Apney Humraah Jo Aatey Ho Idhar Se Pehley
Dasht Parhta Hai MiyaaN Ishq Mein Ghar Se Pehley

Chal Diye Uth Ke Soo-e-Shehr-e-Wafa Koo-e-Habeeb
Pooch Lena Tha Kisi Khaak Basar Se Pehley

Ishq Pehley Bhi Kiya, Hijr Ka Gham Bhi Dekha
Itney Tarhpey Hain, Na Ghabraaye Na Tarsey Pehley

Jee Behalta Hi Nahee Ab Koyi Saa'at Koyi Pal
Raat Dhalti Hi Nahee Chaar Pehar Se Pehley

Hum Kisi Dar Pe Na Thithkey Na Kaheen Dastak Di
SeNkarhoN Dar They Meri JaaN Terey Dar Se Pehley

Chaand Se Aankh Mili Jee Ka Ujaala Jaaga
Hum Ko So Baar Hoyi Subah Sehr Se Pehley


Ibn-e-Insha

__________________
@};- Please update your Signature : Administrator HallaGulla