 Kia batla’ain kya kya dekha | |
Ab kay safar main, tishna-labi main kia batla’ain kya kya dekha
Sehra’on ki pyas bujhaatay darya’on ko pyaasa dekha
Shayad wo bhi sard ruton kay chand si qismat laya ho ga
Sheher ki bheer main aksar jis ko hum nay tanha tanha dekha
Chara-garon ki qaid say chootay, tabeerain sub raakh hueen
Ab kay dil main dard wo utra, ab kay khwab hi aisa dekha
Dard ka tajir baant raha tha galiyon main majrooh tabassum
Dil ki choat koi kia janay, zakhm ko aankh main gehra dekha
Jis kay liye badnaam huay hum, aap to us say mil ker aaye
Aap nay us ko kaisa paya, aap nay us ko kaisa dekha
Kaisa shakhs tha zard ruton ki bheer main jub bhi saamnay aaya
Us ko dhoop sa khilta paya, us ko phool sa khilta dekha
Abr ki chadar taan kay jheel main saaton rang rachanay utra
Moaj-e-aab ki teh main janay chand nay kis ka chehra dekha
Teray baad hamaray haal ki her rut aap gawahi day gee
Her mausam main apni aank main aik hi dard ka saya dekha
Mohsin band kiwaar kay peechay chhup rahi hai sehmi shum’ain
Jesay umr kay baad hawa nay meray ghar ka rasta dekha
__________________ HIJR WALON SAY BARI DAIR SAY SEEKHA HUM NA
 ZINDA REHNAY KAY LIYE JAAN SAY GUZARTAY REHNA |