dil ki dehleez pe dastak si hui pichhle pehr
phir kisi yaad ki baraat chali pichhle pehr
us pari-wish ko to bhooley huwe umrein beeteen
kyun in aankhon se meri neend uri pichhle pehr
qatra maanga tha merey rab ney samandar bakhsha
girya zari mein woh taseer ghuli pichhle pehr
yeh jo bikhra hua,tanha sa nazar aata hai
is ko mehsoos hui teri kami pichhle pehr
tu jo aata to merey ghar mein charaghaan hota
shehr-e-weeran mein faqat raakh uri pichhle pehr
phir tasawwur mein tera waqt-e-judai thehra
aankh mein holey sey dar aai nami pichhle pehr