aaj phir sataaye gi raat pooray chaand ki
dar ba dar phiraaye gi raat pooray chaand ki

baam-o-dar ki qaid main rooh pharpharaaye gi
wehshatain barrhaaye gi raat pooray chaand ki

jis taraf mein jaaun ga meray saaye ki tarah
meray saath jaaye gi raat pooray chaand ki

ye samandari hawaa, us pe qurb ka nasha
kitnay zulm dhaaye gi raat pooray chaand ki

aisa lag raha hai ab, too agar bicchar gayaa
laut ker na aaye gi raat pooray chaand ki

qumqamo'n k shehr main apni apni seaj par
subah tak jagaaye gi raat pooray chaand ki

aaj hi se chorr de mera haath warna phir
umr bhar rulaaye gi raat pooray chaand ki