Urdu Poetry Forum

raat bhii niind bhii kahaanii bhii
haaye kyaa chiiz hai javaanii bhii

ek paiGaam-e-zindaganii bhii
aashiqii marg-e-naagahaanii bhii

is adaa kaa terii javaab nahiin
meharabanii bhii saragaraanii bhii

dil ko apane bhii Gam the duniyaa mein
kuchh balaayen thii aasmaanii bhii

mansab-e-dil Khushii luTaataa hai
Gam-e-pinhaaN bhii paasabaanii bhii

dil ko sholon se karatii hai sairaab
zindagii aag bhii hai paanii bhii

shaad-kaamon ko ye nahiin taufiiq
dil-e-Gamagiin kii shaadamaanii bhii

laakh husn-e-yaqiin se baDakar hai
in nigaaho.n kii badagumaanii bhii

ta.nganaa-e-dil-e-malaal mein hai
behr-e-hastii kii bekaraanii bhii

ishq-e-naakaam kii hai parachhaa_ii
shaadamaanii bhii kaamaraanii bhii

dekh dil ke nigaar-Khaane me.n
zaKhm-e-piinhaaN kii hai nishaanii bhii

Khalq kyaa-kyaa mujhe nahiin kahatii
kuchh sunuuN main terii zabaanii bhii

aaye taariiKh-e-ishq mein sau baar
maut ke daur-daramiyaanii bhii

apanii maasuumiyon ke parde mein
ho ga_ii vo nazar sayaanii bhii

din ko suuraj-mukhii hai vo naugul
raat ko vo hai raat-raanii bhii

dil-e-badanaam tere baare mein
log kahate hain ik kahaanii bhii

nazm karate ko_ii na_ii duniyaa
ki ye duniyaa hu_ii puraanii bhii

dil ko aadaab-e-bandagii bhii na aaye
kar gaye log hukmaraanii bhii

jaur-e-kam-kam kaa shukriyaa bas hai
aap kii itanii meharabaanii bhii

dil mein ik huuk bhii uThe ai dost
yaad aa_ii terii javaanii bhii

sar se paa tak sapurdagii kii adaa
ek andaaz-e-turkamaanii bhii

paas rahanaa kisii kaa raat kii raat
mehamaanii bhii mezabaanii bhii

jo na aks-e-jabiin-e-naaz ki hai
dil mein ik nuur-e-kahakashaanii bhii

zindagii ain diid-e-yaar "Firaq"
zindagii hijr kii kahaanii bhii


(firaq gorakhpori)

__________________
Ek Dafaa
Woh Mujh Se Lipat Ker
Kisi Doosrey Shakhs Ke Gham Main
Phoot Phoot Royee Thi

__________________

bohat khooob.
keep sharing.

__________________

very long but nice choice keep it up

__________________

najanay kon duaaon mein yaad karta hay
mein dobta hon, samndar uchal deta hay ...!!

nice...............

__________________