Teri Baatain Hi Sunaaney Aaye
Dost Bhi Dil Hi Dukhaaney Aaye
Phool Khiltey Hain To Hum Sochtey Hain
Terey Aaney Ke Zamaaney Aaye
Aisi Kuch Chup Si Lagi Hai Jaisey
Hum Tujhey Haal Sunaaney Aaye
Ishq Tanha Hai Sar-e-Manzil-e-Gham
Kon Ye Bojh Uthaaney Aaye
Ajnabi Dost Humain Dekh Ke Hum
Kuch Tujhey Yaad Dilaaney Aaye
Ab To Roney Se Bhi Dil Dukhta Hai
Shaayed Ab Hosh Thikaaney Aaye
Kiya Kaheen Phir Koi Basti Ujrhi
Log Kiyon Jashn Manaaney Aaye
So Raho Maut Ke Pehloo Mein Faraz
Neend Kis Waqt Na Jaaney Aaye
Ahmed Faraz