Aatay Jaatey Chehrey Takta Rehta Hoon
Din Bhar Khuli Kitaabein Parhta Rehta Hoon
Ghar Ki Tanhai Ka Khayal Darata Hai
Younhi Baazaaron Mein Phirta Rehta Hoon
Kisay Khabar Hai Kaun See Deed Ho Aakhri Deed
Her Ik Cheez Ko Gaur Say Takta Rehta Hoon
Logon Say Takraar Bohat He Mehngi Pari
Apnay Aap Say Bhi Ab Larta Rehta Hoon
Neend He To Aafiyat Ka Ik Gosha Hai
Aksar Dupehron Tak Sota Rehta Hoon
Phelti Lehrein Dil Ko Achi Lagti Hain
Taalaabon Mein Pathar Phainkta Rehta Hoon
Kis Mein Himmat Hai Jo Sachi Baat Suney
Sachi Sochta, Jhooti Kehta Rehta Hoon
Dekhta Hoon Ik Lamhe Ko Aaina Magar
Kya Yeh Mein Tha Pehron Sochta Rehta Hoon
Her Ik Lamhey Ka Hai Apna Qarz "Riaz"
Mein Lamhon Ka Qarz Chukata Rehta Hoon....