ye meri ana ki shikast hay, na dawa karo na dua karo
jo karo tu bas ye karam karo, mujhe merey haal pe chor do

wo jo aik tarkash-e waqt hay abhi us main teer bohat sey hain
koi teer tum ko na aa lagey, merey zakhm-e dill pe na yoon hanso

na main kohkan hoon, na Qais hon, mujhe apni jaan aziz hay
mujhe tark-e ishq qobool hay, jo tumhain yaqeen-e wafa na ho

jo tumhaarey dill main shokook hain tu ye eh'd name fozool hain
jo merey khotoot hain phaar do, ye tumhaari khat hain samait lo

jo kisi ko koi sataay ga tu gila bhi hontoo.n pe aay ga
ye tu ik osool ki baat hay, jo khafa hay mujh sey koi tu ho

mujhe abb sadaoo.n sey kaam hay, mujhe khaal-o khad ki khaber nahi
tu phir is farib sey faida ye naqaab abb tu utaar do

mujhe apney fuq'r pe naaz hay, mujhe is karam ki talab nahi
main gada nahi hon faqeer hon, ye karam gadaoo.n main bant do

ye faqat tumhaarey sawal ka mera mukhtasar sa jawaab hay
ye gila nahi hay, kholoos hay, meri guftugu ka asar na lo

ye udh'horey chand ki chandni bhi undh'hairi raat main kum nahi
kahee.n ye bhi saath na chor dey, abhi roshni hay chaley chalo