ik sazaa aur asiiro.n ko sunaa dii jaaye
yaanii ab jurm-e-asiire kii sazaa dii jaaye
usakii Khvaahish hai k ab log na royain na hasyain
behisii vaqt kii aavaaz banaa dii jaaye
dasht-e-naadiidaa kii tahaqiiq zaruurii hai magar
pahale jo aag lagii hai vo bujhaa dii jaaye
sirf jalanaa hii nahii hamako bha.Dakanaa bhii hai
ishq kii aag ko laazim hai havaa dii jaaye
sirf suuraj kaa nikalanaa hai agar subah to phir
ik shab aur merii shab se milaa dii jaaye
aur ik taazaa sitam usane kiyaa ijaad
usako is baar zaraa khul ke duaa dii jaaye