Qalam ne likhkha
ke chahatein mustaqil nahin hain
kahbi jo apney thay ghair hain woh
badal rahi hai dayaar apney
yeh zindagi bhi mayaar paney
Qalam ney likhkha
ke aik doojey pe marney waley
ab aik doojey ko martey hain
yeh nafraton ka ajab jahan hai
kaheen bhi ulfat ka aashiyaan hai?
Qalam ney likhkha
Ana ke qaidi bhi muztarib hain
luta ke sari muhabbatein bhi
ganwa ke sari rafaqatein bhi
karein gey matam to kya miley ga...
Qalam ney likhkha
har aik lafz is ka mutabir hai
yeh maslihat se na Aashna hai
isi sey sachchaii ki baqa hai
magar jo sach hai, badal raha hai
qalam bhi aatish mein jal raha hai
qalam na likhkhey ga ab ke kuchh bhi
ke iski hurmat nahin hai baqi
qalam ke likhkhey ko parhney walo
barho bhi aagey, qalam bachalo