Urdu Poetry Forum

**Ankaboot** · #1 01-23-2005, 12:30 PM

A1. Mera naam = Aamir Javaid�DOB = 7 August 1978�Jaye Paidaish = Sialkot

A2. Mera naam to mere Taya gi ne rakha aur apne name ke meaning /thinking nahi pata.

A3. Shadi ke baray mein jald hi aap ko khabaar doon ga

A4. Ghar mein Ammi hein and we are 4 brothers and 3 sisters aur mein bara hoon apne behan bhaiyoon mein.

A5. Aaj kul Sialkot mein hi reh raha hoon, Basically graduate hoon, saath mein kuch computers aur ISO related courses aur workshops attend ker chukka hoon. Aur aaj kul aik firm mein as an Export Manager job ker raha hoon.

A6. mustakbil mein apna business establish kerna chahta hoon.

A7. Hallagulla to as such yaad nahi, lekin mein websites search kerta hon free time mein to shayad Hallagulla per nazar pari ho gi aur mein ne join ker liya ho ga� Hallagulla se pehle mein aik aur message forum ka member tha, shayad us mein se kisi ne bataya ho ga�I am not sure exactly

A8. Hallagulla mein mein ne zyada ter posting FT mein hi ki, aur doosray sections ko kum visit kiya�wo is liye ke mein bohat zyada posting nahi ker sakta due to time shortage, is liye soocha ke jagah jagah posting kerne se behta he ke kyoon na aik hi section mein reh ker naam banaya jaaye.

A9. Pasandeeda kitaab Quran-e-Paak he, Zyada to nahi perhta lekin jub perhta hoon to tarjma aur tashreeh ke saath perhna pasand kerta hoon. Islami moozoaat per kitaabein perhne ka kafi shook he, is ke ilawa Encyclopedia jo ke mere PC mein installed he usay kafi study kerta hoon, bilkhasoos, science, technology, history, aur geo-political analysis study kerta hoon. Newspaper daily perhta hoon, pasandeeda news paper THE NEWS he. Aur jahan tak Pasandeeda shair aur Adeeb ka taaluq he to frankly speaking mujay adab aur shairi se kuch khaas interest nahi he, kuch shair achay lagtay hein jinhein yaad ker leta hon.

A10. Pasandeeda nazm to koi yaad nahi, Kuch ghazlein hein Anop Jaloota aur Jagjeet Sing ki jo achi lagti hein, aur Fav. Song�Choor Aaye Hum Wo Galiyaan�is ke ilawa Sadiyaan (both are Indian songs), aur haan aaj kul aik album aaya he Lucky Ali ka (Kabi Aisa Lugta he) us ke songs kafi pasand hein.

A11. Hmm pasandeeda jagah jahan her waqt janay ke liye tayaar rehta hoon, I think office ke ilawa koi bhi nahi he�waise yeh mood aur programme pe depend kerta he, dooston ke saath kahin bhi jana pasand kerta hon. Aur duniya goomne ka shook he, Ager kismat mein hua to inshallah zaroor goomon ga.

A.12 Meri nazar mein her mousam ka apna hi charm hota he, Germiyoon mein dooston ke saath outing ka maza aata he, Bersaath mein apne ghar kitchen mein pakooray aur pakwan tyaar kerne ka maza aata he�office se chuti Sunday ko hoti he to Sunday ko cooking ka trend zyada hota he, serdiyoon mein blanket orh ker raat der tak sports channel dekhna aur saath mein coffee peena aur moongphali khaana mamool hota he, mein samajta hoon ke mousam ka mood per aser andaaz hona lazmi si baat he.

A13. Jahan tak libaas ka taaluq he to yeh kehna chahoon ga ke meri job aisi he ke mujay well dressed rehna perta he, Pant Shirt hi pehanta hoon, Dress hameesha neat hota he, aik ya do din hi pehanta hoon, Jeans bhi pehanta hoon, shalwaar kamiz to sirf eid ki namaz ke liye hi pehanta hoon�lekin Sunday ko casual dressing mein hota hoon, half trouser (Gutnoon tak) aur sleeveless shirt mein. Sunday ko sabzi goost wagaira ki shopping bhi isi dressing mein kerta hoon, lekin doston ke saath jub nikalna ho to change ker leta hoon.

