Ankho me raha dil me utar kar nahi dekha
kashti ke musafir ne samandar nahi dekha
Bewaqt agar jaunga sab chaunk padenge
ek umr huyi din me kabhi ghar nahi dekha
Jis din se chala hun meri manzil pe nazar hai
ankho ne kabhi meel ka patthar nahi dekha
ye phool mujhe koi wirasat me mile hain
tumne mera kanto bhara bistar nahi dekha
Yaaro ki mohabbat ka yaqeen kar liya maine
phoolon me chhupaya hua khanjar nahi dekha
Mehboob ka ghar ho ya buzurgon ki zameene
jo chhod diya phir use mud kar nahi dekha
Khat aisa likha hai ke nageene se jade hain
un haathon ne lekin koi zevar nahi dekha
"Patthar mujhe kehta hai mera chahne wala
mai mom hun usne mujhe chhu kar nahi dekha"
Woh mere masayil ko samajh hi nahi sakta jis ne meri ankhon me samandar nahi dekha 