Chalaa jaataa thaa aik nanhaa sa keerhaa raat kaaghaz par
Binaa qasd-e-zarar usko hataayaa maine ungalee se
Magar vah aisa naazuk thaa ki fauran pis gayaa bilkul
Nihaayat hee khafeef yak daagh kaagaz par rahaa uskaa
Abhee vo raushanee mein shamm'a kee kaagaz pa firtaa thaa
Abhee yoon mit gayaa vo jumbish-e angusht-e-insaa'n se
Liyaa mere siva ''notice'' hee kisne uskaa duniyaa mein
Na thee fitrat ko kyaa kaaree-garee uske banaane mein
Nasab-naamaa bhee uskaa aalam-e-zarraat mein hogaa
Yahee thee uskee hastee aour isee mein uskee mastee thee
Na maatam karne vaalaa hai na ''life' likhane vaalaa hai
Vo dhabbaa dars-e-ibrat de rahaa hai mujh ko ai ''akbar''
Ma'aaz allah kyaa samjhaa hai toone apnee waq'at ko
Tujhe bhee safah'ai roo-e-zamee'n se aik din aakhir
Mitaa degee koee tahreek-e-fitrat hukm-e-baaree se
Ajab hairat se main hoon dekhataa iss daag-e- kaagaz ko
Meree nazaron mein to naqshaa ye hai duniyaa-e-faanee ka
Sareehan zism thaa aik jaan thee ahsaas thee usmein
Au ab dhabbaa sa hai kya jaane koee kaisaa dhabbaa hai
Ajab kya hai koee samjhe ''pencil'' kee lakeer isko
Ma'aaz allah ma'aaz allah sannaate ka aalam hai
Bahut jee chaahtaa hai ro'oon iss hastee ke dhabbe par
Ye hain barsaat ke din teesaree bhaadon guzaratee hai
Main apnaa gham ghalat kartaa hoon kuchh ash'aar likhane se
Akbar Allahbadi