A14. Rang to kisi cheez ki munasbat se hi pasand aate hein mujay. Bike hameesha black colour ki hoti he meri�Pant mein blue jeans prefer kerta hoon�kamray ka androoni colour off-white pasand he�aur rooshni ke saathon rang hi achay lagtay hein. Rang ki hamari zindgi mein kya ehmiayat he�Rang hamari zindgi per zaroor aser andaaz hota he, bilhasoos skin ka�aur zyada tar jo larkiyaan fair colour ki hoti hein zyada jazb-e-nazar hoti hein aur jahan tak larkon ke rang ka taaluq he to wo zyada count nahi kerta

A15. mere chahne se lamhay loot nahi aaein ge, ager aisa ho sakta to mein yeh khawahish zaroor kerta ke jo pal mein ne apne Marhoom Doost Shahid (MGBHS) ke saath guzaaray hein, wo loot aaein�bohat yaad kerta hoon apne doost ko aur un lamhaat ko jo us ke sang guzray.
Us lamhay ke intzaar mein hoon, jub mein apna business establish ker loon ga. Mein chahta hoon ke bohat zyada kama ke mein zyada se zyada Halq-e-Khuda ki khidmat ker sakoon, gareeb aur laachaar loogon ko dekh ker dil tarap uthta he.
Aur wo lamha bulaana chahta hoon, jub mere cousin mere doost Shahid ne mere haathon mein dam toora tha, wo lamha bhoolta nahi. Yeh 17 February 2003 ka subhu 10 bajay ka waqt tha�jub mera doost is duniya se rukhsat hua�aap sub se guzaarish he ke Khuda ke hazoor us ki bakhshish ke liye duaa karein�Allah Taalah usay apni Jawar-e-rehmat mein jagah aata fermaye�aamin.

A16. meri zindgi ka khushgawaar hisa wo tha jo mein ne apne doost shahid ke saath guzaara�wo mera cousin tha aur Gujrat ka rehne wala tha, her Saturday night ko wo sialkot aata tha, hum bike pe khoob ghoomtay, masti kerte, outside dinner kerte, saari saari raat jaag ker aik doosray se baatein kerte, Hallagulla kerte, aur pura Sunday saath mein guzaartay, aur phir wo Sunday night ko ya Monday ki morning ko Gujrat chala jata apni job join kerne ke liye�Doosti se bhi zyada hum aapis mein pyaar kerte thay, Hamaray doost, aur sub relative hamein aik JOORI ki surat mein jaantay thay.

A17. Zindgi ka na khushgawaar aur na-kable faramoosh waqeya bhi Shahid ki death ka he, wo Sialkot basant mananay aaya tha aur 16 February 2003 ki raat ko mere ghar se raat 11 bajay wapsi ke liye chala gaya, meri her baat manta tha lekin us din mere kehne pe na ruka aur jatay huay yeh keh gaya ke mein Saturday ko zaroor aaon ga�wo Gujrat pohancha lekin apne ghar na ja saka, kisi ne us per kaartoos ka fire kiya aur kaartoos ke metal elements us ke jism mein saraiyat ker gaye, subhu phone ki ghanti baji, aur yeh buri khabar milli, usi waqt apne aik doost ke saath Aziz Shahid Hospital (Gujrat) pohancha. He was being operated that time. Operation kaamyaab hua, mein medical store se us ke liye kuch medicine lene gaya. Is dooran usay hoosh aa chukka tha aur us aur jub mein wapis aa raha tha to mujay bulanay ke liye mera aik cousin aaya aur kehne laga ke shahid ko hoosh aa gaya he aur tumhein bula raha he, khushi se meeri aankhon se aansu nikal aaye aur mein baag ker shahid ke paas gaya, us ka maatha chooma, usay tasali di�kuch der baad wo kehne laga ke aamir mere pait mein derd ho raha he doctor ko bulao, doctor nahi thay, lekin nurse aai aur kehne lagi ke aisa hota he, gabraanay ki koi baat nahi, mein usay tasali dene laga, lekin wo baar baar kehta raha ke aamir mujay shaded takleef ho rahi he, mera dil gabra raha he, mein on duty nurse ke paas phir gya aur sub bataya aur doctor ki demand ki, doctor mila aur bagair dekhay hi sister ko keh diya ke usay pain killer injection laga do, mein samja shayad injection se kaam theek ho jaye ga, mein ne us ki takleef kum kerne ke liye usay dabana shuru ker diya, us ke haath aur paoon dabaye, wo neend mein chala gaya, mein dabata raha aur aik ward boy aaya aur kehne laga ke patient ko doosray room mein shift kerna he, us ne patient ko stature mein daalne ke liye meri help maangi, jub usay uthaya to bet pe khoon hi khoon tha, aur us ki death ho chuki thi. That was a terrible moment.

