Ghazaal-e-shouq ki wehshat ajab thi
kissi khush chashm se nisbat ajab thi
Hujoom chashm-o-rukhsar-o-dahn main
Jo tanha kar gai soorat ajab thi
Woh tardeed-e-wafa to kar raha tha
magar us shakhs ki halat ajab thi
Meri taqdeer ki nairangion main
Meri tadbeer ki shirkat ajab thi
Sar-e-maqtal kissi ke perahn main
Gulabi rang ki hiddat ajab thi
Badan ka pehlay pehlay aag chakhna
Rag-o-pe main koi lazzat ajab thi