dil main phir dard huwa der talak
na mili is ko dawa der talak

mein ne khushbu ki haqeeqat poochi
phool khaamosh raha der talak

tum ne to sirf suna hi ho ga
mein ne jo dard sahaa der talak

shab ko phir mein ne sulagtaa paya
mann ka khaamosh diya der talak

us ne kuch aur kaha tha shaayed
mein ne kuch aur suna der talak

us ne poocha k mujhe yaad kiya?
mein ne tab hans k kaha der talak

jaanay waal nahi ik pal bhi ruka
aks aankhon main raha der talak

maslehat reh gaee honton pe BATOOL
rooh main shor machaa der talak