A18. Jese jese hamaray Dillon mein yaad-e-Elaahi barhti jaati he, to zindgi kya rooh mein bhi ujaalay bikhar jaatay hein.

A19. Zindgi Khuda ki amanat he, aik din hamein yeh amanat Khuda ko wapis soompni he,

A20. Muhabat aik aisa jazba he jis ke bagair koi insaan na mukamal he.

A21. Khushi milti he to zahir he khush hota hoon aur izhaar Allah ka shuker ada ker ke kerta hoon.

A22.Mere nazdeek doolat, shohrat, muhabat aur izat aisi cheezein hein jin ki zaroorat her shakhas mehsoos kerta he. Doolat itni honi chahiye, ke zarooriyeaat-e-zindgi ba-aasaani puri ho sakein. Shohrat itni ho jis se takabur dimaag ko na choo sakay. Lekin muhabat aur izat to zindgi ki bari zaroorton mein se hein. Zindgi mein yeh doonon cheezein wafar mikdaar mein honi chahiyein.

A23. Mashallah bara naik larka he (akser hamaray khaandan ki ya khaandan ke bahir ki aurton ki taraf se yeh bayaan jaari hota he�lolz)

A24. Jazboon ka izhaar mein aasani se kerta hoon, aur jumloon mein kerta hoon, yaani seedhay saadhay tareekay se kerta hoon.

A25. Jovial, perceptive, Optimistic

A26. Apni imagination mein ideal banana natural he, lekin sarasar bewakoofi bhi he, ager kisi mein aik baat achi he to aap ke mazaaj ke khilaaf bhi kai baatein hoon gi.

A27. Buchay wo phool hein jo ghar ke baagon ko mehkaatay hein, un ke bagair baag baag to hotay hein lekin un mein phoolon ki khushbu nahi hoti

A28. Dil-o-Dimaag ki jang mein mein pehle analysis karon ga, aur phir koi decision leta hoon, ager doono ka palra barabar ho to dil ki baat maanta hoon.

A29. Yahi ke subhu ho gai aur office janay ke liye tayaar hona he.

A30. Usually sunday ko hi ghar ke kaam kerne ka mooka milta he, to sabzi goosht wagaira ki khareedaari mein hi interest hota he, aur ghar ki females ke saath shoping kerne mein kooft mehsoos hoti he.

A31. Aik aadat paida ho gai he gaib dimaagi waali, akser aisa hota he ke jub mein sports, documentary dekh raha hon ya computer ke samne betha hoon aur muj se koi baat karay to mein jawaab nahi deta, is ke ilawa mein sports channel dekhta hoon, geographic channel, discovery, ya reality TV, to usually doost akhbaab ya ghar walay tang hotay hein.

A32. Hmmm...islam aur us ki taaleemat ko to mein achi tarah samajta hoon, lekin namaz regularly nahi perh pata, quran nahi perhta...ghar walay kehte rehte hein, kuch din pabandi ker ke choor deta hoon, lekin islam ke moozoaat per books perhta hoon, aur study kerta rehta hoon.

A33. Be-Hissi aik aisi cheez he jo aaj kul bohat common ho gai he hamaray moaashray mein, mein chahta hoon ke loog aik doosray ko samjei, ehsaas karein, apni responsibilities ko samjein, Pakistan mein kanoon aur moaashra "jis ki laathi us ki bains" ke tehat chal raha he, this system needs to be changed.

A34. Mukhalif sanaf mein mujay aik cheez zyada impress kerti he, maasomiyat (innocence) khawa wo chehray ki ho ya us ki baaton mein.

A35. Kisi ko manana mere liye kabi mushkil nahi raha, apni ghalti ko jaldi realize ker leta hoon aur excuse kene mein mujay waqt bilkul nahi kerta, aur baaz aukaat ager meri ghalti na bhi ho to bhi apni ghalti maan ke compromise kerta hoon...mujay kisi ko sorry kerne mein kabi koi sharam mehsoos nahi hui.

