Urdu Poetry Forum

ay ishq kahee.n ley chal, is paap ki basti sey
nafrat gaah_e alam sey, lanat gah_e hasti sey
in nafs parastoo.n sey, is nafs parasti sey

door.. aur kahee.n ley chal
aay ishq kahee.n ley chal

hum prem pujaari hain. tu prem kanhayya hay!
tu prem kanhayya hay. ye prem ki nayya hay
ye prem ki nayya hay, tu is ka khiwayya hay

kuch fik'r nahi ley chal
ay ishq kehee.n ley chal

be-rehm zamaney ko abb chor rahey hain hum
be-dard azizioo.n sey munh mor rahey hain hum
jo aas k thi wo bhi ab tor rahey hain hum

bas taab nahi ley chal
ay ishq kahee.n ley chal

ye jab'r-kadah, aazad afkaar ka dushman hay
armanoo.n ka qatil hay umeedoo.n ka rahzan hay
jazbaat ka maqtal hay, jazbaat ka mad-fun hay

chal yaa.n sey kahee.n ley chal
ay ishq kahee.n ley chal

aapas main chal aur dhokey sansaar ki reetai.n hain
is paap ki nagri main ujri si pretain hain
haa.n niyaaey ki haarain hain, an-niyaay ki jeetain hain

sukh chain nahi, ley chal
ay ishq kahee.n ley chal

ye dard bhari duniya basti hay gunahoo.n ki
dill chaak umeedoo.n ki, saffak nigahoo.n ki
zulmoo.n ki, jafaoo.n ki, aahoo.n ki, karahoo.n ki

hain ghum sey hazee.n ley chal
ay ishq kahee.n ley chal

aankhoo.n main samaai hay, ik khwaab numa duniya
taro.n ki tarha roshan, mehtaab numa duniya
jannat ki tarha rangee.n, shadaab numa duniya

Lilah wahee.n ley chal
ay ishq kahee.n ley chal

ay ishq humain ley chal ik noor ki vaadi main
ik khwaab ki duniya main, ik toor ki vaadi main
khoroo.n k khayalat_e masroor ki vaadi main

ta-khuld_e baree.n ley chal
ay ishq kahee.n ley chal

maghrib ki hawaoo.n sey aawaz si aati hay
aur hum ko samandar k us paar bulaati hay
shaid koi tanhaai ka daiss batati hay

chal us k qaree.n ley chal
ay ishq kahee.n ley chal

ik aisi fiza jis tak ghum ki na rasaai ho
duniya ki hawa jis main sadiyoo.n sey na aai ho
aay ishq jaha.n tu ho aur teri khudaai ho

aay ishq wahee.n ley chal
aay ishq kahee.n ley chal


ik aisi jaga jis main insaan na bastey hoon
ye mak'r_o jafa paisha haiwaan na bastey hoon
insaa.n ki qaba main ye shaitaan, na bastey hoon

to khouf nahi ley chal
aay ishq kahee.n ley chal

in chaand sitaroo.n k bikhrey howe shehroo.n main
in noor ki kirnoo.n main tehri hoi lehroo.n main
thehri hoi lehroo.n main, soii hoi nehroo.n main

ay Hiz'r_e hasee.n ley chal
ay ishq kahee.n ley chal

ik aisi bahisht aain vaadi main pohanch jain
jis main kabhi duniya k ghum dill ko na tarpaa'ain
aur jis ki baharoo.n main jeeney k mazey aain

lay chal, tu wahee.m ley chal
aay ishq kahee.n ley chal