN. is meN fikree a'nSar kam hai. hejaan aor dilkashee bh~ee hai. lekin woh rea'anaaee-e-fikr aor woh ma'anawee tehdaaree jo Mir-o-ASGhar ke kalaam ka aa'jaaz hai. aor jise Aafaaqee shae'iree kaa t^urrah-e-imteyaaz qaraar diyaa jataa hai. jigar SaHib ke haaN naheeN miltee.

Jigar SaHib kee nawaa-e-a'aashiqanah Maomin se miltee jultee hai. donooN ka meHboob pardah nasheeN hai. donooN meN farq Sirf yeh hai keh Maomin Jigar kee t^arH Husn parast naheeN haiN. jabkeh Jigar darbaar-e-Husn meN faora" sar-e-tasleem kham kar lete naz^ar aate haiN. Jigar SaHib ko jitnaa aa'temaad apne i'shq par hai utnaa hee meHbob ke Husn-o-jamaal par hai. aap meHboob kee z^aheree barhamee se Aazurdah khat^air naheN hote. yahee wajah hai keh yaqeen kee aesee sargoshiyaaN Jigar SaHib ke kalam meN jaa bajaa miltee haiN.

aap kee shae'iree meN mayusee aor naamuradee ne kabh~ee Ghalebah naheeN payaa. aap maZ^ee ke talkh tajrbaat se mustaqbil kee raah ko hamwaar karte rahe. jazbah , shaadabee, Husn-o-i'shq aor umang aap kee shae'iree ke aoSaaf haiN. aap ke aa'temaad ka a'alam dekh~iye. farmate haiN.

Husn ko bh~ee kahaaN naSeeb jigar
woh jo ek shah miree nigaah meN hai!

aap ka mazaaq-e-a'aashqee dusre shae'irooN se kitnaa mukhtalif hai. is kaa andazah is she'er se lagaya jaa saktaa hai. aap ne tamaam u'mr isee kheyaal aor yaqeen se guzaar dee keh.

"wah apne dil ko hazaar rokeeN miree muhabbat ko kiyaa kareeN ge"

yeh baat baRe yaqeen se kahee jaa saktee hai keh beesweeN Sadee ke mumtaaz shae'ir kee Haeciyat se Jigar SaHib kee maqbuliyat ke imkaanaat hameshah raoshan aor taabindah raheeN ge.

Reguards;
Muhammad Tariq Raheel

**aakashjee** · #2 07-02-2007, 10:24 AM

Buhat khooob .....