A36. Shadi aik mazhabi fareeza he, jo her aik ko pura kerna he, shadi ager love aur arranged doono ho to acha he.

A37. Muhabat pehli nazar mein ho sakti he (in rare cases), but usually it takes time.

A38. Aik doost tha jis se mein ne kabi kuch nahi tha chupaya, us ki death ke baad, mein apne dil ki baatein kum hi share kerta hoon kisi se. Because, her doost trustworthy nahi hota, it is a cruel fact.

A39. Kabi mein ne yeh nahi chaha ke meri falaan se doosti ho jaye, doostiyaan to kaafi hein, aur mere khyaal mein doosti kerna koi mushkil kaam nahi he, haan doosti nibhaana zaaoor mushkil he.

A40. Doosti to ammoman muhabat mein badalti dekhi gai he, Aur muhabat bhi doosti mein badal sakti he (in some cases) ager aap shaadi shuda ho to aur apni wife se muhabat kerte ho to us ke saath aap doosti bhi ker saktay ho, similarly maan baap ke saath bhi doosti ho sakti he aur muhabat to pehle se hi mooood hoti he.

A41. Haan mujay bhi koi mila aur bichar bhi gaya aur un lamhoon ki khushbu abi tak saanson mein moojood he aur kabi jaye gi bhi nahi. us ke janay ke baad jo hala paida hua he wo kabi pur nahi ho sakay ga, wo meri zindgi ka hisa bun gaya tha....mein apne marhoom doost Shahid ki baat ker raha hoon. Wo chala to gaya lekin mere dil mein hameesha zinda rahay ga. Mein usay aaj bhi hasta hua, chehakta hua dekh sakta hoon.

A42. Alone&Alone to pehle se hi friend tha, us ke baad Marasi aur Aik Lamha se doosti hui. Marasi dil ka saaf he, jo dil mein hota he keh deta he, Aik Lamha aik nice insaan he, he got a good sense of humour, baat se baat paida kerne ka fun he us mein.

A43. Pasandeeda khushbu to as such koi special nahi he, poison aur one man show pasand he, but usually mein body spray prefer kerta hoon, ager perfume use karon to bohat thoori mikdaaar mein.

A44. Mein ne apne Walid Sahib (MGBHS) se bohat kuch seekha, is duniya mein mere ideal wohi thay, he was jack of all trade. Achay insaan thay, achay baap thay, well educated thay, Baat kerne ka fun tha un mein, unhoon ne apni life apni class ke buchon ko tuition perhanay aur painting kerne se start ki, apne balbooay pe taaleem haasil ki aur her baar scholarship holder rahay. Unhoon ne perhai ke saath saath cinema mein posters design kiye, rickshaw chalaya, tailor banay, Factory mein private jobs kein, tuitions perhaein, House Building Finance Corporation ke manager banay, England gaye, apna business start kiya, apna naam paida kiya, aur apni zindgi gareeb loogon per wakaf ker di. He was a genius and struggling person...He is my ideal personality.

A45. Apni had tak to mein internet friendship pe believe kerta hoon, mujay pata hota he ke jo samne chat ker raha he wo larka he ya larki, aur us ki sooch kesi he, wo doosti ke kabil he bhi ya nahi. Internet friendship totally fake nahi he.

A46. Ho sakti he g, kyoon nahi ho sakti, wo muhabat doosray ke nazreyaat aur doosray ki sooch se hoti he.

A47. yeh question zara mushkil he g

A48. in sawaalon ke jawaab aik netcafe mein beth ker de raha hon subhu ka nashta bhi nahi kiya, aur bhook lag rahi he...lolz...acha lug raha he.

A49. Apni ammi ki nasihat bohat yaad rehti he jub tez bike chalata hoon, wo mujay hameesha nasihat kerti hein ke bike aahista chalane ko.

A50. Hallagulla ke saathiyoon ko yeh kahon ga ke yahan hallagulla ke saath saath aik doosray ko samajne ki kooshish karo, achay topics post karo, boongiyaan zaroor maaro, lekin boongiyaan hi na maartay raho, aap sub ko meri taraf se dilli Eid Mubarik ho....duaa he ke aap sub khush-o-khram raho aur is tarah Hallagulla aur real life enjoy kerte raho. Aur khuda ko kabi na bulaao. Wasalaam Aamir Javaid

Urdu Poetry Forum

Munda Sialkoti

Munda Sialkoti