Urdu Poetry Forum

Tum isi tarha hum sey jo barhum rahey, rukh hawaoo.n k dekho badal jain gai
zindagi ki baharain guzar jain gi, aur ye lamhey fasanoo.n main dhal jain gai

aap sey hum ko beshak bohat uns hay, hum magar apne pindaar ko kya karain
apni toheen hum ko gawara nahi, aap badley tu hum bhi badal jain gai

aap honto.n ko junbish ki zehmat tu dain, kum sey kum dill ko taskeen ho jay gi
hum mizajan barey sada dill log hain, jhoote wadoo.n sey hum bhi behal jain gai

hum-safar yoon tu apney bhi kuch kum nahi, aur ba-zahir sabhi ahl-e ikhlaas hain
lekin unjaan logoo.n ka kya theek hay, waqt k saath ye bhi badal jain gai

saath khana kharaboo.n ka acha nahi, aap Lil'lah wapis chaley jain jaeye
is bayaa.n ki tapti hoi rait per, aap k phool sey paaoo.n jal jain gai

waqt ki ro' bohat taiz hay dostoo.n, ik zara aankh jhapki agar rah main
shouq-e manzil ghubaroo.n main kho jay ga, aur manzil k taiwer badal jain gai

baat pehley jahan thi waheen hay abhi, aur ab bhi kaha ja raha hay yehi
subha ho jay gi, din nikal aay ga, aur ye pehrey undhairoo.n k tal jain gai
+