belous mohabbat ki hum nay ye saza paai
ghairoo.n main bhi ruswaai, apnoo.n main bhi ruswaai

Allah rey yadoo.n ki ye mojaza farmaaii
hansta howa ghum khana, mehki hoi tanhaaii

maazi k dhundal-koo.n sey ye kis ki sada aai
mahoul ki rug rug main babjne lagi shehnaaii

naghmoo.n ki kiran phooti, makhmoor nigahoo.n sey
lo dene lagey lamhey, li waqt nay angraaii

kuch talkh haqaiq nay mamool badal daley
apnoo.n sey kum amaizi, ghairoo.n sey shanasaaii

ye koun sa alam hay afsurda mizaaji ka
gulshan main bhi weeraanii, mehfil main bhi tanhaaii

gulshan ki baharoo.n main shamil hay lahu jin ka
wo log hain gulshan main, ab sirf tamashaaii

afsuda charaghoo.n ki ashkoo.n nay jaga ley li
qismat sey talaafi ki ik shakl nikal aaii

Iqbaal jidher dekho zulmaat k pehrey hain
asaa.n talabi hum ko kis mor pe lay aaii

.
.
.
.
.